Niireke moosoma oratteene irevista sotheene Owehaweha sa mwaakha ola? Akhala wira ti siiso, nwehe akhala wira munniwerya waakhula makoho anittharelana:

Naathokoreryeke sai maKristau oothanliwa?

Hiyo ninnivaha efaita waamini waya, masi khannaattittimiha mootepana. Hiyo khahiyo ‘ninwepesa atthu wira niphwanye sorera’. (Yuda 16) Nave khannaakoha itthu voohimya sa othanliwa waya.—w20.01, epax. 29.

Exeeni enookupalihani wira Yehova onnoowehani?

Biibiliya onnooniherya wira Yehova aahoowehani nlelo muhinatthi oyariwa. Nave onnaakhula mavekelo anyu. Ohiya-vo Yehova onnisuwela murima anyu, muupuwelo anyu ni miteko sanyu sinnimuhakalaliha wala omuriipiha murima. (1 Wah. 28:9; Mir. 27:11) Yehova ohoothanlani nyuwo.—w20.02, epax. 12.

Okathi xeeni onireerela aya olavula wala omaala?

Ninnihakalala vanceene waaleela atthu akina voohimya sa Yehova. Ninnilavula vaavo nninweha ahu mutthu opakaka itthu soohiloka. Nave axitokweene anilavula vaavo anivaha aya miruku vatthuneyaka. Masi hiyo khaninlavula itthu sotheene sa moota muteko woolaleerya onivariwa waya ilapo muteko ahu onikhoottihiwa aya ni khaninlavula myaha sa esiiri.—w20.03, ipax. 20-21.

Ovirikana xeeni okhanle eriyari ya nasope onilavuliwa ekapiitulu 2 ya Yoweli ni nasope onilavuliwa ekapiitulu 9 ya Wisupulula?

Yoweli 2:20–3:2 onihimya wira Yehova aarowa omoomolela ottaiwene nasope ni ammutthuvela mwaha wa muteko ovanre awe. Nuumala-vo, Muluku aarowa omwarexa munepa awe wowaarya. Nasope a Wisupulula 9:1-11 anitaphulela maKristau oothanliwa yaawo anilaleya olumwenku ola wootakhala muhupi wa ophukela wa Yehova, nto eyo ennaanyoonya atthu otheene anikhaliherya olumwenku ola.—w20.04, ipax. 3-6.

Tani ori mwene a onorte olelo-va?

Rússia ni ale animukhaliherya. Awo annaalupattha atthu a Muluku, okhoottihaka muteko ahu woolaleerya ni onnooniherya wira onnaanyokha Anamoona a Yehova. Mwene a onorte onniwana ni mwene a osul.—w20.05, epax. 13.

Niireke mikhalelo siri aGalasia 5:22, 23, paahi siniirela mpantta yoowiima ya munepa wowaarya wa Muluku?

Nnaari. Munepa wowaarya wa Muluku onninikhaliherya okhalana mikhalelo sikina sooloka ntoko exariya. (aÉf. 5:8, 9)—w20.06, epax. 17.

Muxankiho xeeni onikhumelela mwaha wa ohela ifootu ni itthu sikina redes sociais?

Itthu munihela anyu redes sociais pooti owiiriha atthu wuupuwelaka wira nyuwo khamuhiyo mutthu oowiiyeviha ni muniphavela ohimmwa.—w20.07, ipax. 6-7.

Itthu xeeni maKristau akhanle aya oowiixutta ni atothi a ihopa ooloka?

Atothi a ihopa annitotha mapuro anoona aya wira anoovara ihopa. Awo annirumeela ikaruma sooloka. Nave annilipa murima wira awanane mixankiho sinikhumelela. Hiyo nihaana opaka etthu emosaru naalaleeryaka.—w20.09, epax. 5.

Mwa inamuna xeeni nikhanle ahu oowaakhaliherya ale nnaasomiha ahu Biibiliya wuncererya omphenta waya Yehova?

Nihaana waatumererya omusoma Biibiliya khula nihiku ni wuupuwelela ele anisoma aya. Nave nihaana owiixuttiha ovekela.—w20.11, epax. 4.

Moolumo oowi “anokhalihiwa-tho akumi mwa Kristu” anaahimya aani?

Murummwa Paulo khaaphavela waahimya apinaatamu otheene anrowa ohihimuxiwa. Masi aahimya maKristau oothanliwa anihimmwa okhala ‘oreriwa mwa Yesu Kristu’. (1 aKor. 1:2; 15:18)—w20.12, ipax. 5-6.

MaKristau oothanliwa anrowa opaka exeeni wiirimu okathi anrowa aya otatuxiwa “ntoko otthukula maitho ni waphila”?—1 aKor. 15:51-53.

Amuttharaka Yesu, maKristau oothanliwa anrowa waakukhula atthu a maloko otheene ni ekopo ya yuuma. (Wis. 2:26, 27)—w20.12, ipax. 12-13.