Yehova aahaaleela aisarayeli wira yaahaana okhala oowaarya. Nto wira aakhaliherye opaka eyo, Yehova aahaavaha malakiheryo ala anihimmya wira: “Muhilavulé sowotha, nwotheryaka amus’inyu: muhimukumiheryé mukhw’inyu mulattu w’okhwa. Miyo k’Apwiya [Yehova]”.—Onam. 19:2, 16.

Moolumo oowi “muhimukumiheryé mukhw’inyu mulattu”, anikhuma nttaava na eHeeberi. Masi moolumo ala amphavela ohimya exeeni? Eliivuru emosa ya eyuda enilavula sa Onamukuttho ehimmye so: “Mpantta ola wa eversiikulu ela, ti woovila wiiwexexa, mwaha woowi vannivila osuwela ele moolumo ala a eHeeberi anitaphulela aya. Otaphuleliwa wa moolumo ala pooti ohimya ‘oheemela ohoolo, omwaattamela mutthu aahiiso etthu’”.

Asomi akina anoona wira moolumo awo, annivarihana ni eversiikulu 15 yeeyo enihimya wira: “Mwaphukaka milattu, mphukeke n’ixariya: muhimuthanlé mutthu masikhini, walá muhimoveké mulipa-òwerya: mphukeke n’ixariya pahi”. (Onam. 19:15) Akhala wira ti yeeyo anitaphulela aya, yooruma eri eversiikulu 16 enihimya wira muhimukumiherye mulattu mukhwiinyu, anitaphulela ohimuthokorerya moohixariya mutthu mukina otripunaale, naamweettaka nakoso, aahiiso vatthokoni. Nto mwisarayeli aanikhoottiheriwa omwaaaproveitari mutthu mukina wira iiphwanyihe mireerelo. Ekeekhai wira hiyo khanikhanle oopaka itthu iyo soohiloka, masi wookhala otthokiheriwa wooloka onnikhaliherya wiiwexexa moolumo ari eversiikulu 16.

Nkahaya nwehe moolumo ari wanipacerya wa eversiikulu 16. Muluku aahihimya wira khivaareerela olavula itthu sowoothiwa. Ekeekhai wira vaavo mutthu oniwaapa awe atthu akina, eyo pooti okumiherya mixankiho. Masi vaavo mutthu onimootherya awe mutthu, itthu pooti otepa oxankiha. (Mir. 10:19; Mus. 10:12-14; 1 Tim. 5:11-15; Yak. 3:6) Vaavo mutthu onimwaapa awe mukhwaawe, wala onilavula awe itthu sowoothiwa, owo onnihonona mweettelo wooloka wa mutthu owo. Mutthu oowaapa, pooti olavula itthu sowoothiwa voohimya sa mutthu mukina hata osuwelaka wira itthu iyo pooti omwiiriha mutthu onimootherya awe wiiviwa. Ntakiheryo nimosa ti na alopwana anli yaamoothenrye Nabothi. Alopwana ale yaahimootherya Nabothi wira aahilavula itthu soohiloka, nto eyo yaahiiriha Nabothi ovonyakasiwa maluku mpakha wiiviwa. (1 Mam. 21:8-13) Ntoko onihimya awe Onamukuttho 19:16, mutthu onimootherya mukhwaawe onikhala ntoko wira onimukumiherya mulattu onrowa omwiiriha wiiviwa. Ohiya-vo, akhala wira mutthu onnimootherya mutthu mukina, eyo enooniherya wira onnimunyokha mutthu owo.

Mutthu pooti omulavula voohiloka mutthu mukina mwaha wa omunyokha. 1 Yohani 3:15, onihimya so: “Mutthu onimunyokha munnawe, nawiive, nave moosuwela wira khuuvo nawiive onrowa waakhela okumi woohimala”. Nto ti voohakalaliha woona wira nuumala Yehova ohimya wira muhimukumiherye mukhwiinyu mulattu, Yehova ahincererya oriki: “Muhimukhalelé nrima [aahiiso omunyokha] mmus’inyu”.—Onam. 19:17.

Tthiri vannooneya oratteene wira yooruma eri Onamukuttho 19:16, ennaalopola makristau otheene. Nto hiyo nihaana wiimananiha okhootta miyupuwelelo sootakhala saarowa oniiriha omootherya mutthu mukina. Akhala wira ‘ninnimukumiherya mukhwihu mulattu’, ninnooniherya wira ninnimunyokha mutthu owo. Nto otheene ahu nihaana okhootta opaka eyo.—Math. 12:36, 37.