1-2. (a) Etthu xeeni Muluku aarumme awe arummwa araru? Niireke yaahiiwelela? (b) Mwaha ola, ninrowa othokorerya exeeni?

MOOHIPISA nuumala paasikha a 32 nuumala Kristu orwa, murummwa Pedru, Yakobo ni Yohani yaahiweha etthu yootikiniha. Mwaako woorekama, woonasa wene mwaako Hermoni, Yesu aahithatuwa ohoolo waya. Biibiliya onihimya so: “Owiitho wawe waanaarya ntoko nsuwa, nave malaya awe a ota yaanaarya ntoko muthuko”. (Math. 17:1-4) Ehalaka omala yowoonihiwa ele, arummwa ale yaahimwiiwa Muluku ohimyaka wira: “Ola Mwanaka, kinimphentexa aka, onikihakalaliha vanceene. Mmwiiweleleke yoowo”. (Math. 17:5) Okumi aya wotheene, arummwa araru yaahipaka ele Muluku aarumme awe. Awo yaahooniherya wira yaanimwiiwelela Yesu. Hiyo nimphavela otthara ntakiheryo naya.

² Mwaha ovinre, nooweha wira owiriyana nsu na Yesu onihela muhina ohiya opaka itthu sikina. Mwaha ola, ninrowa oweha itthu piili, Yesu onirumme awe opaka.

3. Moovarihana ni Matheyo 7:13, 14, nihaana opaka exeeni?

³ Mmusome Matheyo 7:13, 14. Moone wira Yesu aahilavula mikhora miili soovirikana. Khula mukhora oniroiha estaraata yoovirikana, estaraata “yuulupale” ni estaraata “yaamukhaani”. Masi khekhanle estaraata ya neeraru, maana siri istaraata piili paahi. Nto khula mmosa a hiyo, ohaana othanla estaraata onrowa awe ovira. Eyo yoothanla yuulupale ninreerela ahu opaka. Maana yoothanla ahu enooniiriha ophwanya okumi woohimala wala ohiphwanya.

4. Mutthokiherye makhalelo a estaraata “yuulupale”.

 ⁴ Nihikhala-khale niliyalaka wira istaraata soopiili ti soovirikana. Atthu anceene annithanla ovira estaraata “yuulupale”, mwaha woowi ti yookhweya ovira. Ti vooriipiha murima woona wira atthu anceene annithipelela ovira estaraata yuulupale apakaka itthu atthu anceene anipaka aya. Awo khanisuwela wira estaraata eyo ti ya Satana ni eniroiha wookhwaani.—1 aKor. 6:9, 10; 1 Yoh. 5:19.

5. Marukunuxo xeeni atthu anceene apanke aya wira aphwanye ephiro “yaamukhaani” ni weetta yeeyo?

⁵ Estaraata “yuulupale” yoovirikana vanceene ni estaraata “yaamukhaani” ni Yesu aahimmye wira atthu vakhaani paahi tanivira estaraata yaamukhaani. Mwaha wa xeeni? Mwaha wa maprofeta oowootha. Eyo ti etthu Yesu aaloponle awe awiixutti awe eliivuru ya Matheyo 7:15. Atthu akina anihimya wira sookhala itiini imilyau sinceene soovirikana ni sotheene iyo sinihimya wira sinniixuttiha ekeekhai. Nto mwaha waivaavo, atthu anceene aahiya waavya etiini yekeekhai ni khaniiwexexa itthu itiini iyo siniixuttiha aya. Masi vanniweryaneya ophwanya estaraata eniphwanyiha okumi woohimala. Yesu aahimmye so: “Nyuwo mwaahihiye otthara moolumo aka, munookhala tthiri awiixutti aka, nave munoosuwela ekeekhai, nto ekeekhai eyo enimootaphulani”. (Yoh. 8:31, 32) Akhala wira nyuwo moophwanya ephiro yekeekhai, muhooniherya wira khamunaatthara atthu anceene. Nto vannireerela woottottopelani. Maana nyuwo moomusoma vanceene Biibiliya, muhiixutta ele Muluku oniphavela awe wira mpakeke ni moopacerya owiriyana nsu na Yesu. Mwa ntakiheryo, muhiixutta wira Yehova oniphavela wira nyuwo mukhootteke sowiixuttiha sa etiini yoowootha ni muhiye wiirela mpantta ifesta sinikhuma etiini yoowootha. Woonasa wene, vaahoovilani ohiya itthu soohiloka ni opaka ele Yehova oniphavela awe. (Math. 10:34-36) Nave pooti wira khivookhweelaleni opaka marukunuxo mookumini mwanyu. Hata vari siiso, nyuwo moolakela omphenta Tiithi ihu a wiirimu Yehova ni omuhakalaliha. Mukupaliki ni murima wotheene wira Yehova onnitthapa mwaha wa yoothanla anyu ni marukunuxo mpanke anyu!—Mir. 27:11.

6. Moovarihana ni Esalimo 119:9, 10, 45, 133, etthu xeeni enrowa onikhaliherya ohihiya weetta estaraata yaamukhaani?

⁶ Etthu xeeni enrowa onikhaliherya ohihiya weetta estaraata yaamukhaani? Nkahaya muupuwele ela: Istaraata sikina saamukhaani ni sinikhala mapuro oorakamela osulu ntoko mmiyaakoni. Nto istaraata iyo sinnitekeleliwa iparera wira sakhapeleleke mamotorista. Sahaakhanle iparera iyo, pooti wira mamotorista awo yaamukhuma mustaraatani ni yaamumpaka asitenti. Tthiri khuuvo mutthu okhanle oohimya wira iparera iyo khasinivara muteko aya wala sinnaakhulumula mamotorista awo! Mwa enamuna emosaru, malamulo a xariya a Yehova ari mBiibiliyani ari ntoko iparera sinikhapelela estaraata. Awo anninikhapelela ni anninikhaliherya ohihiya weetta estaraata yaamukhaani.—Musome Esalimo 119:9, 10, 45, 133.

7. Xeeni nyuwo amiravo vahinreerela aya wuupuwela wira estaraata yaamukhaani ennookhoottiheryani opuha okumi?

⁷ Akhala wira mwa mmiravo, woonasa wene okathi mukina munuupuwela wira malamulo a Yehova toovila ni annookhoottiheryani opaka ele muniphavela anyu. Akhala wira ti siiso, muupuweleke wira Satana oniphavela wira mukhalane muupuwelo owo. Owo oniphavela wira muupuweleke wira ti vooloka weetta estaraata yuulupale, yeeyo atthu anceene a olumwenku ola aniphavela aya wira mweetteke. Satana oniphavela wira muupuweleke wira khamunipuha okumi anyu, nto onnaaruma ale munisomana anyu oxikola ni interneti wira mukhalane muupuwelo  owo woohiloka. Owo oniphavela wira muupuweleke wira omurumeela Yehova onnihonona okumi anyu. * Masi muhiliyale ela: Satana khoniphavela wira musuwele mixankiho ephiro eyo yuulupale enrowa aya woophwanyihani. Masi Yehova oniphavela etthu ekina yoovirikana ni ele Satana oniphavela awe. Maana Yehova oniphavela wira nweheke okumi woohakalaliha munrowa anyu ophwanya akhala wira khamunrowa ohiya weetta estaraata eniphwanyiha okumi.—Esal. 37:29; Yes. 35:5, 6; 65:21-23.

8. Yowiiraneya ya Olaf, eniwiixuttiha exeeni amiravo?

⁸ Nkahaya nwehe etthu yaamwiiranenle mmiravo oniihaniwa Olaf. * Anaxikola akhwaawe yanimukhanyererya okhalana mweettelo woohiloka, maana aximwali akina yaanimukhanyererya wira orupane. Okathi aalenle awe wira yena Namoona a Yehova ni onneettela ele Biibiliya oniixuttiha  awe, aximwali akina a esaala awe yuupuwela wira aamutthweela. Aximwali ale yaahipaka sotheene yaawerya aya wira arupane munna ole. Olaf khaamorenle muraakho wa aximwali ale. Masi waahikhala muxankiho mukina. Owo onihimya so: “Maprusoore aka yaanikitumererya orowa osoma wuniversidade. Awo yaahimya wira kaahaana ophwanya muteko wira meelo kikhale mutthu”. Etthu xeeni yaamukhalihenrye Olaf oxintta mixankiho iyo sotheene? Owo onihimya so: “Miyo kaaniimananiha okhala apatthani a anna ni arokora a mmulokoni, awo yaari ntoko amusi aka. Nave kaaniimananiha omusoma vanceene Biibiliya, nto vaavo kaatepa aka omusoma kaanitepa okupali ni murima wotheene wira koophwanya ekeekhai. Nto eyo yaahikikhaliherya ohihiya omurumeela Yehova”.

9. Etthu xeeni ninreerela ahu opaka wira nihihiye weetta estaraata yaamukhaani?

⁹ Satana oniphavela wira nyuwo muhiye weetta estaraata yaamukhaani eniphwanyiha okumi. Owo oniphavela wira nyuwo mweetteke hoothe ni atthu a olumwenku ola, yaawo aneetta estaraata yuulupale yeeyo ‘eniroiha wookhwaani’. (Math. 7:13) Masi hiyo noolakela ohihiya wiiwa nsu na Yesu ni weetta estaraata yaamukhaani, maana opaka eyo enninikhapelela. Vano nrowe niwehe etthu ekina Yesu onirumme awe wira nipakeke.

10. Moovarihana ni Matheyo 5:23, 24, etthu xeeni Yesu onirumme awe opaka?

¹⁰ Mmusome Matheyo 5:23, 24. Yoolepa ela, Yesu aahihimya etthu ya efaita yinceene ayuda yaareerela ya opaka vaavo yaamukokhorela aya Muluku. Nkahaya mmuupuwele muyuda ori ene mutemplo ohalaka vakhaani onvahererya enama awe mukhulupale aanamukuttho wira ovahe mukuttho. Masi onuupuwela wira ookhala mutthu ohikhanle saana wala orina awe mulattu ni yoowo. Nto owo aahaana ohiya yoovaha awe ni orowa omwaavya munnawe. Mwaha wa xeeni? Mwaha woowi, eyo yaahikhalana efaita yinceene ovikana onvaha mukuttho Yehova. Yesu aahihimya eyo moowiiwanyeya oriki: “Mwapacerye toko waataana ni munninyu”.

11. Etthu xeeni Yakobe aapanke awe wira okhalihe murettele ni muulupale awe?

¹¹ Etthu yaamwiiranenle Yakobe enniniixuttiha etthu yuulupale voohimya sa okhaliha murettele. Nuumala Yakobe okhala iyaakha 20 elapo ya ottaiwene, Yehova aahiruma nlaikha omuhimeerya Yakobe wira aahaana otthikela elapo awe. (Maph. 31:11, 13, 38) Masi waahikhala muxankiho. Muulupale awe iihaniwa Esawu aaphavela omwiiva. (Maph. 27:41) Tivonto, Yakobe aahitthyawa elapo awe. Nto Yakobe “ahòva vanjene n’uxanka” uupuwelaka wira nlelo muulupale awe aaniphavela omwiiva. (Maph. 32:8) Masi, Yakobe aawenrye sai okhaliha murettele ni muulupale awe? Etthu yoopacerya aapanke awe waari onvekela Yehova ni murima awe wotheene omuleelaka muxankiho ole. Moottharelana, owo aahinvaha mireerelo sawe Esawu. (Maph. 32:10-16) Nuumala omphwanya Esawu, owo aahiimananiha omuttittimiha vanceene. Maana owo aahikokhora ohiya ekwaha emosa, nnakhala ikwaha piili, masi ikwaha 7. Yakobe aahiwerya okhaliha murettele ni muulupale awe mwaha woowi aahiiyeviha ni aahimuttittimiha.—Maph. 33:3, 4.

12. Yowiiraneya ya Yakobe, enniixuttiha exeeni?

¹² Etthu Yakobe aapanke awe wira okhalihe murettele ni muulupale awe enooniixuttiha etthu yuulupale. Maana Yakobe aahiiyeviha ni aahinvekela Yehova wira omukhaliherye. Nuumala-vo, Yakobe aahipaka mpantta awe, maana aahiimananiha opaka sotheene aawerya awe nuumala omphwanya muulupale awe. Nuumala Yakobe omphwanya Esawu, owo khiimananinhe omooniherya Esawu wira aahivonya. Ohiya-vo, Yakobe aaphavela okhaliha murettele ni muulupale awe. Eyo ti yaari yoolakela yuulupale ya Yakobe. Ninrowa otthara sai ntakiheryo na Yakobe?

13-14. Nihaana opaka exeeni akhala wira noopaka etthu enwereyale munna wala murokora?

¹³ Naaphavelaka ohihiya weetta estaraata eniphwanyiha okumi, nihaana okhaliha murettele ni anna ni arokora. (aRom. 12:18) Ankhi akhala wira noopaka etthu enwereyale munna wala murokora, nihaana opaka exeeni? Nihaana otthara ntakiheryo na Yakobe ninvekelaka Yehova. Nto okathi owo, nihaana onvekela Yehova wira onikhaliherye okhaliha murettele ni munna wala murokora owo.

¹⁴ Nave nihaana waavya okathi wira nuupuwelele makoho ala: ‘Kiireke kinniphavela ohiya wiixinnuwiha waka ni opacerya wiiyeviha wira kikhalihe murettele ni munna owo? Yehova ni Yesu anrowa woonela sai nuumala osuwela wira miyo kinniphavela okhaliha murettele ni munna wala murokora ola?’ Wiipakela makoho ntoko awo, anoonikhaliherya owiriyana nsu na Yesu, wiiyeviha ni omwaavya munna wala murokora owo wira nikhalihe murettele. Akhala wira nnoopaka eyo, nnoowerya otthara ntakiheryo na Yakobe.

15. Opaka ele onihimya awe aEefeso 4:2, 3, enrowa onikhaliherya sai okhaliha murettele ni munna wala murokora?

¹⁵ Niireke munnuupuwela etthu yaarowa okhumelela vaakhanle wira Yakobe aahiixinnuwiha okathi aakumanne awe ni muulupale awe iihaniwa Esawu? Woonasa wene, muxankiho ole waamutepa. Nto okathi ninrowa ahu okhaliha murettele ni munna wala murokora, nihaana wiiyeviha. (Mmusome aEefeso 4:2, 3.) Eliivuru ya Miruku 18:19, enihimya so: “Munna òvehiwa t’òlipa ovikana mwalá: ovanyihana n’uwo ti wolipa ntoko mikhora sa eyuma”. Moowiiyeviha, onvekela muswaammaha munna nimpakenle ahu etthu enwereyale, pooti onikhaliherya ohula mikhora iyo “sa eyuma”.

16. Etthu xeeni ninreerela ahu wuupuwela okathi ninrowa ahu okhaliha murettele ni munna wala murokora, ni nthowa xeeni?

¹⁶ Vaavo ninrowa ahu okhaliha murettele ni munna wala murokora, nihaana wuupuwela oratteene etthu ninrowa ahu ohimya ni moota ninrowa ahu olavula. Nuumala-vo, noona wira nihiilokiherya nihaana omwaavya munna wala murokora nimpakenle ahu etthu enwereyale ni opaka sotheene ninwerya ahu wira nitthikele okhala apatthani. Woonasa wene, wanipacerya owo pooti ohimya itthu soohiloka ni sihinrowa onisivela. Musuweleke wira okathi owo, vannikhweya onanariwa ni wuupuwela wira ooniveeha. Opaka eyo khenrowa okhaliherya etthu. Nto muhikhala-khale muliyalaka ela: Okhaliha murettele ni munna wala murokora wookhalana efaita yinceene  ovikana wooniherya tani ovonnye ni tani orina erasau.—1 aKor. 6:7.

17. Yowiiraneya ya Gilbert, ewiixuttinheni exeeni?

¹⁷ Munna oniihaniwa Gilbert aahaana wiimananiha vanceene wira okhalihe murettele. Owo onihimya so: “Miyo nkaarina waataana wooloka ni mwanaka mwaamuthiyana. Saahivira iyaakha sinivikana piili kiimananihaka ovaanela ni mwanaka moomaaleleya wira kikhalihe murettele”. Etthu xeeni ekina aapanke awe? Munna Gilbert onihimya so: “Okathi wotheene kaarowa aka ovaanela ni mwanaka, kaapacerya onvekela Yehova. Miyo kaaniimananiha olokiherya muupuwelo aka akhala wira aamulavula itthu soohiloka. Kaanisuwela wira kaahaana wiimananiha omulevelela. Kihiixutta wira etthu ya faita khahiyo waari omooniherya wira kaahikhalana erasau, masi etthu kaaphavela aka vanceene waari okhaliha murettele”. Gilbert onnihimya etthu ekhumelenle mwaha wa wiimananiha wawe. Owo onihimya so: “Olelo-va, miyo kookhalana murettele, mwaha woowi kihiiraana ni emusi aka yotheene”.

18-19. Akhala wira noopaka etthu enwereyale munna wala murokora, nihaana opaka exeeni ni nthowa xeeni?

¹⁸ Akhala wira noopaka etthu enwereyale munna wala murokora, nihaana opaka exeeni? Nihaana weettela malakiheryo a Yesu ni okhaliha murettele. Nave nihaana onvekela Yehova nimuleelaka mwaha owo ni okupali wira onoonikhaliherya orumeelaka munepa awe woowaarya wira nikhalihe murettele. Akhala wira nnoopaka eyo, nnoohakalalaka ni nnimooniherya wira ninninwiriyana nsu na Yesu.—Math. 5:9.

¹⁹ Ninnimuxukhurela vanceene Yehova, mwaha woowi omurumaka Yesu, yoowo ori “muru wa muloko” onninivaha malakiheryo ooloka. (aEef. 5:23) Nimutakihaka murummwa Pedru, Yakobo ni Yohani nihaana wiimananiha ‘omwiiwelela’ Kristu. (Math. 17:5) Mwaha ola, nooweha moota nikhanle ahu ookhaliha murettele ni anna ni arokora. Akhala wira nnoopaka eyo ni ohihiya weetta estaraata yaamukhaani yeeyo eniphwanyiha okumi, nnoohakalalaka niinaano-va ni muhoolo nnoophwanya ohakalala ohinimala.