1. Etthu xeeni yaamwiirinhe Yesu waalikanyiha atthareli awe ni ipwittipwitthi?

YESU aahilikanyiha waataana orina awe ni atthareli awe ni waataana makampusi onikhalana awe ni ipwittipwitthi sawe. (Yoh. 10:14) Nlikanyiho nlo ti nookhalela. Maana ipwittipwitthi sinnimusuwela oratteene makampusi aya ni sinniiwelela nsu nawe. Mulopwana mmosa aahoona wira eyo ekeekhai. Owo aahimmye so: “Hiyo naaphavela olatha ifootu ipwittipwitthi, nto naahiitthana wira sinaattamele. Vaavo niitthana ahu, iyo khisaarwiiye, mwaha woowi khisaasuwela nsu nahu. Mmiravo mmosa aari makampusi a ipwittipwitthi iye aahirwa, moohipisa aahiitthana ipwittipwitthi iyo, nto saahirwa”.

2-3. (a) Atthareli a Yesu anooniherya sai wira anniwiriyana nsu nawe? (b) Mwaha ola ni mwaha onittharelana, ninrowa othokorerya exeeni?

² Yowiiraneya ya mulopwana ole, enninuupuxerya moolumo a Yesu okathi aahimyale awe wira awiixutti awe ari ntoko ipwittipwitthi. Owo aahimmye so: “Iyo sinrowa owiriyanaka nsu naka”. (Yoh. 10:16) Masi Yesu ori wiirimu. Nto ninrowa owiriyana sai nsu nawe? Enamuna emosa nikhanle ahu owooniherya wira ninninwiriyana Pwiya ahu, ori weettela itthu oniixuttinhe awe.—Math. 7:24, 25.

³ Mwaha ola ni mwaha onittharelana, nnooweha itthu vakhaani Yesu oniixuttinhe awe. Nave, nnooweha itthu Yesu onirumme awe ohiya opaka ni itthu onirumme awe opaka. Wanipacerya, nrowe nithokorerye itthu piili makampusi ahu ooreera murima onirumme awe wira nihiye opaka.

4. Moovarihana ni Luka 12:29, etthu xeeni ekhanle ooniiriha “oxanka vanceene”?

⁴ Mmusome Luka 12:29. Yesu ohaatumererya atthareli awe wira ‘ahiye oxanka vanceene’ ni itthu simprisari aya wira akhale akumi. Hiyo ninnisuwela oratteene wira miruku sa Yesu ti sooloka  ni ti sa ankhili. Nave hiyo ninniphavela weettela miruku iyo sa Yesu. Masi okathi mukina vanninixankiha weettela. Mwaha wa xeeni?

5. Itthu xeeni siniwiiriha atthu akina oxanka?

 ⁵ Atthu akina annixanka vanceene mwaha wa itthu ntoko yoolya, ikuwo ni opuro wookhala. Akina anikhala ilapo atthu ahireere aya ohaawa, nto vannixankiha ophwanya muteko. Nto pooti waaxankiha ophwanya musurukhu oniphiyerya wira yiikhapeleleke ni okhapelela etthoko aya. Nave pooti wira mutthu aavara muteko etthoko eyo ohookhwa, nto etthoko eyo kheniphwanya musurukhu wira athumeke itthu sinaathowa. Oretta wa koronaviru wala COVID-19 woowiiriha atthu anceene ohikhalana muteko. (Mus. 9:11) Akhala wira sihookhumelelani mixankiho iyo ni mixankiho sikina, munrowa otthara sai miruku sa Yesu soowi muhiye oxanka?

6. Mutthokiherye etthu yaamwiiranenle murummwa Pedru.

⁶ Okathi omosa, murummwa Pedru ni arummwa akina yaari mukalawani ephareya ya oGalileya okathi wa epheyo yuulupale. Nto yaahinweha Yesu eettaka vasulu va maasi. Pedru aahimuleela Yesu wira: “Pwiya, mwaari nyuwo, mukirume kirwe ori anyu, keettaka vasulu va maasi”. Yesu aahimuleela wira “murweeke”, nto Pedru aahikhuma mukalawani “khupacerya weetta vasulu va maasi orowaka aari Yesu”. Vano nkahaya nwehe etthu yiiraneyale moottharelana. “Awehaka-ru epheyo yuulupale, Pedru aahoova. Vano, opaceryaka osama, aahikhuwela iiraka: ‘Pwiya, mukoopole!’” Yesu aahimookolela ntata, omoopola. Moone wira Pedru aahiwerya weetta vasulu va maasi vaavo anwehexexa awe Yesu. Masi okathi Pedru aawehexexa awe epheyo yuulupale, owo aahipacerya  woova, waanyiherya, oxanka ni opacerya osama.—Math. 14:24-31.

7. Yowiiraneya ya murummwa Pedru, enniixuttiha exeeni?

⁷ Yowiiraneya ya murummwa Pedru, enooniixuttiha itthu sinceene. Okathi Pedru aakhumme awe mukalawani orowaka mphareya, owo khaalipelela wira aamuxanka ni osama. Maana aaphavela weetta vasulu va maasi mpakha aari awe Pwiya awe. Masi Pedru aahihiya onwehexexa Yesu, onawehexexa epheyo. Olelo-va, hiyo nihaana okhalana waamini wira niwerye ovilela mixankiho ntoko siisaale Pedru aatthuneya awe waamini wira owerye weetta vasulu va maasi. Nto hata nirina ene mixankiho suulupale, nihaana ohihiya onwehexexa Yehova ni okupali wira onoonikhaliherya. Ninrowa owerya sai opaka eyo?

8. Etthu xeeni enrowa onikhaliherya ohitepexa oxanka mwaha wa itthu sinnithowa?

⁸ Ohiya otepexa oxanka mwaha wa mixankiho sahu, nihaana omuroromela Yehova. Muhiliyale wira Tiithi ihu oophenta Yehova, onoonikhapelela onivahaka itthu sinnithowa akhala wira nnoohela nipuro noopacerya omurumeela. (Math. 6:32, 33) Okathi wotheene, owo onnimaliherya itthu onleiherya awe. (Otum. 8:4, 15, 16; Esal. 37:25) Akhala wira Yehova onnaakhapelela axipalame ni ifilori, eyo ehaana onikupaliha wira khivanireerela oxanka voohimya sa yoowara ni yoolya! (Math. 6:26-30; aFil. 4:6, 7) Ntoko siisaale ophenta oniwiiriha aya anamuyari waakhapelela ni waavaha itthu anaaya ampirisari aya, ophenta onnimwiiriha Tiithi ihu a wiirimu waakhapelela atthu awe. Tthiri, nikupali ni murima wotheene wira Yehova khonikhala-khala ohiyaka onikhapelela!

9. Yowiiraneya ya anamathelana amosa, ewiixuttinheni exeeni?

⁹ Nkahaya nwehe yowiiraneya enooniherya wira Yehova onoonivaha itthu nimprisari ahu wira nikhale akumi. Anamathelana mapioneero, yaahaana weetta ewoora ntero wira aphiye nipuro yaakhala aya atthu atthyanwe elapo aya wira yaakuxe arokora wira arowe omithukumanoni. Munna ole onnihimya so: “Nuumala mithukumano, hiyo naahaalattula arokora ale wira nalye etthu owaani, masi naahoona wira khinaarina etthu yoowaavaha”. Etthu xeeni anamathelana ale yaarowa aya opaka? Munna ole onihimya so: “Nuumala ophiya owaani, naahiphwanya mirupa miili saasareyale yoolya. Hiyo khinaamusuwenle mutthu aaruuhale yoolya ele. Tthiri Yehova aahinikhapelela”. Muhoolo mwaya, ekaaro ya anamathelana ale yaahihononeya ni yaaniruumeela ekaaro ele wira yalaleerye, masi khiyaarina musurukhu wira alokihe. Awo yaahikuxa ekaaro ele wira yasuwele musurukhu yaarowa aya oliva wira elokihiwe. Nuumala-vo, mulopwana mmosa aahimukoha munna ole wira: “Ekaaro ela ti yaawani?” Munna ole aahihimya wira yaari ekaaro awe ni aaruuhale wira elokihiwe. Nto mulopwana ole aahimwaakhula wira: “Muhixanke! Amwaaraka amphavela ekaaro ntoko yeela ni ekoore ene yeeleenexa. Muniphavela kavi?” Munna ole aahimutumirya ekaaro awe mulopwana ole, musurukhu waaphiyerya othuma ekaaro ekina. Owo onihimya so: “Nkiniwerya ohimya moota kaahakalanle aka nihiku nne, miyo kaahisuwela wira etthu ele khahiyo yaakhumelenle mekhaya paahi. Yehova taanikhaliherya”.

10. Esalimo 37:5, ennitumererya sai ohitepa oxanka mwaha wa itthu sinnithowa?

¹⁰ Okathi nninwiriyana ahu makampusi ahu ooreera murima ni ohiya oxanka mwaha wa itthu sa werutthuni sinnithowa, nikupaliki ni murima wotheene wira Yehova onoonikhapelela. (Musome Esalimo 37:5; 1 Ped. 5:7) Nkahaya muupuwele sowiiraneya nilavunle ahu  ettima 5. Mpakha-va, Yehova onninikhapelela omurumeelaka muhooleli a etthoko wala patarau ahu, yaawo annikhaliherya anivahaka itthu sa khula  nihiku sinnithowa. Akhala wira muhooleli a etthoko khoniwerya opaka eyo wala ooyeleela muteko awe, Yehova onoonikhapelela mwa enamuna ekina. Tthiri Yehova onoopaka eyo. Vano, nrowe nithokorerye etthu ekina makampusi ahu ooreera murima onnitumererya awe ohiya opaka.

11. Moovarihana ni Matheyo 7:1, 2, etthu xeeni Yesu onitumerenrye awe wira nihiye opaka? Xeeni vanixankiha aya opaka eyo?

¹¹ Mmusome Matheyo 7:1, 2. Yesu onnisuwela oratteene wira apinaatamu oottheka waaasivela owehexexa soovonya sa atthu akina. Owo aahimmye so: “Muhiye waaphukela akina”. Hiyo pooti wiimananiha vanceene ohiya waaphukela anna ni arokora. Akhala wira okathi mukina onninsivela waalavula voohiloka atthu akina, etthu xeeni ninreerela ahu opaka? Nihaana onwiriyana Yesu ni ohiya waaphukela atthu akina.

12-13. Wuupuwelela moota Yehova aamuthokorenrye awe Davidi, onrowa onikhaliherya sai ohiya waaphukela atthu akina?

¹² Othokorerya ntakiheryo na Yehova, nnoonikhaliherya vanceene. Owo onniwehexexa itthu sooloka atthu akina anipaka aya. Ninniweha eyo, moota aamuthokorerya awe mwene Davidi, yoowo aapanke itampi suulupale. Mwa ntakiheryo, Davidi aahiraruwa ni Bathi-Xeba ni aahimwiiviha iyawe Bathi-Xeba. (2 Sam. 11:2-4, 14, 15, 24) Nto mwaha wa etthu yoohiloka Davidi aapanke awe, aahiikumiherya mixankiho ni aahaakumiherya mixankiho atthu a etthoko awe waahela muhina axaarawe akina. (2 Sam. 12:10, 11) Okathi mukina, Davidi aahooniherya wira khaamuroromela Yehova ni murima wotheene vaavo aarumme awe okontariwa anakhotto otheene a wisarayeli. Woonasa wene, etthu yaamwiirinhe waari wiixinnuwiha ni ororomela nummuru wala mwaattelo wa anakhotto awe. Yaahikhumelela etthu yooriipiha murima. Eretta, yaahiwiiva atthu 70.000 a wisarayeli!—2 Sam. 24:1-4, 10-15.

¹³ Vaakhanle wira okathi ole nyuwo mwaakhala wisarayeli, mwaarowa omuthokoreryaka sai Davidi? Niireke mwaarowa wuupuwelaka wira khivaareerela Yehova ommorela ikharari? Yehova khaapanke eyo. Maana Yehova aahoona wira khalai Davidi aari mutthu oororomeleya ni aahittharuwa ni murima wotheene. Mwaha waivaavo, Yehova aahimulevelela Davidi itampi sawe sotheene. Yehova aanisuwela wira Davidi aanimphenta vanceene ni aaniphavela opaka itthu sooloka. Niireke nyuwo khamunihakalala osuwela wira Muluku ahu oophenta, onniweha itthu sooloka nimpaka ahu?—1 Mam. 9:4; 1 Wah. 29:10, 17.

14. Etthu xeeni enrowa waakhaliherya makristau ohiya waaphukela atthu akina?

¹⁴ Okhala wira Yehova khonlipelela wira okathi wootheene nnoopakaka itthu sooloka, hiyo nave nihilipeleleke wira atthu akina anoopakaka itthu sooloka okathi wootheene. Hiyo nihaana oweha itthu sooloka anipaka aya. Okhala wene, vannikhweya oweha itthu soohiloka atthu akina anipaka aya ni waalavula voohiloka mwaha wa itthu iyo. Masi mutthu onimutakiha Yehova, onnivara muteko oratteene ni atthu akina hata osuwelaka soovonya saya. Mwa ntakiheryo, akoroxo oowooxiwa ahinatthi opwexiwa, pooti okhalaka ntoko wira toohiloka ni kharina efaita. Masi mutthu a ankhili ni onaasuwela saana akoroxo, onnisuwela wira nuumala opwexiwa, awo annikhalana efaita ni toosiva. Nimutakihaka Yehova ni Yesu, nihiwehexexeke itthu soohiloka sa atthu akina, masi niwehexexeke mikhalelo saya sooloka.

15. Oweha makhalelo a atthu akina, onrowa onikhaliherya sai ohaaphukela?

¹⁵ Ohiya paahi oweha mikhalelo sooloka sa atthu akina, etthu xeeni ekina enrowa  onikhaliherya ohaaphukela? Niimananiheke oweha makhalelo aya. Nkahaya muupuwele ntakiheryo nla. Nihiku nimosa otemplo, Yesu aahinweha naamukhweli oothoiwa ohelaka musurukhu vakhaani mukaaxani waaheliwa musurukhu. Yesu khaamukonhe so: “Xeeni muhivahaka musurukhu munceene?” Ohiya owehexexa mwaattelo wa musurukhu naamukhweli ole aavanhe awe, Yesu aahiweha etthu yaamwiiriha ovaha ni makhalelo a naamukhweli ole. Nto aahimuttottopela mwaha woovaha ele aawerya awe.—Luka 21:1-4.

16. Yowiiraneya ya Veronica, ewiixuttinheni exeeni?

¹⁶ Yowiiraneya ya Veronica ennooniherya oratteene efaita erina aya wuupuwela makhalelo a atthu akina. Muloko Veronica aarumeela awe, aahikhala murokora oohitheliwa ni mwanawe mwaamulopwana. Veronica onihimya so: “Miyo koona wira murokora ole aanicompela mithukumano ni khaakhaliherya miteko sa mmulokoni. Mwaha wa yeeyo, kaahipacerya okhalana moonelo woohiloka. Masi okathi kaaronwe aka olaleerya ni murokora ole, aahikileela mixankiho aarina awe mwaha woowi mwanawe aahikhalana oretta wa mmuupuweloni. Nto aaniimananiha wira omukhapelele werutthuni ni omukhaliherya okhalana waataana wooloka ni Yehova. Nto ikwaha sikina, mwaha wa mixankiho sa mwanawe, aanirowa oweha mithukumano muloko mukina”. Veronica onimaliha oriki: “Miyo nkaatonko wuupuwela wira murokora ole  aahikhalana muxankiho muulupale, nto kaahipacerya omuxukhurela ni omuttittimiha murokora ole mwaha wa wiimananiha wawe omurumeela Yehova”.

17. Yakobo 2:8, onnitumererya opaka exeeni, ni ninrowa owerya sai opaka eyo?

¹⁷ Nihaana opaka exeeni noona wira ninnaaphukela anna ni arokora? Muhiliyale wira hiyo nihaana waaphenta anna ni arokora. (Mmusome Yakobo 2:8.) Nave nihaana omuxonttela Yehova wira onikhaliherye ohiya waaphukela anna ni arokora. Nto nihaana opaka etthu moovarihana ni nivekelo nahu, nivirihaka okathi niri ene ni munna wala murokora owo nimmulavula ahu voohiloka. Opaka eyo, enoonikhaliherya omusuwela oratteene. Nave pooti onvekela munna wala murokora owo wira nalaleerye hoothe aahiiso orowa olya etthu. Vaavo ninrowa ahu omusuwelaka oratteene munna wala murokora owo, nnoowerya otthara ntakiheryo na Yehova ni Yesu niwehaka mikhalelo sawe sooloka. Niira siiso, nnimooniherya wira ninniiwelela yooruma ya makampusi ahu ooreera murima ya ohiya waaphukela atthu akina.

18. Ninrowa wooniherya sai wira ninniiwa nsu na makampusi ahu ooreera murima?

¹⁸ Ntoko siisaale ipwittipwitthi siniiwa aya nsu na makampusi aya, atthareli a Yesu anniiwa nsu nawe. Akhala wira nnimwiimananiha ohiya oxanka mwaha wa itthu sinnithowa ni ohiya waaphukela atthu akina, Yehova ni Yesu anooreeliha wiimananiha wahu. Hata niri ene a “nikoto naamukhaani” wala a “ipwittipwitthi sikina”, otheene ahu nihihiye owiriyana ni wiiwelela nsu na makampusi ahu ooreera murima. (Luka 12:32; Yoh. 10:11, 14, 16) Mwaha onittharelana, ninrowa othokorerya itthu piili Yesu onirumme awe opaka.