Niireke moosoma oratteene irevista sootheene Owehaweha sa mwaakha ola? Akhala wira ti siiso, nwehe akhala wira munniwerya waakhula makoho anittharelana:

Yakobo 5:11 onihimya wira “Yehova toophenta vanceene ni toomoriwa ikharari”, eyo enitaphulela exeeni?

Okhala wira toomoriwa ikharari, Yehova onniphavela vanceene onilevelela itampi sahu. Yakobo 5:11, onnooniherya wira Yehova onninikhaliherya. Nto nihaana omutakiha Yehova.—w21.01, epaaxina 21.

Xeeni Yehova ohalaka opaka mareheryo a ohoolela?

Mwaha woowi Yehova onniniphenta. Nto mareheryo a okhala muhooleli annikhaliherya emusi ya Yehova okhala ya murettele ni yootthokiheya. Nave annikhaliherya omusuwela tani okhanle oopaka soothanla sookiserya ni tani anrowa ohoolelaka okathi sinrowa aya ovariheliwaka muteko soothanla iyo.—w21.02, epaaxina 3.

Xeeni makristau anireerela aya okhalana ephoole vaavo anirumeela aya iprokrama sa mensagem wala redes sociais?

Akhala wira mukristau onnithanla waarumeela aredes sociais ohaana waathanla mwa miruku apatthani awe. Nto vannivila opaka eyo akhala wira ninnirumeela ikrupu suulupale. (1 Tim. 5:13) Nave ohaana okhalana ephoole wira ohimwaramware itthu sowoothiwa wala omweetta nakoso.—w21.03, epaaxina 31.

Itthu xeeni sikina saamwiirinhe Muluku omweemererya Yesu ohaaxiwa mpakha wiiviwa?

Etthu yoopacerya, Yesu aahaana wiiviwa vamwirini va nihaaxeryo wira owoopole ayuda yaatakhalihiwe. (aGal. 3:10, 13) Ya nenli, Yehova aamwiixuttiha Mwanawe wira avareke saana muteko awe wa okhala Mukhulupale Aanamukuttho. Ya neeraru, ororomeleya wa Yesu mpakha wiiviwa ohooniherya wira apinaatamu anoowerya ororomeleya hata saaphwanyaka mixankiho suulupale. (Yobi 1:9-11)—w21.04, ipaaxina 16-17.

Munrowa opaka exeeni akhala wira khamunaaphwanya atthu mwaalaleeryaka?

Mwaalaleeryeke okathi munoona anyu wira munimwaaphwanya atthu ari ene owaani. Mulaleeryeke mapuro oovirikana. Nave murumeeleke enamuna ekina yoolaleerya ntoko olepa ikarta.—w21.05, ipaaxina 15-16.

Murummwa Paulo aaphavela ohimya exeeni ni moolumo oowi: “Okhala wira kaaneettela Nlamulo, miyo kookhwela Nlamulo”?—aGal. 2:19.

Nlamulo Muluku anvanhe awe Moise, naapakiwe wira naaroihe aisarayeli wa Kristu. (aGal. 3:19, 24) Nto nlamulo naahimukhaliherya Paulo omweemererya Kristu. Mwaha woopaka eyo, Paulo ‘aahikhwela nlamulo’, niire so, khaakhanyereriwa weettela Nlamulo.—w21.06, epaaxina 31.

Ntakiheryo xeeni Yehova onivanhe awe na ovilela?

Yehova onnivilela oveehiwa nsina nawe, ovaanyihiwa wa okhulupale awe, ohiiweleliwa ni anaawe akina, wootha wa Satana Diabo, mixankiho sinaaphwanya arumeyi awe, okhweliwa apatthani awe, apinaatamu ootakhala murima annaahasula atthu akina, mweettelo woohiloka wa apinaatamu ni ohononiwa itthu Muluku opattunxe awe.—w21.07, ipaaxina 9-12.

Ovilela wa Yosefe onniixuttiha exeeni?

Yosefe aahivilela hata aathokoreriwa voohixariya ni axinnawe. Nave aahootheriwa etthu ahaapanke awe ni aahitthukweliwa mukhatteya iyaakha sinceene wExiitu.—w21.08, epaaxina 12.

Othukumelihiwa xeeni wa nthoonyeryo Hagayo 2:6-9, 20-22 aahimmye awe vahinatthi?

Maloko manceene annikhootta ihapari sa Omwene ninlaleya ahu, masi atthu anceene anneemererya ekeekhai. Moohipisa onimwiiraneya othukumelihiwa wookiserya vaavo maloko anrowa aya opwetexiwa.—w21.09, ipaaxina 15-19.

Xeeni vahinreerela aya okhulumuwa vaavo ninlaleerya ahu?

Yehova onniweha wiimananiha wahu ni onnihakalala vaavo onniweha awe nilaleeryaka. Naahikhulumuwe nnoophwanya okumi woohimala.—w21.10, ipaaxina 25-26.

Onamukuttho 19, onnikhaliherya sai weettela malakiheryo ani: “Mweettelo anyu wotheene okhaleke woowaarya”? (1 Ped. 1:15)

Woonasa wene eversiikulu ela ekumihiwe Onamukuttho 19:2. Nto Onamukuttho 19, onninikhaliherya oweha inamuna nikhanle ahu ooweettela khula nihiku malakiheryo ari 1 Pedru 1:15.—w21.12, ipaaxina 3-4.