1. Ohalaka vakhaani okhwa, etthu xeeni Yesu aamuleelale awe mutakhali mmosa aakhomelaniwe awe? (Luka 23:39-43)

 YESU aakhomeliwe vamosa ni atakhali anli. Nto ahalaka vakhaani okhwa awo yaanitepa woona owereya. (Luka 23:32, 33) Okathi vakhaani waavinre, atakhali ale yaahinveeha Yesu, nto eyo enooniherya wiira awosa khahiyo yaari awiixutti a Yesu. (Math. 27:44; Mar. 15:32) Masi mmosa a atakhali ale, aahirukunuxa murima. Owo aahimmye so: “Yesu, mukuupuwele mwaphiya Moomweneni mwanyu”. Nto Yesu aahimwaakhula so: “Olelo, kinooleelani ekeekhai wira, munrowa okhala ni miyo mParayiisu”. (Mmusome Luka 23:39-43.) Nto khekhanle etthu enooniherya wiira mutakhali ole aanikupali muhupi woowi ‘Omwene wa wiirimu waari vakhiviru’. Nave Yesu khaatonko ohimya wiira mutakhali ole aamukela mparayiisu wiirimu. (Math. 4:17) Tthiri Yesu, aalavula sa eparayiisu ya muhoolo valaponi vaava. Ninsuwela sai eyo?

2. Exeeni enooniherya wiira mutakhali ole aattharunwe aari muyuda?

² Mutakhali ole aarukununxe murima woonasa wene aari muyuda. Nto mutakhali ole aahimuleela mukhwaawe wiira: “Nyuwo nnakhala khamunimoova Muluku? Ehukhumu erina anyu, enoolikana ni yawawe?” (Luka 23:40) Ayuda yaamukokhorela Muluku mmosa paahi, masi amalapo yaakokhorela amuluku anceene. (Okhum. 20:2, 3; 1 aKor. 8:5, 6) Vakhanle wiira atakhali ale khahiyo yaari ayuda, mmosa a atakhali ale aarowa ohimya so: “Nyuwo nnakhala khamuniwoova amuluku?” Etthu ekina enooniherya wiira mutakhali ole aari muyuda, okhala wiira Yesu khaarummwale orowa waalaleerya aamalapo, masi aarummwale waalaleerya ‘aIsarayeli paahi, yaawo ari ntoko ipwittipwitthi sirimenle’.  (Math. 15:24) Mwaha wookhala muyuda, mutakhali ole aanisuwela wiira Muluku aahaaleiherya aisarayeli wiira amwaahihimuxa atthu akhwiiye. Masu aalavunle awe mutakhali ole aattharunwe, annooniherya wiira aanisuwela wiira, Yehova ammuhihimuxa Yesu wiira okhale mwene a Moomweneni mwa Muluku. Woonasa wene, mutakhali ole aattharunwe, aanikupali nave wiira Muluku aamurowa omuhihimuxa.

3. Woonasa wene, mutakhali ole uupuwelela exeeni okathi Yesu aalavunle awe sa eParayiisu? Mutthokiherye. (Maphattuwelo 2:15)

³ Okhala wiira aari muyuda, woonasa wene mutakhali ole aanisuwela etthu yaawiiranenle Adamu ni Eva ni eparayiisu Yehova aavahale awe. Nto okathi aamwiiwale awe Yesu oromolaka sa eParayiisu, woonasa wene owo uupuwela exardim yooreera elapo yeela ya vathi. — Musome Maphattuwelo 2:15.

4. Masu a Yesu aamuhimenrye awe mutakhali ole, annitumererya wuupuwelela exeeni?

⁴ Etthu Yesu aamulenle awe mutakhali ole, ehaana oniiriha wuupuwelela moota okumi onrowa aya okhala mParayiisu. Nto etthu enrowa onikhaliherya opaka eyo, ori wuupuwelela moota waari aya olamulelo wa Salomoni. Mwaha wa xeeni? Mwaha woowi, Biibiliya onihimya wiira Yesu muulupale onvikana Salomoni. Nto nikupaliki wiira Yesu vamosa ni makristau 144.000, anrowa wiiriha elapo okhala eparayiisu yooreera. (Math. 12:42) Ekeekhai wiira “ipwittipwitthi sikina”, eyo piiyo, atthu yaale arina nlipelelo nookhala valaponi, anniphavela osuwela etthu anireerela aya opaka wiira yakhale mparayiisu mahiku ootheene. — Yoh. 10:16.

5. Okumi onrowa okhala sai mParayiisu?

⁵ Munoonela sai, okumi onrowa okhala sai mParayiisu? Woonasa wene, nyuwo munuupuwela opuro wooloka, ntoko exardim ya wEdeni. (Maph. 2:7-9) Nave woonasa wene, munuupuwela masu a Mikeya oowi: “Khula mutthu onaamukilaathi vamuuttutthini wa mukuukhu awe, ni va miri sa eviinyu awe”. (Mik. 4:3, 4, PIIPILIYA Emakhuwa). Aahiiso nyuwo munnuupuwelela soolepa sikina sinihimya wiira enookhala yoolya yinceene. (Esal. 72:16; Yes. 65:21, 22) Nave woonasa wene, munniwerya wuupuwelela muri ene muxardim mooreera ni mukilaathale ene vameesa eri eyoolya yinceene. Nto nyuwo munniwerya woona wunkhela wa ifilori ni wa miri. Munniwerya owiiwa amusi anyu ni apatthani, waahela muhina ale ahihimuxiwe, atheyaka moohakalala okathi anitthekula aya. Tthiri wuupuwelela siiso, khahiyo oloha. Veekeekhai, nikupaliki wiira itthu iya sootheene sinimwiiraneya valaponi. Ohiya-vo, muteko wa mParayiisu onrowa okhala wooloka ni woohakalaliha.

6. Miteko xeeni ninrowa ahu ovaraka mParayiisu? (Nwehe edesenyo.)

⁶ Yehova onipattunxe wiira nihakalaleke ni  muteko ahu. (Mus. 2:24) Okathi wa Olamulelo wa Kristu wa Iyaakha Ekonto Emosa, nnoorowa okhalana muteko munceene woovara. Nto atthu ootheene anrowa woopowa okathi wa maxakha maalupale ni atthu imilyau sinceene anrowa ohihimuxiwa, anoophavelaka ikuwo, eyoolya ni opuro wookhala. Eyo entaphulela wiira nnookhalana muteko munceene ni muteko owo onrowa okhala woohakalaliha. Yehova aahaaleela Adamu ni Eva wiira yaahaana okhapelela ni wuncererya eparayiisu. Mwa enamuna emosa-ru, hiyo nnookhalana eparakha ya wiiriha elapo okhala eparayiisu. Muupuwelele ohakalala ninrowa ahu okhalana okathi ninrowa ahu owiixuttihaka atthu imilyau sinceene anrowa ohihimuxiwa, sa Yehova ni yoolakela awe. Nave vanrowa okhala voohakalaliha waaleela arumeyi a Muluku a khalai, itthu saakhumelenle nuumala awo okhwa!

7. Exeeni nikhanle ahu okupaliki ni mwaha wa xeeni?

⁷ Nto nikupaliki wiira okumi mparayiisu onrowa okhala wooloka, wa murettele, wootthokiheya ni nnookhalana itthu sootheene nimphavela ahu. Mwaha wa xeeni? Mwaha woowi, Yehova onooniherya orumeelaka olamulelo wa Salomoni, moota okumi onrowa okhala elapo esya nilamuleliwaka ni Mwanawe.

8. Masu ari Esalimo 37:10, 11, 29, yiiraneyale sai khalai? (Nwehe mwaha oni: “Makoho Anikohiwa ni Ale Anisoma Irevista Sahu” ori erevista yeela.)

⁸ Mwene Davidi, aahuupuxeriwa olepa moota okumi onrowa aya okhala nuumala mwene a miruku ni oororomeleya opacerya olamulela. (Musome Esalimo 37:10, 11, 29.) Okathi munceene, ninnisoma yoolepa ya Esalimo 37:11, wiira naatthokiherye atthu akina sa eParayiisu. Hiyo ninnipaka eyo okhala wiira Yesu aahihimya eyo okathi aalavula awe mwaha awe wa vamwaako, yooniheryaka wiira masu ala yaamwiiraneya tthiri muhoolo. (Math. 5:5) Nave, moolumo a Davidi annooniherya moota okumi onrowa aya okhala ntoko okathi wa olamulelo wa Salomoni. Okathi atthu a wisarayeli yaalamuleliwa aya ni mwene Salomoni, yaahikhalana murettele munceene ni yaakhala elapo “enikhowa eleti n’uravo”. Nave Muluku ahahimerya so: “Mwaìwelelá ikano saka, mwatthara molumo aka, khíyettela  orattene . . . , kinovaha murettele elapo ela: khavo onrowa owopopihani mwarupaka”. (Onam. 20:24; 26:3, 6) Olamulelo wa Salomoni waari siiso. (1 Wah. 22:9; 29:26-28) Nave-tho Yehova ahimmye wiira atthu ootakhala murima “anorimela nananoru”. (Esal. 37:10) Nnaamwi masu ari Esalimo 37:10, 11, 29, yiiraneyale ene khalai, nave animwiiraneya-tho muhoolo.

9. Exeeni pwiyamwene oSaba aahimmye awe sa olamulelo wa Salomoni?

⁹ Pwiyamwene oSaba aanisuwela wiira olamulelo wa Salomoni waahaphanyiha aisarayeli murettele ni waahikumiherya itthu sinceene sooloka. Nto owo aaheetta mukwaha woorakama orowaka oYerusalemu wiira awehe itthu sootheene siiraneya. (1 Mam. 10:1) Nuumala ophiya oYerusalemu ni oweha itthu sootheene aaleeliwe awe, pwiyamwene oSaba aahimmye so: “Kahilèliwa itthu vakhani pahi, kophwanya sulupale . . . . Òreriwa atthu anyu, òreriwa arumeyi anyu ala, okhala wira anniwerya okhala mahiku ene vamaithoni vanyu ni wiwa miruku sanyu”. (1 Mam. 10:6-8) Masi olamulelo wa mwene Salomoni onooniherya paahi, etthu Yehova onrowa awe opaka okathi mwanawe, Yesu Kristu, onrowa awe olamulelaka valaponi.

10. Moota xeeni Yesu ori awe muulupalexa onvikana Salomoni?

¹⁰ Yesu muulupalexa onvikana mwene Salomoni mwa itthu sootheene. Okhala wiira mwene Salomoni aari mutthu oottheka, owo aahipaka itampi suulupale seiyo saakumihenrye mixankiho atthu a Muluku. Moovirikana ni Salomoni, Yesu namalamulela oohittheka nto owo khonipaka itthu soohiloka. (Luka 1:32; aHeeb. 4:14, 15) Satana aahimweehererya Yesu, masi hata vari siiso, owo khaahiyale okhala oororomeleya wa Yehova. Yesu ohooniherya wiira khonikhala-khala otthekaka, aahiiso opaka itthu sikhanle ooniphwanyiha mixankiho. Tthiri ti voohakalaliha okhalana Mwene ooloka ntoko Yesu.

11. Tani anrowa omukhaliheryaka Yesu?

¹¹ Yesu okhaliheriwaka ni makristau 144.000, onrowa waakhapelelaka apinaatamu ni wiiriha yootthuna ya Yehova wiireya valaponi. (Wiis. 14:1-3) Makristau awo oothanliwa, annisuwela mixankiho sinikhumelela mwaha woowehereriwa, okhala wiira okathi awo yaari aya valaponi yootoko weehereriwa. Mwaha waivaavo, awo anoosuwelaka itthu sinnixankiha. Masi muteko xeeni makristau 144.000, anrowa aya ovaraka?

12. Muteko xeeni Yehova aavanha awe makristau oothanliwa?

¹² Yesu ni makristau oothanliwa anookhalana muteko munceene ovikana muteko aarina awe mwene Salomoni. Mwene Salomoni, aanaakhapelela atthu imilyau sinceene masi elapo emosa paahi. Moovirikana ni Salomoni, makristau oothanliwa anrowa waakhapelelaka atthu ipiliyau sinceene elapo yootheene. Nto Yehova ohaavaha makristau oothanliwa muteko wa vameekhaaya!

13. Muteko xeeni mukina wa efaita makristau 144.000 anrowa aya okhalana?

¹³ Ntoko Yesu, makristau oothanliwa 144.000, anrowa orumeelaka ntoko mamwene ni anamukuttho. (Wiis. 5:10) Nlamulo na Moise, naahimya wiira anamukuttho yaahaana waakhapelela aisarayeli ni waakhaliherya okhalana waataana wooloka ni Yehova. Nave nlamulo nlo naari ntoko “eruku paahi ya itthu sooreera sinirwa”. Nto ninnikupali wiira makristau oothanliwa animwaakhaliherya arumeyi a Muluku okhalana okumi wooloka ni waataana wooloka ni Muluku. (aHeeb. 10:1) Masi nlelo khaninsuwela moota mamwene awo ni alipa amukuttho anrowa aya waakhaliheryaka atthu anrowa okhalaka valaponi. Masi hata vari siiso, nikupaliki wiira mparayiisu, Yehova onoonivahaka malakiheryo ootheene nimphavela ahu. — Wiis. 21:3, 4.

14. Ovarihana xeeni okhanle makristau aniirela mpantta “ipwittipwitthi sikina” ni a “nikoto naamukhaani”?

¹⁴ Yesu onnaahimya atthu onrowa awe olamulelanaka okhala “nikoto naamukhaani”. (Luka 12:32) Nave owo aahiromola ekrupu ekina, yeeyo iitthanne awe okhala “ipwittipwitthi sikina”. Ikrupu iyo piili sinikhala nikoto nimosa. (Yoh. 10:16) Atthu ootheene aniirela mpantta ikrupu iyo soopiili, annivara muteko olelo-va hoothe ni anoorowaka ovara muteko hoothe muhoolo, okathi elapo enrowa aya okhala eparayiisu. Mparayiisu ale a “nikoto naamukhaani” anrowa okhalaka wiirimu masi ale a “ipwittipwitthi sikina” anrowa okhalaka mahiku ootheene valaponi. Ekeekhai wiira ale aniirela mpantta ekrupu ya ipwittipwitthi sikina, wiira akele elapo esya, ahaana opaka itthu sikina olelo-va.

15. (a) Atthu a “ipwittipwitthi sikina” anaakhaliherya sai makristau oothanliwa? (b) Munrowa otthara sai ntakiheryo na munna ori ofarmaasiya? (Nwehe efootu)

¹⁵ Mutakhali ole okhwiiye ohinatthi wooniherya oxukhurela wawe ele aaleeliwe awe ni Yesu. Moovirikana ni mutakhali ole, atthu a “ipwittipwitthi sikina” aakhalana eparakha olelo-va ya wooniherya omuxukhurela waya Yesu. Hiyo ninnooniherya omphenta wahu Yesu okathi nnaakhaliherya ahu makristau oothanliwa. Yesu aahihimya wiira onrowa waaphukela atthu a ipwittipwitthi sikina, moovarihana ni moota anaathokorerya aya makristau oothanliwa. (Math. 25:31-40) Nnoowerya waakhaliherya makristau oothanliwa niluttuweliwaka ovara muteko woolaleerya ni waapaka awiixutti. (Math. 28:18-20) Enamuna emosa nikhanle ahu oopaka eyo, ori orumeela saana eliivuru esya Okumi Woohimala! Vakhala wiira khamurina yoosoma ya Biibiliya, munoonela sai opaceriha yoosoma ya Biibiliya murumeelaka eliivuru eyo?

16. Exeeni nikhanle ahu oopaka olelo-va wiira niilokiherye wiira nakhale mparayiisu?

¹⁶ Nihilipeleleke okathi ninrowa ahu okhalaka mparayiisu wiira nipake itthu sooloka Yehova oniphavela awe. Okhuma nenna-va, nihaana wiimananiha okhala oororomeleya mwa itthu sootheene ohela muhina itthu ninlavula ahu ni nimpaka ahu. Nave nihaana wooniherya okhala oororomeleya wa Yehova, wa ole nithelanne ahu ni annihu a mmulokoni. Vakhala wiira nnoomwiiwelela  Yehova nenna-va, vanookhweyaka omwiiwelela Yehova mparayiisu. Nave nihaana okhalana mikhalelo seiyo sinrowa onikhaliherya okhala mparayiisu. Nwehe mwaha oni: “Niireke Muhiilokiherya Wiira ‘Mwaakhele Elapo’?” ori erevista yeela.

17. Xeeni nihinreerela ahu okhala ooriipiwa murima mwaha wa itampi nipake ahu khalai? Mutthokiherye.

¹⁷ Hiyo khaninreerela wiivaha nthowa mwaha wa itampi nipanke ahu khalai. Masi eyo, khentaphulela wiira nihaana opaka “etampi voolakelela”, mwaha wookhalana mukuttho wowoopola wa Yesu. (aHeeb. 10:26-31) Vakhala wiira noopaka etampi, nihaana wooniherya wiira noottharuwa ni murima wootheene, ni onvekela Yehova vamosa ni axitokweene wiira anikhaliherye. Napaka eyo, nikupaliki wiira Yehova onoonilevelela moomalela. (Yes. 55:7; Mit. 3:19) Nto muupuweleke ele Yesu aalenle awe aFarisi oriki: “Miyo nkirwenle owiitthana anaxariya, masi anatampi”. (Math. 9:13) Tthiri mukuttho wa Yesu ti muulupale ni wefaita ni onniwerya oliverya itampi sahu sootheene.

18. Etthu xeeni nyuwo munrowa anyu ophavela omukoha mutakhali ole aakhomeliwe ni Yesu?

¹⁸ Niireke munniwerya wuupuwelela muri ene mParayiisu, nvaanelaka ni mutakhali ole aakhomeliwe vamosa ni Yesu. Veekeekhai, nyuwo munoorowa omutthokiheryaka moota moonihenrye anyu oxukhurela wanyu mukuttho wa Yesu. Woonasa wene, nyuwo munoorowa omukoha moota oonenle awe okathi ole aakhomeliwe awe ni okathi aamwiiwale awe Yesu ohimyaka wiira munookhala ni miyo mParayiisu. Nave owo pooti ophavelaka osuwela moota okumi waari aya mahiku ookiserya, okathi olumwenku waalamuleliwa aya ni Satana. Tthiri enrowa okhala eparakha yuulupale owiixuttiha atthu anceene Nuulumo na Muluku omuhela muhina mutakhali ole! — aEef. 4:22-24.

19. Xeeni okumi ohinrowa aya okhala wooxankiha mParayiisu? (Nwehe edesenyo ya ekaapa.)

¹⁹ Okumi mparayiisu khonrowa okhala wooxankiha. Khula okathi nnookhalanaka muteko woovara ni waasuwela atthu anceene. Etthu yootepa ohakalaliha okhala wiira khula nihiku nnoosuwelaka mikhalelo sa Yehova ni nnoopuhaka itthu sinceene onrowa awe onivaha. Khula okathi nnimwiixuttaka itthu isya sa Yehova ni nnoosuwelaka itthu sinceene opattunxe awe. Nto vaavo ninrowa ahu okhalaka mahiku ootheene, omphenta wahu Yehova onrowa otepaka olipa. Veekeekhai, ninnimuxukhurela vanceene Yehova vamosa ni Yesu mwaha woonivaha nlipelelo nookhala mahiku ootheene mParayiisu!