Okathi Yehova aapattunxe awe Adamu ni Eva, aahaaruma wiira yaayareke anamwane ni ‘asareyeke mulaponi mothene ni yettiheke elapo yothene’. Owo aaphavela ohimya exeeni ni moolumo awo? Yehova aaphavela ohimya wiira vakhaani-vakhaani elapo yaamukhala eparayiisu. (Maph. 1:28) Nto atthu ootheene anrowa okhalaka valaponi, ahaana wiiwelelaka yooruma eyo. Olelo-va, exaartim ya weedeni khekhanle-tho. Nto wiira elapo ekhale eparayiisu, nihaana orowa opacerya vasya itthu sootheene. Nuumala Armagedoni, nnookhalana muteko munceene wiira nilokiherye elapo ehononiwe ni apinaatamu. Tthiri, onrowa okhala muteko munceene!

Eyo enninuupuxerya muteko yaavanre aya aisarayeli nuumala otthika oBabilonia. Saahivira iyaakha 70 elapo ya aisarayeli ehikhaliwaka. Masi profeta Yesaya, aahihimya khalai ene, wiira aisarayeli akhaliheriwaka ni Yehova, yanwerya olokiherya elapo ele wiira ekhale yooreera. Eprofesia eyo yaahimya so: “Annitatuxa etthaya yowuma,  yimihaka solya sinjene: anotatuxa nipuro nohikhala mutthu, nikhaleke ematta y’Apwiya”. (Yes. 51:3) Tthiri eyo yaahiiraneya. Ntoko aisarayeli, ale anrowa waakhela elapo, akhaliheriwaka ni Yehova, anoowerya okhaliha eparayiisu. Itthu xeeni munireerela anyu opaka wiira mooniherye wiira munniphavela ovara muteko owo?

Etthu emosa mukhanle anyu oopaka, ori wiimananiha orattela empa anyu wiira ekhaleke yooreera ni yootthokiheya. Nyuwo pooti opaka eyo hata atthu akina yaattamanne anyu ahipakaka. Nave-tho pooti olokiherya Empa ya Omwene ni Esalau ya Asembeleya. Ohiya-vo, akhala wiira makhalelo anyu anniweemereryani, pooti wiivahererya wiira mwaakhaliheryeke anna aphwanyiwe ni ehasara. Siiso, munimooniherya wiira moolikana para waakhaliherya anna ni arokora. Mwiikoheke so: ‘Muteko xeeni okhanle aka oowiixutta olelo-va, onrowa ovareleya muteko elapo esya?’

Nuumala omuhihimuxa mwaana mwaamuthiyana a Jairo, Yesu aahiruma wiira “mwaana ole ovahiwe yoolya”. (Mar. 5:42, 43) Nave khivaaxankinhe omukhapelela mwaana ole mwaamuthiyana a iyaakha 12. Masi nkahaya muupuwele muteko onrowa okhala okathi Yesu, onrowa awe omaliherya yooleiherya enihimya so: “Atthu otheene ari mmahiye anrowa  . . . wiiwa nsu nawe, akhume mmahiye”. (Yoh. 5:28, 29) Nnaamwi Biibiliya ohihimyaka itthu sootheene, nkahaya muupuwele muteko onrowa okhala nuumala ohihimuxiwa atthu akhwiiye! Vanrowa oprisariki ovahiwa yoolya, ikuwo ni opuro wookhala. Hata olelo-va nyuwo pooti wooniherya wiira munniphavela okhaliherya. Itthu xeeni mukhanle anyu oopaka?

Okathi munisuwela anyu wiira muloko anyu onrowa oxukuriwa ni mutokweene a esirkwiitu, nyuwo pooti wiivahererya onvaha eyoolya. Ikwaha sikina, munna aarumeela oBetheli, aahiiso aari mutokweene a esirkwiitu pooti ohiya ovara miteko iyo. Nto akhala wiira onrumeela muloko anyu, nyuwo pooti wiivahererya omukhaliherya ophwanya opuro wookhala. Nave-tho, pooti opakiwaka konkresu a muttetthe aahiiso a vameekhaaya waattamela opuro onikhala anyu. Nto nyuwo pooti wiivahererya wiira mwakhaliherye anna awo  ohinatthi opacerya aahiiso nuumala konkresu owo. Ohiya-vo, pooti wiivahererya owaakhela anna anikhuma ottaiwene.

Moovarihana ni eliivuru ya Miteko 24:15, vannooneya wiira anoohihimuxiwa atthu anceene. Anceene a atthu awo, akhwiiye ahimusuwelaka Yehova. Nto awo anookhalana eparakha yoomusuwela Yehova nuumala ohihimuxiwa. a Muluku onimwarumeela arumeyi awe oororomeleya wiira owiixuttihe ni waakhaliherya ale anrowa ohihimuxiwa. (Yes. 11:9) Murokora onaasimiya Charlotte, olalenrye wEuropa, wAmérica do Sul ni wÁfrica, onniphavela vanceene ovara muteko owo. Owo onihimya so: “Miyo kinniphavela vanceene waalaleerya ale anrowa ohihimuxiwa. Okathi kinsomaka itthu saamwiiranenle mutthu mmosa aakhanle khalai, kinuupuwela so: ‘Okumi awe mutthu ola, waamutepa oloka vaakhanle wiira aahimusuwela Yehova’. Miyo kinoona opisa ophiya okathi woowiixuttiha atthu awo wiira amusuwele Yehova”.

Hata arumeyi oororomeleya a Yehova yaakhanle Yesu ohinatthi orwa valaponi, anrowa opirisariki wiixutta itthu sinceene. Nkahaya muupuwele: Vanrowa okhala voohakalaliha vanceene omutthokiherya Daniyeli wiiraneya wa iprofesia aalempe awe, masi ahiiwexexa awe. (Dan. 12:8) Nave muupuwele moota vanrowa aya oreera omwiixuttiha Ruthi ni Nowemi wiira Mesiya okhumelenle nloko nayasa. Tthiri, vanrowa okhala vootepa oreera ovara muteko owo wa olaleerya olumwenku wootheene. Okathi owo khaninrowa okhalanaka mixankiho ni oowokiwa ni olumwenku ola wootakhala.

Mpakeke exeeni niinaano-va wiira mwiilokiherye? Mwiimananiheke olokiherya inamuna siniixuttiha anyu ni olaleerya moohihiyererya. (Math. 24:14) Pooti wiira nenna-va khamunwerya olaleerya vanceene ntoko mwaaphavela anyu mwaha wa wuuluvala wala mathowa makina. Masi munimooniherya wiira munniphavela vanceene waalaleerya atthu anrowa ohihimuxiwa, mwiimananihaka olaleerya nenna-va ntoko vanwerya anyu.

Nto nikoho tinla: Niireke nyuwo munniphavela tthiri waakhela elapo? Niireke ni nyuwo nave munoona opisa ophiya elapo ela okhala eparayiisu, wiira mwaakhaliherye ale anrowa ohihimuxiwa ni owiixuttiha? Nto muttotteleke mureerelo iparakha sikhanle olelo-va, sa ovara miteko sinlikana ni iye munrowa anyu ovaraka okathi onrowa anyu waakhela elapo.