1. Exeeni mmiravo okhanle awe oopaka wiira olipihe waamini wawe?

 MWENE Davidi aahinvaha miruku mwanawe, Salomoni, ohimyaka so: “Mwiilipihe ni mulipe murima”. (1 Mam. 2:1-3, Biibiliya a Elapo Esya.) Miruku iyo, sinnivareleya muteko wa anna ootheene ari amiravo, aniphavela olipiha waamini waya. Wiira vaweryaneye, khula etthu anipaka aya, awo aahaana wiiwelela malamulo a Muluku ni weettela malakiheryo a mbiibiliyani. (Luka 2:52) Xeeni vari aya va faita anna ari amiravo okhalana waamini woolipa?

2-3. Xeeni vari aya va faita munna ori mmiravo okhala mukristau orina waamini woolipa?

² Mmiravo mukristau, ookhalana miritti sinceene mweemusini hata mmulokoni. Vakhala wiira mwa mmiravo, pooti wiira munnuupuwelela miritti munrowa anyu okhalana muhoolo. Nave woonasa wene, mookhalana yoolukama ya ovara muteko wa Muluku wa okathi wootheene, orumeela ntoko murumeyi ookhaliherya ni muhoolo mwaya, okhala mutokweene a mmulokoni. Nave waanyiheryasa munniphavela othela ni waayara anamwane. (aEef. 6:4; 1 Tim. 3:1) Wiira mmalelihe soolukama iyo, muhaana okhala mukristau orina waamini woolipa. b

³ Exeeni enrowa wookhaliheryani okhala mukristau orina waamini woolipa? Sookhala mikhalelo sinceene sooloka munireerela anyu okhalana. Exeeni munrowa anyu opaka nenna-va, wiira muhoolo nwerye omaleliha soothanla sanyu?

4. Munrowa ophwanya woowi matakiheryo ooloka mukhanle anyu ootthara? (Nwehe efootu.)

⁴ Muthanleke matakiheryo ooloka mukhanle anyu ootthara. Mbiibiliyani aakhala matakiheryo ooloka munna ori mmiravo  onireerela awe otthara. Matakiheryo awo a mbiibiliyani, ta alopwana yamphenta Muluku ni yiimananiha okhapelela saana miritti saya ni atthu a Yehova. Nave-tho munoophwanya matakiheryo ooloka a amusi anyu ari Anamoona a Yehova ni anna a mmulokoni. (aHeeb. 13:7) Nave mookhalana ntakiheryo noolokexa na Yesu Kristu. (1 Ped. 2:21) Okathi munsoma anyu matakiheryo awo ni ephoole, mmananiheke wuupuwelela mikhalelo sooloka arina aya. (aHeeb. 12:1, 2) Nuumala-vo, nweheke moota mukhanle anyu oowaatakiha alopwana awo owaamini.

5. Munrowa owerya sai okhalana ankhili, ni xeeni opaka eyo vari aya va faita? (Esalimo 119:9)

⁵ Mukhalane ni “mukhapelele osuwela . . . muhahiyé ankhili yolakaseyakani”. (Mir. 3:21) Mulopwana orina ankhili, onnuupuwela oratteene ni onnivaha ephoole ohinatthi opaka etthu. Tivonto, mwiimananiheke wiira mukhalane mukhalelo owo. Mwaha wa xeeni? Mwaha woowi olumwenku ola ninkhala ahu, aasareya alopwana anitthara miyuupuwelo saya aahiiso oowaakuva wootothiwa ni miyoonelo soohiloka. (Mir. 7:7; 29:11) Ohiya-vo, itthu ntoko ifilme, aredes sociais ni internet, pooti ohonona muupuwelo anyu ni moota munipaka anyu itthu. Nto munrowa owerya sai okhalana ankhili? Mpaceryeke nenna-va osoma aahiiso wiixutta malakiheryo a mbiibiliyani ni oweha efaita arina aya mookumi mwanyu. Murumeeleke malakiheryo awo okathi munrowa anyu opakaka soothanla sinrowa omuhakalaliha Yehova. (Musome Esalimo 119:9.) Akhala wiira munoottharaka malakiheryo a mbiibiliyani okathi munipaka anyu soothanla, eyo enimookhaliheryani okhala mukristau orina waamini woolipa. (Mir. 2:11, 12; aHeeb. 5:14) Nrowe nithokorerye moota ankhili anrowa aya wookhaliheryani nirumeelaka inamuna iya piili sinittharelana: Yoopacerya, moota munaathokorerya anyu arokora, ya nenli, moota munipaka anyu soothanla voohimya sa owara ni wiitthokiha.

6. Ankhili anrowa omukhaliherya sai munna ori mmiravo waattittimiha saana arokora?

⁶ Ankhili, animookhaliheryani waattittimiha saana arokora. Khivantthekeya, munna osiveliwa ni murokora ophavelaka omusuwela. Masi munna orina muupuwelo wooloka, khonrowa opaka etthu enrowa omwiiriha murokora wuupuwela wiira oniphavela omuthela, variki munna owo ohiphavelaka. (1 Tim. 5:1, 2) Vakhala  wiira munna onninamorari ni murokora, ohaana osyaka opaka itthu saarowa oveehiha nsina ni omutthu wa murokora owo. Nave munna owo ohaana osyaka okhala ni murokora owo ari ene anli aya paahi. — 1 aKor. 6:18.

7. Ankhili anrowa omukhaliherya sai munna ori mmiravo othanla ikuwo soowara ni moota wowiitthokiha?

⁷ Okathi munna onipaka awe soothanla sa moota woowara ni wiitthokiha, enamuna ekina onooniherya awe wiira ookhalana ankhili. Okhala wene, atthu yaale ahinittittimiha malamulo a Yehova aniwara attharaka ikuwo siri namoota. Muupuwelo woohiloka wa atthu awo, onniwiiriha ophavela owara ikuwo sootita ni sihinaasuwanyeiha akhala wiira alopwana aahiiso athiyana. Munna ori mmiravo oniphavela olipiha waamini wawe, ohaana otthara malakiheryo a mbiibiliyani okathi onithanla awe ikuwo soowara ni ovaha ntakiheryo nooloka mmulokoni. Owo pooti wiikoha so: ‘Kiireke soothanla saka kinnooniherya wiira kookhalana moonelo wooloka ni kinnaathokorerya atthu akina? Kiireke moota kiniwaraka ni wiitthokiha, enniwiiriha atthu akina wuupuwela wiira ka namoona a Yehova?’. (1 aKor. 10:31-33; Tito 2:6) Munna ori mmiravo onuupuwela saana myaha iya, onimooniherya nttittimiho ohiya paahi ni anna ni arokora a mmulokoni, masi-tho ni Tiithi awe a wiirimu, Yehova.

8. Exeeni mmiravo okhanle awe oopaka wiira okhale mutthu oororomeleya?

⁸ Muroromeleyeke. Mmiravo oororomeleya, onnivara saana miteko sawe. (Luka 16:10) Muupuwele ntakiheryo nooloka na Yesu. Yesu khaatonko ohiyererya miteko sawe, ohiya vo owo aanivara miteko sootheene aavekeliwa awe ni Yehova hata saari sooxankiha. Yena aanaaphenta atthu ootheene otepexa wene awiixutti awe ni aahileva okumi awe mwaha wa mureerelo aya. (Yoh. 13:1) Nyuwo pooti omutakiha Yesu, nvaraka muteko munceene wiira mmalelihe yoothanleliwa anyu. Vakhala wiira khamunsuwela ovara saana etthu nvekeliwe anyu, mwiiyeviheke ni mwaavekeleke anna anisuwela wiira yookhaliheryeni. Muhivareke miteko vakhaani musuwelaka wiira sookhala sikina. (aRom. 12:11) Ohiya-vo, mmaleliheke soothanleliwa sanyu “ntoko munimurumeela Yehova, ohiya atthu”. (aKol. 3:23) Ekeekhai wiira mwa mutthu oottheka, nto mwiiyeviheke ni mweemereryeke soovonya sanyu. — Mir. 11:2.

9. Xeeni mmiravo onireerela awe wiixutta itthu sikhanle oomukhaliherya khula nihiku?

⁹ Wiira mukhale mukristau orina waamini woolipa, muhaana wiixutta itthu sinrowa wookhaliheryakani khula nihiku. Wiixutta itthu iyo, sinimookhaliheryani omaleliha miritti sanyu sa mmulokoni. Nave sinimookhaliheryani ophwanya muteko woovara, waakhaliherya amusi anyu ni okhalana waataana wooloka ni atthu akina. Vano nrowe niwehe itthu iyo munireerela anyu wiixutta.

10-11. Vakhala wiira mmiravo onimwiixutta olepa ni osoma saana, mureerelo xeeni onrowa awe ophwanya ni ophwanyiha muloko? (Esalimo 1:1-3) (Nwehe efootu.)

¹⁰ Mwiixutteke osoma ni olepa saana. Biibiliya  onihimya wiira osoma Nuulumo na Muluku khula nihiku ni wuupuwelela, ninnimukhaliherya mutthu okhala oohakalala ni miteko sawe okhumela saana. (Musome Esalimo 1:1-3.) Okhalana yoosoma ya Biibiliya khula nihiku, enimookhaliheryani osuwela moota Yehova onuupuwela awe ni osuwela moota woovarihela muteko malakiheryo. (Mir. 1:3, 4) Munna onisuwela saana opaka itthu iya, ookhalana efaita yuulupale mmulokoni. Mwaha wa xeeni?

¹¹ Muloko onnaapirisari anna oophwanelela wiira avaheke miruku ni malakiheryo a mbiibiliyani. (Tito 1:9) Vakhala wiira munimwiixutta osoma ni olepa saana, munoolavulaka myaha ni munoolokiheryaka ikomentaario sinrowa olipiha waamini wa anna ni arokora. Nave munooweryaka olepa inoota sanyu okathi munimusoma anyu Biibiliya, okathi muniwiriyana anyu mwaha mmulokoni, waasembeleyani ni okongresuni. Inoota iyo sinimookhaliheryani olipiha waamini wanyu ni waalipiha atthu akina.

12. Exeeni enrowa wookhaliheryani osuwela olavula saana ni atthu akina?

¹² Musuweleke olavula saana ni atthu akina. Mukristau ohaana wiixutta olavula saana ni atthu akina. Munna onisuwela olavula saana ni atthu akina, onniwiriyana ni ephoole okathi anilavula aya ni onniiwexexa moonelo aya ni muupuwelo aya. (Mir. 20:5) Owo onoowerya osuwela moota anilavula aya, owehaka owiitho waya yaalavulaka ni itthu aniphavela aya ohimya. Munoowerya wiixutta itthu iyo sootheene nvirihaka okathi muri ene ni atthu akina. Vakhala wiira munooviriha okathi munceene nvaanelaka ni atthu awo, murumeelaka mensagem, aredes sociais aahiiso emeili, vanimoovilakani owaattamela wiira nvaanele. Mwiivaheke okathi wiira nvaanele muri ene hoothe. — 2 Yoh. 12.

13. Etthu xeeni ekina mmiravo onireerela awe wiixutta? (1 Timootheyo 5:8) (Nwehe efootu.)

¹³ Musuweleke orumeela saana musurukhu. Mukristau orina waamini woolipa, onnikhapelela saana ni onisuwela waakhapelela amusi awe. (Mmusome 1 Timootheyo 5:8.) Mapuro makina, amiravo anniixuttihiwa ovara saana muteko ni axipaapa aya aahiiso amusi aya akina. Nave mapuro makina, amiravo anniixutta oovara muteko okathi anisoma aya oskola. Moohicikha moota munrowa anyu wiixutta ovara muteko, ti vooloka osuwela ovara etthu enrowa wookhaliheryani muhoolo. (Mit. 18:2, 3; 20:34; aEef. 4:28) Mutthareke ntakiheryo na mutthu onivara muteko munceene ni apacerya onimaliha. Mwiira siiso, munoowerya ophwanya muteko ni ovara mahiku manceene. Mikhalelo nilavunle ahu ittima sivinre, sookhalana efaita wiira mukristu owerye omaleliha soothanla onrowa awe opaka muhoolo. Nrowe nithokorerye soothanla iyo.

14. Mmiravo onrowa wiilokiherya sai wiira okele muteko wa Muluku wa okathi wootheene?

¹⁴ Nyuwo pooti othanla ovara muteko wa Muluku wa okathi wootheene. Anna anceene arina waamini woolipa, apacenrye muteko wa Muluku wa okathi wootheene ari ene amiravo. Okhala pioneero onimookhaliheryani olavula saana ni atthu a makhalelo oovirikana. Nave onimookhaliheryani osuwela orumeela saana musurukhu muniphwanya anyu. (aFil. 4:11-13) Enamuna yooloka ya opacerya ovara muteko wa Muluku wa okathi wootheene, ori okhala pioneero ookhaliherya. Anna anceene yaahiivahererya orumeela ntoko mapioneero ookhaliherya miyeeri vakhaani, nto eyo yaahaakhaliherya wiilokiherya wiira arumeeleke ntoko mapioneero ookilaatheya. Nuumala okhala pioneero ookilaatheya, nyuwo pooti olattuliwa wiira mwavareke miteko sikina ntoko okhaliherya miteko sooteka ni okhaliherya oBeteli.

15-16. Exeeni enrowa omukhaliherya mmiravo wiira okhale murumeyi ookhaliherya aahiiso mutokweene?

¹⁵ Nyuwo pooti okhala murumeyi ookhaliherya aahiiso mutokweene. Anna ootheene a mmulokoni, annireerela wiimananiha vanceene wiira aphwanelele okhala axitokweene yaakhaliheryaka anna ni arokora. Biibiliya onihimya wiira, anna ootheene aniimananiha okhala mutokweene ‘awo anniphavela etthu yooreera’. (1 Tim. 3:1) Ohinatthi okhala mutokweene, munna ohaana okhala murumeyi ookhaliherya. Arumeyi ookhaliherya, annaakhaliherya axitokweene waakhapelela anna ni arokora a mmulokoni mwa inamuna soovirikana. Axitokweene ootheene ni arumeyi ookhaliherya, moowiiyeviha anaakhaliherya anna ni arokora ni oluttuweliwa muteko woolaleerya. Amiravo pooti othanliwa okhala arumeyi ookhaliherya nuumala ophiyeriha iyaakha 16. Arumeyi ookhaliherya aniphwanelela, pooti othanliwa okhala axitokweene arina ene iyaakha 20.

¹⁶ Exeeni mukhanle anyu oopaka wiira mukhale murumeyi ookhaliherya aahiiso mutokweene? Biibiliya onnihimya mikhalelo munireerela anyu okhalana. Muhiliyale wiira mikhalelo iyo sinivarihana ni Biibiliya, omphenta wanyu Yehova, amusi ni muloko. (1 Tim. 3:1-13; Tito 1:6-9; 1 Ped. 5:2, 3) Mpakeke khula etthu muniwerya anyu wiira mwiiwexexe etthu enihela muhina khula mukhalelo. Ohiya-vo, munvekeleke Yehova wiira ookhaliheryeni okhalana mikhalelo iyo. c

17. Mmiravo onrowa wiilokiherya sai wiira okhale namaiyawe ni muhooleli a etthoko ooloka? (Nwehe efootu.)

¹⁷ Nyuwo pooti othanla othela ni okhala muhooleli a etthoko. Moovarihana ni masu a Yesu, makristau makina arina waamini woolipa, annithanla  okhala ahithenle. (Math. 19:12) Vakhala wiira munoothanla othela, munookhalana muritti wa okhala namaiyawe ni muhooleli a etthoko. (1 aKor. 11:3) Yehova oniphavela wiira mulopwana oothela, omphenteke saana mwaarawe, omukhaliheryaka olipiha waamini wawe ni onvahaka itthu sinimuthowa. (aEef. 5:28, 29) Mikhalelo sootheene ni itthu munireerela anyu wiixutta nithokorenrye ahu mwaha ola, ntoko ankhili, waattittimiha athiyana ni okhala oororomeleya, sinimookhaliheryani ookhala mulopwana oothela ni muhooleli ooloka.

18. Mmiravo onrowa wiilokiherya sai wiira okhale paapa ooloka?

¹⁸ Othanla waayara anamwane. Nuumala othela, nyuwo pooti othanla waayara anamwane. Exeeni munireerela anyu wiixutta ni Yehova sa okhala tiithi ooloka? Munimwiixutta itthu sinceene. (aEef. 6:4) Yehova khuuleliwa muru omuleela mwanawe, Yesu, wiira aanimphenta ni aanisiveliwa ni yena. (Math. 3:17) Vakhala wiira munookhalana mwaana, muhuuleliweke muru omuleela wiira munnimphenta nave apaka etthu yooloka mmuxukhureleke. Anamuyari anitthara ntakiheryo na Yehova, annaakhaliherya anaaya okhala makristau arina waamini woolipa. Wiira mwiilokiherye okhala tiithi ooloka, muhaana owooniherya amusi anyu nenna-va, anna ni arokora a mmuloko wiira munnaaphenta ni munnaavaha efaita. (Yoh. 15:9) Nave itthu iyo sinimookhaliheryani muhoolo nuumala othela ni okhala muhooleli a etthoko. Mulipelelaka ophiya okathi owo, mukupaliki wiira Yehova, amusi anyu ni anna ni arokora annovahani efaita.

19-20. Exeeni enrowa waakhaliherya amiravo okhala makristau arina waamini woolipa? (Nwehe efootu ya vakaapani.)

¹⁹ Amiravo, muhaana wiimananiha wiira mukhale mukristau orina waamini woolipa. Muthanleke matakiheryo ooloka munireerela anyu otthara, okhalana mikhalelo ntoko ankhili, ororomeleya, wiixutta itthu sinrowa wookhaliheryani mookumini mwanyu ni wiilokiherya wiira mukhalane miritti muhoolo.

²⁰ Woonasa wene, nyuwo pooti oxankaka okathi munuupuwela anyu miritti sootheene munireerela anyu ookhalana muhoolo. Masi munoowerya. Muhiliyale wiira Yehova onniphavela wookhaliheryani. (Yes. 41:10, 13) Nave anna ni arokora a mmulokoni animookhaliheryakani. Mwakhalana waataana wooloka ni Yehova, okumi anyu onrowa okhala woohakalaliha. Ninnoophentani vanceene nyuwo anna muri amiravo! Mukupaliki wiira Yehova onimooreelihani mwaha wa wiimananiha wanyu okhala mukristau orina waamini woolipa. — Mir. 22:4.