1. Exeeni nikhanle ahu oopaka wiira nikhale makristau arina waamini woolipa?

 TI VOOHAKALALIHA onweha mwaana annuwaka moowaakuveya. Masi khuuvo onisuwela moota mwaana oninnuwa awe. Moovirikana ni vo, naaphavelaka olipiha waamini wahu nittharaka ntakiheryo na Yesu, nihaana opaka etthu. b (1 aKor. 13:11; aHeeb. 6:1) Wiira mutthu okhale mukristau orina waamini woolipa, ohaana wiimananiha vanceene. Ohiya-vo, owo ohaana okhaliheriwa ni munepa woowaarya wiira okhalane mikhalelo sooloka, owerya ovara muteko saana ni wiilokiherya wiira muhoolo okhalane miritti. — Mir. 1:5.

2. a) Maphattuwelo 1:27 onniixuttiha exeeni? b) Exeeni ninrowa ahu othokorerya mwaha ola?

² Yehova, aahaapattuxa apinaatamu mulopwana ni muthiyana. (Musome Maphattuwelo 1:27.) Ti vookhweya onweha wiira ola mulopwana aahiiso muthiyana. Masi sookhala itthu sikina siniwiiriha okhala atthu oovirikana. Mwa ntakiheryo, Yehova onvaha mulopwana ni muthiyana miritti soovirikana. Nave onvaha khula mmosa ikuru sinrowa omukhaliherya ovara saana muritti awe. (Maph. 2:18) Mwaha ola, nnoothokorerya moota murokora ori mwali, okhanle awe oolipiha waamini wawe. Mwaha onittharelana, ninrowa wiixutta moota anna ari amiravo akhanle aya oolipiha waamini waya.

3-4. Arokora imwali anrowa ophwanya woowi matakiheryo ooloka akhanle aya ootakiha? (Nwehe efootu.)

³ Biibiliya, onnaaromola athiyana anceene yamphenta ni yaamurumeela Yehova. (Nwehe mwaha oni: “O que podemos aprender das mulheres mencionadas na Bíblia?”  ori va jw.org.) Ntoko yoolepa ya mwaha ola enihimya aya, athiyana awo yaanisuwela “wiiphimela itthu sotheene” ni yaari ‘oororomeleya mwa itthu sootheene’. Olelo-va, mmulokoni aakhala arokora anceene arina waamini woolipa, yaawo arokora ari aximwali akhanle aya oowaatakiha.

⁴ Niireke munnimusuwela murokora orina ntakiheryo nooloka mukhanle anyu ootthara? Nweheke mikhalelo xeeni orina awe, nuumala-vo, muupuweleke moota mukhanle anyu ootakiha mikhalelo iyo. Ittima sinttharelana, nnooweha mikhalelo miraru arokora anireerela aya okhalana.

5. Xeeni wiiyeviha ori aya mukhalelo wa efaita wa murokora orina waamini woolipa?

⁵ Wiiyeviha, mukhalelo wa faita makristau anireerela aya okhalana. Akhala wiira murokora toowiiyeviha, onookhalana ompatthani wooloka ni Yehova ni atthu akina. (Yak. 4:6) Mwa ntakiheryo, muthiyana onimphenta Yehova ni oowiiyeviha onniiwelela malakiheryo akumiheriwe ni Yehova voohimya sa okhala muhooleli. (1 aKor. 11:3) Malakiheryo awo, Yehova oomuhimya mutthu okhanle ookhapelelaka muloko ni emusi. c

6. Arokora imwali, exeeni aniixutta aya ni wiiyeviha wa Rebeka?

⁶ Nrowe niwehe ntakiheryo na Rebeka. Owo aari muthiyana ankhili ni oolipa murima, nave aanisuwela okathi ni moota woopaka itthu. (Maph. 24:58; 27:5-17) Hata vari siiso, khula okathi aari oottittimiheya ni oowiiwelela. (Maph. 24:17, 18, 65) Vakhala wiira munoomutakihaka Rebeka okhala oowiiyeviha, nwiiwelelaka ale Yehova aavanhe awe okhulupale, munimwaahakalaliha amusi anyu vamosa ni muloko.

7. Arokora anrowa wooniherya sai wiisuumaaliha attharaka ntakiheryo na Esteeri?

⁷ Wiisuumaaliha, mukhalelo mmosa makristau anireerela aya okhalana. Biibiliya onihimya wiira “vari wisunnuwiha wokhala-vo wuliwa muru”. (Mir. 11:2) Esteeri ari muthiyana ni murumeyi oororomeleya a Yehova. Mwaha woowiisuumaaliha, eyo yaahimukhaliherya  ohikhala oowiixinnuwiha okathi aakhalihiwe awe pwiyamwene. Owo aahiiwelela malakiheryo aavahiwe awe ni maanu awe, Mardokeyo, ni aahivarihela muteko. (Esth. 2:10, 20, 22) Nave nyuwo munoowerya otakiha wiisuumaaliha wa Esteeri, mwaakohaka atthu akina miruku ni weettela. — Tito 2:3-5.

8. Moovarihana ni 1 Timootheyo 2:9, 10, wiisuumaaliha onrowa waakhaliherya sai arokora othanla mwa miruku ikuwo soowara?

⁸ Esteeri, aahooniherya wiisuumaaliha mwa enamuna ekina. Owo aari “òrerexa, vokuxa mirima s’atthu othene yamona”, hata vari siiso, owo khaittottopa. (Esth. 2:7, 15) Arokora anrowa omutakiha sai Esteeri? Enamuna emosa akhanle aya oopaka eyo, ori weettela miruku siri 1 Timootheyo 2:9, 10. (Mmusome.) Yoolepa ela, murummwa Paulo aahimmye wiira athiyana awareke ikuwo ntoko vaniphwanela aya ni vookhalela. Nuulumo na ekereku nirumeeliwe va, ninnaatumererya athiyana makristau owara mwa enamuna yooloka yuupuwelaka moonelo wa atthu akina. Ninnixukhurela vanceene waaweha arokora yiiwelelaka malakiheryo ala ni awaraka mwa enamuna yooloka!

9. Exeeni nniixutta ahu ni ntakiheryo na Abigayili?

⁹ Ankhili, mukhalelo mukina makristau ootheene anireerela aya okhalana. Masi ankhili exeeni? Mukhalelo onnikhaliherya osuwela etthu yooloka ni yoohiloka, nuumala-vo nnathanla etthu yooloka. Nrowe niwehe ntakiheryo na Abigayili. Iyawe aahipaka etthu yoohiloka yaarowa waaphwanyiha mixankiho atthu ootheene yaakhala ni yaavara muteko vatthokoni vawe. Masi Abigayili aahipaka etthu moowaakuveya. Mwaha waivaavo, aahoopola ikumi sa atthu anceene. (1 Sam. 25:14-23, 32-35) Nave ankhili anoonikhaliherya osuwela okathi woolavula ni okathi woomaala. Nave-tho, anninikhaliherya waathokorerya saana atthu akina, nihiikelihaka myaha saya sihinnira mpantta. — 1 Tes. 4:11.

10-11. Osoma ni olepa saana sinrowa wookhaliheryani sai nyuwo ni atthu akina? (Nwehe efootu.)

¹⁰ Murokora ohaana wiixutta opaka etthu enrowa omukhaliherya khula nihiku. Itthu sikina pooti wiixutta muri ene mwaana nave sinimookhaliheryani okumi anyu wootheene. Vano nrowe niwehe itthu iyo munireerela anyu wiixutta.

¹¹ Mwiixutteke osoma ni olepa saana. Soolema sa ilapo sikina, atthu anuupuwela wiira khahiyo wa faita muthiyana wiixutta osoma ni olepa. Ohiya vo, owo mukhalelo makristau ootheene anireerela aya okhalana. d (1 Tim. 4:13) Tivonto, ehikhale etthu enrowa owiirihani  wooceela osuwela osoma ni olepa saana. Mareeliho xeeni anikhumelela? Vanniweryaneya ophwanya muteko. Nave munooweryaka osoma ni owiixuttiha saana atthu akina Nuulumo na Muluku. Etthu ekina ya faita, okhala wiira munooweryaka omusoma Biibiliya, wuupuwelela ni okhala mpatthani ooloka a Yehova. — Yoox. 1:8; 1 Tim. 4:15.

12. Miruku 31:26 oniwiixuttihani exeeni?

¹² Musuweleke moota woolavula ni atthu akina. Ti vooloka mukristau osuwela olavula saana ni atthu akina. Olavulaka sa mwaha ola, murummwa Yakobo, ohimye so: “Khula mutthu ohana wakuvela owiriyana, masi apiseke olavula”. (Yak. 1:19) Vaavo muniwiriyana anyu ni ephoole okathi atthu akina anilavula aya, munnooniherya wiira mookhalana “othunku” aahiiso munaamorela ikharari. (1 Ped. 3:8) Akhala wiira khamwiiwexenxe etthu elavuliwe ni mutthu mukina aahiiso moonelo awe, mukoheke mwa enamuna yooloka. Nto muhinatthi olavula mwiivaheke okathi wiira muupuwele saana. (Mir. 15:28) Mwiikoheke so: ‘Etthu kinrowaaka olavula ti yeekeekhai aahiiso kinoomulipiha mutthu mukina? Kinoolavula mwa nttittimiho aahiiso mooreera murima?’ Mutthareke ntakiheryo na arokora anilavula mooreera murima ni mwanttittimiho. (Musome Miruku 31:26.) Mwaawiriyaneke ni ephoole moota anilavula aya. Wiimananiha olavula saana ni atthu akina, enimookhaliheryani okhalana apatthani ooloka ni okhalana murettele ni atthu akina.

13. Munrowa wiixutta sai okhapelela etthoko? (Nwehe efootu.)

¹³ Mwiixutteke moota wookhapelela saana etthoko. Ilapo sikina, athiyana tanikhapelela etthoko. Maama anyu aahiiso murokora mukina onisuwela ovara saana muteko, woonasa wene pooti wookhaliheryani. Murokora mmosa oniitthaniwa Cindy, ohimmye so: “Etthu yooloka maama aka okiixuttinhe awe, ori osuwela wiira ovara miteko soovila etthu yoohakalaliha. Oxutta waapeya, okwesa vate, ottottha ni othuma itthu omerkaatu, sookhweiherya okumi aka ni sookikhaliherya wuncererya muteko oninvarelaka Yehova. Nave maama aka, ookikhaliherya owaakhela saana aletto ni eyo yookiiriha waasuwela saana anna ni arokora arina matakiheryo ooloka kikhanle aka ootthara”. (Mir. 31:15, 21, 22) Muthiyana a ankhili, onisuwela owaakhela saana aletto ni onikhapelela saana etthoko awe, onnihakalaliha emusi awe nave onnivaha ntakiheryo nooloka mmulokoni. — Mir. 31:13, 17, 27; Mit. 16:15.

14. Exeeni mwiixuntte anyu ni yoowiiraneya ya murokora Cristal, ni exeeni muhinreerela anyu oliyala?

¹⁴ Musuweleke wiikhapelela saana. Khula mukristau ohaana wiixutta moota woowiikhapelela. (2 aTes. 3:7, 8) Murokora Cristal, onihimya so: “Okathi kaasomaka oskola, anamuyari aka yaahikikhaliherya othanlela itisipiliina saarowa okikhaliherya muhoolo. Paapa  aka, aahikitumererya wiixutta moota woopaka ikontha, nto eyo yaahikikhaliherya vanceene”. Ohiya paahi wiixutta itthu sinrowa wookhaliheryani ophwanya muteko, muhaana wiixutta moota woorumeela musurukhu mwa miruku. (Mir. 31:16, 18) Mwaahakalalaka ni itthu murina anyu munasyaka okopha-kopha, eyo enimookhaliheryani wuncererya muteko muninvarela anyu Yehova. — 1 Tim. 6:8.

15-16. Xeeni arokora oohitheliwa arina aya efaita yuulupale mmulokoni? (Marko 10:29, 30)

¹⁵ Okhalana mikhalelo sinlipiha waataana wanyu ni Yehova ni wiixutta ovara itthu sikina, sinimookhaliheryani ni soothanla munrowa anyu opaka muhoolo. Nwehe matakiheryo vakhaani a itthu mukhanle anyu oothanla.

¹⁶ Nyuwo pooti othanla okhala muhitheliwe mwa okathi vakhaani. Yesu aahihimya wiira athiyana akina yaamuthanla okhala ahitheliwe, hata mapuro yaale atthu akina anivaha aya efaita ekasamento. (Math. 19:10-12) Akina pooti okhala oohitheliwa mwaha wa mathowa oovirikana. Masi mukupaliki wiira Yehova ni Yesu annaavaha efaita arokora oohitheliwa. Arokora oohitheliwa olumwenku wootheene, annivaha matakiheryo ooloka mmulokoni. Mwaha wa ophenta ni waathokorerya waya saana atthu akina, awo anithokoreriwa okhala arokora ni aximaama a atthu akina a mmulokoni. — Mmusome Marko 10:29, 30; 1 Tim. 5:2.

17. Murokora ori mwali, onrowa wiilokiherya sai wiira okele muteko wa Muluku wa okathi wootheene?

¹⁷ Nyuwo pooti othanla ovara muteko wa Muluku wa okathi wootheene. Muteko munceene woolaleerya olumwenku wootheene, onivariwa ni arokora. (Esal. 68:12) Niireke munoowerya okela muteko wa Muluku wa okathi wootheene? Nyuwo pooti okhala Pioneera, wiivahererya okhaliherya okathi vakhaani muteko wooteka aahiiso orumeela oBeteli. Munvekeleke Yehova voohimya sa itthu muniphavela anyu. Mwaakoheke atthu akina awenrye opaka eyo ni nweheke etthu mukhanle anyu oopaka wiira nwerye. Nave mpakeke soothanla sinrowa wookhaliheryani ophwanya ele muniphavela anyu. Musuweleke wiira okela muteko wa Muluku wa okathi wootheene, onimookhaliheryani ompakela Yehova itthu sikina soohakalaliha.

18. Xeeni vari aya va faita murokora omuthanla saana munna onrowa omuthela? (Nwehe efootu.)

¹⁸ Nyuwo pooti othanla otheliwa. Mikhalelo  ni itthu sootheene niwenhe ahu mpakha-va, sinimookhaliheryani okhala muthiyana ooloka. Masi vakhala wiira muniphavela otheliwa, muhaana omuthanla mwa miruku ole onrowa woothelani. Musuweleke wiira eyo yoothanla yuulupale munrowa anyu opaka mookumini wanyu. Muhiliyale wiira, munrowa wiiwelelaka soothanla sa mulopwana mmuthanlale anyu wiira ootheleeni. (aRom. 7:2; aEef. 5:23, 33) Mwiikoheke so: ‘Kiireke munna ole ookhalana waamini woolipa? Onnihela muteko wa Yehova nipuro noopacerya mookumini mwawe? Onnipaka soothanla sooloka? Onneemya soovonya sawe? Onnaattittimiha athiyana? Kiireke onoowerya okikhaliherya olipiha ompatthani aka ni Yehova, okikhapelela ni okhala mpatthani aka ooloka? Kiireke onnimaleliha miteko onivahiwa awe? Mwa ntakiheryo, miritti xeeni orina awe mmulokoni ni onikhapelela sai?’ (Luka 16:10; 1 Tim. 5:8) Tthiri mwaaphavelaka omphwanya mulopwana ooloka, nyuwo muhaana wiilokiherya wiira mukhale muthiyana ooloka.

19. Xeeni murokora onireerela awe ohakalalaka vaavo oniitthaniwa awe ‘namakhaliherya’ a iyawe?

¹⁹ Biibiliya onihimya wiira muthiyana ooloka, ‘namakhaliherya’ a iyawe. (Maph. 2:18) Niireke eyo enooniherya wiira muthiyana khorina efaita? Nnaari! Maana okhala namakhaliherya etthu ya efaita yuulupale. Ikwaha sinceene, Biibiliya onnimuhimya Yehova okhala ‘namakhaliherya’. (Esal. 54:6; aHeeb. 13:6) Muthiyana onimooniherya okhala namakhaliherya a ekeekhai okhaliheryaka ni weemererya miyoonelo ni soothanla sa iyawe. Mwaha womphenta Yehova, owo onnaakhaliherya atthu akina oweha wiira iyawe ookhalana mikhalelo sooloka. (Mir. 31:11, 12; 1 Tim. 3:11) Munoowerya wiilokiherya wiira mukhale muthiyana ooloka, mulipihaka omphenta wanyu Yehova ni mwaakhaliheryaka atthu akina akhale amusi anyu aahiiso a mmulokoni.

20. Exeeni maama okhanle awe oopaka wiira okhaliherye emusi awe?

²⁰ Nyuwo pooti othanla waayara anamwane. Nuumala otheliwa, nyuwo ni iyanyu pooti ompaka palano oowaayara anamwane. (Esal. 127:3) Masi, muhaana wuupuwelela etthu enihela muhina okhala maama ooloka. Mikhalelo ni itthu niixuntte ahu mwaha ola, sinimookhaliheryani okhala muthiyana ootheliwa ni maama ooloka. Mwakhalana ophenta, oreera murima ni opixa murima, munookhaliherya emusi anyu okhala yoohakalala nave aniinyu anoorowa oweha wiira anniphentiwa ni okhapeleliwa. — Mir. 24:3.

21. Niwooneleke sai arokora, ni mwaha wa xeeni? (Nwehe efootu ya vakaapani.)

²¹ Arokora, ninnoophentani mwaha wa muteko muninvarela anyu Yehova ni arumeyi awe. (aHeeb. 6:10) Munniimananiha wiira mukhalane mikhalelo sooloka, wiixutta itthu sikina ni wiilokiherya ni soothanla munrowa anyu opaka muhoolo. Mwaha woopaka eyo, nyuwo munnikhweiherya okumi anyu ni atthu akina annitteeliwa murima. Mukupaliki wiira mookhalana efaita yuulupale mmutthenkesoni mwa Yehova!