NINNIXUKHURELA itthu sootheene Yehova onivanhe awe, ohela muhina orumeela mootaphuwa soovaha iyo. Moovarihana ni Biibiliya, eviinyu yoovaha ya Yehova. Owo onihimya so: “Evinyu enatteliha mirima saya, . . . ephau enalipiha irutthu saya”. (Mus. 10:19; Esal. 104:15) Woonasa wene mooweha wiira atthu akina, aakhalana muxankiho ni eviinyu aahiiso owurya mootepana. Ohiya-vo, atthu akina aakhalana miyoonelo soovirikana moovarihana ni elapo anikhala aya aahiiso makhalelo aya. Exeeni enrowa omukhaliherya mukristau opaka soothanla sooloka nilavulaka sa eviinyu?

Moohicikha yoolema ya elapo niyariwe ahu aahiiso makhalelo ahu, nihaana wiiwelelaka malakiheryo a mbiibiliyani, niira siiso nnaamuhakalala.

Ntoko munisuwela anyu, atthu anceene a moolumwenkuni anniwurya eviinyu ikwaha sinceene ni mootepana. Atthu anceene anniwurya eviinyu aphavelaka ohakalala. Nave atthu akina anniwurya aphavelaka oxintta mixankiho arina aya. Mutthu yoole owuryexa, onnooniwa okhala ooloka ni aikuru.

Makristau ahaana owurya eviinyu attharaka malakiheryo oophenta a mpattuxa aya. Mwa ntakiheryo, Yehova onnihimya mixankiho sinikhumelela mwaha wa owuryexa. Eliivuru ya Miruku 23:29-35, ennilavula sa mutthu oniwurya eviinyu mootepana ni mixankiho sinimukhumelela. a Daniel mutokweene yoowo onikhala wEuropa, uupuwelaka moota okumi awe waari aya ohinatthi okhala Namoona a Yehova, ohimmye so: “Kaanihapaliwa vanceene ni kaanipaka soothanla soohiloka nave saanikikhumelela mixankiho. Olelo-va okathi kinuupuwelelaka itthu iyo kinniriipiwa murima”.

Ninrowa owerya sai opaka soothanla sooloka ni osyaka mixankiho sinikumiheriwa ni eviinyu? Nnoopaka eyo neemereryaka wiira malakiheryo a Muluku anikhaliheryeke opaka soothanla.

Nrowe niwehe ele Biibiliya onihimya awe sa eviinyu ni etthu eniwiiriha atthu akina owuurya.

Biibiliya khonikhoottiha owurya eviinyu, masi ni mphimo. Maana owo onihimya wiira eviinyu ennihakalaliha murima. Musuweli 9:7 onihimya so: “Mulyeke solya sanyu n’utteliwa murima: nwuryeke evinyu anyu n’usiveliwa”. Yesu ikwaha sikina aaniwurya eviinyu nave arumeyi oororomeleya a khalai yaaniwurya. — Math. 26:27-29; Luka 7:34; 1 Tim. 5:23.

Biibiliya onihimya wiira wookhala ovirikana owurya ni mphimo ni ohapaliwa. Owo onihimya so: “Muhihapaliweke, okhala wira ohapaliwa onnimwiiriha mutthu opaka itthu sootepa otakhala”. (aEef. 5:18) Onnincererya ohimyaka so: “Anamuhapaliwa, . . . khanaakhela Omwene wa Muluku”. (1 aKor. 6:10) Soolepa iya sinnooniherya wiira Yehova onninyokha owuryexa ni ohapaliwa. Ohiya waatakihaka atthu ni soothanla saya, hiyo ninniiwelela malakiheryo a Muluku wiira nimuhakalalihe.

Atthu akina, anoona wiira pooti owurya vanceene masi yaahihapaliwe-ru. Moonelo owo ti woohiloka. Biibiliya onnooniherya oratteene wiira ale ari “ipottha sa evinyu” ikwaha sikina annihonona mweettelo aya wooloka ni annimutthekela Muluku. (Tito 2:3; Mir. 20:1) Hata Yesu onninlopola wiira ‘ale aniwurya vanceene’ pooti ohikela elapo esya. (Luka 21:34-36) Exeeni mukristau okhanle awe oopaka wiira osyake mixankiho sinikumiheriwa ni eviinyu?

Etthu yootakhala weemererya owurya eviinyu mwaha wa makhalelo ninkhala ahu. Ntoko makristau, nihaana otthara malakiheryo a Yehova voohimya sa yoolya ni owurya, opaka eyo nnimooniherya wiira nookhalana ankhili. Biibiliya onninuupuxerya ohimyaka so: “Mwaalyaaka wala mwaawuryaka aahiiso mwiiraka khula etthu, mpakeke itthu sotheene mphavelaka onvuwiha Muluku”. (1 aKor. 10:31) Muupuwelele makoho ni malakiheryo a mbiibiliyani anittharelana:

Kiireke kiniwurya eviinyu wiira kaasivelihe atthu akina? Eliivuru ya Okhuma 23:2 onihimya so: “Mutthareke exariya, muhattharé anawothe”. Eversiikulu ela Yehova aatumererya aisarayeli wiira ahaatthareke atthu anipaka itthu sihinimusivela. Malakiheryo awo annivareleya muteko olelo-va. Akhala wiira nnimweemererya otakiha ni otthara soothanla sa atthu akina, pooti oniiriha ohiya omurumeela Yehova. — aRom. 12:2.

Kiireke kiniwurya eviinyu kiphavelaka owooniherya atthu akina wiira kookhalana ikuru? Soolema sa mittetthe sikina, owurya eviinyu vanceene onneemereriwa ni ohuulaana. (1 Ped. 4:3) Masi nwehe miruku siri 1 aKorinto 16:13 sini: “Mukhaleke oowehaweha, mulipiheryeke waamini wanyu, mukhaleke oolipa murima”. Niireke eviinyu ennimukhaliherya mutthu okhalana ikuru? Nnakhala vakhaani. Eviinyu pooti omwiiriha mutthu ohuupuwela saana ni ohiwerya opaka soothanla sooloka. Ohimya ekeekhai, owurya eviinyu mootepana ohiya onivaha ikuru enoonikhulumula. Yesaya 28:7 onihimya wiira ale aniwurya mootepana animwiikumiherya maxakha.

Ikuru seekeekhai sa Yehova ‘sinniviriha ephiro yooreera’. (Esal. 18:33) Nnootthara ephiro eyo vakhala wiira nnoovaha ephoole ni osyaka itthu saarowa oniiriha ohiya omurumeela Yehova. Yesu okathi aari awe valaponi, aahooniherya ikuru iyo sinikhuma wa Yehova, okhala wiira atthu anceene yaanimuttittimiha ni aari oolipa murima.

Kiireke kiniwurya wiira kixintte mixankiho saka? Nasaalimo Davidi aahirummwa olepa so: “Ovelavela n’uxanka wahìniha murim’aka: vano nyuwo [Yehova] mokihakalaliha, khukitteliha murima”. (Esal. 94:19) Nto mwakhalana muxankiho mmuroromeleke Yehova ohiya eviinyu. Enamuna emosa mukhanle anyu oopaka eyo ori ohihiya onvekela Yehova. Atthu akina, annivekela miruku mutthu orina waataana wooloka ni Yehova nave  opaka eyo ehaakhaliherya vanceene. Vekeekhai, owurya eviinyu mootepana niphavelaka oxintta mixankiho pooti oniiriha opaka soothanla soohiloka. (Hos. 4:11) Daniel, yoowo nimulavunle ahu wanipacerya, onihimya so: “Miyo kaaniwuryexa mwaha wa mixankiho kaarinaka ni kaaniivaha nthowa. Kaamananiha oxintta mixankiho iyo meekhaka, maasi ohiya ovukuwa saamutepeleleya. Mwaha waivaavo, kaahaayeleela apatthani aka ni atthu akina yaahihiya okittittimiha”. Exeeni yaamukhalihenrye Daniel? Owo onihimya so: “Kaahoona wiira kaahaana okhaliheriwa ni Yehova, ohiya ni eviinyu. Nto kikhaliheriwaka ni Yehova koowerya oxintta mixankiho iyo”. Yehova ori oolikana ene wiira onikhaliherye, hata noonaka wiira muxankiho owo khaninwerya oxintta. — aFil. 4:6, 7; 1 Ped. 5:7.

Vakhala wiira munniwurya eviinyu, nyuwo pooti ovarerya mwaha owo mwiipakelaka makoho ala anittharelana: ‘Kiireke mutthu a vatthokoni vaka aahiiso mpatthani aka ootoko oxankiheya mwaha wa moota kiniwurya aka eviinyu?’ Mwaakhula wiira aayo, eyo enooniherya wiira mookhalana muxankiho aahiiso mweettelo woohiloka. ‘Kiireke kinniwurya eviinyu mootepana ovikana khalai?’ Etthu ntoko eyo, woonasa wene pooti ehikhanle yoolema anyu masi mwaahivahe ephoole pooti okhala yoolema anyu. ‘Kiireke kinniwerya okhala mahiku vakhaani aahiiso manceene kihiwunrye eviinyu?’ Moona wiira vannoovilani opaka eyo, musuweleke wiira eviinyu ehoottottorolani. Nto muhaana waaphavela mameediku wiira yookhaliheryeni oxintta muxankiho owo.

Mwaha wa mixankiho sinaakhumelela ale aniwurya eviinyu, sinniwiiriha makristau makina othanla ohiwurya eviinyu. Atthu akina annithanla ohiwurya eviinyu maana khenaasivela aahiiso enoowunkherya. Etthu ninreerela ahu opaka, ori ottittimiha miyoonelo ni soothanla sa anna ni arokora.

Woonasa wene nyuwo pooti wiivaha mphimo ni moota muniwurya anyu eviinyu. Nave makristau anithanla owurya eviinyu annireerela opaka eyo yiivahaka mphimo. Nyuwo pooti oweha moota muniwurya anyu eviinyu, woonasa wene nwuryaka ekwaha emosa vasumanani aahiiso owurya vakhaani nuumala olya. Nave atthu akina annithanla eviinyu anireerela aya owurya pooti okhala serveexa masi ohiya ntture aahiiso mwaakhemmwaalo. Nto wiivaha mphimo onimookhaliheryani othanla moota woowurya ni mwaattelo wa eviinyu. Okathi mukristau oniivaha awe mphimo,  khivaniprisari wuuleliwa muru ni moota atthu akina anrowa aya woonelaka.

Okathi munipaka anyu soothanla voohimya sa eviinyu, muhaana wuupuwela moota atthu akina anrowa aya woonela. ARoma 14:21 onihimya so: “Fataari ohikhuura enama aahiiso ohiwurya eviinyu, nnakhala opaka etthu enrowa ovukula waamini wa munninyu”. Munrowa owerya sai ovarihela muteko miruku iya? Mwaaphentaka anna ni arokora. Vakhala wiira munoothanla owurya eviinyu masi munoona wiira munoovukula waamini wa munninyu, munoonela sai ohipaka eyo? Munimooniherya waattittimiha ni waathokorerya atthu akina, vakhala wiira munoophavela mureerelo wa atthu akina ohiya mureerelo anyu paahi. — 1 aKor. 10:24.

Ohiya-vo, pooti wiira kuvernu oovaha malamulo voohimya sa eviinyu nto makristau ahaana wiiwelela malamulo awo. Mwa ntakiheryo, malamulo awo pooti ohela muhina okhoottiheriwa anamwane owuurya eviinyu, oheemereriwa owurya eviinyu mweettihaka ekaaro wala etthu ekina. — aRom. 13:1-5.

Yehova oonivaha itthu sinceene, emosa wa seiyo, opaka soothanla mootaphuwa ni moota ninrowa ahu orumeela soovaha iyo. Eyo enihela muhina othanla moota ninrowa ahu owurya ni olya. Ninnixukhurela vanceene ni yoovaha ela ya othanla mootaphuwa, nave nimphavela opaka soothanla sinrowa omuhakalaliha Tiithi ahu a wiirimu, Yehova.