1. Exeeni yaamukupaliha Abrahamu wiira aamukhalana mwaana?

 YEHOVA aahimuleiherya mpatthani awe, Abrahamu, wiira aamukhalana mwaana, nave maloko ootheene a valaponi yaamureelihiwa mwaha wa mwaana owo. (Maph. 15:5; 22:18) Abrahamu aanimwaamini vanceene Muluku, eyo yaahimwiiriha okupali wiira yooleiherya ya Muluku yaamwiiraneya. Masi Abrahamu aarina iyaakha 100 nave Sara 90, nlelo awo yiira ahinatthi omuyarasa mwaana. (Maph. 21:1-7) Hata vari siiso, Biibiliya onihimya so: “Mwaha wa nlipelelo aarina awe, owo aanaamini wira aamukhala tiithi a maloko manceene, ntoko Muluku aahimmye awe”. (aRom. 4:18) Ntoko ninsuwela ahu, etthu Abrahamu aalipelela awe yaahiiraneya. Owo aahikhala tiithi a mwaana aaleiheriwe, Isakhi. Xeeni Abrahamu aareerela awe okupali wiira Yehova ammaleliha yooleiherya awe?

2. Exeeni yaamukupaliha Abrahamu wiira yooleiherya ya Yehova yaamwiiraneya?

² Abrahamu aanimusuwela oratteene Yehova, ti nthowa naya “owo aanikupali tthiri wira Muluku aarowa opaka ele aaleihenrye awe”. (aRom. 4:21) Yehova aahimuthokorerya Abrahamu okhala naxariya mwaha wa waamini wawe. (Yak. 2:23) Ntoko onihimya awe aRoma 4:18, Abrahamu aahikhalana waamini ni nlipelelo. Vano nrowe niwehe etthu murummwa Paulo otthokihenrye awe aRoma ekapiitulu 5 voohimya sa nlipelelo.

3. Paulo aahimmye exeeni sa nlipelelo?

³ Paulo onnitthokiherya xeeni ninreerela ahu okupali wiira “ororomela nno khunoototha”. (aRom. 5:5, Piipiliya Emakhuwa.) Nave, onninikhaliherya wiiwexexa moota nikhanle ahu oolipiha nlipelelo nahu. Nrowe nithokorerye yoowiiraneya ya Paulo, olempe awe aRoma 5:1-5. Okathi ninrowa ahu othokoreryaka, nnooweha moota nikhanle ahu oolipa nlipelelo nahu.  Nave itthu Paulo aalepenle awe makristau a oRoma, sinimookhaliheryani ophavelasa inamuna sa olipiha nlipelelo murina anyu olelo-va. Masi wanipacerya, ninrowa oweha nlipelelo nootepa ovara murima, Paulo aahimmye wiira nakhalana khaninrowa wooceya.

4. ARoma 5:1, 2 onihimya exeeni?

⁴ Mmusome aRoma 5:1, 2. Moolumo ala Paulo aalepenle anna ni arokora a muloko wa oRoma. Anna ni arokora ale, yaahiixutta voohimya sa Yehova ni Yesu, yaahikhalana waamini nave yaahithanla okhala Makristau. Muluku ‘aahaahimya okhala anaxariya mwaha wa waamini waya’ ni aahaathanla ni munepa woowaarya. Awo yaanilipelela waakhela etthuvo yoohakalaliha.

5. Nlipelelo xeeni arina aya makristau oothanliwa?

⁵ Muhoolo mwaya, Paulo aahaalepela Makristau oothanliwa a wEefeso voohimya sa nlipelelo yaavahiwa aya ni Muluku. Nlipelelo nno, naahela muhina “itthu sootepa oreera aaleihenrye awe ale oororomeleya”. (aEef. 1:18) Nave Paulo aahaaleela makristau a oKolosi opuro ene yaarowa aya waakhela nlipelelo naya. Owo aahimmye wiira nlipelelo naya yaarowa waakhela opuro ‘asukeriwe aya wiirimu’. (aKol. 1:4, 5) Makristau oothanliwa, anrowa ohihimuxiwa wiira yaakhele okumi woohimala wiirimu, alamulelaka vamosa ni Kristu. — 1 aTes. 4:13-17; Wiis. 20:6.

6. Munna mmosa oothanliwa aahimmye exeeni sa nlipelelo?

⁶ Makristau ootheene oothanliwa annihakalala ni nlipelelo nno. Mmosa wa anna awo oothanliwa, Frederick Franz. Olavulaka sa moonelo awe, ohimmye so: “Nlipelelo nahu ti neekeekhai ni nnimwiiraneya, nto ootheene ahu 144.000 nnimwaakhela yooleiherya ela ya Muluku”. Mwaakha wa 1991 nuumala orumeela iyaakha sinceene ntoko oothanliwa, munna Franz aahimmye so: “Ninnivaha efaita yinceene nlipelelo nahu. . . . Ninnixukhurela vanceene nlipelelaka wiiraneya yooleiherya eyo. Etthu ya faita olipelela, hata  siviraka iyaakha sinceene. Miyo kinnihakalala vanceene ni nlipelelo nno”.

7-8. Nlipelelo xeeni makristau makina arina aya? (aRoma 8:20, 21)

⁷ Atthu anceene animukokhorela Yehova olelo-va, aakhalana nlipelelo noovirikana ni makristau oothanliwa. Nlipelelo arina aya ti nenlo aarina awe Abrahamu, na waakhela okumi woohimala valaponi vaava alamuleliwaka ni Omwene wa Muluku. (aHeeb. 11:8-10, 13) Paulo oolepa sa nlipelelo nno noohakalaliha. (Mmusome aRoma 8:20, 21.) Exeeni yoosivenleni okathi mwaasomme anyu sa yooleiherya eyo ya mbiibiliya? Niireke yoosivenleni osuwela wiira muhoolo khamunrowa okhala ipottha sa etampi ni okhwa? Aahiiso niireke yaari osuwela wiira munoorowa otthikela waaweha ale mwaaphenta anyu akhwiiye mparayiisu valaponi vaava? Tthiri nikupaliki wiira sinimwiiraneya itthu sinceene soohakalaliha mwaha wa “nlipelelo” nrina ahu.

⁸ Moohicikha akhala wiira nrina nlipelelo na waakhela okumi woohimala valaponi aahiiso wiirimu, ootheene ahu nookhalana mathowa ooloka anniiriha ohakalala. Nave nnoowerya olipiha nlipelelo nahu nno. Paulo onnitthokiherya moota eyo enrowa aya oweryaneya. Nrowe nithokorerye itthu olempe awe, sinnikhaliherya okupali wiira nlipelelo nahu nnimwiiraneya.

9-10. Moovarihana ni ntakiheryo na Paulo, itthu xeeni makristau anireerela aya olipelelaka? (aRoma 5:3) (Nwehe ifootu.)

⁹ Mmusome aRoma 5:3. Paulo ohimmye wiira ohaawa onniphwanya, pooti oniiriha olipiha nlipelelo nahu. Moota xeeni? Nihiliyale wiira ootheene ale animutthara Kristu sinimwaaphwanyaka mixankiho. Nrowe nthokorerye ntakiheryo na murummwa Paulo. Owo aahaaleela makristau a oTesaloonika ohimyaka so: “Okathi naari ahu ni nyuwo, naanooleelani wira saamuniphwanya mixankiho. Nto eyo ti etthu eniiraneya”. (1 aTes. 3:4) Nave aahaalepela makristau a oKorinto, ohimyaka so: “Axinnaka, nimphavela wira musuwele maxakha yaaniphwannye . . . khinaasuwela  akhala wira naamukhala akumi wala nnaari”. — 2 aKor. 1:8; 11:23-27.

¹⁰ Nave hiyo makristau olelo-va, ninnilipelela oniphwanya mixankiho soovirikana. (2 Tim. 3:12) Niireke nyuwo mootoko olupatthiwa mwaha woomwaamini Yesu ni okhala mutthareli awe? Niireke apatthani anyu aahiiso amusi anyu aatoko wootheyani? Niireke aatoko woothokoreryani mootakhala? Aahiiso niireke mootoko olupatthiwa omutekoni mwaha wa ororomeleya wanyu? (aHeeb. 13:18) Niireke mootoko olupatthiwa ni kuvernu mwaha wookhalela nthiti muteko woolaleerya? Moohicikha mixankiho sinniphwanya olelo-va, Paulo ohimmye wiira nihakalaleke. Mwaha wa xeeni?

11. Xeeni ninreerela ahu ovilela moohicikha mixankiho sinniphwanya?

¹¹ Nihakalaleke okathi sinniphwanya aya mixankiho, okhala wiira iyo sinninikhaliherya okhalana mukhalelo wa faita. ARoma 5:3, onihimya wiira “ohaawa onnikumiherya ovilela”. Makristau ootheene sinimwaaphwanyaka mixankiho, masi ootheene aya anipirisari ovilela. Ootheene ahu, nihaana ovilela moohicikha mixankiho sinniphwanya. Niira siiso, nnooweha yiiraneyaka ele ninlipelela ahu. Hiyo khanimphavela okhala ntoko atthu ale Yesu aawuupuwela awe, okathi aalavula awe sa epyo yaamorenle vamalukuni. Wanipacerya atthu awo anneemererya ekeekhai, masi “sakhumelela mixankiho aahiiso olupatthiwa” annitthikela ottuli ni annihiya weettela ekeekhai. (Math. 13:5, 6, 20, 21) Ekeekhai wiira olupatthiwa aahiiso oniphwanya mixankiho khahiyo etthu yooloka, masi ovilela onnikumiherya mireerelo. Mwa enamuna xeeni?

12. Mireerelo xeeni nimphwanya ahu vaavo ninvilela ahu mixankiho?

¹² Yakobo aahimmye wiira ovilela okathi sinniphwanya aya mixankiho, pooti oniphwanyiha mireerelo. Owo olempe so: “Muhiye wira ovilela omaliherye muteko aya, wira mukhale oomalela ni oohittheka mwa inamuna sotheene, ehoothowakani etthu”. (Yak. 1:2-4) Yakobo ohimmye wiira ovilela wahu, wookhalana yoolakela. Yoolakela xeeni eyo? Yoolakela ahu, nimphavela wiira ovilela onikhaliherye okhalana mikhalelo ntoko opixa murima, waamini ni omuroromela Muluku. Nave ovilela onniniphwanyiha mireerelo sikina.

13-14. Exeeni eniireya vaavo ninvilela ahu ni eyo enivarihana sai ni nlipelelo nahu? (aRoma 5:4)

¹³ Mmusome aRoma 5:4. Paulo ohimmye wiira ovilela onniniiriha “weemereriwa ni Muluku”. Eyo enitaphulela wiira okathi munivilela anyu mixankiho, Yehova onniweemereryani. Masi khentaphulela wiira Yehova onnihakalala okathi munilupatthiwa anyu aahiiso sinoophwanyayani mixankiho. Owo onihakalala ni nyuwo mwaha wa ovilela wanyu. Ovilela wanyu onniwiirihani weemereriwa ni Muluku. Tthiri awo mareeliho oohakalaliha! — Esal. 5:12.

¹⁴ Muhiliyale wiira Abrahamu aahivilela mixankiho soovirikana, eyo yaahimwiiriha olipiha waamini wawe nave Yehova aahimureeliha mwaha wa ovilela. Yehova aamuthokorerya ntoko naxariya ni mpatthani awe. (Maph. 15:6; aRom. 4:13, 22) Nave eyo pooti oniiraneela. Hiyo khanneemereriwa ni Muluku mwaha wa itthu ninwerya ahu opaka mmutthenkesoni aahiiso miritti sirina ahu, masi mwaha wa ovilela ni waamini wahu. Moohicikha iyaakha sahu, makhalelo ahu ni itthu ninwerya ahu opaka, ootheene ahu nihaana ovilela ni waamini. Niireke wookhala muxankiho munivilela anyu nenna-va? Akhala wiira ti siiso, mukupaliki wiira Yehova onnihakalala ni ovilela wanyu. Okathi ninsuwela  ahu wiira Muluku onnineemererya, nlipelelo nahu ni sooleiherya sawe ninnitepa okhala noolipa.

15. Exeeni Paulo aahimmye awe aRoma 5:4, 5, nave nikoho xeeni ninkhumelela?

¹⁵ Ntoko murummwa Paulo otthokihenrye awe, hiyo ninneemereriwa ni Yehova akhala wiira ninniroromeleya wa yena ni ohihiya ovilela mixankiho. Owo onnitthikela otthokiherya, ohimyaka so: “Weemereriwa ni Muluku, onninivaha nlipelelo, vano hiyo pooti ororomela tthiri nlipelelo nlo”. (aRom. 5:4, 5) Vanikhala wiira eyo etthu yooxankiha. Mwaha wa xeeni? Okhala wiira wanipacerya, moovarihana ni aRoma 5:2, Paulo aahimmye wiira makristau a oRoma yaahikhalana nlipelelo naya, eyo piiyo, “waakhela ovuwa onikhuma wa Muluku”. Woonasa wene mutthu pooti wiikoha so: ‘Akhala wiira makristau ale yaahikhalana nlipelelo, xeeni Paulo aatthikenle awe olavula sa nlipelelo?’

16. Nlipelelo nahu nincerereyale sai? (Nwehe ifootu.)

¹⁶ Etthu enrowa onikhaliherya wiiwexexa ele anitaphulela aya moolumo a Paulo, ori wuupuwelelaka nlipelelo nahu. Mwa ntakiheryo, munnuupuwela ekwaha yoopacerya mwiixuntte anyu sa nlipelelo noohakalaliha, okathi mwaasomihiwa anyu Biibiliya? Woonasa wene, wanipacerya muupuwela wiira nlipelelo na okhala mahiku ootheene valaponi ti nootepa oreera, masi khaninrowa wiiraneya. Nuumala wiixutta voohimya sa Yehova ni sooleiherya sawe siri mbiibiliyani, nlipelelo nanyu nihincerereya nave munnikupali wiira itthu munlipelela anyu ti sekeekhai.

17. Ninrowa olipiha sai nlipelelo nahu hata nuumala wiivahererya ni opatisiwa?

¹⁷ Hata nuumala wiivahererya wa Yehova ni opatisiwa, muhaana ohihiya wiixutta voohimya sa Yehova, mwiira siiso munoolipiha waamini wanyu. (aHeeb. 5:13–6:1) Nave nyuwo munookupaliki moolumo ari aRoma 5:2-4. Pooti wiira sinnoophwanyani mixankiho,  masi hata vari siiso khamunihiya ovilela, nave muhoona wiira muheemereriwa ni Muluku. Vano mwaha woosuwela wiira Yehova onnoophentani, eyo enniwiirihani okupali wiira sinimwiiraneya itthu oleihenrye awe. Nave nlipelelo nanyu ninnitepa okhala noolipa ovikana okathi mwaapacenrye anyu wiixutta ekeekhai. Vano munnoona nlipelelo nno okhala na ekeekhai ni wiira nookhalana efaita yuulupale. Nlipelelo nno, ninniwiirihani oturuka okumi anyu, waathokorerya saana amusi anyu, opaka soothanla sooloka ni orumeela saana okathi anyu.

18. Exeeni Yehova onnilipiherya awe?

¹⁸ Paulo aahilavula etthu ekina ninlipelela ahu ya faita, ninrowa ahu waakhela nuumala weemereriwa ni Muluku. Owo onnilipiherya wiira itthu ninlipelela ahu sinimwiiraneya. Xeeni ninreerela ahu okupali eyo? Aalipiheryaka makristau sa nlipelelo naya, murummwa Paulo ohimmye wiira ororomela nno khunoototha, “okhala wira Muluku onnirumeela munepa awe woowaarya, yoowo onnivaha awe”. (aRom. 5:5) Tthiri nookhalana mathowa ooloka anniiriha okhalana nlipelelo nna.

19. Nikupaliki exeeni voohimya sa nlipelelo nahu?

¹⁹ Mwiivaheke okathi wiira muupuwelele etthu Yehova aamuleihenrye awe Abrahamu, moota aamweemerenrye awe ni aamuthokorenrye awe okhala mpatthani awe. Etthu Abrahamu aalipelela awe yaahiiraneya. Biibiliya onihimya so: “Nuumala Abrahamu wooniherya opixa murima, aahimwaakhela natiri aamaneliwe awe”. (aHeeb. 6:15; 11:9, 18; aRom. 4:20-22) Abrahamu khooceyale. Nave nyuwo khamunrowa wooceya ni mwaahihiye okhala oororomeleya, nlipelelo nanyu nnooreelihiwa. Mookhalana mathowa ooloka aniwiirihani otteeliwa murima, okhala wiira moosuwela wiira itthu munlipelela anyu sinimwiiraneya! (aRom. 12:12) Paulo olempe so: “Kinivekela wira Muluku, yoowo onivaha nlipelelo, otepe wootteelihani murima ni oovaheeni murettele munceene, mwaha woowi munnimuroromela. Nto, mukhaliheriwaka ni munepa woowaarya, nyuwo munoolipiha vanceene nlipelelo nanyu”. — aRom. 15:13.