Niireke moosoma oratteene irevista sootheene sa Owehaweha sa mwaakha ola? Akhala wiira ti siiso, nwehe akhala wiira munniwerya waakhula makoho anittharelana:

Exeeni enihela muhina “oturuka moota munuupuwela anyu”? (aRoma 12:2)

Enihela muhina itthu sinceene, ohiya paahi ohimyaka wiira kinnipaka itthu sooloka mookumini mwaka. Masi nihaana ovarerya omutthu ahu ni opaka marukunuxo wiira niweryeke omusiveliha Yehova. — Owehaweha 23.01, ipaax. 8-9.

Ninrowa okhalana sai ephoole ni itthu ninweha ahu aahiiso owiriyana siniiraneya olumwenku ola?

Tthiri nookhalana mathowa ooloka anniiriha okhalana ephoole ni itthu siniiraneya moolumwenkuni. Maana itthu iyo sinimaleliha iprofesia sa mbiibiliyani. Okathi ninvaanela ahu ni atthu akina nihaana osyaka waaleela atthu awo itthu sinrowa wiiraneya muhoolo nihinsuwela ahu, okhala wiira pooti okumiherya ohiiwanana mmulokoni. (1 aKor. 1:10) — Owehaweha 23.02, epaax. 16.

Opatisiwa wa Yesu ovirikanne sai ni waawihu?

Yesu khaapirisanri wiivahererya wa Yehova, okhala wiira aayariwe nloko na atthu yiivaherenrye wa Muluku. Owo khaarina itampi. Nto mwaha waivaavo, khaapirisari onvekela Yehova wiira oleveleliwe itampi. — Owehaweha 23.03, epaax. 5.

Itthu xeeni nikhanle ahu oopaka wiira atthu akina aweryeke okomentari mmithukumanoni?

Etthu emosa nikhanle ahu oopaka ori ovaha ikomentaario sookhuveya. Hata nvahaka ekomentaario yookhuveya, musyakeke olavula iponto sinceene sa ettima eyo. Vakhala wiira munoolavula iponto sootheene sa ettima eyo, anna akina khanirowa owerya okomentari. — Owehaweha 23.04, epaax. 23.

Moovarihana ni (Yesaya 35:8, Piipiliya Emakhuwa), exeeni ekhanle “Ephiro Yooreera”?

Estaraata ela ya nthoonyeryo yaataphulela mukwaha ayuda yaarowa aya weetta okhuma oBabilonia mpakha oYerusalemu. Enitaphulela exeeni olelo-va? Mwa iyaakha sinceene ohinatthi mwaakha wa 1919, ennilokiheriwa ephiro ela ya nthoonyeryo. Olokiheriwa iwo onihela muhina otaphuleliwa wa Biibiliya, iliivuru sinimutthokiherya Biibiliya, wimpirimiriwa wa Biibiliya ni iliivuru sikina. Arumeyi a Yehova anneetta “Ephiro eyo Yooreera”, arowaka oparayiisu weiwo anrowa aya waakhela mareeliho manceene anikumiheriwa ni Omwene wa Muluku. — Owehaweha 23.05, ipaax. 15-19.

Axithiyana xeeni anli onnilopola awe Miruku ekapiitulu 9?

Eliivuru ya Miruku ekapiitulu 9 ennaalavula axithiyana anli: Oopacerya, muthiyana ‘mulolo’. Nlattulo na muthiyana ola ninniwiiriha atthu ‘okumana ni okhwa’. Anenli, muthiyana a “Ankhili”. Akhala wiira nnimweemya nlattulo na muthiyana a “ankhili” eekeekhai, nnoohakalala ni nnimwaakhela okumi woohimala. (Mir. 9:1, 6, 13, 18) — Owehaweha 23.06, ipaax. 22-24.

Yehova aamoonihenrye sai Lothi wiira toowiiyeviha ni khonithipelela moonelo awe?

Yehova aahiruma malaikha awe wiira yamuhimeerye naxariya Lothi, wiira otthyawele muttetthe wa omiyaakoni. Masi Lothi aahivekela wiira yena ni emusi awe atthyawele muttetthe mwaamukhaani wa oSowari. Moowiiyeviha Yehova aahimweemererya otthyawela muttetthe ole wa oSowari. — Owehaweha 23.07, epaax. 21.

Muthiyana onrowa opaka exeeni vakhala wiira iyawe onniweha epornokrafia?

Muthiyana ahiivaheke nthowa uupuwelaka wiira tonimwiiriha iyawe oweha epornokrafia. Etthu enrowa omukhaliherya muthiyana owo, ori osoma ni wuupuwelela matakiheryo a mbiibiliyani a athiyana yaariipiwe murima masi enanvekela Yehova wiira aakhaliherye. Owo ohaana omukhaliherya iyawe osyaka itthu saarowa omwiiriha oweha epornokrafia aahiiso ohiya omurumeela Yehova. — Owehaweha 23.08, ipaax. 14-17.

Okathi ninkohiwa ahu voohimya sa itthu ninkupali ahu, xeeni wuupuwelela saana etthu enimwiiriha onikoha, enrowa aya onikhaliherya okhala oomaaleleya?

Ohiya wuupuwelaka wiira oniphavela oniveeha, vaamuloka oweha nikoho nno ntoko eparakha wiira nimusuwelihe etthu yooloka okhanle awe oopaka. Niira siiso, nnoowerya waakhula mwa enamuna yoomaaleleya. — Owehaweha 23.09, epaax. 17.

Maria onniixuttiha exeeni sa ovekela okhaliheriwa?

Nuumala osuwela wiira aarowa okhala maama a Mesiya, aahaavekela atthu akina wiira amukhaliherye. Nlaikha Gabriyeli ni Elizabeti yaahimulipiha Maria aarumeelaka soolepa. Nave hiyo nnoowerya okhalana ikuru vaavo atthu akina annikhaliherya aya. — Owehaweha 23.10, epaax. 15.

Woonasa wene Yehova onaakhula sai mavekelo ahu?

Yehova onnileiherya wiira onoowiriyanaka mavekelo ahu vakhala wiira annivarihana ni ele oniphavela awe. (Yer. 29:12.) Yehova pooti waakhula mavekelo oolikana mwa inamuna soovirikana, masi khula okathi onoonikhaliheryaka. — Owehaweha 23.11, ipaax. 21-22.

ARoma 5:2 onnilavula sa “ nlipelelo” nto xeeni eversiikulu 4 enitthikela aya olavula sa “nlipelelo”?

Nuumala wiiwa ihapari sooreera, mutthu pooti okhalana nlipelelo na waakhela okumi woohimala mparayiisu valaponi vaava. Masi okathi sinimphwanya ya mixankiho ni onawerya ovilela, onnoona wiira Yehova onnimweemererya, nto nlipelelo orina awe ninnilipa ni nookhalana faita. — Owehaweha 23.12, ipaax. 12-13.