1. Nimuupuwelaka Abrahamu, nikoho xeeni woonasa wene nniikoha ahu?

 ATTHU anceene, anniiwa olavuliwaka Abrahamu, masi khanisuwela itthu sinceene voohimya sa yena. Moovirikana ni atthu awo, hiyo ninnimusuwela oratteene Abrahamu ola oniromoliwa mbiibiliyani. Mwa ntakiheryo, ninnisuwela wiira Abrahamu aahiitthaniwa okhala “tiithi a atthu otheene oowaamini”. (aRom. 4:11) Woonasa wene nyuwo pooti wiikohaka so: ‘Kiireke kinoowerya okhalana waamini woolipa ntoko aarina awe Abrahamu?’ Aayo, tthiri vanooweryaneya.

2. Xeeni vari aya va faita wiixutta ntakiheryo na Abrahamu? (Yakobo 2:22, 23)

² Vanooweryaneya okhalana waamini woolipa ntoko aarina awe Abrahamu, niixuttaka ni ntakiheryo onivanhe awe. Nuumala orummwa ni Muluku, Abrahamu aahithaamela mapuro oorakamela wa muttetthe aakhala awe, nave iyaakha sinceene owo aakhala muheemani. Ohiya-vo, owo aari oolikana ene, wiira onvahe mwanawe amphentexa awe, Isakhi ntoko mukuttho. Itthu iya sootheene, sinooniherya wiira Abrahamu aanimwaamini vanceene Yehova. Waamini ni miteko sa Abrahamu, saahimwiiriha Yehova omuthokorerya okhala naxariya ni omuthanla okhala mpatthani awe. (Mmusome Yakobo 2:22, 23.) Yehova oniphavela wiira miyo ni nyuwo nikhale apatthani awe. Ti etthu yaamwiirinhe omuruma Paulo ni Yakobo olepa ntakiheryo na Abrahamu mbiibiliyani. Mwaha ola, nnooweha etthu aRoma ekapiitulu 4 ni Yakobo ekapiitulu 2 sinniixuttiha aya voohimya sa Abrahamu. Ikapiitulu iya piili, ninniphwanya itthu sa efaita voohimya sa Abrahamu.

3. Yoolepa xeeni ya mbiibiliyani Paulo ni Yakobo atthokihenrye aya?

³ Paulo ni Yakobo, aatthokiherya moolumo ari Maphattuwelo  15:6 ani: “Abramu ahiwamini Apwiya: vano mwaha wo wamini wawe, Apwiya yahisiveliwa ni yowo, khumwakhelela”. Yehova onnimuthokorerya mutthu okhala naxariya, akhala wiira onnimusiveliha ni onnipaka ele oniphavela awe. Ti voohakalaliha osuwela wiira vanooweryaneya Muluku onithokorerya ntoko anaxariya, nnaamwi nri ene apinaatamu oottheka! Niireke khivaarowa woosivelani Muluku woothokoreryani ntoko naxariya? Wiira eyo yiiraneye, ninrowa oweha etthu yaamwiirinhe Yehova omuhimya Abrahamu okhala naxariya, ni etthu nikhanle ahu oopaka naaphavelaka wiira Yehova onithokorerye ntoko anaxariya.

4. Exeeni enaakhoottiherya apinaatamu okhala anaxariya?

⁴ Ekarta ya murummwa Paulo aalepenle awe aroma, aahitthokiherya wiira atthu ootheene toottheka. (aRom. 3:23) Nto vaniweryaneya sai, Muluku waathokorerya apinaatamu akina ntoko anaxariya ni oohittheka? Wiira aakhaliherye makristau wiiwexexa mwaha ole, murummwa Paulo aahitthokiherya yoowiiraneya ya Abrahamu.

5. Exeeni yaamwiirinhe Yehova omwiitthana Abrahamu okhala naxariya? (aRoma 4:2-4)

⁵ Yehova aahimwiitthana Abrahamu okhala naxariya, okathi yoole aakhala awe elapo ya oKanaani. Exeeni yaamwiirinhe Yehova ohimya siiso? Niireke mwaha woowi Abrahamu aanitthara Nlamulo na Moise mwa enamuna yooloka? Nnaari. (aRom. 4:13) Ninnisuwela eyo, okhala wiira Nlamulo na Moise naavahiwe aisarayeli nuuvira iyaakha 400, nuumala Muluku omwiitthana Abrahamu okhala naxariya. Nto exeeni yaamwiirinhe Yehova omwiitthana Abrahamu okhala naxariya? Yehova aahimooniherya Abrahamu oreera murima wuulupale ni aahimwiitthana okhala naxariya mwaha wa waamini aarina awe. — Mmusome aRoma 4:2-4.

6. Xeeni Yehova oniwiitthana awe apinaatamu oottheka okhala anaxariya?

⁶ Paulo aahitthokiherya wiira mutthu orina waamini, Muluku “onnimuthokorerya mutthu owo okhala naxariya mwaha wa waamini wawe”. (aRom. 4:5) Paulo onnitthokiherya-tho ohimyaka so: “Eyo ti etthu Davidi aahimmye awe wira mutthu onithokoreriwa okhala naxariya ni Muluku, ohikhanle mwaha wa miteko sawe, mutthu owo onnihakalala. Davidi aahimmye wiira: ‘Oohakalala taale aleveleliwe miteko saya sootakhala, ni siliyaliwe itampi saya. Oohakalala tuule Yehova ohinikontaryawe etampi awe’”. (aRom. 4:6-8; Esal. 32:1, 2) Muluku onnilevelela itampi saya atthu yaale animwaamini. Owo onnaalevelela moomalela ni khonuupuwela-tho soovonya saya. Yehova onnimuthokorerya mutthu okhala naxariya ni oohittheka, mwaha wa waamini wawe.

7. Xeeni ninhimya ahu wiira arumeyi a Muluku a khalai, yaari anaxariya?

⁷ Abrahamu, Davidi ni arumeyi a Yehova oororomeleya, yaahiitthaniwa okhala anaxariya. Masi hata vari siiso, awo yaari atthu oottheka ni anatampi. Mwaha wa waamini waya, Yehova aahaathokorerya okhala atthu oohittheka, naalikanyiha ni ale yahaamurumeela. (aEef. 2:12) Ekarta ya murummwa Paulo aalepenle awe aroma, aahitthokiherya wiira nihaana okhalana waamini, naaphavelaka okhala apatthani a Muluku. Ntoko Abrahamu ni Davidi, akhala wiira nnoomwaamini Yehova, nnookhala apatthani awe.

8-9. Miyoonelo xeeni soohiloka voohimya sa ikarta sa Paulo ni Yakobo, ni mwaha wa xeeni?

⁸ Mwa iyaakha sinceene, ahooleli a itiini, anniphavelasa osuwela etthu erina efaita yuulupale, akhala wiira waamini aahiiso miteko.  Atthu akina aniixuttiha so: Wiira mutthu oopowe, oohaana omwaamini Pwiya Yesu Kristu. Pooti wiira mootoko owiiwa atthu akina ahimyaka so: “Mmukupali Yesu wiira moopowe”. Atthu anceene arina etiini, annirumeela moolumo a murummwa Paulo aahimmye awe so: “Mutthu onithokoreriwa okhala naxariya ni Muluku, ohikhanle mwaha wa miteko sawe”. (aRom. 4:6) Masi atthu akina, anihimya wiira “munoowerya woopowa” akhala wiira munooxukuryaka mapuro yaale ikerexa sinthokorerya aya okhala oowaarya aahiiso mwaapakaka itthu sooloka. Woonasa wene, awo anirumeela moolumo ari Yakobo 2:24 ani: “Mutthu onnikhalihiwa naxariya mwaha wa miteko sawe, ohiya mwaha wa waamini paahi”.

⁹ Mwaha wa miyoonelo iya soovirikana, atthu akina animusoma Biibiliya, anihimya wiira Paulo ni Yakobo anilavula itthu soovirikana voohimya sa waamini ni miteko. Ntoko anihimya aya atthu akina a itiini, Paulo aakupali wiira mutthu aahaana okhalana waamini aaphavelaka omuhakalaliha Muluku. Nave Yakobo aakupali wiira mutthu aaniwerya omuhakalaliha Muluku mwaha wa miteko sawe. Profesore mmosa ohimmye wiira “Yakobo khaakupali nthowa naya murummwa Paulo aahimmye awe wiira mutthu aahaana okhalana waamini wiira okhale naxariya ohiya ni miteko”. Masi itthu Paulo ni Yakobo alempe aya, sinikhuma wa Yehova. (2 Tim. 3:16) Tivonto wookhala otthokiheriwa oratteene, ovirikana okhanle ele Paulo ni Yakobo yaahimmye aya. Vaavo ninthokorerya ahu ikarta sa Paulo ni Yakobo, sinoonikhaliherya wiiwexexa oratteene etthu khula mmosa aaphavela awe ohimya.

10. “Miteko” xeeni Paulo aahimya awe? (aRoma 3:21, 28) (Nwehe eteseenyo.)

¹⁰ “Miteko” xeeni Paulo aahimya awe siri aRoma ekapiitulu 3 ni 4? Owo aalavula sa miteko ‘nlamulo naahimya aya’, eyo piiyo, nlamulo  na Moise, naakumiheriwe Omwaako Sinayi. (Mmusome aRoma 3:21, 28.) Vanikhala wiira okathi wa Paulo, makristau makina a ayuda khiyaakupali wiira Nlamulo na Moise khinaavareleya muteko ohela muhina miteko Nlamulo nle naavekela aya. Eyo ti etthu yaamwiirinhe Paulo olavula ntakiheryo na Abrahamu, otthokiheryaka wiira Yehova onnimuthokorerya mutthu okhala naxariya ohiya mwaha wa ‘miteko nlamulo naahimya aya’ masi mwaha wa waamini. Moolumo ala anninlipiha vanceene, maana anniniixuttiha wiira nihaana omwaamini Muluku ni Yesu, naaphavelaka othokoreriwa okhala anaxariya.

11. “Miteko” xeeni Yakobo aahimya awe?

¹¹ Moovirikana ni Paulo, “miteko” Yakobo onilavula awe ekapiitulu 2, khahiyo miteko ‘nlamulo naahimya aya’ ntoko aatthokihenrye awe Paulo. Yakobo aalavula sa miteko aahiiso itthu makristau anireerela aya opaka khula nihiku. Miteko seiyo sinooniherya wiira mukristau onnimwaamini Muluku mweekeekhai aahiiso nnaari. Nrowe niwehe matakiheryo manli Yakobo orumenle awe.

12. Yakobo aatthokihenrye sai ovarihana okhanle waamini ni miteko? (Nwehe eteseenyo.)

¹² Ntakiheryo noopacerya, Yakobo aahimmye wiira, makristau aahaana othokoreryanaka mwa enamuna emosa-ru. Owo aahilavula yoowiiraneya ya mulopwana mmosa aathokorerya saana athaaciri masi aanyokha amasikhini. Yakobo aahimmye wiira mulopwana ole aixoona okhala mutthu oowaamini masi itthu aapaka awe khisaavarihana ni itthu aahimya awe. (Yak. 2:1-5, 9) Ntakiheryo na nenli, Yakobo onnilavula sa munna aahiiso murokora ohirina etthu yoowara ni yoolya eniphiyerya khula nihiku, masi mutthu mukina khonipaka etthu wiira omukhaliherye. Hata mutthu owo ohinimukhaliherya ohimyaka wiira onnaamini, masi miteko sawe sinnooniherya wiira khorina  waamini. Eyo ti etthu yaamwiirinhe Yakobo olepa so: “Waamini paahi, ohirina miteko, ti wookhwa”. — Yak. 2:14-17.

13. Ntakiheryo xeeni Yakobo orumenle awe nnooniherya wiira waamini ohaana ovarihanaka ni miteko? (Yakobo 2:25, 26)

¹³ Yakobo onnimulavula Rahabi okhala ntakiheryo nooloka na mutthu orina waamini ni onooniherya ni miteko sawe. (Mmusome Yakobo 2:25, 26.) Rahabi aahiiwa olavuliwaka sa Yehova ni aanisuwela wiira owo aanaakhaliherya aisarayeli. (Yoox. 2:9-11) Nto owo aahooniherya waamini wawe ni miteko aakhapelelaka anamahottela a aisarayeli yaawo okumi aya waari mmaxakhani. Eyo yaahimwiiriha muthiyana ole oottheka ni ahaakhanle mwisarayeli, othokoreriwa okhala naxariya ntoko athokoreriwe awe Abrahamu. Ntakiheryo na Rahabi, ninniniixuttiha wiira waamini wahu ohaana ovarihanaka ni miteko.

14. Xeeni ninhimya ahu wiira itthu aalavunle awe Paulo ni Yakobo khasinivaanyihana?

¹⁴ Paulo ni Yakobo yaatthokiherya paahi ovarihana okhanle waamini ni miteko, masi mwa inamuna soovirikana. Paulo aatthokihenrye wiira makristau a ayuda, khiyaarowa weemereriwa ni Yehova akhala wiira miteko saya saavarihana paahi ni miteko saavekeliwa ni Nlamulo na Moise. Masi Yakobo aatthokiherya wiira makristau yaahaana wooniherya waamini yaathokoreryaka saana atthu akina.

15. Inamuna xeeni nikhanle ahu owooniherya waamini ni Miteko sahu? (Nwehe ifootu.)

¹⁵ Yehova khoniphavela ohimya wiira nihaana opaka itthu siisaale aapaka awe Abrahamu wiira nithokoreriwe okhala anaxariya. Ohimya ekeekhai, sookhala inamuna soovirikana nikhanle ahu oowooniherya waamini ni miteko sahu. Mwa ntakiheryo, nihaana owaakhela oratteene ale anampacerya orweela mithukumano,  waakhaliherya anna ni arokora sinaaphwanya mixankiho ni waapakela itthu sooloka amusi ahu. Tthiri, iya siri miteko Yehova oneemererya awe ni onireeliha awe. (aRom. 15:7; 1 Tim. 5:4, 8; 1 Yoh. 3:18) Nave enamuna ekina nikhanle ahu oowooniherya waamini, ori olaleya ihapari sooreera mooluttuweliwa. (1 Tim. 4:16) Ootheene ahu, nnoowerya wooniherya waamini ni miteko sahu, wiira sooleiherya sa Yehova ti sa ekeekhai ni itthu sootheene onipaka awe ti sooloka. Napaka itthu iya sootheene, nikupaliki wiira Muluku onoonithokorerya okhala anaxariya ni nnookhala apatthani awe.

16. Nlipelelo xeeni Abrahamu aarina awe naamukhalihenrye okhalana waamini?

¹⁶ ARoma ekapiitulu 4, ninniphwanya etthu ekina nniixutta ahu voohimya sa Abrahamu, eyo piiyo, efaita nrina aya nlipelelo nahu. Yehova aahileiherya wiira orweela wa Abrahamu, “maloko manceene” yaamureelihiwa. Nkuupuwelani moota Abrahamu aahakalanle awe nuumala wiiwa eyo! (Maph. 12:3; 15:5; 17:4; aRom. 4:17) Masi okathi waanivira, Abrahamu aarina iyaakha 100 Sara aarina 90, awosa nlelo yiira ahinatthi omuyara mwaana. Moonelo wa apinaatamu, vaakhala wiira khivaarowa oweryaneya Abrahamu ni Sara okhalana mwaana. Nave eyo yaaheehererya waamini wa Abrahamu. “Masi mwaha wa nlipelelo aarina awe, owo aanaamini wira aamukhala tiithi a maloko manceene”. (aRom. 4:18, 19) Wookiseryani waya, ntoko Yehova aaleihenrye awe, awo yaahimuyara mwaana. Vano Abrahamu aari tiithi a Isakhi. — aRom. 4:20-22.

17. Ninsuwela sai wiira vanniweryaneya othokoreriwa ni Muluku okhala anaxariya?

¹⁷ Ntoko niwenhe ahu, vanooweryaneya Yehova oneemererya ni onithokorerya okhala anaxariya ntoko Abrahamu. Tthiri murummwa Paulo aahitthokiherya eyo okathi aalavunle awe so: “Masi, moolumo oowi ‘aahithokoreriwa okhala’, khiyaalepeliwe Abrahamu paahi. Moolumo awo, noolepeliwa-tho hiyo, okhala wira nnoothokoreriwa okhala anaxariya mwaha wa omwaamini Muluku, yoowo omuhihimunxe Yesu”. (aRom. 4:23, 24) Ntoko Abrahamu, nihaana okhalana waamini onivarihana ni miteko ni nlipelelo. ARoma ekapiitulu 5, Paulo aahitthikela-tho olavula sa nlipelelo nahu. Eyo ti etthu ninrowa ahu othokorerya mwaha onittharelana.