MWAHA ONITHOKORERIWA 49
NSIPO 147 Muluku Ooleiherya Okumi Woohimala
Exeeni Munireerela Anyu Opaka Wiira Mphwanye Okumi Woohimala?
“Ole onimweemererya Mwaana ni omwaamini yoowo, okhalane okumi woohimala”. — YOH. 6:40.
ELE NINROWA AHU WIIXUTTA
Mwaha ola, nnoothokorerya mareeliho anrowa aya ophwanya atthu oothanliwa ni ale a ipwittipwitthi sikina, mwaha wa mukuttho woowoopola wa Yesu Kristu.
1. Xeeni atthu akina anuupuwela aya wiira khivaniweryaneya okhala mahiku ootheene?
ATTHU anceene, annoolya eyoolya yooloka ni opaka esersiisiyu khula nihiku wiira akhalane okumi wooloka. Hata vari siiso, awo kharina nlipelelo na okhala mahiku ootheene. Woonasa wene, atthu awo anuupuwela wiira khivaniweryaneya mutthu okhala ohuuluvalaka aahiiso ohikhwaaka. Moovirikana ni vo, Yesu aahihimya wiira apinaatamu vanniweryaneya ophwanya “okumi woohimala” ntoko onihimya awe Yohani 3:16 ni 5:24.
2. Yohani ekapiitulu 6, onihimya exeeni sa okumi woohimya? (Yohani 6:39, 40)
2 Mwa mwiiriirya, nihiku nimosa Yesu aahivaha iphaawu ni ihopa muttitthi muulupale wa atthu. a Tthiri eyo yaari etthu yooreera, masi etthu aahimmye awe nihiku naattharelana, yaahitepa waatikiniha atthu ale. Muttitthi ole waahimutthara Yesu mpakha oKafarnawu, mukerekhere mwa ephareya ya oGalileya, weiwo owo aaleelale awe wiira vanweryaneya atthu akhwiiye ohihimuxiwa wiira akhalane okumi woohimala. (Mmusome Yohani 6:39, 40.) Tivonto, mmananiheke owuupuwela amusi ni apatthani akhwiiye. Moolumo a Yesu, anooniherya wiira hata nikhwaaka aahiiso amusi ni apatthani ahu akhwiiye, pooti oweryaneyaka ohihimuxiwa wiira niphwanye okumi woohimala! Atthu akina pooti waaxankiha wiiwexexa moolumo a Yesu ari Yohani ekapiitulu 6. Etthu xeeni Yesu aahimmye awe?
3. Moovarihana ni Yohani 6:51, etthu xeeni Yesu aahimmye?
3 Nuumala Yesu ovaha eyoolya muttitthi ole mwa miiriirya, awo yaahipacerya wuupuwela emana yeeyo Yehova aavanhe awe aisarayeli moothakoni. Biibiliya onniitthana emana eyo okhala “ephaawu yaakhuma wiirimu”. (Esal. 105:40; Yoh. 6:31) Wiira owiixuttihe etthu ya faita yuulupale, Yesu aahipacerya olavula etthu yaasuwela aya, eyo piiyo, emana. Nnaamwi emana yaakumiheriwe mwa mwiiriirya ni Muluku, atthu ale yaalyiiye, nuuvira okathi yaahikhwa. (Yoh. 6:49) Moovirikana ni vo, iihimyaka mmensawe, Yesu aahimmye wiira miyo ka “ephaawu yeekeekhai, yeeyo enikhuma wiirimu”, “ephaawu Muluku onivaha awe” ni ‘ephaawu enaavaha okumi atthu’. (Yoh. 6:32, 33, 35) Yesu aahitthokiherya wiira waahikhala ovirikana wuulupale yena ni emana. Owo aahimmye so: “Miyo ka ephaawu ekumi, yeeyo ekhumme wiirimu. Akhala wira mutthu onookhuura ephaawu ela, onookhala mukumi mahiku otheene”. (Mmusome Yohani 6:51.) Tthiri ayuda ale khiyaareere oxankiheya. Awo khiyaawerya wiiwexexa etthu Yesu aahimya awe okathi aatthokiherya awe wiira miyo ka “ephaawu” enikhuma wiirimu, yeeyo erina efaita yinceene ovikana emana Yehova aavanhe awe aisarayeli. Masi Yesu aahaaleela wiira: “Ephaawu enivaha aka ti erutthu aka”. Yesu aaphavela ohimya exeeni ni moolumo awo? Ti vooloka ophavela osuwela waakhuliwa wa nikoho nla, maana eyo enoonikhaliherya ophwanya okumi woohimala waahela muhina amusi ni apatthani ahu akhwiiye. Nrowe nithokorerye ele anitaphulela aya moolumo a Yesu.
YESU AAPHAVELA OHIMYA EXEENI NI MOOLUMO OWI “EPHAAWU EKUMI” NI “ERUTTHU AKA”?
4. Xeeni atthu akina yaatikinihinwe aya ni ele Yesu aahimmye awe?
4 Okathi Yesu aahimmye awe wiira ephaawu yaareerela aya okhuura yaari erutthu awe, yeeyo ‘onaavaha awe atthu anikhala valaponi’, awo yaahitikinihiwa vanceene. Woonasa wene, awo yuupuwela wiira yaahaana okhuura erutthu ya Yesu yeekeekhai. (Yoh. 6:52) Masi Yesu aahilavula-tho etthu ekina yahaareere waaxankiha. Owo aahimmye so: “Kinooleelani ekeekhai wira, mwaahikhuure-ru erutthu ya Mwaana a mutthu, ni mwaahiwurye-ru ephome awe, khamunrowa ophwanya okumi”. — Yoh. 6:53.
5. Ninsuwela sai wiira Yesu khaaphavela ohimya wiira atthu ale yahaana owurya ephome awe?
5 Okathi wa Nowe, Muluku ahaakhoottiherya apinaatamu olya ephome. (Maph. 9:3, 4) Nave muhoolo mwaya, Yehova aahaaleela aisarayeli wiira ahilyeeke ephome. Khula mutthu aarowa olya ephome, ahaana ‘okumihiwa munlokoni’, eyo piiyo, wiiviwa. (Onam. 7:27) Yesu aahiwiixuttiha ayuda ale wiiwelela malamulo ootheene Muluku aavanhe awe aisarayeli. (Math. 5:17-19) Tivonto, Yesu khaavekenle ayuda ale okhuura erutthu awe yeekeekhai aahiiso owurya ephome awe. Okathi Yesu aalavula awe moolumo ala oovara murima, owo aaphavela owiixuttiha atthu ale moota woophwanya “okumi woohimala”. — Yoh. 6:54.
6. Xeeni ninhimya ahu wiira moolumo a Yesu a okhuura erutthu awe ni owurya ephome awe, yaari a nthoonyeryo?
6 Masi exeeni Yesu aaphavela awe ohimya? Vannooneya oratteene wiira Yesu aalavula mwa nthoonyeryo, ntoko siisaale aalavunle awe ni muthiyana mmosa musamariya. Owo aahimmye so: “Ole onrowa owurya maasi kinrowa aka onvaha, khonivoliwa-tho ntthona. Vano maasi kinrowa aka onvaha, anrowa olikanaka ni nipuro nimphattuwa maasi mwa yoowo, aninvaha okumi woohimala”. (Yoh. 4:7, 14) b Yesu khaaphavela ohimya wiira muthiyana ole musamariya aarowa ophwanya okumi woohimala mwaha woowurya maasi a vapoosu. Mwa enamuna emosa-ru, okathi Yesu aalavula awe ni muttitthi ole oKafarnawu, khaaphavela ohimya wiira yamphwanya okumi woohimala vakhala wiira yaamukhuura erutthu awe ni owurya ephome awe.
OKATHI MUKINA YESU AALAVUNLE AWE MOOLUMO OOLIKANA
7. Atthu akina anihimya exeeni ni moolumo a Yesu ari Yohani 6:53?
7 Atthu akina anihimya wiira moolumo ari Yohani 6:53, Yesu aahimya etthu atthu anireerela aya opakaka okathi wa Eyoolya ya Ohiyu ya Apwiya, okhala wiira okathi ole, aahirumeela moolumo mamosa-ru aalavunle awe oKafarnawu. (Math. 26:26-28) Atthu awo anihimya wiira ootheene ale anirweela niira na Eyoolya ya Ohiyu ya Apwiya, ahaana okhuura ephaawu ni owurya eviinyu. Niireke eyo ekeekhai? Ti vooloka ophavela osuwela waakhuliwa wa nikoho nno, maana khula eyaakha atthu imilyau sinceene annithukumana ni hiyo nihiku nlo nuulupale. Nrowe nthokorerye ovirikana okhanle masu ari Yohani 6:53, ni ele aahimmye awe okathi wa Eyoolya ya Ohiyu ya Apwiya.
8. Ovirikana xeeni okhanle ni ele Yesu aalavunle awe okathi aari awe oGalileya ni ele aalavunle awe okathi wa Eyoolya ya Ohiyu ya Apwiya? (Nwehe eteseenyo.)
8 Nrowe niwehe ovirikana okhanle okathi Yesu aalavula awe myaha iya. Yoopacerya, okathi xeeni ni opuro xeeni Yesu aalavunle awe masu ari Yohani 6:53-56? Owo aalavunle oGalileya mwaakha wa 32 Nuumala Kristu Orwa. Eyo yiiraneyale ohalaka mwaakha mmosa wiira opake Eyoolya ya Ohiyu ya Apwiya, oYerusalemu. Ya nenli, masu ale Yesu aaleela aani? Owo aaleela atthu yaale yaaxankela vanceene eyoolya ohiya ophavela wiixutta voohimya sa Yehova ni Omwene awe. (Yoh. 6:26) Nuumala Yesu olavula moolumo yahiiwexexa aya, moowaakuveya awo yaahihiya omwaamini. Hata awiixutti awe akina, yaahihiya omutthara. (Yoh. 6:14, 36, 42, 60, 64, 66) Atthu ale a oGalileya, yaahivirikana ni arummwa 11 oororomeleya yaawo yaari ni Yesu okathi wa Eyoolya ya Ohiyu ya Apwiya. Okathi ole, arummwa ale 11 oororomeleya yaari ni yena nnaamwi yahiiwexexa itthu sootheene iixuttiha awe. Masi hata vari siiso, arummwa ale yaanikupali wiira Yesu aari Mwaana a Muluku yoowo aakhurunwe wiirimu. (Math. 16:16) Nto owo aahaattottopela ohimyaka so: “Nyuwo khimwaakihiyale hata okathi keehereriwa aka”. (Luka 22:28) Ovirikana nno okhanle, onooniherya wiira masu ari Yohani 6:53, Yesu khahiyo aaphavela ohimya etthu yaarowa wiiraneyaka okathi wa Eyoolya ya Ohiyu ya Apwiya. Nave-tho, sookhala itthu sikina sinooniherya ovirikana nno okhanle.
Yohani ekapiitulu 6, onnooniherya etthu Yesu aahimmye awe okathi aari awe ni muttitthi oGalileya (moono woothiyana). Nuumala eyaakha emosa, ori ene ni ekurupu yaamukhaani ya arummwa awe 11 oororomeleya oYerusalemu (moono woolopwana) (Nwehe ettima 8)
MOOLUMO A YESU ANITHAPHULELA EXEENI PARA NYUWO?
9. Moolumo Yesu aalavunle awe okathi wa Eyoolya ya Ohiyu ya Apwiya, aahimmya aani?
9 Okathi wa Eyoolya ya Ohiyu ya Apwiya, Yesu ahaavaha ephaawu awiixutti awe ni aahaaleela wiira yaathonyerya erutthu awe. Nave-tho, aahaavaha eviinyu onaaleela wiira enithoonyerya ‘ephome ya nivarihano’. (Mark. 14:22-25; Luka 22:20; 1 aKor. 11:24) Ele Yesu aahimmye awe, eyo piiyo, nivarihano, yaari etthu ya faita yuulupale. Okathi Yesu aalavula awe voohimya sa “nivarihano na niinaano”, owo aahimya atthu yaale anrowa olamulelaka ni yena Moomweneni mwa Muluku ohiya apinaatamu ootheene. (aHeeb. 8:6, 10; 9:15) Arummwa ale khiyaiwexenxe oratteene etthu Yesu aahimmye awe okathi ene yoole. Masi moohipisa, yaamuthanliwa ni munepa woowaarya ni yaarowa wiirelaka mpantta nivarihano na niinaano, eyo piiyo, yaarowa olamulelaka ni Yesu wiirimu. — Yoh. 14:2, 3.
10. Moolumo Yesu aalavunle awe oGalileya, avirikanne sai ni ale aalavunle awe okathi wa Eyoolya ya Ohiyu ya Apwiya? (Nwehe efootu.)
10 Ele Yesu aahimmye awe okathi wa Eyoolya ya Ohiyu ya Apwiya, enivareleya muteko para “nikoto naamukhaani”. Arummwa ale oororomeleya yaari ni yena okathi ole, ti yaari oopacerya wiirela mpantta ekurupu ele. (Luka 12:32) Ti yaawo Yesu aavekenle awe okhuura ephaawu ni owurya eviinyu. Nave atthu akina muhoolo mwaya yaarowa wiirelaka mpantta ekrupu ele, yaahaana okhuura ephaawu ni owurya eviinyu okathi wa Eyoolya ya Ohiyu ya Apwiya. Atthu awo paahi tanrowa olamulelaka ni Yesu wiirimu. Etthu Yesu aalenle awe arummwa awe, ennooniherya ovirikana okhanle ni ele aahimmye awe okathi ari awe ni muttitthi ole oGalileya. Tivonto, ele Yesu aahimmye awe okathi wa Eyoolya ya Ohiyu ya Apwiya, enivareleya muteko ni ekrupu yaamukhaani paahi ya atthu. Masi ele aahimmye awe oGalileya, enivareleya muteko para atthu anceene.
Ale anikhuura ephaawu ni owurya eviinyu okathi wa Wuupuwelela, aniirela mpantta ekrupu yaamukhaani ya atthu anrowa olamulelaka ni Yesu wiirimu. Nave apinaatamu ootheene anoowerya ophwanya okumi woohimala, akhala wiira animwaamini mukuttho wa Yesu (Nwehe ettima 10)
11. Etthu xeeni enooniherya wiira masu aalavunle awe oGalileya khahiyo aahimya atthu vakhaani paahi?
11 Etthu yaavaha aya efaita atthu ale Yesu aalavulanne awe oGalileya, yaari eyoolya paahi. Masi Yesu aaphavela waakhaliherya wiiwexexa etthu yaarina efaita yuulupale, ovikana eyoolya. Owo aahaaleela etthu yaarowa waakhaliherya ophwanya okumi woohimala. Nave Yesu aahimmye wiira atthu ale akhwiiye, yaamuhihimuxiwa nihiku nookiserya wiira akhaleke mahiku ootheene. Mareeliho awo, khahiyo yaarowa ophwanya atthu a ekrupu yaamukhaani paahi ntoko aahimmye awe okathi wa Eyoolya ya Ohiyu ya Apwiya. Ohiya-vo, okathi aari awe oGalileya, aalavula sa mareeliho anrowa aya ophwanya atthu ootheene. Owo aahimmye so: “Akhala wira mutthu onookhuura ephaawu ela, onookhala mukumi mahiku otheene. . . . Ephaawu enivaha aka ti erutthu aka wira atthu anikhala valaponi aphwanye okumi”. — Yoh. 6:51. c
12. Etthu xeeni ninreerela ahu opaka wiira niphwanye okumi woohimala?
12 Niireke Yesu aaphavela ohimya wiira atthu ootheene ari valaponi, anoophwanya okumi woohimala? Nnaari. Masi ale ‘anikhuura ephaawu’ ni animwaamini Yesu, tanrowa ophwanya mareeliho awo. Olelo-va, atthu anceene anihimya wiira annimukupali Yesu ni annimuthokorerya ntoko moopoli aya. (Yoh. 6:29) Yaahikhala atthu anceene oGalileya yaawo yaamwaamini Yesu, masi muhoolo mwaya yaahihiya omutthara. Mwaha wa xeeni?
13. Etthu xeeni ninreerela ahu opaka wiira nikhale atthareli ekeekhai a Yesu?
13 Atthu anceene a muttitthi ole, yaamutthara Yesu mwaha woowi aanaavaha itthu yaaphavela aya. Awo yaaphavela wiira openuxeke iretta saya, aavaheke eyoolya ni olavuleke itthu saasivela owiriyana. Yesu aahooniherya wiira khaarwiiye valaponi wiira aavaheke itthu yaapirisari aya. Moovirikana ni vo, owo aarwenle owiixuttiha etthu yaareerela aya opaka wiira akhale atthareli awe ekeekhai. Awo yaahaana “orwa wa” yena aahiiso owiriyana ni weettela itthu sootheene iixuttiha awe. — Yoh. 5:40; 6:44.
14. Nipakeke exeeni wiira nittottele mureerelo erutthu ni ephome ya Yesu?
14 Yesu aahiwiixuttiha atthu ale wiira orumeelaka erutthu awe ni ephome awe, vanweryaneya awo okhala mahiku ootheene. Atthu awo yahaana okupali eyo. Nto waamini iwo waamwaakhaliherya ayuda, nave-tho onoonikhaliherya olelo-va. (Yoh. 6:40) Ele Yesu ohimmye awe eri Yohani 6:53, enitaphulela wiira nihaana waamini mukuttho woowoopola wa Yesu wiira niphwanye okumi woohimala. Atthu anceene anoottottela mureerelo mareeliho awo. — aEef. 1:7.
15-16. Itthu xeeni sa efaita yuulupale niixuntte ahu siri Yohani ekapiitulu 6?
15 Yohani ekapiitulu 6, nihiixutta itthu sinceene seiyo sirina efaita yuulupale ni sinnilipiha vanceene. Nihiixutta wiira Yesu onnaathokorerya vanceene atthu. Okathi aari awe oGalileya, owo aahaapenuxa aretta, aahiwiixuttiha atthu voohimya sa Omwene ni aahaavaha eyoolya atthu ale. (Luka 9:11; Yoh. 6:2, 11, 12) Nave-tho etthu ya faita yuulupale, okhala wiira owo aahiixuttiha wiira yena “ephaawu ya okumi”. — Yoh. 6:35, 48.
16 Ekeekhai wiira ale Yesu aawiitthanne awe okhala “ipwittipwitthi sikina”, khanikhuura ephaawu nnakhala owurya eviinyu okathi wa Wuupuwelela Okhwa wa Yesu. (Yoh. 10:16) Masi awo annikhuura “ephaawu ya okumi” mwa enamuna ya nthoonyeryo. Annipaka eyo, yaaminiki mukuttho wowoopola wa Yesu Kristu. (Yoh. 6:53) Moovirikana ni vo, ale anikhuura ephaawu ni aniwurya eviinyu, annooniherya wiira aniirela mpantta nivarihano na niinaano, ni aakhalana nlipelelo na orowa olamulelaka ni Yesu wiirimu. Hata niri ene atthu oothanliwa aahiiso a ipwittipwitthi sikina, yoowiiraneya eri Yohani ekapiitulu 6, yookhalana yootaphulela ya efaita yuulupale para hiyo, eyo piiyo, nihaana waamini mukuttho wowoopola wa Yesu wiira niphwanye okumi woohimala.
NSIPO 150 Mumphavele Muluku Wira Moopoliwe
a Yoolepa ya Yohani 6:5-35, yoothokoreriwa mwaha ovinre.
b Maasi Yesu aahimmye awe, anithoonyerya mareheryo Yehova opanke awe wiira vaweryaneye okhalana okumi woohimala.
