Kiyariwe mwaakha wa 1927 esitati yaamukhani ya oChicago, Illinois wEstados Unidos. Anamuyari aka yaarina anamwane 5. Jetha, Don, miyo, Karl, ni Joy. Miyo ni axihima aka ootheene, naarina yoolakela emosa-ru, omurumeela Yehova. Jetha aalattuliwe eturma nummeru 2 ya Eskola ya oGileadi mwaakha wa 1943. Axihima aka araru yaahilattuliwa oBeteli ya oBrooklyn oNova York. Don aalattuliwe mwaakha wa 1944, Karl mwaakha wa 1947 ni Joy mwaakha wa 1951. Ntakiheryo naya ni na anamuyari aka, naahikikhaliherya ophavela wunceererya muteko kanvarela aka Yehova.

Anamuyari ahu yaanimusoma Biibiliya ni yaanimphenta Muluku. Awo yaaniniixuttiha opaka etthu emosaru. Nuumala paapa aka orowa owana ekhotto ya olumwenku wootheene wEuropa, owo khaapavela-tho osuwela voohimya sa etiini. Tivonto, maama aka khaareere ohakalala mwaha wa apaapa otthikela owaani. Masi maama aka aahimuleela paapa aka so: “Karl nrowe ntthikele orowa okerexa”. Paapa aka aakhunle so: “Miyo kinimoohoolani, masi nkinrowa ovolowa”. Nto maama aka aahimukoha so: “Mwaha wa xeeni?” Owo aakhunle so: “Okathi wa ekhotto, ahooleli a itiini a ekerexa emosaru, yaaniwana yaaworu ni yaanavekelela anakhotto a ekerexa aya! Nto niireke Muluku aanikhaliherya ikurupu soopiili?”

Nihiku nimosa amaama ari ene okerexa, Anamoona a Yehova anli yaahimana mukhora ahu. Awo yaahinvaha paapa aka iliivuru piili siitthaniwa Luz, seiyo saalavula voohimya sa itthu siri eliivuru ya Revelação. Apaapa sahaasivela vanceene ni yaaheemererya. Nuumala maama aka oweha iliivuru iye, aahipacerya oleeri. Nihiku nimosa, amaama yaahinweha Jornal yoowo aalattula atthu orowa omusoma Biibiliya sirumeeliwaka iliivuru iye saitthaniwa Luz. Nto awo yaahilakela orowa. Okathi aaphiyale awe, muthiyana mmosa aahihula mukhora. Nuumala-vo, maama aka aahimooniha eliivuru emosa ni aahimukoha so: “Niireke iliivuru iya sinisommwa vaava?” Muthiyana owo aakhunle so: “Aayo sinisommwa vaava, xontte pooti ovolowa”. Esumana yaattharelana, maama aka aahikikuxa miyo ni axihima aka nnarowa opuro ole, nto okhuma nihiku nle, naanirowa khula esumana.

Nihiku nimosa nisomaka eliivuru ele, mulipa-aahoolela, aahikivekela wiira kisome Esaalimu 144:15, yeeyo enihimya wiira nloko noohakalala, ti nenle Muluku aya ori Yehova. Tthiri yoolepa ele yaahikisivela  vanceene. Nave-tho, yaahikisivela yoolepa ya 1 Timootheyo 1:11, yeeyo enihimya wiira: Yehova ‘Muluku oohakalala’, ni aEefeso 5:1 yeeyo enihimya wiira: ‘Nimutakiheke Muluku’. Miyo, kaahisuwela wiira kaahaana ohakalalaka mwaha wa omurumeela Mpattuxa ni omuxukhurela mwaha wa eparakha eyo. Kinneererya opaka itthu iyo sootheene okumi aka wootheene.

Muloko waattamenle owaani, waaphwanyaneya oChicago, weiwo waari ikiloomo 32. Masi hata vari siiso, hiyo naanirowela mithukumano, ni omwaamini waka Biibiliya waanincerereya. Kinnuupuwela ekwaha emosa mulipa-aahoolela mithukumano anvekenle awe Jetha wiira okomentari. Okathi yena aakomentari awe, miyo kaahuupuwela so: “Miyo kaanisuwela waakhuliwa waya”. Miyo nave kaahaana ovenxa ntata wiira kikomentari’’. Nuumala-vo, kaahipacerya wiilokiherya wiira kavaheke ikomentaario saka. Masi etthu ya faita yuulupale, okhala wiira miyo ni axihima aka naanilipiha ompatthani ahu ni Yehova. Miyo kipatisiwe mwaakha wa 1941.

Mwaakha wa 1942, aahikhala konkresu oCleveland, Ohio yoowo kihimmuliyala aka. Yaahikhala atthu ikurupu soowiiraka 50 wEstados Unidos yaawo yanwiriyana konkresu ole amurumeelaka telefoni. Emusi ahu yaathukumanne waattamela opuro ole aarowa aya opakiwa konkresu. Okathi ole yiira ewaniwaka ekhotto ya nenli ya olumwenku wootheene. Nave onyokhiwa wa anamoona a Yehova waamutepa wuncerereya. Ohiyu, anna yaanaapattiha alampata a ekaaro yaawehihaka mpantta mukina wa opuro ole naamanke ahu. Anna ale yaahiiwanana wiira khula ohiyu, ahaana okhala mutthu aaweherya khula ekaaro. Nto vakhala wiira yaamwaaweha atakhali awo arwaaka, awo yahaana orumiha epuzina ni waapattiha alampata a ikaaro iye wiira yaatuthe. Nuumala-vo anna akina yaamoorwa okhaliherya. Nuumala oweha eyo kaahuupuwela so: ‘Tthiri arumeyi a Yehova ari oolikana ene para khula etthu’. Nto kaahirupa moomaaleleya, ni khiivo etthu yaanixankinhe.

Nuuvira iyaakha vakhaani, okathi kaamuupuwela aka konkresu ole, kaahiweha wiira maama aka khiivo etthu yaamuxankiha aahiiso oova awe. Maama aka aanimuroromela Yehova ni mutthenkeso awe, nave-tho miyo nkinikhala-khala kiliyalaka ntakiheryo nawe.

Ohinatthi konkresu ole, maama aka aarumeela ntoko pioneera ookilaatheya. Nto maama aka aahivaha ephoole mwaha waalavuliwe voohimya sa ovara muteko wa Muluku wa okathi wootheene. Okathi naatthikela ahu owaani, awo yaahimmye so: “Miyo kaaniphavela ovikaniha orumeela ntoko pioneera, masi kinoona wiira nkinwerya maana kihaana okhapelela emusi ahu mekhaka”. Nuumala-vo, owo aahinikoha vakhala wiira nanwerya omukhaliheryaka. Hiyo nahaakhula wiira aayo. Nto khula voosiisu, aaninivaha muteko mmosa aahiiso miili wiira nivareke nihinatthi olya. Okathi naarowa ahu oskola, amaama yaanivarerya akhala wiira miteko sootheene naahivara, nuumala-vo yaanirowa muteko woolaleerya. Awo yanaatteliwa miteko, masi khula okathi yaaninikhapelela saana. Okathi naatthika ahu oskola, khula nihiku naaphwanya amaama anlipelelaka owaani, wiira nilye etthu othana. Nave ikwaha sikina, nuumala otthika oskola naanirowa naawo muteko woolaleerya. Nto eyo yaahinikhaliherya oweha muteko onivara awe pioneero.

Kikenle muteko wa opioneero kirine ene iyaakha 16. Nnaamwi apaapa yaahaakhanle Namoona a Yehova, awo yaaniphavela osuwela moota waari  aya muteko aka wa opioneero. Ohiyu omosa kaahimuleela paapa aka wiira, hata kiimananihaka khuuvo kinimusomiha aka Biibiliya. Nuumala-vo kaahimukoha paapa aka so: “Niireke munniphavela omusoma Biibiliya ni Miyo?” Owo aahuupuwela vakhaani ni ohimya so: “Miyo nkirina nthowa ninkikhoottiherya weemererya eyo”. Nto miyo kaahikhalana eparakha ya omusomiha paapa aka ntoko naxikola aka oopacerya!

Hiyo naasoma eliivuru “A Verdade Vos Tornará Livres”. Nuuvira okathi kaahiweha wiira paapa aka aanikikhaliherya okhala mwiixuttihi ooloka ni osiveliwaka omusoma Biibiliya. Mwa ntakiheryo, nuumala osoma ettima emosa, owo aahimmye so: “Miyo kihiiwexexa etthu eliivuru ela enihimya aya. Masi munisuwela sai wiira eliivuru ela enihimya ekeekhai?” Miyo nkailokihenrye para waakhula nikoho nle. Nto kaahimuleela so: “Miyo nkiniwerya wootthokiheryani niinaano-va, masi yoosoma ahu enittharelana kinoophavelasa waakhuliwa waya”. Moohakalaliha, kaahiphwanya waakhuliwa waya. Miyo kaahiphwanya soolepa sa mbiibiliyani saalavula voohimya sa mwaha ole naasoma ahu. Okhuma nihiku nle, kaahiixutta otokosa ni wiilokiherya oratteene okathi kinrowa aka wiiriha yoosoma ya Biibiliya. Nto eyo yaahikikhaliherya olipiha waataana waka ni Yehova ni wa paapa aka. Nto owo aahipacerya ovarihela muteko ele iixutta awe ni aahipatisiwa mwaakha wa 1952.

Nuumala ophiyeriha iyaakha 17, kaahikhuma owaani. Murokoraka Jetha a aari misionaaria ni Don aari bethelita. Ootheene aya yaaniphenta yoothanleliwa aya, nto eyo yaahikilipiha vanceene. Kaahimaleliha olepa epetisau ya orowa oBeteli ni oGileyaadi, kinalipelela opuro Yehova aarowa awe okirumeelaka. Nto kaahilattuliwa oBeteli mwaakha wa 1946.

Mwa iyaakha soowiiraka 75 kivirinhe aka kirumeelaka oBeteli, kaahikhalana soothanleliwa sinceene ni kihiixutta itthu sinceene. Mwa ntakiheryo, kaanimpirimiri iliivuru, ovara etepartamento ya ikontha, kaanithuma itthu saarumeeliwa oBeteli ni winviyari mapuro makina. Masi etthu ya faita yuulupale, okhala wiira oBeteli wookikhaliherya olipiha waataana waka ni Yehova, mwa ntakiheryo, omulompa Muluku voosiisu ni myaha siniroiheliwa emusi ya oBeteli.

Miyo kihiixutta itthu sinceene ni muhima aka ookiseriwa iitthaniwa Karl, yoowo aalattuliwe oBeteli mwaakha wa 1947. Owo anisiveliwa omusoma Biibiliya ni aanisuwela wiixuttiha. Waahikhala okathi kanvekenle aka wiira okikhaliherye ni mwaha kaarowa aka olavula. Kaahimuleela wiira kaahitokosa vanceene voohimya sa mwaha ole masi nkaasuwela moota wootthokiherya. Nto owo aahikikhaliherya okikohaka  so: “Joel tuuvi ori muru wa mwaha anyu?” Nto kaahiweha wiira kaahaana ottittimiherya iponto saavarihana ni muru wa mwaha ole kaarowa aka olavula. Miyo nkinkhala-khala kiliyalaka etthu ele aakiixuttinhe awe.

Wiira muteko naavara ahu oBeteli okhaleke woohakalaliha, nahaana wiimananiha opaka ele eniwerya ahu wiira nilaleye ihapari sooreera, nto eyo yaahinikhaliherya okhalana soowiiraneya soolipiha. Kinnuupuwela ekwaha emosa kaari aka ni munna mmosa nrowaka opaka erevisiita othana oBronx oNova York, naarowa omuxukurya muthiyana nanvahe ahu erevista A Sentinela ni Despertai! Naahipacerya ovaanela ni muthiyana ole nihimyaka so: “Ohiyu ola, ninvanela myaha sa mbiibiliyani sa efaita yuulupale”. Nuumala-vo, muthiyana owo aakhunle so: “Akhala wiira munlavula myaha sa mbiibiliyani, pooti ovolowa”. Hiyo naahivaanela vanceene ni osoma soolepa sinceene seiyo saalavula voohimya sa Omwene wa Muluku ni elapo esya. Owo khaareere osiveliwa ni ovaanela iwe. Nto esumana yaattharelana, aahiwiitthana apatthani awe anceene wiira akhale ni hiyo okathi wa yoosoma ahu. Muhoolo mwaya, muthiyana ole ni iyawe, yaahikhala arumeyi oororomeleya a Yehova.

Kaahiviriha iyaakha soowiiraka 10 kimuhaavyaka mutthu wiira kimuthele! Munnisuwela etthu ekikhalihenrye omphwanya murokora orina waataana woolipa ni Yehova? Miyo kaahinvekela Yehova, ni kaahuupuwelela etthu kaarowa aka opaka nuumala othela.

Kaahimusuwela murokora iitthaniwa Mary Aniol nuumala konkresu a mwaakha wa 1953 estaadiyu ya oYankee. Owo aahirowela exikola ya oGileyaadi ni murokoraka Jetha, nave awo yaarumeela ntoko mamisionaaria hoothe. Mary aahikileela soowiiraneya soohakalaliha okathi aarumeela awe ntoko misionaaria oCaribe ni soosoma sa Biibiliya iirinhe awe mwa iyaakha sinceene. Vaavo okathi waavira aya, ophentana wahu waamutepa wunnuwa. Nithelanne Abril mwaakha wa 1955. Kinniweha wiira Mary yaari yoovaha ya Yehova maana khareere okiixuttiha itthu sinceene. Owo aanihakalala ni khula yoothanleliwa awe, aaniimananiha vanceene, anaaphenta atthu akina, ni khula okathi aanihela nipuro noopacerya mookumini mwawe Omwene wa Muluku. (Math. 6:33) Nuumala orumeela iyaakha 3 osirkwiitu, mwaakha wa 1958 naahilattuliwa oBeteli.

Kihiixutta itthu sinceene ni mwaaraka. Mwa ntakiheryo, nuumala othelana naahilakela omusoma Biibiliya hoothe. Khula ekwaha naanisoma iversiikulu 15. Nuumala osoma, naanivaanela itthu niixuntte ahu ni moota naakhanle ahu ooweettela mookumini mwahu. Ikwaha sinceene, Mary aanikileela itthu sinceene soohakalaliha iixutte awe oGileyaadi ni muteko wa omisionaaria. Itthu aakiixuttinhe awe sookikhaliherya olokiherya saana myaha saka ni osuwela moota wowaalipiha arokora. — Mir. 25:11.

Mwaaraka Mary, okhwiiye mwaakha wa 2013. Miyo kinniphavela vanceene otthikela onweha elapo esya. Hata vari siiso, koolakela ohihiya wiixuttihiwa ni Yehova ni omuroromela ni murima aka wootheene. (Mir. 3:5, 6) Wuupuwelela itthu arumeyi a Yehova anrowa aya opaka elapo esya, onnikimaaliha ni okihakalaliha. Elapo esya moohaanyiherya nnimwiixutta itthu sinceene isya ni mwiixuttihi ahu muulupale! Nkinisuwela moota woomuxukhurela Yehova, mwaha wa itthu sinceene okiixuttinhe awe mpakha olelo-va, ni oreera murima onikooniherya awe.