1. Etthu xeeni Yesu aahimmye awe sa mahiku ookiserya, ni nlopolo xeeni aavanhe awe awiixutti awe?

 MAHIKU vakhaani Yesu ohinatthi okhwa, awiixutti awe axexe yaahimukoha so: “Tiivi eri ethoonyeryo ya . . . omala wa olumwenku?” (Math. 24:3) Woonasa wene, awiixutti ale yaakoha aphavelaka osuwela okathi Yerusalemu ni etemplo saarowa aya opwetexiwa. Yesu khaalavunle paahi okathi Yerusalemu aarowa awe opwetexiwa, masi owo aahilavula moota waarowa aya ʻomala olumwenkuʼ onikhala ahu. Yesu aaleelaka awiixutti awe voohimya sa omala wa olumwenku, owo aahimmye so: “Vano, nihiku nene wala ewoora ene khuuvo onisuwela, nnakhala malaikha a wiirimu hata Mwaana a Muluku, masi Tiithi paahi tonisuwela”. Nuumala Yesu olavula masu ala, owo aahaalopola awiixutti awe wiira: “Muhirupe” ni “Muthipeleleke owehaweha”. — Mar. 13:32-37.

2. Xeeni vaari aya wa faita makristau yaakhala okathi wa arummwa okhala oowehaweha?

² Makristau ayuda yaakhala okathi wa arummwa yaahaana wiikasoopa. Okhala wiira opaka eyo, yaamwaakhaliherya woopowa. Yesu aahaaleela wiira yaahaana okhala oowehaweha wiira asuwele okathi Yerusalemu aarowa awe opwetexiwa. Owo aahimmye so: “Mwaweha oYerusalemu orukureriwe ene ni anakhotto, musuweleke wira opwetexiwa waya ori vakhiviru”. Okathi makristau yaarowa aya owehaka itthu iyo siiraneyaka, awo yaahaana opaka ele Yesu aarumme awe ni “otthyawela omiyaakoni”. (Luka 21:20, 21) Ale yaiwelenle nlopolo nle na Yesu, yahoopowa okathi aroma yampwetenxe aya Yerusalemu.

3. Mwaha ola ninrowa wiixutta exeeni?

³ Moohipisa, makhalelo ootakhala a olumwenku ola anoomala. Masi ehinatthi eyo wiiraneya, hiyo nihaana okhala ohirupa ni ohihiya okhala oowehaweha. Nto mwaha ola, nnooweha  moota nikhanle ahu okhalana ephoole okathi ninweha ahu aahiiso owiriyana itthu siniiraneya olumwenku ola. Nave-tho, nnooweha moota nikhanle ahu oowiikasoopa ni orumeela mwa miruku okathi ahu.

4. Xeeni ninreerela ahu ovahaka ephoole itthu siniiraneya moolumwenkuni ni moota xeeni itthu iyo sinimaleliha aya iprofesia sa mbiibiliyani?

⁴ Tthiri nookhalana mathowa ooloka anniiriha okhalana ephoole ni itthu siniiraneya moolumwenkuni. Maana itthu iyo sinimaleliha iprofesia sa mbiibiliyani. Mwa ntakiheryo, Yesu aahihimya itthu saarowa onikhaliherya osuwela okathi olumwenku ola wa Satana onrowa aya opwetexiwa. (Math. 24:3-14) Nave murummwa Pedru aahihimya wiira nihaana ovahaka ephoole wiiraneya wa iprofesia iyo, wiira waamini wahu okhale woolipa. (2 Ped. 1:19-21) Eliivuru yookiserya ya mbiibiliyani enipacerya ni masu ala anihimya so: “Ala moolumo a itthu Yesu Kristu oonihenrye awe okathi ola. Yesu aahivahiwa itthu iyo ni Muluku, wira owooniherye arumeyi a Muluku itthu saarowa wiiraneya voohipisa”. (Wiis. 1:1) Nto ti vooloka ovaha ephoole itthu siniiraneya moolumwenkuni ni oweha moota iyo sinimaleliha aya iprofesia sa mbiibiliyani. Nave hiyo pooti ophavelaka waaleela atthu akina voohimya sa itthu iyo.

5. Exeeni ninreerela ahu osyaka ni exeeni ninreerela ahu opaka? (Nwehe efootu.)

⁵ Okathi ninvaanela ahu ni atthu akina sa iprofesia sa mbiibiliyani, nihaana osyaka waaleela atthu awo itthu sinrowa wiiraneya muhoolo nihinsuwela ahu. Mwaha wa xeeni? Mwaha woowi khanimphavela ohimya etthu yaarowa okumiherya ohiiwanana mmulokoni. Mwa ntakiheryo, woonasa wene hiyo pooti wiiwaka wiira makhulupale a mulaponi aniphavela omaliha ikhotto, nto eyo pooti okumiheryaka murettele ni ovareleleya. Ohiya ohimya wiira itthu iyo sinimaleliha eprofesia eri 1 aTesaloonika 5:3, vaamureerela osoma malakiheryo akumiheriwe niinaano. Nave okathi ninvaanela ahu, itthu ninlavula ahu sihaana ovarihanaka ni malakiheryo akumiheriwe ni mutthenkeso wa Yehova. Niira siiso, nnimwaakhaliherya anna ni arokora okhalana “muupuwelo ni moonelo mmosaru”. — 1 aKor. 1:10; 4:6.

6. Itthu xeeni nniixutta ahu okathi nimmusoma ahu 2 Pedru 3:11-13?

⁶ Mmusome 2 Pedru 3:11-13. Murummwa Pedru onninikhaliherya okhalana moonelo wooloka okathi ninthokorerya ahu iprofesia sa mbiibiliyani. Owo aahimmye wiira nihaana ʻowehereryaka nihiku na Yehova, ni ohiliyalaʼ. Mwaha wa xeeni? Mwaha woowi khanimphavela paahi osuwela nihiku ni ewoora Yehova onrowa awe omuruuha Harmagedoni. Masi nimphavela orumeela okathi onihala wiira ʻnikhale atthu anivara miteko sooloka ni ampaka itthu sinooniherya wiira anniroromeleya wa Mulukuʼ. (Math. 24:36; Luka 12:40) Ni moolumo makina, nimphavela opaka itthu sooloka ni okupali wiira itthu sootheene nninvarela ahu Yehova nimpaka mwaha womphenta wahu vanceene. Masi naaphavelaka opaka eyo, nihaana okhala oowiikasoopa.

7. Nnooniherya sai wiira ninnikasoopa? (Luka 21:34.)

⁷ Yesu aahaaleela awiixutti awe wiira ohiya paahi owehaka itthu siniiraneya moolumwenkuni, masi yaahaana okhala oowiikasoopa. Ninnisuwela eyo, okathi ninsoma ahu masu ari Luka 21:34. (Mmusome.) Tthiri Yesu aahimmye wiira: “Mwiikasoope”. Mutthu oniikasoopa, onnivaha ephoole ni onnikhootta itthu sootheene saarowa ohonona waataana wawe ni Yehova. Mutthu onipaka eyo, onnikhala moophentani mwa Muluku. — Mir. 22:3; Yuda 20, 21.

8. Miruku xeeni murummwa Paulo aavanhe awe makristau?

 ⁸ Murummwa Paulo aahaaleela makristau wiira yaahaana owehawehaka mweettelo aya. Mwa ntakiheryo, owo aahaaleela makristau a wEefeso wiira: “Nwehaweheke saana mweettelo anyu, wiira muheetteke ntoko alolo masi ntoko atthu a miruku”. (aEef. 5:15, 16) Khula okathi, Satana onnimananiha ohonona waataana wahu ni Yehova. Ti maana aya Biibiliya onnitumererya awe wiira nihaana “osuwela ele Yehova oniphavela awe”. Nto napaka eyo nnoowerya oxintta sooweeha sa Satana. — aEef. 5:17.

9. Ninrowa owerya sai osuwela ele Yehova oniphavela awe?

⁹ Biibiliya khonihimya khula etthu ninreerela ahu osyaka wiira niwerye olipiha waataana wahu ni Yehova. Masi ikwaha sikina, hiyo nihaana opaka soothanla nnaamwi Biibiliya ohihimyaka mooluluwanya. Wiira nipake soothanla mwa miruku, nihaana osuwela “ele Yehova oniphavela awe”. Nnoowerya opaka eyo, akhala wiira nnoomusomaka Biibiliya khula nihiku ni wuupuwelela ele ninsoma ahu. Hata Biibiliya ohihimyaka mooluluwanya voohimya sa mwaha mmosa, hiyo nnoowerya weetta ntoko “atthu a miruku”. Vakhala wiira nnimwiimananiha osuwela ele Yehova oniphavela awe ni okhalana “muupuwelo wa Kristu”, nnoopaka soothanla sooloka. (1 aKor. 2:14-16) Nnaamwi sooweeha sikina sa Satana siri ene sookhweya osuwela, masi sikina ti soovila osuwela.

10. Mikhalelo xeeni soowoopiha ninreerela ahu osyaka?

¹⁰ Sookhala itthu ninreerela ahu osyaka, itthu sene tiiya: Olavula moovekana ni mutthu nihithelanne ahu, owurya vanceene aahiiso ohapaliwa, olya vanceene, waalavula moohiloka atthu akina, oweha epornografia, ifilme soowali, iprograma sinooniherya itthu soohiloka ni itthu sikina. (Esal. 101:3) Khula okathi, nwanani ahu Diabo onnirumeela sooweha soovirikana wiira ohonone ompatthani ahu ni Yehova. (1 Ped. 5:8) Naahikhalane ephoole, Satana pooti ohelaka vamurimani vahu aahiiso mmuupuweloni mwahu itthu ntoko nrima, ohiroromeleya, ohiphiyeriwa, onyokhana, wiikompela ni opweha mathowa vamurimani. (aGal. 5:19-21) Wanipacerya woonasa wene hiyo pooti wuupuwelaka wiira miyuupuwelo iyo khahiyo sootakhala. Ntoko siisaale mwiri wa eveneno onwerya awe ovuvurya ni wiiva miri sikina, moolikanasa naahikhalane ephoole, mikhalelo soohiloka siri vamurimani vahu pooti wunnuwa ni ohonona mikhalelo sahu sooloka. — Yak. 1:14, 15.

11. Etthu xeeni yoowoopiha ninreerela ahu okhalana ephoole, ni mwaha wa xeeni?

¹¹ Etthu ekina nikhanle ahu osyaka ori waapaka apatthani oohiloka. Nrowe niwehe ntakiheryo nimosa. Muupuwele wiira munivara muteko ni mutthu ohikhanle Namoona a Yehova. Okhala wiira nyuwo mwa Namoona a Yehova muniphavela wiira owo owooneke saana Anamoona a Yehova akina. Mwaha waivaavo, khula okathi nyuwo munnimuthokorerya saana ni omureerela murima mutthu owo. Nto, mahiku makina okathi woophumurya nyuwo munnoolya hoothe. Masi moohipisa nyuwo munnipaka eyo khula nihiku. Ikwaha sikina munivaanela anyu, owo onnilavula myaha soohiloka. Wanipacerya myaha iyo pooti ohoosivelaka-ni. Nto nuuvira okathi, nyuwo munnilimalela myaha iyo muhinacalela. Nihiku nikina, owo onnoolattulani wiira mwalye hoothe opuro mukina nuumala muteko, nto nyuwo munneemererya. Nuuvira okathi nyuwo munnipacerya wuupuwela ntoko ole munivarana anyu muteko. Mwa okathi vakhaani paahi, nyuwo munnipacerya omutakiha ole munivarana anyu muteko. Ekeekhai wiira nihaana waathokoreryaka saana ni waareerela murima atthu ootheene, masi nihiliyale wiira awo pooti ohononaka mweettelo ahu wooloka. (1 aKor. 15:33) Niikasoopa, ntoko Yesu ohimmye awe, khaninrowa waataanaka ni atthu  ahiniphenta malamulo a Yehova. (2 aKor. 6:15) Napaka eyo nnoowehaka itthu soowoopiha ni osyaka.

12. Awiixutti a Yesu yaahaana opaka exeeni alipelelaka opwetexiwa makhalelo a okathi ole?

¹² Yesu khaaphavela wiira awiixutti awe yiikhuraaneke paahi alipelelaka opwetexiwa wa makhalelo a okathi ole. Ti nthowa naya Yesu aavanhe awe muteko awiixutti awe wiira ahale avaraka. Nto Yesu aalenle wiira yaahaana olaleyaka ihapari sooreera “oYerusalemu, oYudeya ni oSamariya wootheene, ni elapo yootheene ya vathi”. (Mit. 1:6-8) Muteko ole tthiri waari muulupale! Mwaha wooluttuweliwa ovara muteko woolaleerya, awo yaahirumeela saana okathi aya.

13. Xeeni ninreerela ahu orumeelaka okathi ahu mwa miruku? (aKolosi 4:5.)

¹³ Mmusome aKolosi 4:5. Wiira niwerye wiikasoopa, nihaana oweha moota ninrumeela ahu okathi ahu. Biibiliya onihimya wiira: “Oreriwa n’utakhaliwa khunimuthanla mutthu”. (Mus. 9:11) Ti maana aya hiyo pooti oyeleelaka okumi ahu mootutuxerya.

14-15. Ninrowa orumeela sai okathi ahu mwa miruku? (aHeeberi 6:11, 12.) (Nwehe efootu.)

¹⁴ Nnoowerya orumeela okathi ahu saana, akhala wiira nnoopaka ele Yehova oniphavela awe ni olipiha waataana wahu ni yena. (Yoh.  14:21) Nto nihaana ʻokhala oolipa ni oohittikinyeya. Okathi wootheene nikhalaneke muteko munceene nnaavarela ahu Apwiyaʼ. (1 aKor. 15:58) Niira siiso, hata ophiyaka wanikisa, niire so, wanikisa wa okumi ahu aahiiso wa olumwenku, hiyo khaninrowa othanana. — Math. 24:13; aRom. 14:8.

¹⁵ Olelo-va, Yesu nlelo onniweettiha awiixutti awe okathi anilaleya aya ihapari sooreera sa Omwene elapo yootheene. Yesu aahaaleiherya awiixutti awe wiira aarowa waakhaliheryaka mpakha wanikisa. Nave olelo-va, ti etthu onipaka awe. Onnipaka eyo okathi onaakhaliherya awe awiixutti awe olaleya ihapari sooreera sa Omwene olumwenku wootheene. Nto nikhaliheriwaka ni mutthenkeso wa Yehova, ninniixuttihiwa moota woovara muteko owo. (Math. 28:18-20) Nave hiyo ninnipaka ele Yesu onrumme awe. Nilipelelaka okathi Yehova onrowa awe opwetexa olumwenku ola, hiyo nihaana wiimananiha wiira nilaleerye ni wiixuttiha ni ohihiya okhala oowehaweha. Vakhala wiira nnootthara malakiheryo ari aHeeberi 6:11, 12, nnoowerya ovarexexa nlipelelo nahu “mpakha wookiseryani”. — Mmusome.

16. Exeeni nilakenle ahu ohihiya opaka?

¹⁶ Yehova oothanla nihiku ni okathi onrowa awe opwetexa olumwenku ola wa Satana. Nihiku nlo naphiya, Yehova onoorowa opaka itthu sootheene aaleihenrye awe. Ekeekhai wiira hiyo ikwaha sikina pooti woonaka opisa omala olumwenku ola, masi nikupaliki wiira nihiku na Yehova nnoophiya “tthiri, khivaninteya”. (Hab. 2:3) Nto nilipelelaka ophiya nihiku na Yehova, nihaana okhala oowehaweha. Nto nihihiye ʻwalipelela Apwiya: Nimuroromelaka Muluku, [Yoowo ori] mopoli ahuʼ. — Mik. 7:7.