1-2. Exeeni ennikhaliherya wiiwexexa moonelo wa Yehova, nuumala ohimyaniwa itthu soowoothiwa?

 NKUUPUWELANI ela: Mutthu munimphenta anyu vanceene olavunle ene itthu sihireere woowereyani. Masi munnisuwela wiira itthu iyo ti soowoothiwa. Hata vari siiso atthu akina annikupali. Etthu yootepa oxankiha okhala wiira, atthu awo annilaleya itthu iyo soowoothiwa ni anniwiiriha atthu anceene okupali. Mwaarowa woonela sai? Nyuwo mwaamuriipiwa murima vanceene mwaha wa itthu iyo. Masi hata vari siiso, munnaattittimiha vanceene atthu awo, nave khamumphavela wiira mweettelo wooloka aahiiso nsina nanyu nihononiwe. — Mir. 22:1.

² Yoowiiraneya ela enninikhaliherya wiiwexexa moota Yehova oonenle awe, nuumala oveehiwa nsina nawe. Nlaikha nimosa, naahilavula itthu soowootha nimuhimeeryaka muthiyana oopacerya, Eva. Owo aahikupali itthu iyo soowoothiwa. Mwaha wa wootha wa nlaikha nno, anamuyari ahu oopacerya yaahimutthekela Yehova, nto eyo ehiiriha apinaatamu ootheene okhalana yoottheka ni okhwaaka. (Maph. 3:1-6; aRom. 5:12) Olelo-va sinnikhumelela mixankiho olumwenku wootheene, ntoko okhwa, ikhotto ni ohaawa, mwaha wa wootha wa Satana oXardim ya wEdeni. Yehova onoonela sai vaavo vaniweha awe mixankiho sootheene, sinikhumelela mwaha wa wootha iwo? Ohimya ekeekhai Yehova khoreere oriipiwa murima. Hata vari siiso, owo khahiyo Muluku ootakhala aahiiso ohinaathokorerya apinaatamu. Tthiri owo khonihiya okhala “Muluku oohakalala”. — 1 Tim. 1:11.

3. Eparakha xeeni nrina ahu?

³ Nookhalana eparakha ya wooniherya wiira itthu Satana aalavunle awe, ohimyaka nsina na Yehova saari soowoothiwa. Nnimooniherya eyo, niiwelelaka nlamulo nni: ‘Mutthapele nsina na [Yehova]’. (Esal. 113:1) Nnoopaka eyo vakhala wiira ninnilavula  ni atthu akina mookhalela, voohimya sa nsina nlo noowaarya. Niireke muri oolikana ene opaka eyo? Nrowe nthokorerye itthu tthaaru sinrowa onikhaliherya otthapela nsina na Yehova ni murima ahu wootheene.

YEHOVA ONNIHAKALALA NAAVUWIHAKA NSINA NAWE

4. Xeeni Yehova onihakalala awe okathi nimmuttottopela ahu? Nvahe nlikanyiho. (Nwehe efootu.)

⁴ Tiithi ahu a wiirimu, onnihakalala vanceene okathi ninvuwiha ahu nsina nawe. (Esal. 119:108) Atthu akina, khanikupali okathi aanittottopeliwa aya ni anilavuliwa aya mwa enamuna yooloka. Niireke Yehova onoonela siiso? Nnaari. Muupuwele nlikanyiho nla: Mwaana mmosa onnimukupaarela paapa awe mwa enamuna yoophenta ni onamuhimeerya so: “Nyuwo mwa paapa ooloka ohinlikananiwa olumwenku ola!” Moolumo ala a mwaana, annimwiiriha paapa ohakalala ni ohinoona yoohimya. Mwaha wa xeeni? Niireke paapa owo khonikupali eyo aahiiso onisuwela mwaha woottottopeliwa ni mwanawe paahi? Nnaari. Moovirikana ni vo, owo onnisuwela wiira paapa ooloka, masi onnihakalala vanceene okathi mwaana ole onimooniherya awe niphento ni onimuxukhurela awe. Paapa ole onnisuwela wiira ophenta ni oxukhuru, mikhalelo sinrowa omukhaliherya mwanawe wunnuwa moohakalala. Moolikanasa ni paapa owo, Yehova, Tiithi ahu, onnihakalala okathi nimmuttottopela ahu.

5. Okathi nimmuttottopela ahu Yehova exeeni nnooniherya ahu?

⁵ Nave okathi nimmuttottopela ahu Yehova, ninnooniherya wiira itthu Satana olavunle awe, oonootherya khula mmosa a hiyo. Moota xeeni? Owo aahimmye wiira khuuvo pinaatamu aarowa okhala oororomeleya wa Yehova ni waakiherya nsina nawe. Nave aahimmye wiira khuuvo pinaatamu nuumala omphwanya mixankiho, aarowa ovikaniha okhala oororomeleya. Aahihimya-tho wiira ootheene ahu nammunyanyala Yehova, akhala wiira mutthu mukina aamunivaha etthu yootepa oloka. (Yoob. 1:9-11; 2:4) Masi murumeyi oororomeleya, Yoobi, aahooniherya wiira Satana nawoothe. Ankhi hiyo? Khula mmosa a hiyo, ookhalana eparakha ya omurumeela moororomeleya ni okhaliherya nsina na Tiithi ahu. (Mir. 27:11) Tthiri opaka eyo eparakha yuulupale.

6. Ninrowa omutakiha sai Mwene Davidi ni aLevi? (Nehemiiya 9:5)

⁶ Omphenta Muluku, onniwiiriha atthu oororomeleya ophavela onvuwiha nsina nawe ni murima aya wootheene. Mwene Davidi aalempe so: “Eroho aka [murima aka] ennattottopela Apwiya: sothene siri mwa miyo sinnivuwiha nsina naya”. (Esal. 103:1) Davidi aanisuwela wiira ottottopela nsina na Yehova, vaamulikana  ni omuttottopela mwaneene ene Yehova. Nsina na Yehova ninhela muhina mikhalelo sawe, nto eyo enniniiriha wuupuwelela mikhalelo sawe iyo sooloka, ni itthu soohakalaliha onipaka awe. Davidi aanithokorerya nsina na Tiithi awe okhala noowaarya, ni aanivuwiha. Owo aanipaka eyo ni ‘itthu sootheene aarina awe’ eyo piiyo, ni murima awe wootheene. Mwa enamuna emosa-ru, aLevi yaanipaka ele yaawerya aya, wiira ekhaliherye ovuwihiwa nsina na Yehova. Moowiiyeviha, awo yaaneemererya wiira moolumo aya khiyaawerya ovuwiha nsina noowaarya na Yehova voophwanelela. (Mmusome Nehemiiya 9:5.) Moohaanyiherya, wiiyeviha iwo waahimuhakalaliha vanceene Yehova.

7. Ninrowa onvuwiha sai Yehova okathi woolaleerya ni vaavo nintthekula ahu ni atthu akina?

⁷ Omuttottopela Yehova, enamuna ekina nnooniherya ahu wiira ninnimuxukhurela ni omphenta. Okathi ninlaleerya ahu, nihiliyale wiira etthu yuulupale nimphavela ahu, ori waakhaliherya atthu akina omwaattamela Yehova ni omuthokorerya ntoko Tiithi oophenta. (Yak. 4:8) Nave nookhalana eparakha yuulupale ya omurumeela Biibiliya niwooniheryaka atthu akina wiira Yehova, Muluku oophenta, axariya, a ankhili, oowerya ni orina mikhalelo sikina soovara murima. Enamuna ekina nninvuwiha ahu Yehova ni omuhakalaliha, ori wiimananiha okhalana mikhalelo ntoko sirina awe. (aEef. 5:1) Akhala wiira nnimwiira siiso, atthu akina animoonaka wiira noovirikana ni ale ahinimurumeela Yehova. (Math. 5:14-16) Okathi nintthekula ahu ni atthu akina, pooti wiira nnookhalanaka eparakha ya waakhaliherya osuwela xeeni niri ahu oovirikana ni atthu akina. Yookhumelela aya, atthu arina murima wooloka, anoophavelaka wiixutta voohimya sa Muluku ahu. Okathi nninvuwiha ahu Yehova mwa inamuna iya, owo onnihakalala vanceene. — 1 Tim. 2:3, 4.

YESU ONNIHAKALALA OKATHI NINVUWIHA AHU NSINA NA YEHOVA

8. Xeeni Yesu ori awe ntakiheryo nooloka na ovuwiha nsina na Yehova?

⁸ Soopattuxiwa sootheene sikhale wiirimu aahiiso valaponi, khuuvo onimusuwela saana Tiithi ohikhanle Mwaana. (Math. 11:27) Yesu onnimphenta Tiithi awe ni topacenrye ovuwiha nsina nawe. (Yoh. 14:31) Okathi anvekela awe Tiithi awe ohiyu wookiserya ohinatthi okhwa, Yesu aahilavula sa muteko woolaleerya valaponi, ohimyaka so: “Miyo kihaasuweliha nsina nanyu”. (Yoh. 17:26) Exeeni aaphavela awe ohimya?

9. Nlikanyiho xeeni Yesu ovanhe awe ninnikhaliherya osuwela mikhalelo sa Yehova?

⁹ Ohiya paahi waaleela atthu wiira nsina na Muluku Yehova, Yesu aahipaka-tho itthu sikina. Ayuda, yaawo yaavaanela ni Yesu, yaanisuwela nsina na Muluku, masi Yesu taapacenrye ‘waasuweliha’ mikhalelo sa Tiithi awe. (Yoh. 1:17, 18) Mwa ntakiheryo, soolempwa sa eHeeberi, sinihimya wiira Yehova toomoriwa ikharari ni ooreera murima. (Okhum. 34:5-7) Yesu aahitthokiherya eyo, ovahaka ntakiheryo na mwaana aakhumme vate wa paapa awe. Vaavo ninsoma ahu nlikanyiho na paapa oninweha mwanawe ori ene ottaiwene, onatthimaka orowaka omukupaarela ni omulevelela ni murima wootheene, niri eliivuru ya Luka, ninniwerya osuwela oratteene omoriwa ikharari ni oreera murima wa Yehova. (Luka 15:11-32) Yesu oonisuweliha moota Yehova ori awe.

10. a) Ninsuwela sai wiira Yesu aanirumeela nsina na Tiithi awe ni aaphavela wiira atthu akina apake etthu emosa-ru? (Marko 5:19) (Nwehe eteseenyo.) b) Yesu oniphavela wiira nipakeke exeeni olelo va?

¹⁰ Niireke Yesu aaniphavela wiira atthu akina, arumeeleke nsina na Tiithi awe? Aayo. Ahooleli akina a itiini, yaakupali wiira oromola nsina na Muluku mahala ene, waari ohikhalana nttittimiho. Masi Yesu kheemerenrye wiira moonelo  owo woohiloka, omukhoottiherye ovuwiha nsina na Tiithi awe. Ekwaha emosa, Yesu aahimpenuxa mulopwana mmosa aavariwe ni malaikha ootakhala, aakhala muttetthe wa oXeraasa. Atthu yaahipacerya omoova vanceene Yesu ni yaahimuxonttela wiira okhume mmuttettheni mwaya. (Mar. 5:16, 17) Hata vari siiso, Yesu aaphavela wiira atthu a muttetthe ole esuwele nsina na Muluku. Ti maana aya Yesu aamulenle awe mulopwana ole, wiira aahimeerye atthu akina itthu Yehova ampakenle awe. (Mmusome Marko 5:19.) a Olelo-va, Yesu oniphavela wiira nsina na Tiithi awe, nisuweliwe olumwenku wootheene! (Math. 24:14; 28:19, 20) Okathi nimpaka ahu ele ninwerya ahu, wiira naasuwelihe atthu akina nsina na Yehova, ninnimuhakalaliha Mwene ahu, Yesu Kristu.

11. Exeeni Yesu aawiixuttinhe awe arumeyi awe ovekelaka, ni mwaha wa xeeni? (Ezekiyeli 36:23)

¹¹ Yesu aanisuwela wiira Yoolakela ya Yehova, yaari otteeliha nsina nawe ni waakhaliherya atthu akina osuwela wiira itthu saahimmwe ni Satana saari soowoothiwa. Ti etthu yaamwiirinhe owiixuttiha atthareli awe wiira avekeleke so: “Tiithi ihu muri wiirimu, nsina nanyu nitteelihiwe”. (Math. 6:9) Yesu aanisuwela wiira soopattuxiwa sootheene, saahaana wiirela mpantta mwaha ola wa otteeliha nsina na Yehova. (Mmusome Ezekiyeli 36:23.) Khiivo yoopattuxiwa eri valaponi, ewenrye otteeliha nsina na Yehova onvikana Yesu. Masi awanani awe Yesu, yaamoothenrye exeeni nuumala yena otthukweliwa? Awo yaahimootherya ahimyaka wiira khaamuttittimiha Muluku! Yesu aanisuwela wiira orumeela moohiloka nsina na Tiithi awe aahiiso oveehiha, yaari yoottheka yuulupale. Tthiri Yesu aahiriipiwa murima vanceene mwaha wa wootheriwa ni otthukweliwa. Woonasa wene, osuwela wiira oveehiha nsina na Yehova yaari yoottheka, eyo ti etthu ‘yaamuriipinhe murima’ ohinatthi otthukweliwa. — Luka 22:41-44.

12. Yesu otteelinhe sai nsina na Tiithi awe?

¹² Wiira ootteelihe nsina na Tiithi awe, Yesu aahivilela omaniwa, oveehiwa ni wootheriwa itthu. Owo aahisuwela wiira aanimwiiwelela Tiithi awe mwa itthu sootheene, nto khiivo etthu yaamwiiriha wuuliwa muru. (aHeeb. 12:2) Nave aanisuwela wiira Satana taamukumiherya mixankiho iye. (Luka 22:2-4; 23:33, 34) Satana aanipaka sootheene aawerya awe  wiira omwiirihe Yesu okhala oohiroromeleya, masi khaawenrye. Yesu ohooniherya wiira Satana nawoothe muulupale, nave Yehova ookhalana arumeyi ahinihiya okhala oororomeleya wa yena, hata saaphwanyaka mixankiho.

13. Munrowa omuhakalaliha sai Mwene anyu, Yesu?

¹³ Niireke munniphavela omuhakalaliha Mwene anyu, Yesu? Muhihiye ovuwiha nsina na Yehova, mwaakhaliheryaka atthu akina wiixutta mikhalelo soovara murima sa Muluku ahu. Mwiira siiso, munimooniherya wiira munnitthara vakhiviru vene mavalo a Yesu. (1 Ped. 2:21) Ntoko Yesu, mukupaliki wiira munnimuhakalaliha vanceene Yehova. Nave munnooniherya wiira nwanani awe, Satana, nawoothe muulupale!

NINNOOPOLA IKUMI OKATHI NINVUWIHA AHU NSINA NA YEHOVA

14-15. Itthu xeeni soohakalaliha, sinrowa wiiraneya vaavo nnaakhaliherya ahu atthu akina wiixutta voohimya sa Yehova?

¹⁴ Okathi ninvuwiha ahu nsina na Yehova, ninnaakhaliherya atthu akina woopola ikumi saya. Moota xeeni? Okhala wiira atthu anceene ‘miyuupuwelo saya soottiyeliwa ni muluku a olumwenku ola’, Satana. (2 aKor. 4:4) Awo annikupali soowootha sa Satana, ntoko iya: Muluku khokhanle, Muluku ori ottaiwene ni hiyo, khoninthokorerya, tootakhala murima ni onnaapaha anatampi omooroni. Satana onnihimya soowootha iya sootheene, maana oniphavela wiira omala-malihe nsina na Yehova ni aakhoottiherye atthu okhala apatthani awe. Masi ninnimukhoottiherya Satana opaka eyo, vaavo ninwiixuttiha ahu atthu ekeekhai voohimya sa Tiithi ahu ni nivuwihaka nsina noowaarya na Muluku ahu. Nto exeeni enikhumelela?

¹⁵ Ikeekhai sa Nuulumo na Muluku, sookhalana owerya wuulupale. Okathi ninwiixuttiha ahu atthu voohimya sa Yehova ni mikhalelo sawe, ninniweha etthu yooreera enikhumelela. Sinnikhuma miyuupuwelo soohiloka nikhanle ahu oolikanyiha ni ookulu athaapwa Satana aawarinhe awe atthu. Nto awo annipacerya oweha mikhalelo sooloka sa Tiithi ahu, nave annipacerya osiveliwa ni owerya ohinimala wa Yehova. (Yes. 40:26) Nto awo annimuroromela Yehova mwaha wa exariya awe. (Otum. 32:4) Ankhili a Yehova annaakhaliherya wiixutta itthu sinceene. (Yes. 55:9; aRom. 11:33) Awo anniphwanya nimaaliho vaavo aniixutta aya wiira Yehova  toophenta. (1 Yoh. 4:8) Vaavo anitepa aya omwaattamela Yehova, nlipelelo na okhala mahiku ootheene annoona okhala neekeekhai. Moohaanyiherya, nookhalana eparakha yuulupale ya waakhaliherya atthu akina omwaattamela Tiithi ahu! Tthiri okathi nimpaka ahu eyo, Yehova onninthokorerya okhala atthu ‘anivara muteko vamosa ni yena’. — 1 aKor. 3:5, 9.

16. Atthu anoonela sai okathi aniixutta aya voohimya sa nsina na Muluku?

¹⁶ Woonasa wene, etthu yoopacerya nnaaleela ahu atthu akina, ori waasuweliha wiira nsina na Muluku, Yehova. Eyo pooti omwiiriha mutthu orina murima wooloka osiveliwa. Mwa ntakiheryo, mwali mmosa oniitthaniwa Aaliyah, b ohuuwale etiini ehikhanle ya ekristau. Masi owo khaasiveliwa ni etiini awe, maana aanoona wiira khiyaamukhaliherya omwaattamela Muluku. Aahiweha eyo, nuumala opacerya omusoma Biibiliya ni Anamoona a Yehova. Owo aahipacerya omoona Muluku ntoko mpatthani awe ni aahixanka nuumala osuwela wiira nsina na Muluku naahikumihiwa aBiibiliya akina nranttelihiwa ni etiitulo yoowi, Apwiya. Okumi awe waahiturukeya, nuumala osuwela nsina na Muluku, Yehova. Owo ohimmye so: “Mpatthani aka muulupale okhalana nsina!” Exeeni yaakhumelenle muhoolo mwaya? Owo onihimya-tho so: “Nenna-va, kookhalana murettele vamurimani vaka, nave kinnoona wiira ka mutthu a faita”. Mulopwana mmosa iitthaniwa Steve aari mulipa oowiipa, aahuuwale mwa enamuna yooxankiha etiini ya eYuda. Okhala wiira aaniweha itthu sinceene soohiloka saapakiwa ni etiini awe, owo khaaphavela wiirela mpantta etiini yootthokiheya. Masi nuumala maama awe okhwa, owo aaheemererya wiirela mpantta yoosoma ya Biibiliya, aasomihiwa mpatthani awe ni Namoona a Yehova. Nuumala wiixutta nsina na Muluku, eyo yaahinvara murima vanceene. Owo ohimmye so: “Miyo nkaatonko wiixutta nsina na Muluku, ele yaari ekwaha yoopacerya kiixuntte aka wiira Muluku ookhalana nsina, nto kaahipacerya omuthokorerya ntoko Mutthu. Okathi ene yoole, kaahoona wiira komphwanya Mpatthani aka a eekeekhai”.

17. Xeeni muhiniphavela anyu ohiya ovuwiha nsina na Yehova? (Nwehe efootu.)

¹⁷ Okathi munivara anyu muteko woolaleerya, niireke munniwiixuttiha atthu voohimya sa nsina noowaarya na Yehova? Niireke munnaakhaliherya osuwela mikhalelo soovara murima sa Muluku ahu? Akhala wiira munnipaka eyo, munnivuwiha nsina na Muluku. Muhihiye ovuwiha nsina noowaarya na Yehova, mwaakhaliheryaka atthu akina omusuwela mwaneene nsina nlo. Mwiira siiso, munimoopola ikumi sinceene. Nave munrowa ottharaka mavalo a Mwene ahu, Yesu Kristu ni etthu yootepexa oreera munoomuhakalalihaka Tiithi ahu, Yehova. Tivonto, muhihiye ‘ottottopela nsina na [Yehova] mahiku ootheene’! — Esal. 145:2.