Akhala wira eyo ekeekhai, nkahaya muupuwele moota okumi ahu waarowa aya okhala. Mwa ntakiheryo, nkahaya muupuwele ela: mwaana a munna ohiixiiva. Tiithi awe ooriipiwa murima vanceene. Owo onnikoha akhala wira Yehova aanisuwela itthu saarowa okhumelela nto onathanla akhala wira owo ni amwaarawe yanwerya ovilela ehasara ele. Olumwenku ola, anamunceene a hiyo nnookumanana ihasara. Nto niireke nihaana okupali wira Yehova onniweha-weha itthu sotheene sinikhumelela mookumini mwahu?

Vaavo ninrowa ahu omuthokorerya 1 aKorinto 10:13, ninrowa woona wira Biibiliya khonikhaliherya muupuwelo woowi Yehova onnisuwela vahinatthi mixankiho siniwerya ahu ovilela, nto onathanla muxankiho ene onrowa ahu okumana. Xeeni vanihimya ahu siiso? Nrowe nthokorerye mathowa maxexe.

Noopacerya, Yehova ohaavaha apinaatamu othanla mootaphuwa, niire so, otaphuwa wira apakeke soothanla saya. Yehova oniphavela wira nipakeke soothanla sahu. (Otumererya 30:19, 20; Yoxuwa 24:15) Akhala wira ninnipaka soothanla sinimusivela Yehova, nto nihaana ororomela wira onoonikhaliherya. (Miruku 16:9) Masi akhala wira nimpaka soothanla soohiloka, nnoohepha ele enaala ahu. (aGalasia 6:7) Vaakhanle wira Yehova aamuthanla vahinatthi mixankiho sahu, nto niireke naamukhalana othanla mootaphuwa?

Na nenli, Yehova khonnaakiherya ‘oreriwa n’utakhaliwa ohinimuthanla mutthu’. (Musuweli 9:11) Mutthu pooti omukhumelela ehasara okhala wira ori opuro woohiloka ni okathi woohiloka. Yesu aahilavula sa ehasara yaawiivale atthu 18, okathi yaamorenle aya empa. Yesu ahooniherya wira khahiyo Muluku taawiivale atthu ale. (Luka 13:1-5) Nto khahiyo vooloka wuupuwelaka wira ehinatthi okhumelela ehasara, Muluku onnaathanla tani anrowa woopowa aahiiso okhwa.

Na neeraru, khula mmosa a hiyo ookhalana eparakha yoovikaniha okhala ororomeleya wa Yehova. Satana aahimmye wira arumeyi a Yehova, animurumeela yena mwaha wa itthu onaavaha awe. Satana aahimmye wira hiyo khininwerya okhala oororomeleya wa Yehova akhala wira ninnikumana mixankiho sinceene. (Yobi 1:9-11; 2:4; Wisupulula 12:10) Vaakhanle wira Yehova onninaakiherya mixankiho sikina, nto eyo yaarowa wooniheryaka wira Satana aahimya ekeekhai.

Na neexexe, Yehova khoniphavela osuwela vahinatthi itthu sotheene sinrowa onikhumelela. Ekeekhai wira Yehova onoowerya osuwela itthu sinrowa okhumelela muhoolo aphavela vale. (Yesaya 46:10) Masi, Biibiliya onnooniherya wira Yehova onnithanla ohiphavela osuwela vahinatthi itthu sotheene sinrowa onikhumelela muhoolo. (Maphattuwelo 18:20, 21; 22:12) Yehova toophenta ni taxariya, nto khonnikhoottiherya opaka soothanla sahu mootaphuwa.—Otumererya 32:4; 2 aKorinto 3:17.

Nto, Paulo aaphavela ohimya exeeni vaavo aahimmye awe wira Yehova “khanihiya wira mwehereriwe ovikana ikuru sanyu”? Ni masu ala, Paulo onnitthokiherya ele Yehova onipaka awe okathi wa weehereriwa ohiya nihinatthi weehereriwa. Akhala wira ninnimuroromela Yehova, owo onrowa onikhaliherya okathi ninkumana ahu khula yooweeha mookumini mwahu. (Esalimo 55:23) Vano, nrowe nthokorerye mathowa manli yaamwiirinhe Paulo olavula masu awo.

Nthowa noopacerya ti noowi mixankiho sotheene sinikumana ahu “sinnapwanya” atthu otheene. Okathi wotheene ninkhala ahu olumwenku ola wa Satana, nnookumanaka mixankiho sinceene, hata ihasara. Masi, akhala wira  ninnimuroromela Yehova, nnoovilelaka mixankiho iyo ni ovikaniha okhala oororomeleya. (1 Pedru 5:8, 9) Wanipacerya wa ekapiitulu 10 ya 1 aKorinto, Paulo oolepa sooweeha saaphwannye aIsarayeli moothakoni. (1 aKorinto 10:6-11) Ale yaamuroromela Yehova yaahiwerya ovilela sooweeha iyo. Masi aIsarayeli akina khiyaamwiiwelenle Yehova. Nto awo khiyaavikaninhe ororomeleya okhala wira khiyaamuroromenle Yehova.

Nthowa na nenli, okhala wira Muluku “t’òroromeleya”. Eyo enitaphulela exeeni? Oweha moota Yehova onaakhapelela awe arumeyi awe okhuma khalai, ninnoona wira moororomeleya onnaakhaliherya ‘ale animphenta, ni anìwelela ikano sawe’. (Otumererya 7:9) Nave ninniixutta wira okathi wotheene Yehova onnimaliherya sooleiherya sawe. (Yoxuwa 23:14) Tthiri nikupaliki itthu iya piili: (1) Yehova khonrowa weemererya wira yooweeha etepaxe ovila nihinwerya ahu ovilela, ni (2) owo ‘ononivaha ikuru’ wira nixintte.

Moota xeeni Yehova ‘onaavaha awe ikuru’ ale animuroromela? Tthiri owo pooti okumiha muxankiho ahu. Masi muupuweleke wira Paulo ohimmye wira Yehova “onimovahani ikuru sinweryananyu ovilela n’uxintta”. Tivonto, Yehova khula okathi onninivaha ikuru wira nivikanihe okhala oororomeleya. Nrowe nthokorerye inamuna vakhaani sa moota onipaka awe eyo.

• Yehova ‘onninihakalaliha mwa inamuna sothene’. (2 aKorinto 1:3, 4) Owo onoowerya omaaliha muupuwelo ni murima ahu omurumeelaka Biibiliya, munepa awe wootteela ni murumeyi oororomeleya ni a ankhili.—Matheyo 24:45; Yohani 14:16, aRoma 15:4.

• Yehova pooti orumeela munepa awe wootteela wira onikhaliherye. (Yohani 14:26) Munepa wootteela pooti onikhaliherya wuupuwelela sowiiraneya ni malakiheryo a mBiibiliyani wira nipake soothanla mwa miruku.

• Yehova pooti orumeela malaikha wira anikhaliherye.—aHéberi 1:14.

• Yehova pooti waarumeela anna ni arokora wira anikhaliherye. Awo pooti onlipiha ni moolumo ni miteko saya.—aKolosi 4:11.

Nto, exeeni yiixuntta ahu ni moolumo a Paulo aniphwanyaneya 1 aKorinto 10:13? Yehova khonithanla sooweha ninrowa ahu okumana. Masi nikupaliki wira namuroromela Yehova nnoowerya ovilela sooweha iyo. Ninnisuwela wira okathi wotheene Yehova onrowa onivaha ikuru wira niweryeke ovikaniha okhala oororomeleya wa yena.