1, 2. (a) Anamoona a Yehova avirikanne sai ni itiini sikina? (b) Exeeni ninrowa ahu wiixutta mwaha ola ni onittharelana?

IKWAHA sinceene, atthu annaakoha Anamoona a Yehova wira: “Ti pani ori muhooleli anyu?” Awo annikoha siiso okhala wira itiini sinceene ookhala mulopwana aahiiso muthiyana onihoolela. Tthiri ninnihakalala ohimya wira Muhooleli ahu khahiyo pinaatamu. Ohiya-vo, Muhooleli ahu ti Yesu Kristu! Owo onnimwiiwelela Tiithi awe ori Muhooleli muulupale, Yehova.—Matheyo 23:10.

² Nave-tho yookhala egrupu ya alopwana eniitthaniwa “murumeyi òroromeleya ni ànkhili”, yaawo anaahoolela atthu a Muluku valaponi mahiku ala. (Matheyo 24:45) Masi ninsuwela sai wira Yehova tonnihoolela omurumeelaka Mwanawe? Ninrowa woona mathowa mararu annikupaliha eyo. Nave nnaamwi Yehova aarumeelaka apinaatamu wira yaahooleleke atthu awe, ninnoona wira okhuma khalai mpakha vano Yehova tori Muhooleli a ekeekhai a atthu awe.—Yesaya 58:11.

3. Exeeni yanvanhe Moise owerya wira aahooleleke aIsarayeli?

³ Munepa wootteela wahaavaha owerya anamitthaka a Muluku. Yehova aahimuthanla Moise wira aahooleleke aIsarayeli. Exeeni yaamukhalihenrye ovara saana muteko ola wootthuneya?  Yehova aahinvaha Moise “eroho awe yowarya”, niire so, munepa awe wootteela. (Mmusome Yesaya 63:11-14.) Tivonto, Yehova taahoolela atthu awe maana munepa awe wootteela ti waamukhaliherya Moise.

4. Exeeni yooniherya wira Moise aahikhalana munepa wa Muluku? (Nwehe elatarato yoopacerya.)

⁴ Niireke aIsarayeli yanoona wira Moise aahikhalana munepa wa Muluku? Aayo! Maana munepa wootteela wa Yehova waahinvaha Moise owerya wa opaka miiriirya ni omusuweliha nsina na Muluku mwene a wEjiitu, Farawo. (Okhuma 7:1-3) Nave munepa wootteela waahimukhaliherya Moise okhala muhooleli oophenta ni oopixa murima. Moise aahivirikana ni ahooleli a ilapo sikina, yaawo yaari oohaaxa ni oowiitthuna! (Okhuma 5:2, 6-9) Moohaaniherya, Yehova aahimuthanla Moise wira okhale muhooleli a atthu Awe.

5. Atthu xeeni akina Yehova aavanhe awe munepa awe wira yaahooleleke atthu awe?

⁵ Atthu xeeni akina Yehova aavanhe awe munepa awe wira yaahooleleke atthu awe? Biibiliya onaakhula so: ‘Yoxuwa ari mutthu òsareya ankhili ni miruku’. (Otumererya 34:9) Munepa wootteela wa Yehova ‘wahimukela Gedeyoni’. (Makhulupale 6:34) Nave munepa wa Yehova ‘wahikhala ni Davidi’. (1 Samuweli 16:13) Alopwana awo otheene yaaroromela okhaliheriwa ni munepa wa Muluku wira apake itthu seiyo yahaarowa aya owerya opaka ni ikuru saya. (Yoxuwa 11:16, 17; Makhulupale 7:7, 22; 1 Samuweli 17:37, 50) Tthiri, Yehova taavaha owerya woopaka itthu iyo suulupale, nto owo paahi taaphwanela ottottopeliwa.

6. Xeeni Muluku aaphavela awe wira atthu awe yaattittimiheke ahooleli a wIsarayeli?

⁶ Exeeni aIsarayeli yaatthuneya aya opaka nuumala osuwela wira munepa wootteela wa Muluku wahaavaha owerya atthu ntoko Moise, Yoxuwa, Gedeyoni ni Davidi? Awo yahaana waattittimiha. Masi okathi omosa atthu yaamwaapa aya Moise, nkahaya nwehe ele Yehova aakonhe awe: “Nihiku xeni atthu ala antthunaya ottharuwa okiveha?” (Mothakoni 14:2, 11) Tthiri, Yehova aahaathanla alopwana ale wira yaahooleleke atthu Awe. Okathi atthu yawiiwelela aya alopwana ale, tthiri awo yaanimutthara Yehova yoowo aari Muhooleli aya.

7. Malaikha yaamukhalihenrye sai Moise?

⁷ Malaikha yahaakhaliherya anamitthaka a Muluku. (Mmusome aHéberi 1:7, 14.) Muluku aahirumeela malaikha wira amukhaliherye Moise. Wanipacerya, nlaikha nimosa ‘nahimukhumelela vamwirini wavarela’, khunvaha muteko wa owoopola aIsarayeli ni waahoolela. (Miteko 7:35) Yanenli, Muluku aahirumeela malaikha wira anvahe Moise Malamulo wira awiixuttiheke aIsarayeli. (aGalasia 3:19) Ya neeraru, Yehova aahimuleela Moise wira: “Mwakuxe atthu, mwarowane elapo yohimenryakani. Nlaikha naka nnimoholani”. (Okhuma 32:34) Biibiliya khonihimya wira aIsarayeli yaahiweha nlaikha nipakaka  itthu iyo. Masi, moota Moise aawiixuttiha awe ni waalakiherya atthu, vanooneya wira owo aanikhaliheriwa ni malaikha.

8. Malaikha yaamukhalihenrye sai Yoxuwa ni Ezekiya?

⁸ Atthu xeeni akina yaakhaliheriwe ni malaikha? Biibiliya onihimya wira: “Mukhulupale ànakhotto Àpwiya”, niire so, nlaikha, naahimukhaliherya Yoxuwa oxintta ekhotto ni aKaanani. (Yoxuwa 5:13-15; 6:2, 21) Muhoolo mwaya, okathi Mwene Ezekiya aahoolela awe atthu a Muluku, muttitthi muulupale wa anakhotto a wAsiria yahiwoopopiha wira yaarowa omunyaanya Yerusalemu. Ohiyu omosa “nlaikha n’Apwiya nahirowa wamakalyaya anakhotto a wAsiria, khuwivakasa atthu ikonto miloko mulokó ni mithanu na miraru n’atthu ikonto thanu (185.000)”.—2 Mamwene 19:35.

9. Nnaamwi anamitthaka a Muluku yaari oohimalela, exeeni aIsarayeli yaatthuneya aya opaka?

⁹ Malaikha toomalela. Masi, atthu yaakhaliherya aya yaari oohimalela. Mwa ntakiheryo, okathi omosa Moise aahooceela onvuwiha Yehova. (Mothakoni 20:12) Nave Yoxuwa khaamukonhe Muluku okathi maGibeyoni yaaphavela aya wataana ni yena. (Yoxuwa 9:14, 15) Nave-tho okathi omosa, mwene Ezekiya aahiixinnuuha. (2 Wahala 32:25, 26) Nnaamwi alopwana ale yaari oohimalela, aIsarayeli yahaana owiiwelela. Nave awo yahaana woona wira Yehova aanirumeela malaikha awe wira yaakhaliherye. Tthiri, Yehova aanaahoolela atthu awe.

10. Moota xeeni Moise eettihiwa awe ni Malamulo a Muluku?

¹⁰ Nuulumo na Muluku naahiweettiha anamitthaka a Muluku. Biibiliya onnihimya malamulo yaavahiwe aIsarayeli okhala “Ikano sa Moise”. (1 Mamwene 2:3) Masi Biibiliya onnooniherya wira Yehova taavanhe Malamulo awo. Nave Moise aahaana wiiwelela malamulo awo. (2 Wahala 34:14) Mwa ntakiheryo, nuumala Yehova omuleela moota wooteka etabernaakulu “Moise ahìwelela, kwira sothene ntoko Apwiya samurummyaya”.—Okhuma 40:1-16.

11, 12. (a) Exeeni Yoxuwa ni mamwene yaalamulela atthu a Muluku yaavekeliwa aya opaka? (b) Moota xeeni Nuulumo na Muluku naakhaliherya aya atthu yaahoolela atthu a Muluku?

¹¹ Yoxuwa aahikhalana Nuulumo na Muluku okathi aakhalihiwa awe muhooleli, nave Yehova aamulenle so: “Muhihiyeké osoma elívuru ila ya ikano. Mutthokeleleke ikano seiyo othana n’uhiyu, wira mwetteleke orattene sothene sinrumaya”. (Yoxuwa 1:8) Muhoolo mwaya, mamwene yaarowa wahoolelaka atthu a Muluku, yahaana osoma Malamulo khula nihiku, okopiyari malamulo awo, nave-tho yahaana wiiwelela ni ‘wettela molumo othene n’ikano sothene sirummwe-mo’.—Mmusome Otumererya 17:18-20.

¹² Moota xeeni Nuulumo na Muluku naaweettiha aya alopwana yaahoolela atthu a Muluku? Mwa ntakiheryo, nkahaya mmuupuwele Mwene Yosiya. Nuumala ophwanyiwa Nlamulo na Moise, mulipa-oolepa a Yosiya aahipacerya osoma ohoolo wa mwene. * (Nwehe enoota.) Nto “vaiwalyawe itthu silempwe mulivuruni mwa Ikano s’Apwiya, mwené Yosiya ahikhera sowara sawe”. Tthiri, Nuulumo na Muluku naahimwiiriha Yosiya waapwexakasa amuluku eethiru ni aahimulokiherya Paasikha muulupale ahaatonko opakiwa. (2 Mamwene 22:11; 23:1-23) Okhala wira Yosiya ni ahooleli akina oororomeleya yaanitthara Nuulumo na Muluku, awo yaanaavaha malakiheryo  atthu a Muluku moovarihana ni Nuulumo nawe. Nto marukunuxo awo yaanaakhaliherya atthu a Muluku omwiiwelela Yehova.

13. Ahooleli a atthu a Muluku yaavirikanne sai ni ahooleli a maloko makina?

¹³ Ahooleli a maloko makina yeettihiwa ni osuwela wa apinaatamu orina mukano. Mwa ntakiheryo, ahooleli a aKaanani ni atthu aya yaanipaka itthu soohiloka ntoko orupihana amusiru, alopwanaru aahiiso athiyanaru, orupiha inama, waapaha anamwane ni waakokhorela amuluku eethiru. (Onamukuttho 18:6, 21-25) Nave-tho ahooleli a oBabilonia ni wEjiitu, khiyaarina malamulo mamosaru yaarina aya atthu a Muluku voohimya sa oratta. (Mothakoni 19:13) Masi, atthu a Muluku yanaaweha ahooleli aya oororomeleya yaalipihaka wira avikaniheke okhalana okokhorela wooloka, oratta ni osyaka orupihana woohiloka. Moohaaniherya, Yehova anaahooleela atthu awe.

14. Xeeni Yehova aapwapwela awe ahooleli akina a atthu awe?

¹⁴ Khahiyo wira mamwene otheene yaalamulela atthu a Muluku yaanitthara malakiheryo a Muluku. Mamwene awo oohiroromeleya, yaanikhootta otthara malakiheryo a munepa wootteela wa Muluku, malaikha awe, ni Nuulumo nawe. Ikwaha sikina Yehova aanaapwapwela aahiiso waarantteliha ni mamwene makina. (1 Samuweli 13:13, 14) Muhoolo mwaya, Yehova aahimuthanla mutthu aarowa okhala muhooleli oomalela.

15. (a) Moota xeeni maprofeta yoonihenrye aya wira muhooleli oomalela aamoorwa? (b) Ti pani aari muhooleli oomalela?

¹⁵ Mwa iyaakha sinceene, Yehova aahileiherya wira ammuthanla muhooleli oomalela aarowa oweettihaka atthu awe. Mwa ntakiheryo, Moise aahaaleela aIsarayeli wira: “Apwiya Muluku anyu anomuthanla munlokoni mwanyu ni mw’amusi anyu profeta onlikana ni miyo: ti yowo orinanyu onwiriyana”. (Otumererya 18:15) Yesaya aahimmye wira mutthu Owo aarowa okhala “mukhulupale ni mwené”. (Yesaya 55:4) Nave Daniyeli aahilepa voohimya sa Mesiya wira aarowa okhala “Mukhulupale”. (Daniyeli 9:25) Nave-tho, Yesu aahiihimya okhala “Muholeli” a atthu a Muluku. (Mmusome Matheyo 23:10.) Awiixutti a Yesu yaanimutthara yena, ni yaanikupali wira Yesu aathanliwe ni Yehova. (Yohani 6:68, 69) Exeeni yaakupaliha wira Yesu Kristu aari mutthu aathanliwe ni Yehova wira aahooleleke atthu a Muluku?

16. Exeeni yooniherya wira Yesu aahivahiwa owerya ni munepa wootteela?

¹⁶ Munepa wootteela waahinvaha Yesu owerya. Okathi Yesu aabatiziwa awe, Yohani aahoona “erimu ehuleiyene ni eroho emukhuruwelaka ntoko epomba”. Moohipisa munepa ‘wahimurowana Yesu wothakoni’. (Marko 1:10-12) Okathi Yesu aalaleerya awe valaponi, munepa wootteela wa Muluku waahinvaha owerya wira owiixuttihe atthu ni opaka miiriirya. (Miteko 10:38) Nave-tho, munepa wootteela waahimukhaliherya Yesu wooniherya mikhalelo ntoko ophenta, otteeliwa murima ni waamini woolipa. (Yohani 15:9; aHéberi 12:2) Khuuvo muhooleli  mukina ooneyale saana wira ookhalana munepa wootteela wa Muluku. Tthiri, Yehova aahimuthanla Yesu okhala Muhooleli.

17. Exeeni malaikha yaapanke aya wira amulipihe Yesu?

¹⁷ Malaikha yaahimukhaliherya Yesu. Moohipisa nuumala Yesu obatiziwa, “malaikha a Muluku yahirwa, enamurumela Yesu”. (Matheyo 4:11) Iwoora vakhaani ohinatthi okhwa, “nlaikha na wirimu nahimukhumelela wira nimulipihe murima”. (Luka 22:43) Yesu aahisuwela wira Yehova aamuruma malaikha wira amukhaliheryeke okathi wooreerela.—Matheyo 26:53.

18, 19. Moota xeeni Nuulumo na Muluku naamweettiha aya Yesu ni soowiixuttiha sawe?

¹⁸ Nuulumo na Muluku naanimweettiha Yesu. Okhuma woopaceryani wa muteko awe woolaleerya mpakha okhwa wawe vamwirini va nihaaxeryo, Yesu aaheemererya weettihiwa ni Nuulumo na Muluku. Hata okathi aakhwa awe, Yesu aahiromola iprofesia voohimya sa Mesiya. (Matheyo 4:4; 27:46; Luka 23:46) Masi, ahooleli a itiini yaakhala okathi ole yaahivirikana ni Yesu. Awo khiyaatthara Nuulumo na Muluku, nnaamwi Nuulumo nno navaanyiha soowiixuttiha saya. Yesu aahiromola Nuulumo na Muluku okathi aalavula awe sa ahooleli awo, oriki: “Atthu ala annikittittimiha ni molumo pahi: mirima saya siri ottaiwene ni miyo. Awo annikikokhorela siyo: ikano sinixuttihaya ti soruma s’atthu pahi”. (Matheyo 15:7-9) Yehova khaakhala-khala omuthanlaka mutthu ahaarowa ottharaka Nuulumo nawe wira aahoolele atthu a Muluku.

¹⁹ Nave-tho Yesu aanirumeela Nuulumo na Muluku okathi aawiixuttiha awe atthu. Vaavo ahooleli a itiini yanvaanyiha aya, owo khaarumeela osuwela wawe aahiiso sookumanana sawe sa mweekumini wira owaakhule. Ohiya-vo, aawiixuttiha atthu orumeelaka Soolempwa. (Matheyo 22:33-40) Nave, Yesu  anwerya wiihimya olavulaka sa okumi awe okathi aaryaawe wiirimu aahiiso okathi waapattuxiwa aya olumwenku. Masi, okhala wira aanisiveliwa ni Nuulumo na Muluku, aaniphavela waaleela atthu akina ni ‘anitthukula osuwela waya, wira asuwelexe Solempwa’.—Luka 24:32, 45.

20. (a) Yesu anvuwinhe sai Yehova? (b) Yesu aavirikanne sai ni Herodi Agripa I?

²⁰ Nnaamwi ale yanwiriyana Yesu yaatikinihiwa ni moota iixuttiha awe, okathi wotheene owo anvuwiha Mwiixuttihi awe, eyo piiyo Yehova. (Luka 4:22) Okathi thaaciri mmosa aaphavela awe onvuwiha Yesu omwiitthanaka ni mwiihanelo wa nttittimiho oriki “Mwixuttihi Òrera Murima”, moowiiyeviha Yesu aahimmye so: “Munkìrelela-ni òrera murima? Òrera murima ti Muluku pahi: khavo-tho mukina”. (Marko 10:17, 18) Masi, nuuvira iyaakha 8 muhoolo mwaya, Herodi Agripa I, yoowo aari mwene a oYudeya, aahikhalana moonelo woovirikana ni wa Yesu. Nto nihiku nimosa na muthukumano wa vameekhaaya, Herodi aahiwara ikuwo sa omwene ni sa musurukhu munceene. Nuumala onweha ni onwiriyana, atthu awo yaahikhuwela eriki: “Ola olavunle mulukú, kahiyó mutthu!” Herodi aahisiveliwa ottottopeliwa. Nto exeeni yaamukhumelenle? “Okathi ene yowo, nlaikha n’Apwiya nahimmana Herodi, okhala wira khamuttittimihale Muluku. Herodi uwo ahitthumpwa ni miyunku, khukhwa”. (Miteko 12:21-23) Tthiri, Yehova khaamuthanlale Herodi wira okhale muhooleli. Masi, Yesu ahooniherya wira aahithanliwa ni Muluku, ni okathi wotheene aaninvuwiha Yehova ntoko Muhooleli Muulupale a atthu Awe.

21. Exeeni ninrowa ahu othokorerya mwaha onittharelana?

²¹ Yehova aaphavela wira Yesu okhale Muhooleli, ohiya paahi iyaakha vakhaani. Nto nuumala Yesu ohihimuxiwa, owo ahaaleela awiixutti awe wira: “Kovahiwa owerya wothene wirimu ni vathí”. Nave aahincererya oriki: “Miyo kinokhala ni nyuwo mahiku othene mpakha elapo omala”. (Matheyo 28:18-20) Masi vaniweryaneya sai Yesu waahoolela atthu a Muluku valaponi, okhalaka wiirimu? Tani Yehova aarowa awe waarumeela wira akhale anamitthaka a Yesu valaponi? Ni moota xeeni maKristau yaarowa aya owerya waasuwela anamitthaka a Muluku? Makoho ala ninrowa othokorerya mwaha onittharelana.