1. Itthu xeeni yowoopola eniwerya aya oniphwanyiha?

MUKUTTHO wowoopola wa Yesu Kristu onnikumiherya mareeliho manceene. Mwa ntakiheryo, mukuttho wowoopola ti muhulelo onaakhaliherya anamwane otheene a Adamu aniphenta exariya wiirela mpantta emusi ya Muluku. Nave ninnilipelela okhala mahiku otheene moohakalala. Masi etthu yootepa otthuneya ti yoowi, yowoopola ennivarihana vanceene ni myaha sootepa otthuneya wa ale anikhala wiirimu ni valaponi.—aHéberi 1:8, 9.

2. (a) Myaha xeeni sootthuneya wiirimu ni valaponi Yesu aahenle awe muhina munivekeloni mwawe? (Nwehe elatarato yoopacerya.) (b) Ninrowa othokorerya exeeni mwaha ola?

² Iyaakha piili Yesu ohinatthi okhwa, aahiwiixuttiha atthareli awe ovekela so: ‘Tiith’ihu, muri wirimu! Nsina nanyu nivuwihiwe; Omwene anyu orwe; otthuna wanyu wireye ntoko wirimu siso vathí-va’. (Matheyo 6:9, 10) Nrowe nthokorerye moota yowoopola enivarihana aya ni otteelihiwa wa nsina na Yehova, olamulelo wa Omwene wa Muluku ni wiiraneya wa yoolakela ya Muluku.

3. Nsina na Yehova ninthoonyerya exeeni? Satana aaveehale sai nsina na Yehova?

³ Wanipacerya, Yesu aahivekela wira nsina na Yehova nitteelihiwe aahiiso othokoreriwa okhala noowaarya. Nsina na Yehova ninthoonyerya omutthu awe aahiiso mukhalelo awe. Yehova ti Muluku ootepa owerya ni a xariya olumwenku wotheene. Nave Yesu aahimuhimya okhala “Tithi Òwarya”. (Yohani 17:11) Okhala wira Yehova toowaarya, nto khula etthu onipaka awe ni khula nlamulo onipaka awe ti noowaarya. Masi, moolavilavi, ojardim ya wEdeni Satana aahivaanyiha ehakhi ya Muluku ya waavaha malamulo apinaatamu. Nave Satana aahimootherya Yehova ni aahiveeha nsina ni omutthu wa Muluku.—Maphattuwelo 3:1-5.

4. Yesu oonihenrye sai wira aanithokorerya nsina na Yehova okhala noowaarya?

⁴ Mwa enamuna ekina, Yesu aaniphenta nsina na Yehova ni aahipaka khula etthu aawerya awe wira otteelihe nsina nlo. (Yohani 17:25, 26) Moota xeeni? Maana mweettelo ni soowiixuttiha sa Yesu, saahaakhaliherya akina woona wira malamulo a Yehova taxariya ni wira sotheene sinnivekela awe opaka sinninikhaliherya. (Musome Esalimo 40:9-11.) Nnaamwi Satana aamukumihenrye Yesu mixankiho sinceene mpakha wiiviwa, Yesu aahivikaniha ororomeleya. Nto Yesu ohooniherya wira mutthu oohittheka onoowerya omwiiwelela Yehova moomalela.

5. Nnooniherya sai wira ninnithokorerya nsina na Yehova okhala noowaarya?

⁵ Ninrowa wooniherya sai wira ninniphenta nsina na Yehova? Ni mweettelo ahu. Yehova onivekela wira nikhaleke atthu oowaarya. (Mmusome 1 Pedru 1:15, 16.) Eyo enitaphulela wira nimmukokhorela paahi yena ni ninnimwiiwelela ni murima ahu wotheene. Hata okathi ninlupatthiwa ahu, ninnipaka khula etthu eniwerya ahu wira neetteleke malamulo a Yehova. Weettela malamulo a Yehova, onnivuwiha nsina nawe. (Matheyo 5:14-16) Nave ninnooniherya wira malamulo awe tooloka ni Satana nawoothe. Hiyo naatthu oohimalela nto ninnivonya. Masi akhala wira ninnittheka, nihaana ottharuwa ni opaka khuta etthu wira nihiye itthu sinnyoholiha nsina na Yehova.—Esalimo 79:9.

6. Nnaamwi nryeene oohimalela, xeeni Yehova onnithokorerya awe okhala anaxariya?

⁶ Hata nryeene oowoottihiwa aahiiso a “ipwittipwitthi sikina”, Yehova onoonilevelela itampi sahu akhala wira ninnaamini yowoopola. Owo onniweemererya otheene yaale aniivahererya wa yena, okhala anamakokhorela awe. Nave onnaakhaliha anaawe maKristau oowoottihiwa anaxariya, ni ale a “ipwittipwitthi sikina” onnaakhaliha apatthani awe. (Yohani 10:16; aRoma 5:1, 2; Yakobo 2:21-25) Tivonto, hata vano, yowoopola enninikhaliherya okhalana wataana wooloka ni Tiithi ihu ni otteeliha nsina nawe.

7. Yowoopola enikumiherya mareeliho xeeni?

⁷ Nivekelo na nthoonyeryo, Yesu aahimmye so: ‘Omwene anyu orwe’. Moota xeeni yowoopola enivarihana aya ni Omwene wa Muluku? Yesu ni atthu 144.000, taniirela mpantta Omwene wa Muluku aahiiso eguvernu awe. Nto yowoopola enniwiiriha atthu awo ohihimuxiwa wira arowe wiirimu. (Wisupulula 5:9, 10; 14:1) Awo anrowa okhala mamwene ni alipa a mukuttho wira alamuleleke elapo vamosa ni Yesu, iyaakha ekonto emosa. Okathi owo, Yehova onrowa orumeela Omwene wira iirihe elapo okhala eparayiisu  ni waakhaliherya apinaatamu otheene okhala oomalela. Nto arumeyi a Yehova ari wiirimu ni ale ari valaponi, anrowa okhala emusi emosa paahi. (Wisupulula 5:13; 20:6) Yesu onrowa ompwetexa Satana ni omaliha mixankiho sotheene sikumiheriwe ni Satana owo.—Maphattuwelo 3:15.

8. (a) Yesu aakhalihenrye sai awiixutti awe woona wira Omwene wa Muluku ti wootthuneya? (b) Olelo-va, ninkhaliherya sai Omwene wa Muluku?

⁸ Yesu aahaakhaliherya awiixutti awe osuwela woona otthuneya waya Omwene wa Muluku. Moota xeeni? Nuumala obatiziwa, Yesu aahipacerya olaleya “ehapari yorera y’Omwene wa Muluku” khula opuro aarowa awe. (Luka 4:43) Nave-tho, aahaaleela awiixutti awe wira akhale anamoona awe “mpakha omalenle elapo”. (Miteko 1:6-8) Olelo-va muteko woolaleya Omwene, onnaavaha atthu eparakha ya wiixutta voohimya sa yowoopola ni okhala atthu a Omwene wa Muluku. Ninnooniherya wira na atthu oororomeleya a Omwene vaavo nnaakhaliherya ahu ale oowoottihiwa olaleya ihapari sooreera olumwenku wotheene.—Matheyo 24:14; 25:40.

9. Xeeni vanitthuneya ahu okupali wira yoolakela ya Yehova wa apinaatamu enimwiiraneya tthiri?

⁹ Yesu aaphavela ohimya exeeni ni masu oowi: “Otthuna wanyu wireye”? Vaavo Yehova vanihimya awe wira etthu eyo enrowa wiiraneya, enimwiiraneya tthiri. (Yesaya 55:11) Omwareya wa Satana khowenrye okhoottiherya yoolakela ya Yehova. Tiivi yaari yoolakela ya Yehova wa elapo ela? Owo aaphavela wira elapo esareye anamwane oomalela a Adamu ni Eva. (Maphattuwelo 1:28) Vaakhanle wira Adamu ni Eva yaahikhwa ahiyanre, yoolakela ya Muluku wira elapo ela esareye anaaya khiyaarowa wiiraneya. Nto, Yehova aahiweemererya wira yaayare anamwane. Tivonto, yowoopola ennaakhaliherya atthu otheene anaamini okhalana eparakha yookhala oomalela ni okhala mahiku otheene valaponi. Yehova onnaaphenta atthu ni oniphavela wira akhaleke oohakalala ntoko aaphavela awe.

10. Atthu akhwiiye anittottela sai mureerelo yowoopola?

¹⁰ Ankhi atthu ibilyau sinceene akhwiiye ahinatthi omusuwela Yehova? Nave Yehova oniphavela wira atthu awo akhalane okumi. Tivonto, onrowa waahihimuxa. Yowoopola ennaakhaliherya wira atthu awo ahihimuxiwe. Nuumala-vo anrowa wiixutta voohimya sa Yehova ni okhala mahiku otheene. (Miteko 24:15) Yehova ti Maphattuwelo a okumi. Vaavo Yehova onaattikiherya awe okumi atthu akhwiiye, owo onnikhala Tiithi aya. (Esalimo 36:10) Nivekelo na ntakiheryo na Yesu, owo aahimmye wira Yehova ti ‘Tith’ihu, ori wirimu!’ (Matheyo 6:9) Yehova onvaha Yesu muritti muulupale wira aahihimuxe atthu akhwiiye. Yesu aahimmye wira: “Miyo ki ohihimuwa n’ikumi”.—Yohani 6:40, 44; 11:25.

11. Tiivi ekhanle yoolakela ya Muluku wa “muttitthi mulupalexa”?

¹¹ Nave Yesu aahimmye so: “Tthiri, othene ale anettela otthuna wa Muluku, yawo t’akhanle axinn’aka n’axirokor’aka n’amam’aka”. (Marko 3:35) Muluku oniphavela wira atthu a maloko otheene ni a mahimo otheene ni a ilavulelo sotheene akhale anamakokhorela awe. Atthu awo anihimmwa okhala “muttitthi mulupalexa”, yoowo ahaakhanle mutthu “awerya owalikela”. Awo annaamini yowoopola ni aniphavela omwiiwelela Muluku. Nave anninvuwiha Muluku ariki:  “Wopola ti wa Muluku ahu, yowo okilanthe vehijeni, ni ti wa mwapwittipwitthi”.—Wisupulula 7:9, 10.

12. Nivekelo Yesu aapanke awe, ninniixuttiha exeeni sa yoolakela ya Yehova wa apinaatamu?

¹² Nivekelo na ntakiheryo nooniixuttiha itthu sinceene voohimya sa Yehova ni yoolakela awe wa apinaatamu. Etthu yoopacerya: nihaana opaka sotheene siniwerya ahu wira nitteelihe nsina na Yehova ni onvuwiha yena. (Yesaya 8:13) Mukuttho wowoopola wa Yesu, yoowo oniiriha oweryaneya woopoliwa wahu, onnivuwiha nsina na Muluku. Tthiri, nsina na Yesu nintaphulela “Yehova ti Moopoli”. Etthu ya nenli: Yehova onrowa orumeela Omwene awe wira okumiherye mireerelo sotheene yowoopola enaavaha aya apinaatamu oowiiwelela. Etthu ya neeraru: Ninniroromela wira khiivo enrowa okhoottiherya wiiraneya yoolakela ya Yehova.—Esalimo 135:6; Yesaya 46:9, 10.

13. Xeeni vanibatiziwa ahu?

¹³ Enamuna emosa nnooniherya ahu wira ninnixukhurela yowoopola, ori wiivahererya wa Yehova ni obatiziwa. Nto eyo ethoonyeryo yoowi ninnaamini yowoopola ni wira “hiyo n’àtthu Àpwiya” Yehova. (aRoma 14:8) Vaavo nimbatiziwa ahu, ninninvekela Yehova onivaha “murima woloka”, eyo piiyo, yowuupuxerya ya murima yooloka. (1 Pedru 3:21) Yehova onninivaha mareeliho anikumiheriwa ni yowoopola. Nave, ninnikupali wira onrowa onivaha itthu sotheene onileihenrya awe.—aRoma 8:32.

14. Xeeni Yehova onniruma awe waaphenta atthu akina?

¹⁴ Itthu sotheene Yehova onipaka awe oniira moophenta. Nave oniphavela wira atthu otheene animukokhorela amutakiheke ni aphentaneke mukina ni mukhwaawe. (1 Yohani 4:8-11) Vaavo vanaaphenta ahu atthu, ninnooniherya wira nimphavela okhala ntoko ‘Tithi [ihu] ori wirimu’. (Matheyo 5:43-48) Tthiri malamulo manli maalupale ti omphenta Yehova, ni waaphenta akina. (Matheyo 22:37-40) Enamuna emosa enooniherya ahu wira ninnaaphenta atthu, ti waalaleerya atthu awo ihapari sooreera sa Omwene wa Muluku. Akhala wira ninniiwelela yooruma ya Yehova ya waaphenta atthu akina,  vanceenexa annihu, omphenta wahu onrowa okhala “womalela”.—1 Yohani 4:12, 20.

15. (a) Mareeliho xeeni Yehova onnivaha awe vano? (b) Mareeliho xeeni onrowa awe onivaha muhoolo?

¹⁵ Yehova onninikupaliha wira mwaha woowaamini yowoopola, itampi sahu sinrowa ‘ottipihiwa’. Nto onoonlevelela itampi sahu moomalela. (Musome Miteko 3:19-21.) Ntoko nithokorenrye ahu wanipacerya, orumeelaka yowoopola Yehova onoowiiriha apinaatamu akina okhala anaawe wiirimu. Awo ti yaale ari oowoottihiwa. (aRoma 8:15-17) Nave onnaalattula ale a “ipwittipwitthi sikina” wiirela mpantta emusi awe valaponi. Nuumala okhala oomalela, anrowa weehereriwa ekwaha yookiserya. Nave, akhala wira anrowa ovikaniha ororomeleya, Yehova onrowa waakhaliha anaawe. (aRoma 8:20, 21; Wisupulula 20:7-9) Okathi wotheene, Yehova onrowa waaphentaka anaawe. Yowoopola enrowa ovikanihaka okumiherya mareeliho oohimala. (aHéberi 9:12) Yehova oonivaha eparakha ela ya vameekhaaya, nto khuuvo mutthu onwerya onaakha.

16. Yowoopola ennikhaliherya sai okhala ootaphuwa?

¹⁶ Akhala wira nnoottharuwa itampi sahu, khiivo etthu Diabo onrowa awe opaka wira onooceelihe wiirela mpantta emusi ya Yehova. Yesu okhwiiye “emara emosá pahi”. Tivonto yowoopola yooliveriwa voomalela. (aHéberi 9:24-26) Adamu anikumihenrye okhwa, masi mukuttho wowoopola wa Yesu onrowa onivaha okumi woohimala. Yowoopola enoowerya onitaphula olumwenku ola wa Satana ni woova okhwa.—aHéberi 2:14, 15.

17. Ophenta wa Yehova onitaphulela exeeni wa nyuwo?

¹⁷ Tthiri, soolakela sa Muluku sinimwiiraneya. Ntoko siisaale malamulo a ephattu Yehova opanke awe ahiniturukeya aya, Yehova khonikhala-khala oturukeyaka. Nave khonikhala-khala onivarihaka mwala. (Malakhiya 3:6) Yehova onninivaha itthu sikina ohiya paahi okumi. Tthiri Owo onniniphenta. Biibiliya onihimya wira: “Vano hiyo nosuwela oniphenta wa Muluku, khwamini oniphenta weiwo. Muluku ophentá”. (1 Yohani 4:16) Okathi wotheene anatiri a Muluku anniiraneya. Moohipisa, elapo enrowa okhala eparayiisu. Nto, atthu otheene anrowa omutakihaka Yehova ni ophentana mukina ni mukhwaawe. Nave, soopattuxiwa sotheene wiirimu ni valaponi sinrowa ohimya wira: “Ottottopela n’uvuwa n’usuwela, oxukhuru n’uttittimiha n’uwerya n’ikuru ti sawawe Muluku ahu wa mahiku othene! Amen!”—Wisupulula 7:12.