1. MuSamariya aapenuxiwe ni Yesu, oonihenrye sai oxukhurela?

ALOPWANA muloko yaahixanka vanceene. Awo yaarina makuttula ni khiyaasuwela akhala wira yampenuwa. Maana oretta aya waamutepa. Nihiku nimosa, ari ene ottaiwene yaahinweha Yesu, yoowo aari Mwiixuttihi Muulupale. Awo yaahiiwa wira Yesu aanaapenuxa aretta a khula enamuna, nto yaanikupali wira Yesu aamwaapenuxa. Vano, awo yaahikhuwela ariki: “Yesu, Mwixuttihi! Munimorele ikharari!” Alopwana ale muloko yaahipenuxiwa moomalela. Tthiri ninnikupali wira yaahimuxukhurela Yesu mwaha woowaareerela murima. Mulopwana mmosa, aahooniherya ohiya paahi oxukhurela, masi aahooniherya omuxukhurela * wawe Yesu. MuSamariya ole aahipacerya onvuwiha Muluku “ni nsu nulupale”.​—Luka 17:12-19.

2-3. (a) Exeeni ekhanle ooniiriha ohiya okhala atthu ooxukhuru? (b) Mwaha ola, ninrowa othokorerya exeeni?

² Nimutakihaka muSamariya, nihaana waaxukhurela atthu ale annireerela murima. Okathi mukina ninniliyala wooniherya ni moolumo ni miteko sahu waaxukhurela wahu atthu ale annireerela murima.

³ Mwaha ola, ninrowa othokorerya nthowa naya ori aya wootthuneya okhala atthu ooxukhuru ni moolumo ni miteko sahu. Nave ninrowa othokorerya ele nniixutta ahu ni matakiheryo a mBiibiliyani a atthu yaari ooxukhuru ni oohixukhuru. Nave-tho, ninrowa othokorerya inamuna nikhanle ahu ookhala atthu ooxukhuru.

4-5. Xeeni nintthuneya ahu okhala atthu ooxukhuru?

⁴ Yehova oonivaha ntakiheryo na oxukhurela. Enamuna emosa onooniherya awe oxukhurela ori waareeliha ale ammusiveliha. (2 Sam. 22:21; Esal. 13:7; Math. 10:40, 41) Biibiliya onnintumererya wira nihaana omutakiha ‘Muluku okhala wira nàn’awe òphentiwa’. (aÉf. 5:1) Nto etthu yuulupale enniiriha okhala atthu ooxukhuru, okhala wira nimphavela omutakiha Yehova.

⁵ Nrowe niwehe nthowa nikina ninniiriha waaxukhurela atthu akina. Oxukhurela onlikana ni yoolya yooloka, eyo ennisiva akhala wira ninnoolya ni atthu akina. Vaavo hiyo ninxukhurela ahu ninnihakalala vanceene. Nave vaavo nnaaxukhurela ahu atthu akina, atthu awo annihakalala vanceene. Okathi nnaaxukhurela ahu atthu akina, ninniwooniherya wira ninnivaha efaita onikhaliherya waya aahiiso etthu anivanhe aya. Akhala wira nnoopaka eyo, opatthani ahu ni mutthu owo onoolipa vanceene.

6. Moolumo ooxukhurela anlikana sai ni masa apakiwe ni eweero?

⁶ Oxukhurela wahu wookhalana efaita yuulupale. Biibiliya onihimya so: ‘Molumo òrera ahimmwe okathi worera anlikana [ni masa] eweero ehotthiwe mmukhalani motutha’. (Mir. 25:11) Nkahaya muupuwele moota anreera aya masa apakiwe ni eweero aahiiso eparatha! Tthiri masa awo aakhalana efaita yuulupale! Mwaarowa woonela sai vaakhanle wira moovahiwa masa ntoko awo? Moohaanyiherya mwaamuxukhurela vanceene. Moolikanasa, moolumo anyu ooxukhurela aakhalana efaita yinceene. Nave musuweleke wira masa apakiwe ni eweero anniviriha okathi munceene. Mwa enamuna emosa-ru, akhala wira munoomuxukhurela mutthu, owo pooti ohiliyala moolumo anyu ooxukhuru okumi awe wotheene.

7. Ntoko enooniherya aya Esalimo 27: 4, moota xeeni Davidi ni osuulu wa Asafi yoonihenrye aya oxukhurela waya?

⁷ Arumeyi anceene a khalai a Muluku yaari ooxukhuru. Mmosa a arumeyi awo aari Davidi. (Musome Esalimo 27:4.) Moolumo ni miteko sawe sinnooniherya wira aanixukhurela okokhorela wekeekhai. Owo aahivaha itthu sinceene sa efaita wira etekiwe etemplo. Nave osuulu wa Asafi waahooniherya oxukhurela alepaka isaalimo aahiiso masipo oottottopela. Nsipo nimosa, owo onnimuxukhurela ni omuttottopela Yehova mwaha wa ‘miteko sawe sovuwa’. (Esal. 75:2) Tthiri, Davidi ni osuulu wa Asafi yaaniphavela omooniherya Yehova wira yaanimuxukhurela vanceene mwaha wa mareeliho otheene aavaha awe. Nyuwo pooti wuupuwela inamuna mukhanle anyu oowaatakiha anasaalimo awo.

8-9. Murummwa Paulo aaxukhurenle sai anna ni arokora? Mwaha woopaka eyo, exeeni yaakhumelenle?

⁸ Enamuna murummwa Paulo aathokorerya awe anna ni arokora, aahooniherya wira aanaaxukhurela. Ikwaha sinceene, aanipaka nivekelo omuxukhurelaka Muluku mwaha wa annawe. Nave aahiwooniherya wira aanaavaha efaita mwaha wa itthu aalepenle awe. Iveersu 15 soopacerya sa ekapiitulu 16 ya aRoma, Paulo onnihimya masina 27 a annawe maKristau. Paulo aanuupuwela wira Akila ni Priska “yahileva ekumi aya” wira amoopole, nave onnihimya wira Febe “ahakhapelela atthu anjene” omuhela muhina Paulo. Tthiri owo aahaattottopela vanceene anna ni arokora ale yiimananiha vanceene.​—aRom. 16:1-15.

⁹ Paulo aanisuwela wira anna ni arokora yaari oohimalela, masi wanikisa wa ewarakha aalepenle awe aRoma, owo onnilavula mikhalelo saya sooloka. Tthiri anna ni arokora ale yaahilipa vanceene vaavo yiiwa aya esommwaka mmulokoni moolumo oottottopela a Paulo! Mwaha woopaka eyo, vannooneya wira ompatthani wa Paulo ni anna ale waahilipa vanceene. Niireke munnixukhurela itthu sooloka anna ni arokora a muloko anyu anipaka aya?

10. Enamuna Yesu aattottopenle awe atthareli awe, enniixuttiha exeeni?

¹⁰ Muhupi aaroihenle awe miloko sa wAsia Menor, Yesu aahixukhurela miteko atthareli awe yaapaka aya. Mwa ntakiheryo, Yesu aahipacerya muhupi aaroihenle awe muloko wa oTiyatira ohimyaka wira: “Miyo kosuwela mwettelo anyu: kosuwela ophentana wanyu ni wamini wanyu ni warumela wanyu akhw’inyu ni nthiti nanyu. Kosuwela-tho wira munnitepa ovara miteko sorera ovikana khalai”. (Wis. 2:19) Yesu khahiyo aahimmye wuncererya wa muteko aya paahi, masi aahaattottopela mwaha wa mikhalelo sooloka saawiiriha opaka itthu sooloka. Nnaamwi aatthuneya waavaha miruku atthu akina a muloko wa oTiyatira, Yesu aahipacerya ni aahimaliha muhupi awe aattottopelaka. (Wis. 2:25-28) Nkahaya muupuwele owerya Yesu orina awe ntoko muhooleli a miloko sotheene. Owo khaatthuneya oxukhurela miteko ninvara ahu. Masi, hata vari siiso owo onniimananiha onittottopela. Tthiri Yesu ohaavaha ntakiheryo nooloka axitokweene a mmulokoni!

11. Moovarihana ni aHéberi 12:16, Esawu oonela sai itthu sowaarya?

¹¹ Mooriipiha murima, atthu akina aniromoliwa mBiibiliyani yaari oohixukhuru. Mwa ntakiheryo, anamuyari awe Esawu yaanimphenta ni omuttittimiha Yehova. Masi Esawu khaattittimiha itthu sowaarya. (Mmusome aHéberi 12:16.) Esawu oonihenrye sai wira aari mutthu oohixukhuru? Moololo, Esawu  aahimutumiherya eyuulupale awe muhima awe iihaniwa Yakobe ni muhusi wa epwiri. (Maph. 25:30-34) Muhoolo mwaya, Esawu aahithanana mwaha wa yoothanla aapanke awe. Owo khaatthuneya othanana nuumala ohaakhela mareeliho a okhala mwaana oopacerya oyariwa.

12-13. AIsarayeli yoonihenrye sai wira yaari oohixukhuru? Nto exeeni yaakhumelenle?

¹² AIsarayeli, yaahikhalana mathowa manceene ookhala atthu ooxukhuru. Nuumala Yehova okumiherya Epahu ya Namuloko, owo aahiwoopola wEjiitu, weiwo yaari aya ipottha. Nave-tho, Yehova aahiwoopola vaavo aapwetenxa awe anakhotto ootupa a wEjiitu Ephareya Yooxeerya. Vano, aIsarayeli ale yaahixukhurela vanceene mpakha omwiipela Yehova nsipo nootthapela. Masi niireke yaahivikaniha okhala atthu ooxukhuru?

¹³ Nuumala aIsarayeli ale okumanana mixankiho, moohipisa awo yaahiliyala itthu sotheene Yehova aapakenle awe. Awo yaahooniherya wira yaari atthu oohixukhuru. (Esal. 106:7) Moota xeeni? Biibiliya onihimya wira “atthu othene a nloko na Isarayeli yahikelela omwàpa Moise n’Àroni”, moohaanyiherya atthu ale yaamwaapa Yehova. (Okhum. 16:2, 8) Yehova aahinyoonyiheya mwaha wa ohixukhuru wa atthu awe. Muhoolo mwaya, Yehova aahihimya vahinatthi wira atthu otheene yaarina iyaakha 20 orowa ohoolo, yaamookhwa moothakoni, omuhiya paahi Yoxuwa ni Kalebi. (Moth. 14:22-24; 26:65) Vano, nrowe niwehe moota nikhanle ahu oosyaka otthara matakiheryo ala ohiloka wira nitthareke ooloka.

14-15. (a) Anamathelana, anrowa wooniherya sai wira annixukhurelana? (b) Anamuyari, anrowa owiixuttiha sai anaaya okhala atthu ooxukhuru?

¹⁴ Okhala ooxukhuru vatthokoni. Emusi yotheene ennittottela mureerelo akhala wira atthu otheene a vatthokoni tooxukhurela. Vaavo ale athelanne anxukhurelana aya, eyo ennilipiha etthoko aya. Nave eyo, ennaakhaliherya waakuvela olevelelana. Mulopwana onimuxukhurela mwaarawe, khoniweha itthu sooloka paahi, masi owo onnimuttottopela ni “onninvuwiha” mwaarawe. (Mir. 31:10, 28) Nave, muthiyana a miruku, onnimuleela iyawe itthu onimuxukhurela awe.

¹⁵ Anamuyari, munrowa owiixuttiha sai aniinyu okhala atthu ooxukhuru? Musuweleke wira aniinyu anrowa otakihaka ele munihimya anyu ni mumpaka anyu. Nto mwaavaheke ntakiheryo nooloka mwaaxukhurelaka yapaka  etthu yooreera. Nave nwiixuttiheke aniinyu waaxukhurela atthu akina yaapaka etthu yooloka. Ohiya-vo, mwaakhaliheryeke aniinyu woona wira oxukhurela ohaana okhuma vamurimani ni wira moolumo aya annaakhaliherya vanceene atthu akina. Mwa ntakiheryo mwali mmosa ohimmye so: “Okathi mama aka aarina awe iyaakha 32, owo anaahuwa mekhawe anamwane araru. Okathi kaarina aka iyaakha 32, kaahoona wira waari woovila waahuwa anamwane araru mekhawe. Nto kaahimuleela wira kinnixukhurela vanceene mwaha woowiimananiha okihuwa miyo ni axirokoraka anli. Mwa okathi vakhaani ovinre, maama aka ookileela wira moolumo aka ale annimusivela vanceene, nave okathi wotheene onnuupuwela ni annimukurunuxa murima vanceene”.

16. Nvahe ntakiheryo nnooniherya wira moolumo ooxukhurela annaalipiha atthu akina.

¹⁶ Okhala ooxukhuru mmulokoni. Vaavo nnaaxukhurela ahu anna ni arokora ninnaalipiha vanceene. Mwa ntakiheryo, mutokweene orina iyaakha 28 oniihaniwa Jorge, aahiwereiwa vanceene. Nto waahivira mweeri ntero ohirowelaka mithukumano. Hata nuumala otthikela orowela mithukumano, owo khaawerya opaka ipantta sawe mmulokoni. Jorge onihimya so: “Koona wira nkaarina efaita mwaha woowi nkaawerya ovara miteko saka mmulokoni. Masi nuumala muthukumano, munna mmosa aahikileela wira: ‘Kinnooxukhurelani vanceene munna mwaha wa ntakiheryo nooloka mukivanhe anyu miyo ni etthoko aka. Tthiri myaha mwaalavunle anyu myeeri vakhaani sivinre saahinisivela vanceene. Nave soonikhaliherya wunnuwa momunepani.’ Moolumo ale yaahikivara murima mpakha omoriha maithori. Tthiri ale yaari moolumo kaaphavela aka wiiwa okathi ole”.

17. Ntoko onihimya awe aKolosi 3:15, ninrowa omuxukhurela sai Yehova mwaha wa itthu onivanhe awe?

¹⁷ Mmuxukhureleke Muluku. Yehova oonivaha yoolya yinceene yomunepani. Mwa ntakiheryo, onninivaha malakiheryo ooloka mmithukumanoni, murevistani ni websaiti ahu. Niireke mootoko owiriyana aahiiso osoma myaha, murevistani wala oweha eviidiyu va TV JW muhimya wira, ‘Tthiri ela etthu kaaphavela aka’? Nto ninrowa omuxukhurela sai Yehova? (Mmusome aKolosi 3:15.) Enamuna emosa ori onvekela nimuxukhurelaka mwaha wa itthu sotheene sooloka onnivaha awe.​—Yak. 1:17.

18. Ninrowa wooniherya sai wira ninnixukhurela okhalana Empa ya Omwene?

 ¹⁸ Nave ninnooniherya wira ninnimuxukhurela Yehova vaavo ninrattela ahu opuro nimmukokhorela ahu. Nihaana okhaliherya orattela ni olokiherya Empa ahu ya Omwene, ni okhapelela saana ikaruma eletroniko ninrumeela ahu wira nirumihe isipo ni iviidiyu mmulokoni. Vaavo ninrattela ahu saana Ipa sa Omwene, iyo sinoopisa ophweeya ni khonrowa orumeeliwa musurukhu munceene wira silokiheriwe. Nto opaka eyo, onniiriha okhala musurukhu wira sitekiwe ni olokiheriwa Ipa sa Omwene olumwenku wotheene.

19. Yowiiraneya ya mutokweene a esirkwiitu ni mwaarawe, enniixuttiha exeeni?

¹⁹ Mwaaxukhureleke ale aniimananiha onikhaliherya. Vaavo nimmuxukhurela ahu mutthu, moolumo ahu pooti omukhaliherya mutthu owo hata orina ene mixankiho sinceene. Nkahaya nwehe ntakiheryo na mutokweene a esirkwiitu ni mwaarawe. Eyiita nuumala olaleerya nihiku notheene, awo yaahitthikela opuro yaamaka aya akhulumunwe ene vanceene. Okhala wira waaniriirya vanceene, mwaarawe aarumpe owanre ene ekasako. Voosiisu nihiku naattharelana, owo aahimuleela iyawe wira khaarowa owerya ovikaniha muteko ole wa esirkwiitu. Nuuvira okathi voosiisu ene yoole, aahaakhela ewarakha aalepeliwe awe ni efiliyaali. Ewarakha ele, aattottopeliwa murokora ole mwaha wa muteko aavara awe ni ovilela wawe. Anna yaanisuwela wira khivanikhweya omakela othaama khula esumana. Iyawe onihimya so: “Ottottopeliwa iwe waahinvara murima vanceene mwaaraka, owo khaatthikenle ohimya wira aaphavela ohiya muteko wa esirkwiitu. Tthiri, okathi kinuupuwela aka ohiya muteko ola, owo ommakela okilipiha wira nivikanihe”. Anamathelana ale aaviriha iyaakha sinivikana 40 avaraka muteko wa esirkwiitu.

20. Etthu xeeni nikhanle ahu oopaka mahiku otheene, ni nthowa xeeni?

²⁰ Mahiku otheene niimananiheke wooniherya wira naatthu ooxukhuru ni moolumo ni miteko sahu. Moolumo ahu ooxukhurela animwaakhaliherya atthu anceene ovikaniha ovilela khula nihiku olumwenku ola wooxankiha. Nave moolumo ahu ooxukhurela anoolipiha ompatthani ahu mahiku otheene. Niira siiso, nnoowerya omutakiha Yehova Muluku, Tiithi ihu oovaha ni ooxukhurela.