Mwaakha wa 1913, paapa aka John Mills, aahibatiziwa epooma ya oNova York orina ene iyaakha 25. Munna Russell taalavunle mwaha wa obatizo. Moohipisa nuumala obatiziwa, paapa aka aahirowa oTrinidad, weiwo aamuthenle awe maama aka Constance Farmer, yoowo aari namasoma ooluttuweliwa a Biibiliya. Paapa aka aahimukhaliherya mpatthani awe William Roland Brown omooniherya “Fotodrama da Criação”. Awo yaapanke eyo, ehinatthi emusi ya munna Brown ovahiwa yoothanleliwa esya ya ovara mpantta Onikela Nsuwa wÁfrica 1923. Paapa aka ni maama aka, yaawo yaarina nlipelelo na orowa wiirimu, yaahivikaniha okhala oTrinidad.

Anamuyari aka yaarina anamwane 9, alopwana 5 ni athiyana 4, oopacerya iitthaniwa Rutherford, yoowo aari presidenti a Sociedade de Tratados da Torre de Vigia de Sião. Nuumala oyariwa 30 a Dezembro a 1922, kaahivahiwa nsina na Clayton James Woodworth, muhoolo mwaya kaahikhaliherya olokiherya myaha sa erevista The Golden Age (vano eniihaniwa Nvenye!). Nnaamwi anamuyari ahu yaaniroihale oxikola, okathi wotheene yaanintumererya okhalana soolukama sa omunepani. Maama aka aanisuwela otthokiherya oratteene Soolempwa. Nave, Paapa aka aanisiveliwa onileela myaha sa mBiibiliyani mwa enamuna yooniherya wira ti sekeekhai.

Wiimananiha waya woonikhaliherya vanceene. Anamwane araru axilopwana noorowela Exikola ya oGileadi. Axirokoraka araru yaahirumeela mwa iyaakha sinceene ntoko mapioneera ipooma sa oTrinidad ni oTobago. Arumeelaka mwiixuttiho ni ntakiheryo naya nooloka, anamuyari ahu aanikhaliherya ‘ophatteiwa vaté vaya Apwiya’. Nave onilipiha waya woonikhaliherya ovikaniha ‘wunnuwa vapuwani va Muluku ahu’.—Esal. 92:14.

Empa ahu, naari nipuro na mithukumano soorowa olaleerya. Mapioneero yaanithukumana owaani ni yaanilavula sa ntakiheryo na Munna George  Young, misionaario a oCanadá yoowo aaxukurya epooma ya oTrinidad. Anamuyari aka, yaanilavula itthu sooloka sa emusi ya Brown, yaawo yaakhala Mpantta Onikela Nsuwa wÁfrica. Itthu iyo sotheene saahikikhaliherya opacerya olaleerya kirina ene iyaakha 10.

Okathi ole, irevista sahu saanilavula mooluluwanya itthu soohiloka sinipakiwa ni itiini sowootha, mutthenkeso wa nakoso ni anapoliitika oohixariya. 1936 makhulupale a etiini yoowootha yaahimwiiriha muhooleli a anakhotto a oTrinidad okhoottiherya iliivuru sa Torre de Vigia. Hiyo naahihiya opaka, masi naahivikaniha okawa mpakha omala iliivuru sotheene naarina ahu. Naaheetta mphironi ni waarumeela abisikleta nikunxe ene ifolyeeto ni owara ikartaaxi. Nri ene ni egrupu yaarumeela ekaaro ya masu yaakhuma epooma ya oTunapuna, naahilaleerya mipantta sinceene soorakamela oTrinidad. Eyo yaari etthu yookuxa murima! Ovara miteko iyo somunepani waahikiiriha obatiziwa kirina ene iyaakha 16.

Soohiyeriwa iyo soopacerya sa omunepani ni sookumanana saahikiiriha ophavela okhala misionaario. Yoophavela eyo yaaninnuwa mpakha okathi kaaronwe aka okhala ni Munna Edmund Whitfield Cummings, mwakha wa 1944. Naahihakalala vanceene othukumana ni atthu 10 wira Nuupuwelele okhwa wa Kristu mwaakha wa 1945. Mwaakha waattharelana, waahipakiwa muloko woopacerya esisiro ele.

Moohipisa muhoolo mwaya, kaahimulaleerya muthiyana kaavarana aka muteko Oris Williams. Owo aari mutthu aimananiha vanceene waakiherya sookupali iixuttihiwe awe. Okathi kaamusomiha aka Biibiliya, Oris aahiixutta ele Nuulumo na Muluku ninhimya aya, khubatiziwa 5 a Janero a 1947. Nuuvira okathi naahisivelana mpakha othelana. Owo aahipacerya okhala pioneera Novembro a 1950. Kiri ene ni Oris okumi aka womunepani waaninnuwa-tho.

Mwaakha wa 1955 naahilattuliwa Exikola ya oGileadi. Vaavo nailokiherya ahu, Miyo ni Oris naahihiya muteko ahu, nto naahitumiha empa ahu ni mireerelo sahu sikina, nuumala vo naahikhuma wAruba. 29 a Julyo a 1956, naari anaxikola yaakaratuwanri a eturma 27 ya oGileadi, nto naahithanleliwa oNigéria.

Naawehaka itthu nipanke ahu, Oris onihimya so: “Munepa wa Yehova onnimukhaliherya mutthu olimalela muteko wa omisionaario. Moovirikana ni iyaka, miyo nkaaphavela okhala misionaaria. Kaaphavela okhalana empa aka wira kaahuweke anaaka. Kaahituruka muupuwelo aka nuumala woona wira muteko woolaleerya wahaana ovariwa moowaakuveya. Nuumala okaratuwariwa oGileadi kaahoona wira kaari oolikana ene orowa ovara muteko wa omisionaario. Nuumala onwela pakiti iihaniwa Queen Mary, munna Worth Thornton yoowo aavara eskritoorio ya Munna Knorr aahihimya wira: ‘Bon voyage!’ Owo aahinileela wira naarowa orumeelaka oBetheli. ‘Khuuh, nnaari!’ Kaahiittha iphumu. Moohipisa kaahilimalela ni waanikisivela orumeela oBetheli weiwo kaathanleliwe aka ovara miteko soovirikana. Muteko waatepa okisivela waari owaakhela aletto. Kinnaaphenta atthu, nto muteko aka waanikikhaliherya ovara vakhiviru vene ni anna a oNigéria. Anna anceene yaaphiya akhulumunwe ene, attweelenle ene, avoliwe ene ntthona ni etala. Yaari eparakha yuulupale waakhaliherya anna ale. Itthu iyo sotheene saari muteko woowaarya wa Yehova, ni eyo yaanikiphwanyiha ohakalala wekeekhai”. Tthiri miteko sinceene soonikhaliherya wunnuwa momunepani.

Okathi naathukumanne ahu ntoko emusi 1961 oTrinidad, Munna Brown aahilavula sookumanana sawe soohakalaliha wÁfrica. Nto miyo kaahilavula moota muteko ahu wannuwa aya oNigéria. Munna Brown aahikikhupaarela moophenta omuleela Paapa aka wira: “John nyuwo khamunaphiye wÁfrica, masi Woodworth oophiya!” Paapa aka aahaakhula oriki: “Nvikanihe opaka eyo! Nvikanihe!” Olipihiwa ni atthu awo yaakhumme khalai omurumeela Yehova waahikilipiha omaleliha muteko aka woolaleerya.

1962, kahivahiwa eparakha yootthikela osoma myeeri 10 exikola ya oGileadi eturma 37. Munna Wilfred Gooch, yoowo aari kordenadoore a efiliyaali ya oNigéria ari eturma 38 ya oGileadi,  nuumala-vo aahiroihiwa wInglaterra. Nto kaahivahiwa muritti wookhala kordenadoore a efiliyaali ya oNigéria. Kittharaka ntakiheryo na emusi ya Munna Brown, kaaheetta mikwaha sinceene wira kaasuwele anna oophentiwa a oNigéria. Nnaamwi yahaarina mireerelo sinceene sa werutthuni ntoko atthu a ilapo soothaaciri, ohakalala waya wookooniherya wira ohakalala khonlipa ni okhalana mireerelo sa werutthuni aahiiso musurukhu munceene. Moovarihana ni makhalelo aya waanikisivela waaweha ari ene ooreera ni oophwaneliwa mmithukumanoni. Vaavo yaathukumana aya okongresuni, anamunceene yaarwa ni ikamiyau ni ibolekaja * (ikaaro saapakiwa elapo ele). Okhala wene ikaaro iye saanilemphwa moolumo owaakuva wuupuweliwa. Ekaaro emosa yaalempwe so: “Mattoi-ttoi vakhaani a maasi annipaka ephareya yooreera”.

Tthiri moolumo ale vakhaani yaari eekeekhai! Wiimananiha wa khula mutthu, onninlipiha vanceene. 1974, elapo ya oNigéria yaari elapo yoopacerya ohiya wEstados Unidos yaarina anamalaleerya anivikana 100.000. Tthiri muteko waaninnuwa vanceene!

Nnaamwi muteko wannuwa, oNigéria yaahipacerya Ekhotto yaawaniwe okhuma 1967 mpakha 1970. Saahivira myeeri sinceene anna a oBiafran mpantta mukina wa Muro Niger ahiweryaka olavula ni efiliyaali. Nto naahaana waaroihela yoolya ya omunepani. Ntoko kihimmye aka wanipacerya, mwaha wa ovekela ni omuroromela Yehova naahiwerya olapuwa muro ole ikwaha sinceene.

Mpakha va, kinnuupuwela mikwaha iye sowoopiha naalapuwa ahu muro Niger, maana vaanoopiha wiiviwa ni anakhotto, iretta ni ihasara sikina. Tthiri vaanivila opaka mikwaha iye mwaha woowi ekhotto yaahitepa oviha ni atoropa federal yaahittiyelela mpantta mukina wa oBiafran. Ekwaha emosa, kaahilapuwa ohiyu Muro Niger ni ekalawa yaakuxa mapasaxero kikhumaka epooma ya wAsaba, kirowaka epooma ya Onitsha weiwo kaarowa aka waalipiha axitokweene a epooma ya Enugu. Nto mukwaha mukina, kaahaalipiha axitokweene a epooma ya wAba, weiwo muteko ahu waakhoottihiwa aya. Nave, kiri ene epooma ya oPort Harcourt, ovaanela waka ni anna a epooma ele naahimaliha moowaakuveya nipakaka nivekelo, maana atoropa a guvernu yiira ewanaka ni anakhotto a oBiafran mpantta mukina wa epooma ele.

Tthiri mithukumano iye kaapaka aka ni anna ale oophentiwa, saari sootthuneya wira siwooniherye ophenta ni okhapelela wa Yehova ni waavaha miruku sootthuneya wira avikaniheke wuuraana ni ohiirela mpantta ipoliitika. Ti voohakalaliha woona wira anna a oNigéria yaahivilela okathi ole wooxankiha. Nave anna ale yaahivikaniha wuuraana ni yaaniphentana ahixikhaka nloko aahiiso nikhuli. Tthiri, yaari eparakha yuulupale okhala ni anna okathi ole wooxankiha!

Mwaakha wa 1969, munna Milton George Henschel taari presidenti a Asembeleya a Olumwenku Wotheene aarina muru oni: “Paz na Terra” oNova York, estaadiyu Yankee, miyo kaamukhaliherya ni kaahiixutta itthu sinceene. Tthiri ole waari okathi woohakalaliha, maana 1970 naahikhalana Asembeleya mukina a Olumwenku Wotheene aarina muru oni: “Homens de Boa Vontade”, yoowo nampanke ahu oLagos, oNigéria. Okhala wira yiira emanle ene niinano ekhotto, okhumela saana wa muthukumano ole onnooniherya wira Yehova aahinireeliha vanceene. Muthukumano ole waaniwiriyaniwa mattaava 17 ni atthu yaarwenle yaari 121.128. Munna Knorr, Henschel ni anna akina yaanixukurya yaawo yaarwiiye ni iviyau soowaalukariwa sa wEstados Unidos ni wInglaterra yaahaaweha atthu 3.775 abatiziwaka, tthiri owo waari obatizo wuulupale nalikanyiha ni obatizo wa nihiku na Pentekoositi! Okhaliherya olokiherya muthukumano ole, waari okathi wowaatteliwa miteko mookumini mwaka. Tthiri anamalaleerya yaanincerereya mowaakuveya!

Iyaakha sinivikana 30 kirumenle aka oNigéria, waanikisivela okathi mukina okhala mutokweene a esirkwiitu ni okathi mukina kaanixukurya ifiliyaali sa Mpantta Onikela Nsuwa wÁfrica. Mamisionaario yaanixukhurela vanceene okathi kaathokorerya aka saana ni waalipiha! Muteko ole wookikhaliherya woona wira waathokorerya saana atthu akina onnaakhaliherya wunnuwa momunepani ni olipiha ororomela ni wiiraana wa mutthenkeso wa Yehova.

 Tthiri nikhaliheryo na Yehova ti naanikhalihenrye ovilela mixankiho saakumiheriwe ni ekhotto ni iretta. Nto okathi wotheene naanoona wira Yehova aaninreeliha vanceene. Mwaaraka Oris onihimya so:

“Ikwaha sinceene naamakela owereiwa malaaria. Okathi omosa, naahimuroiha Worth oxipitaali ohiisuwelaka. Kaahileeliwa wira Worth aamookhwa, masi owo khaakhwiiye! Nuumala opacerya wiisuwela, Worth aahipacerya omuleela nfurumeero aamukhapelela voohimya sa Omwene wa Muluku. Muhoolo mwaya, miyo ni Worth naahirowa omuxukurya nfurumeero ole, Mr. Nwambiwe wira nimukhaliherye omwiiwexexa Biibiliya. Owo aaheemererya ekeekhai ni muhoolo mwaya aahikhala mutokweene a epooma ya wAba. Miyo nave kihaakhaliherya atthu anceene, waahela muhina Amaka wira akhale arumeyi oororomeleya a Yehova. Tthiri naanisiveliwa vanceene waasuwela ni ophenta, soolema, mikhalelo ni nttaava na atthu a oNigéria”.

Yookhala etthu ekina niixuntte ahu, etthu ene tiila: Wunnuwa momunepani okathi ninthanleliwa ahu ovara elapo ekina, woonikhaliherya waaphenta anna ni arokora hata arina ene mikhalelo soovirikana ni sawihu.

Nuumala orumeela eBetheli ya oNigéria, mwaakha wa 1987 naahivahiwa yoothanleliwa esya ya orowa okhala mamisionaario esisiro yooreera ya oSta Lúcia, oCaribe. Eyo yaari yoothanleliwa yoohakalaliha, masi nahikhalana mixankiho. Moovirikana ni wÁfrica weiwo mulopwana onaatteya awe, muxankiho wa oSta. Lúcia ti woowi anamathelana anceene annikhala vamosa ahilepinhe ekasamento aya. Nto owerya wa Nuulumo na Muluku nihaakhaliherya atthu anceene naasomiha ahu Biibiliya opaka marukunuxo.

Okhala wira nihuuluvala ni khanniiwerya-werya, 2005 Nikhuuru Noolamulela naahinithaamiherya eseedi ahu ya olumwenku wotheene oBrooklyn, oNova York, wEstados Unidos. Mpakha va kinnimuxukhurela Yehova mwaha wa Oris. Owo okhwiiye mwaakha wa 2015, tthiri okhwa wawe onnikiriipiha murima. Oris aari nikhaliheryo naka nuulupale ni aari muthiyana oophenta. Miyo kaanimphenta vanceene iyaakha iye 68 nivirinhe ahu nri ene vamosa. Kihoona wira etthu eniphwanyiha ohakalala wekeekhai, okhale mukasamentoni aahiiso mmulokoni ori ottittimiha okhulupale, olevelelana ni murima wotheene, okhala oowiiyeviha, ni okhalana yoowiima ya munepa wootteela.

Vaavo ninnyoonyiheya ahu aahiiso okhulumuwa, nihaana onvekela Yehova wira onikhaliherye ovikaniha ovara muteko awe. Tthiri navikaniha weemererya marukunuxo, nnimoona wira itthu sinimweettaka saana otepexa wene ale arina miritti mmutthenkesoni!—Yes. 60:17; 2 aKor. 13:11.

Vano oTrinidad ni oTobago, Yehova ooreeliha vanceene muteko wa anamuyari aka ni atthu akina, erelatoorio yookiserya ennooniherya wira akhala atthu 9.892 yaawo yeemerenrye okokhorela wekeekhai. WAruba, atthu anceene anniimananiha olipiha muloko woopacerya yoowo kaari aka. Esisiro ele sookhala miloko 14. Nave-tho, oNigéria anamalaleerya ahincerereya mpakha ophiya 381.398. Vano esisiro ya oSta Lúcia aakhala atthu 783 ankhaliherya Omwene wa Yehova.

Vano kirina iyaakha sinivikana 90. Esalimo 92:15 ennaahimya ale yaaliwe empa ya Yehova eriki: “Anlikana ni miri sinìma hatá sùluvanle: annilipa orattene, khukhalana ekumi yinjene”. Kinnixukhurela vanceene okhala wira koorumeela okumi aka mmutekoni mwa Yehova. Soohiyeriwa somunepani sookikhaliherya omurumeela Yehova moomalela. Mwaha wa okiphenta wawe, Yehova ookeemererya ‘wunnuwa vapuwani va Muluku [aka]’.—Esal. 92:13.