1. Exeeni ekhanle oonixankiha, ni pooti oniiriha wuupuwelaka exeeni?

NIIREKE mootoko oxanka vanceene? * Woonasa wene, mwaahixanka mwaha wa etthu atthu akina yaahimmye aya aahiiso yaapanke aya. Nave pooti wira mwaahixanka mwaha wa etthu mwaahimmye anyu aahiiso mwaapanke anyu. Mwa ntakiheryo, pooti wira mwaahipaka yoottheka munuupuwela wira Yehova khonrowa woolevelelani. Nave okhala wira mwaanixanka vanceene mwaha wa yoottheka anyu, muupuwela wira khamurina waamini aahiiso mwa mutthu ootakhala. Niireke eyo ekeekhai?

2. Matakiheryo xeeni a mBiibiliyani anooniherya wira oxanka khontaphulela ohikhalana waamini?

² Nrowe nthokorerye matakiheryo vakhaani a mBiibiliyani. Mwa ntakiheryo, maama awe profeta Samuweli iihaniwa Ana, aari muthiyana aarina waamini wuulupale. Owo aahixanka vanceene vaavo mutthu mmosa a etthoko awe aamuthokorerya awe mootakhala. (1 Sam. 1:7) Murummwa Paulo aahikhalana waamini woolipa, masi owo ‘anivelavela nihiku ti nihiku’ mwaha wa miloko. (2 aKor. 11:28) Nave mwene Davidi aahikhalana waamini woolipa, nto Yehova aanimphenta vanceene. (Mit. 13:22) Hata vari siiso, Davidi aahipaka itampi seiyo saamuxankiha vanceene. (Esal. 38:5) Masi Yehova aahaamaaliha arumeyi awe awo otheene. Nrowe niwehe etthu ntakiheryo naya ninniixuttiha aya.

3. Xeeni ninyoonyiheya ahu vaavo mutthu onnilavula awe moohiloka?

³ Vaavo atthu akina annilavula aya moohiloka aahiiso ahinnireerela aya murima, hiyo pooti oxanka vanceene. Vannitepa owereya akhala wira mutthu onipaka eyo, mpatthani ahu aahiiso mmusi ahu. Nto hiyo pooti oxanka nnuupuwela wira khaninkhalana-tho apatthani. Okathi mukina, mutthu pooti ohilakelela olavula moolumo akhanle ooniwereiha murima! (Mir. 12:18) Aahiiso mutthu owo pooti olakelela opaka itthu onsuwela awe wira sinooniwereya. Murokora mmosa aahikumanana muxankiho owo. Owo onihimya so: “Iyaakha vakhaani sivinre, mutthu kuupuwela aka wira aari mpatthani aka, aahikootherya itthu sootakhala munternetini. Eyo yaahikixankiha vanceene. Nto nkaawerya osuwela nthowa naya mutthu kaamuroromela aka aakoothenrye awe”. Nto niireke yootoko owiiraneelani etthu ntoko eyo? Akhala wira ti siiso, ntakiheryo na Ana nnoowiixuttihani etthu yuulupale.

4. Mixankiho xeeni Ana aarina awe?

⁴ Ana aahikhalana mixankiho sinceene. Mwa ntakiheryo, mwa iyaakha sinceene khaayara. (1 Sam. 1:2) Musuweleke wira aIsarayeli anceene, yuupuwela wira muthiyana ahaayara khaareelihiwa ni Muluku. Nto Ana, aanuuliwa muru vanceene. (Maph. 30:1, 2) Yaahikhala etthu ekina yaamuriipiha murima vanceene Ana. Iyawe aahimuthela muthiyana mukina iihaniwa Penina, nto owo aahaayara anamwane. Nave, Penina aanimunlela ehace Ana nto ‘aninveha’ wira omuriipihe murima. (1 Sam. 1:6) Wanipacerya, Ana aaniwerya ovilela mixankiho sawe. Masi okathi mukina “ahipajerya wunla, khunyanyala yolya”. Tthiri Ana ‘ahiripiwa murima vanjene’. (1 Sam. 1:7, 10) Niireke Ana aahiphwanya nimaaliho?

5. Ovekela waamukhalihenrye sai Ana?

⁵ Ana aahinvekela Yehova omuleelaka etthu yaamuriipiha murima. Nuumala ovekela, aahimuleela muxankiho awe Mukhulupale Aanamukuttho iihaniwa Eli. Vano Eli aahimuleela Ana wira: “Muroke ni murettele: Muluku a Isarayeli òvaheni envekenlyanyu”. Nto exeeni yaakhumelenle? Ana “ahivenya, khurowa olya: owitho wawe wahimukokola”. (1 Sam. 1:17, 18) Ovekela waahimukhaliherya Ana ophwanya murettele.

6. Itthu xeeni nniixutta ahu voohimya sa ovekela wa Ana ni aFilipi 4:6, 7?

 ⁶ Ovekela onoonikhaliherya okhalana murettele. Ana aahiviriha okathi munceene ovaanelaka ni Tiithi awe a wiirimu. (1 Sam. 1:12) Nave-tho hiyo nihaana oviriha okathi munceene nivaanelaka ni Yehova, nimuleelaka itthu sinnixankiha, itthu nnoova ahu ni sootteettheya sahu. Nto pooti wira okathi nimmuleela ahu Yehova mixankiho sahu, khaninwerya olavula oratteene aahiiso nimmoriha maithori. Tthiri okathi mukina, hiyo pooti wunla naamuleelaka Yehova mixankiho sahu. Musuweleke wira Yehova khonikhala-khala okhulumuwaka owiriyana mavekelo ahu. Nave vaavo ninvekela ahu voohimya sa mixankiho sahu, nihaana wuupuwela miruku murummwa Paulo onivanhe awe aFilipi 4:6, 7. (Mmusome.) Murummwa Paulo, aahihimya mooluluwanya wira nihaana omuxukhurela Yehova vaavo nninvekela ahu. Tthiri nookhalana mathowa manceene anniiriha omuxukhurela Yehova. Mwa ntakiheryo, nihaana omuxukhurela Yehova mwaha wa ekumi onivanhe awe, itthu sooloka opanke awe, oniphenta wawe woororomeleya ni nlipelelo noohakalaliha onivanhe awe. Etthu xeeni ekina Ana onniixuttiha awe?

7. Ana ni iyawe yaamakela opaka exeeni?

⁷ Hata aarina mixankiho, Ana aamakela orowa ni iyawe nipuro aakokhoreliwa Yehova, oSilo. (1 Sam. 1:1-5) Okathi aari awe otabernaakulu, Mukhulupale a Anamukuttho Eli aahimulipiha omuleelaka wira Yehova aamwaakhula mavekelo a Ana, nto eyo yaahimmaaliha vanceene.—1 Sam. 1:9, 17.

8. Mithukumano sinnikhaliherya sai? Mutthokiherye.

⁸ Nnookhalana murettele vaavo nihinhiya ahu orowela mithukumano. Wanipacerya wa mithukumano sahu, ninnipakiwa nivekelo wira munepa wootteela wa Yehova okhale ni hiyo. Muhiliyale wira murettele oniirela mpantta yoowiima ya munepa wootteela. (aGal. 5:22) Vaavo ninrowela ahu mithukumano hata nixankale ene, Yehova, anna ni arokora anoonilipiha ni onikhaliherya okhalana murettele mmuupuweloni ni vamurimani vahu. Muhiliyale wira ovekela ni orowela mithukumano ti inamuna Yehova onirumeela awe wira onilipihe ni onimaaliha. (aHéb. 10:24, 25) Vano nrowe nithokorerye etthu ekina ntakiheryo na Ana ninniixuttiha aya.

9. Niireke mixankiho sa Ana saahimala moowaakuveya ni exeeni aapanke awe?

⁹ Mixankiho sa Ana khisaamanle moowaakuveya. Nuumala Ana otthikela owaani okhumaka aamukokhorela awe Muluku otabernaakulu, nlelo aakhala empa emosa ni Penina. Nave Biibiliya khonihimya akhala wira Penina aahituruka moonelo awe. Woonasa wene, Ana aahaana ovikaniha ovilela onyoonyihiwa ni Penina. Hata vaari siiso, Ana aahiwerya okhalana murettele. Okhala wira Ana aanikupali wira Yehova onniwiriyana mavekelo, owo khaatepa oxanka. Tthiri vannooneya wira Ana aaheemererya omaalihiwa ni olipihiwa ni Yehova. Okathi vakhaani muhoolo mwaya, Yehova aahaakhula mavekelo a Ana ni aahaayara anamwane!—1 Sam. 1:19, 20; 2:21.

10. Ntakiheryo na Ana ninniixuttiha exeeni?

¹⁰ Nnoowerya okhalana murettele hata mixankiho sahu sihimanle. Hata nivekelaka vanceene ni orowela moohihiyererya mithukumano, mixankiho sahu sikina pooti ohimala. Ntakiheryo na Ana, ninninikhaliherya woona wira khiivo etthu ekhanle oomukhoottiherya Yehova onilipiha ni onimaaliha. Yehova khonikhala-khala oniliyalaka, muhiliyale wira nenna-va ni muhoolo, Yehova onoonitthuvela mwaha wa ororomeleya wahu.—aHéb. 11:6.

11. Itthu xeeni saarowa omuxankiha Paulo?

¹¹ Saahikhala itthu sinceene saarowa omwiiriha Paulo oxanka. Mwa ntakiheryo, okhala wira aanaaphenta vanceene anna ni arokora, owo aanixanka mwaha wa mixankiho saaphwanya. (2 aKor. 2:4; 11:28) Okathi Paulo aalaleerya awe, atthu yaamulupattha yaanimmana ni omutthukwela mukhatteya. Nave Paulo aahivilela mixankiho seiyo saamukhulumula ntoko ‘okhala motthoiwani’. (aFil. 4:12) Nave okhala wira aahisama ikwaha tthaaru mphareya, woonasa wene aanixanka vaavo eetta awe mikwaha ni ekalawa. (2 aKor. 11:23-27) Exeeni yaamukhaliherya Paulo okathi aaxanka awe?

12. Exeeni yaamukhalihenrye Paulo ovukula oxanka?

¹² Nnaamwi Paulo aaxanka vaavo anna ni arokora yaakumana aya mixankiho, owo kheererya ophuka mixankiho saya mekhawe. Paulo aanisuwela wira khaawerya opaka itthu sotheene mekhawe. Yena anaavekela atthu akina wira amukhaliherye okhapelela miloko. Mwa ntakiheryo, aahaavaha miritti alopwana oororomeleya ntoko Timootheyo ni Tito. Moohaanyiherya, muteko wa anna awo oororomeleya waanivukula oxanka wa Paulo.—aFil. 2:19, 20; Tito 1:1, 4, 5.

13. Axitokweene anrowa omutakiha sai Paulo?

¹³ Mwaavekeleke atthu akina wookhaliheryani. Amutakihaka Paulo, axitokweene anceene oophenta annixanka vaavo anna anikumana aya mixankiho. Masi mutokweene mmosa paahi khoniwerya waakhaliherya anna othene a mmulokoni. Wiiyeviha onnaakhaliherya axitokweene waavekela anna akina aniphwanelela wira yaakhaliheryeke okhapelela ipwittipwitthi sa Muluku.—2 Tim. 2:2.

14. Xeeni Paulo ahaatepa awe oxanka? Ntakiheryo nawe ninniixuttiha exeeni?

¹⁴ Mweemereryeke wira muhaana omaalihiwa. Paulo aari mutthu oowiiyeviha, nto owo aaniphavela ni aaneemererya omaalihiwa ni olipihiwa ni atthu akina. Owo khaaxanka uupuwelaka wira atthu akina yaarowa omoonaka ntoko mutthu oolosowa mwaha woosuwela wira aanilipihiwa ni apatthani awe. Omulepelaka Fileemoni, Paulo aahimmye so: “Ophenta wanyu wokitteliha murima, wokihakalaliha vanjene”. (Fil. 7) Paulo onnaaromola atthu anceene aavarana awe muteko, yaawo yaamulipinhe vanceene okathi wooxankiha. (aKol. 4:7-11) Akhala wira na atthu oowiiyeviha nnoosuwelaka wira nihaana olipihiwa. Nto anna ni arokora anoosiveliwaka onikhaliherya okathi nimphavela ahu.

15. Exeeni Paulo aapanke awe okathi wooxankiha?

 ¹⁵ Muroromeleke nuulumo na Muluku. Paulo aanisuwela wira nuulumo na Muluku nanwerya omulipiha. (aRom. 15:4) Nave naamunvaha ankhili wira ovilele khula muxankiho. (2 Tim. 3:15, 16) Okathi aatthukweliwe awe ekwaha ya nenli oRoma, Paulo uupuwela wira aamwiiviwa moohipisa. Okathi ole wooxankiha, Paulo aapanke exeeni? Owo aahinvekela Timootheyo orwa moohipisa ni aahinvekela wira aarwaaka ‘omuruhele-tho ilivuru [iroolu]’. (2 Tim. 4:6, 7, 9, 13) Mwaha wa xeeni? Mwaha woowi iliivuru iye vanikhala wira saalempwale ni nttaava na eHeeberi, seiyo Paulo aarumeela awe yoosoma awe ya omwaneene. Akhala wira nnoomutakiha Paulo nisomaka nuulumo na Muluku khula nihiku, Yehova onoorumeela Soolempwa iyo wira onimaalihe hata niwananaka mixankiho sinceene.

16. Davidi oonenle sai nuumala opaka itthu soohiloka?

¹⁶ Davidi aahipaka etthu yootepa otakhala. Owo aahiraruwa ni Bathi-Xeba, aahimwiiviha iyawe ni aaheererya ovitha itthu soohiloka aapanke awe. (2 Sam. 12:9) Wanipacerya, Davidi khacalela itthu aapanke awe. Nto mwaha woopaka eyo, aahihonona waataana wawe ni Yehova, nave aahixanka ni aahitteettheya vanceene. (Esal. 32:3, 4) Exeeni yaamukhalihenrye Davidi ovilela oxanka waakhumelenle mwaha wa soottheka sawe? Exeeni enrowa onikhaliherya napaka etampi?

17. Moovarihana ni Esalimo 51:3-6, ninsuwela sai wira Davidi aahittharuwa ni murima wotheene?

¹⁷ Nvekeleke wira muleveleliwe. Nuuvira okathi, Davidi aahinvekela Yehova. Owo aahittharuwa ni murima wotheene ni aahimuleela Yehova itampi sawe sotheene. (Musome Esalimo 51:3-6.) Opaka eyo yaahimukhaliherya okhalana murettele ni ohakalala! (Esal. 32:1, 2, 4, 5) Akhala wira moopaka etampi yuulupale, xontte muheereryeke ovitha. Ohiya-vo, munvekele Yehova mmuleelaka itampi sanyu sotheene. Mwiira siiso, munoophwanya murettele ni munoosyaka oxanka mwaha wa yowuupuxerya ya murima yoohiloka. Mwaaphavelaka olokiherya waataana wanyu ni Yehova, muhaana opaka etthu ekina ohiya paahi ovekela.

18. Davidi oonihenrye sai wira aaheemererya ottaruxiwa?

¹⁸ Mweemereryeke ottaruxiwa. Okathi Yehova aamurumme awe profeta Natani orowa  olavula ni Davidi voohimya sa etampi awe, Davidi kheerenrye ovitha etampi awe aahiiso ovevereiha ohimyaka wira etthu aapanka awe khiyaatempe otakhala. Moohipisa, aaheemererya wira aahimutthekela ohiya paahi iyawe Bathi-Xeba, masi aahimutthekela vanceene Yehova. Davidi aaheemererya ottaruxiwa ni Yehova, nto Yehova aahimulevelela. (2 Sam. 12:10-14) Akhala wira noopaka etampi yuulupale, nihaana waaleela ale Yehova aathanlale awe wira anihooleleke. (Yak. 5:14, 15) Nave nihaana osyaka ovevereiha aahiiso wiixaakiha. Naakuvela weemererya ottaruxiwa, moohipisa nnoophwanya murettele ni ohakalala.

19. Nihaana olakela opaka exeeni?

¹⁹ Mwiimananiheke osyaka opaka itampi mwaapanke anyu khalayi. Mwene Davidi aanisuwela wira aahaana okhaliheriwa ni Yehova wira osyake opaka itampi aapanke awe. (Esal. 51:9, 12, 14) Nuumala oleveleliwa ni Yehova, Davidi aahilakela osyaka muupuwelo woohiloka. Mwaha woopaka eyo, owo aahiphwanya murettele wa mmuupuweloni.

20. Ninrowa wooniherya sai wira ninnixukhurela oleveleliwa ni Yehova?

²⁰ Ninnooniherya wira ninnixukhurela oleveleliwa ni Yehova vaavo nninvekela ahu, weemererya ottaruxiwa ni wiimananiha osyaka opaka itampi naapanke ahu. Napaka itthu iyo, nnookhalana murettele mmuupuweloni. Munna James yoowo aapanke itampi suulupale, onnikupali wira eyo ekeekhai. Owo onihimya so: “Nuumala waaleela axitokweene itampi saka, vaakhala ntoko wira kaaruliwe muritti woolemela. Kaahilipa vanceene ni kaahikhalana murettele wa mmuupuweloni”. Ti voolipiha osuwela wira “Apwiya ankhala vakhiviru n’ale òtemwa: anniwòpola alipa-òwojeya”.—Esal. 34:19.

21. Ninrowa omweemererya sai Yehova onimaaliha?

²¹ Okhala wira nootepa waattamela wanikisa, mixankiho sahu sinrowa otepaka. Nto vaavo munrowa anyu oxankaka, mwaakuveleke onvekela Yehova. Mmusomeke Biibiliya khula nihiku. Mutthareke ntakiheryo na Ana, murummwa Paulo ni na Mwene Davidi. Munvekeleke Tiithi inyu a wiirimu wira ookhaliheryeni osuwela itthu sinooxankihani. (Esal. 139:23) Owo onimookhaliheryani ovilela mixankiho sanyu, otepexa wene iye muhinwerya anyu mekhinyu. Akhala wira munoopaka eyo, munrowa okhalaka ntoko nasaalimo aamwiipenle Yehova oriki: “Ovelavela n’uxanka wahìniha murim’aka: vano nyuwo mokihakalaliha, khukitteliha murima”.—Esal. 94:19.