1. Mwaha wa nrima, exeeni yaakhumelenle emusi ya Yosefe?

YAKOBE aanaaphenta vanceene anaawe otheene. Masi aanitepa omphenta Yosefe yoowo aarina iyaakha 17. Axinnawe Yosefe yoonenle sai? Awo yaanimukhalela nrima, nto eyo yaahiwiiriha opacerya omunyokha. Yosefe khaapanke etthu yootakhala yaakhanle oowiiriha axinnawe omunyokha. Hata vaari siiso, awo yaahimutumiha ntoko epottha ni yaahinwoka paapa aya ahimyaka wira enama yootakhala yaahimwiiva Yosefe. Okhala wira yaari ananrima, awo yaahihonona murettele veemusini ni yaahimuriipiha murima vanceene paapa aya.—Maph. 37:3, 4, 27-34.

2. Moovarihana ni aGalasia 5:19-21, xeeni nrima nri aya nootakhala?

² MBiibiliyani nrima * nniirela mpantta elista ya mikhalelo ‘sotakhala’ aahiiso sa weerutthuni, seiyo saarowa omwiiriha mutthu ohikela Moomweneni mwa Muluku. (Mmusome aGalasia 5:19-21.) Okhala wene, nrima ninnikumiherya itthu sootakhala ntoko, onyokhana, ikhotto ni owali.

3. Mwaha ola ninrowa othokorerya exeeni?

³ Ntakiheryo na axinnaawe Yosefe ninnooniherya wira nrima ninnihonona waataana ni murettele waakhanle vatthokoni. Nnaamwi nihirowaka opaka etthu axinnawe Yosefe yaapanke aya, otheene ahu na atthu oohimalela, nave murima ahu pooti oniwoka. (Yer. 17:9) Tivonto, okathi mukina hiyo pooti waakhalela nrima atthu akina. Nihaana opaka exeeni akhala wira nrima noopacerya omaka vamurimani vahu? Vano nrowe niwehe matakiheryo vakhaani ari mBiibiliyani a nlopolo, yaawo annikhaliherya osuwela itthu sikhanle owiiriha nrima omaka vamurimani  vahu. Moottharelana ninrowa woona etthu nikhanle ahu oopaka wira niwanane nrima ni okumiherya murettele.

4. Xeeni aFilisti yaamukhalela aya nrima Isakhi?

⁴ Mutthu ookhalana mihakhu sinceene. Isakhi aari mulopwana oothaaciri, nto aFilisti yaahipacerya omukhalela nrima mwaha wa mihakhu aarina awe. (Maph. 26:12-14) Nave awo yaahuuhweela ihime Isakhi aarumeela awe wira ovahe maasi inama sawe. (Maph. 26:15, 16, 27) Ntoko aFilisti, atthu akina olelo-va, annaakhalela nrima ale arina mihakhu sinceene aahiiso athaaciri. Awo khahiyo paahi aniphavela itthu atthu akina arina aya, masi awo khaniphavela wira atthu awo akhalane itthu arina aya.

5. Xeeni ahooleli a itiini yaamukhalela aya nrima Yesu?

⁵ Vaavo mutthu oniphentiwa awe vanceene. Ahooleli a etiini ya aYuda yaanimukhalela nrima Yesu mwaha woowi atthu anceene yaanisiveliwa okhala ni Yesu. (Math. 7:28, 29) Yesu aarummwale ni Muluku ni iixuttiha ekeekhai. Hata vaari siiso, ahooleli a itiini yaanimootherya itthu sootakhala ni omuramusa wira ahonone mweettelo wooloka wa Yesu. (Mar. 15:10; Yoh. 11:47, 48; 12:12, 13, 19) Yowiiraneya ela, enniixuttiha exeeni? Mmulokoni aakhala anna ni arokora arina mikhalelo sinaasivela atthu anceene. Nto nihaana wiimananiha wira nihikhala-khale naakhalelaka nrima anna awo. Ohiya opaka eyo, nihaana otakiha mikhalelo saya sooloka.—1 aKor. 11:1; 3 Yoh. 11.

6. Diotrefe oonihenrye sai wira aari nanrima?

⁶ Vaavo mutthu mukina onivahiwa awe iparakha mmutthenkesoni. Eseekulu yoopacerya, Diotrefe aanaakhalela nrima ale yaarina iparakha mmulokoni. Owo aaphavela “okhala nipuro nopacerya” eriyari ya anna mmulokoni. Nto aahipacerya omootherya ni omulavula moohiloka murummwa Yohani ni atthu akina yaarina iparakha wira ahooniweke saana ni anna. (3 Yoh. 9, 10) Nnaamwi nihipakaka etthu ntoko ele aapanke awe Diotrefe, naahiivahe ephoole pooti opacerya omukhalela nrima munna ovahiwe eparakha naaphavela ahu, otepexa wene akhala wira nnoona wira nanwerya ovara saana muteko owo waavikana atthu akina.

7. Nrima ninkumiherya exeeni?

⁷ Nrima nri ntoko miiwa sootakhala. Akhala wira miiwa sa nrima soomaka vamurimani vahu, vannivila okumiha. Nave nrima ninnikumiherya moonelo woohiloka ntoko, wiixinnuwiha, wiitthuna ni otepa wiivaha efaita. Ntoko siisaale miiwa sinikhoottiherya aya ipyo wunnuwa, nrima pooti oniiriha ohikhalana mikhalelo sooloka ntoko, ophenta, othunku ni oreera murima. Nto vaavo nnoona ahu wira nrima noopacerya omaka vamurimani vahu, nihaana waakuvela ophela. Ninrowa owanana sai nrima?

8. Mikhalelo xeeni sinrowa onikhaliherya owanana nrima?

⁸ Nnoowerya owanana nrima akhala wira nnookhalana mikhalelo miili: Woopacerya wiiyeviha, wa nenli ohakalala. Nto akhala wira nnookhalana mikhalelo iyo, nrima nnoomala-mala vamurimani vahu. Wiiyeviha onoonikhaliherya ohitepa wiivaha efaita waavikana atthu akina. Maana mutthu oowiiyeviha khonuupuwela wira tootepexa oloka. (aGal. 6:3, 4) Mutthu oohakalala onnixukhurela itthu orina awe ni khoniilikanyiha ni atthu akina. (1 Tim. 6:7, 8) Vaavo mutthu oowiiyeviha onihakalala awe, owo onnitteeliwa murima aawehaka atthu akina, avahiwaka iparakha.

9. Moovarihana ni aGalasia 5:16 ni aFilipi 2:3, 4, munepa wootteela onrowa onikhaliherya sai?

⁹ Munepa wootteela wa Muluku onoonikhaliherya owanana nrima, okhala oowiiyeviha ni  ohakalala. (Mmusome aGalasia 5:16; aFilipi 2:3, 4.) Munepa wootteela wa Yehova onoonikhaliherya otokosa moonelo ni muupuwelo ahu. Akhala wira miyuupuwelo iyo ti soohiloka, Muluku pooti onikhaliherya orantteliha ni miyuupuwelo sooloka. (Esal. 26:2; 51:12) Moise ni murummwa Paulo yaahiwerya owanana nrima. Nrowe nthokorerye ntakiheryo naya ni ele nniixutta ahu.

10. Yowiiraneya xeeni yaarowa omweehererya Moise? (Nwehe elatarato ya ekaapa.)

¹⁰ Moise aahivahiwa okhulupale wuulupale eriyari ya atthu a Muluku, masi owo khaakhalela nrima iparakha iyo. Mwa ntakiheryo, okathi omosa Yehova aahikumiha munepa vakhaani aarina awe Moise, khwaavaha makhulupale makina yaawo yaari waattamela eheema yoothukumana. Moohipisa Moise aahisuwela wira makhulupale manli yahaaronwe oheemani yoothukumana yaahaakhela munepa wootteela ni yaahipacerya olavula ntoko maprofeta. Nto Yoxuwa aahinvekela Moise wira aamaalihe. Vano Moise oonenle sai? Owo khaakhalenle nrima itthu iye Yehova aavanhe awe makhulupale ale manli. Ohiya-vo, Moise aahiiyeviha ni aahihakalala mwaha wa iparakha atthu ale yaakhenle aya. (Moth. 11:24-29) Ntakiheryo na Moise ninniixuttiha exeeni?

11. Axitokweene anrowa omutakiha sai Moise?

¹¹ Niireke nyuwo mwa mutokweene? Niireke nikhuuru na axitokweene nootoko woovekelani omwiixuttiha munna mukina wira ohalane eparakha enoosivelani? Mwa ntakiheryo, woonasa wene onnoosivelani ohoolela yoosoma ya erevista Owehaweha. Akhala wira mwa mutthu oowiiyeviha ntoko Moise, khamunrowa woovelela omwiixuttiha munna mukina wira ohalane eparakha anyu. Ohiya-vo, munoohakalalaka omwiixuttiha ni omukhaliherya munna owo.

12. Anna anceene anooniherya sai wiiyeviha ni ohakalala?

¹² Nkahaya nwehe ntakiheryo nikina anna anceene oowuuluvala aniwanana aya. Mwa iyaakha sinceene anna awo annirumeela ntoko axitokweene anuuraanyiha nikhuuru na axitokweene. Masi okathi anikhalana aya iyaakha 80, awo ahaana waahiyerya eparakha aya anna akina. Etthu emosaru enniwiiraneela axitokweene a esirkwitu. Vaavo anikhalana aya iyaakha 70, moowiiyeviha awo annihiya okhala mutokweene a esirkwitu anaakhela iparakha sikina. Iyaakha iya sookiserya, olumwenku wotheene anna ni arokora anirumeela oBetheli annilattuliwa okhala mapioneero. Anna ni arokora awo oororomeleya khaniixinliha mwaha woohiya yoothanleliwa yaasivela.

13. Exeeni yaakhanle oomwiiriha Paulo waakhalela nrima arummwa 12?

¹³ Murummwa Paulo ntakiheryo nikina na mutthu oohakalala ni oowiiyeviha. Paulo kheemerenrye nrima nimakaka vamurimani vawe. Nnaamwi aavanre vanceene muteko woolaleerya, moowiiyeviha owo aahimmye so: “Miyo kiri mwamukhanixa wavikana arummwa othene, kihiphwanelaka hatá wireliwa murummwa”. (1 aKor. 15:9, 10) Arummwa 12 yaahimutthara Yesu okathi wa muteko awe woolaleerya valaponi, masi Paulo aakhanle muKristau nuumala Yesu wiiviwa ni ohihimuxiwa. Nnaamwi muhoolo mwaya aathanliwe okhala murummwa a amalapo, Paulo khaavahiwe eparakha ya okhala murummwa eriyari ya arummwa ale 12. (aRom. 11:13; Mit. 1:21-26) Ohiya waakhalela nrima arummwa ale 12, mwaha wa waataana yaarina aya ni Yesu, Paulo aanivikaniha ohakalala ni iparakha aarina awe.

14. Wiiyeviha ni ohakalala onrowa onikhaliherya opaka exeeni?

¹⁴ Nimutakihaka Paulo, wiiyeviha ni ohakalala onoonikhaliherya waattittimiha ale avahiwe  okhulupale ni Yehova. (Mit. 21:20-26) Muhiliyale wira Yehova ohaathanla alopwana akina wira anihooleleke mmulokoni. Ekeekhai wira awo atthu oohimalela, masi Yehova onnaathokorerya okhala “sovaha sawe”. (aÉf. 4:8, 11) Ti vootepa otthuneya waattittimiha ale annihoolela ni moowiiyeviha, otthara malakiheryo annivaha aya. Niira siiso nnookhalana waataana wooloka ni Yehova ni murettele ni annihu.

15. Nihaana opaka exeeni?

¹⁵ Akhala wira nnimweemererya nrima wunnuwa vamurimani vahu, khaninrowa okhalana murettele mukina ni mukhwaawe. Tivonto, nihaana okumiha vamurimani vahu khula etthu enooniherya nrima ni ohiwiiriha atthu akina okhalana nrima vamurimani vaya. Itthu iyo ti sootepa otthuneya naaphavelaka wiiwelela yooruma ya Yehova eni: “Niphaveleke itthu sinniphwanyiha murettele ni sinnilipiherya wamini wahu”. (aRom. 14:19) Nihaana opaka exeeni wira naakhaliherye atthu akina owanana nrima? Ninrowa okhaliha sai murettele?

16. Ninrowa waakhaliherya sai atthu akina owanana nrima?

¹⁶ Moonelo ni mweettelo ahu pooti waakhaliherya aahiiso nnaari atthu akina. Olumwenku wa Satana onnitumererya “ophavela okhalana sothene sinònahu”. (1 Yoh. 2:16) Moonelo owo onniwiiriha atthu okhalana nrima. Tivonto ti vooloka osyaka omakela olavula itthu nrina ahu aahiiso nimphavela ahu othuma. Napaka eyo, nnoosyaka owiiriha atthu akina okhalana nrima. Enamuna ekina nikhanle ahu oosyaka owiiriha  atthu akina okhalana nrima, ori osyaka omakela olavula iparakha nrina ahu mmulokoni. Akhala wira nimmakela olavula iparakha nrina ahu, noopacerya wunttelaniha ematta nikhanle aya oowunnuwa nrima. Enamuna yooloka ori wooniherya waathokorerya wahu atthu akina ni waattottopela mwaha wa itthu sooloka anipaka aya. Niira siiso, nnimwaakhaliherya okhala atthu oohakalala ni nnookhaliha murettele mmulokoni.

17. Axinnawe Yosefe yaawenrye opaka exeeni ni nthowa xeeni?

¹⁷ Hiyo nnoowerya oxintta nrima! Nrowe nthokorerye ntakiheryo na axinnawe Yosefe. Nuuvira iyaakha sinceene okhuma vaavale yaamuthokorenrye aya moohixariya, awo yaahimphwanya Yosefe wExiitu. Ohinatthi waaleela axinnawe wira aari Yosefe, owo aahiweehererya wira oone akhala wira yaahituruka moonelo aya. Nto okathi yaalya aya, Yosefe aahinvaha yoolya yinceene Beniyamini muhimaawe ookiserya oyariwa waavikana axinnawe akina. (Maph. 43:33, 34) Hata vari siiso, khiivo etthu enooniherya wira axinnawe ale yaahimukhalela nrima Beniyamini. Ohiya-vo, awo yaahooniherya wira yaanimuthokorerya saana muhima aya ni paapa aya, Yakobe. (Maph. 44:30-34) Okhala wira yaahiphela nrima vamurimani vaya, axinnawe Yosefe yaahittikiherya murettele yaahononne aya mweemusini. (Maph. 45:4, 15) Mwa enamuna emosaru, akhala wira nnookumiha nrima vamurimani vahu, nnookhaliherya okhaliha murettele mweemusini ni mmulokoni.

18. Moovarihana ni Yakobo 3:17, 18, exeeni enrowa okhumelela akhala wira nnookhaliha murettele?

¹⁸ Yehova oniphavela wira niwananeke nrima ni niimananiheke okhalana murettele. Wira nipake itthu iyo piili, nihaana wiimananiha vanceene. Ntoko nithokorenrye ahu mwaha ola, otheene ahu pooti okhalana nrima. (Yak. 4:5) Nave ninkhala olumwenku atthu anceene ari aya ananrima. Masi nakhala atthu oowiiyeviha, oohakalala ni waavaha efaita atthu akina, khaninrowa okhalana nrima. Ohiya-vo, ninrowa okhaliherya okhalana murettele ni okhalana mikhalelo sooloka.—Mmusome Yakobo 3:17, 18.