1. Etthu xeeni eniiriha mutthenkeso wa Yehova okhala woowiirana?

NINNIHAKALALA wiirela mpantta mutthenkeso wa Yehova. Xeeni mutthenkeso wa Yehova ori awe wowiiraana ni wa murettele? Etthu emosa okhala wira otheene ahu ninniimananiha waattittimiha ale Yehova aavanhe awe okhulupale. Tthiri, vaavo nniiwelela ahu mareheryo a ohoolela Yehova opanke awe, ninnitepa wiiraana.

2. Mwaha ola ninrowa waakhula makoho xeeni?

² Mwaha ola, ninrowa othokorerya tani avahiwe okhulupale mmulokoni. Nave ninrowa waakhula makoho anittharelana: Muteko xeeni arokora avahiwe aya? Niireke khula munna muhooleli a arokora otheene? Niireke okhulupale axitokweene arina aya mmulokoni onoolikana ni okhulupale muhooleli a etthoko orina awe vatthokoni vawe? Wanipacerya, nrowe niwehe moota nikhanle ahu oowaathokorerya arokora.

3. Etthu xeeni enrowa onikhaliherya ovaha efaita itthu arokora ampaka aya?

³ Ninnaaxukhurela vanceene arokora aniimananiha othokorerya etthoko aya, olaleya ihapari sooreera ni waakhaliherya atthu akina mmulokoni. Nto nnootepaka waavaha efaita arokora awo akhala wira ninnisuwela moota Yehova ni Yesu anaathokorerya aya. Nave nnoottottela mureerelo oweha moota murummwa Paulo aathokorerya awe athiyana.

4. Biibiliya onooniherya sai wira Yehova onnaavaha efaita athiyana ntoko onaavaha awe efaita olopwana?

⁴ Biibiliya onnooniherya wira Yehova onnaavaha efaita athiyana ntoko onaavaha awe efaita alopwana. Mwa ntakiheryo, eseekulu yoopacerya Yehova aahaavaha munepa awe woowaarya alopwana ni athiyana. Nave aahaavaha ikuru wira apakeke miiriirya ntoko olavula mattaava oovirikana. (Mit. 2:1-4,  15-18) Nave-tho Yehova ohaathanla ni munepa awe woowaarya alopwana ni athiyana wira yalamuleleke ni Kristu wiirimu. (aGal. 3:26-29) Ohiya-vo, alopwana ni athiyana anootthuveliwa avahiwaka okumi woohimala valaponi vaava. (Wis. 7:9, 10, 13-15) Musuweleke wira Yehova ohaavaha alopwana ni athiyana muteko woolaleya ni owiixuttiha atthu ihapari sooreera. (Math. 28:19, 20) Mwa ntakiheryo, eliivuru ya Miteko ennimulavula murokora iihaniwa Prisila. Owo ni iyawe iihaniwa Aakila aahimutthokiherya oratteene ekeekhai mulopwana iihaniwa Apolo, yoowo aasuwela oratteene soolempwa.—Mit. 18:24-26.

5. Luka 10:38, 39, 42, onooniherya sai wira Yesu anaattittimiha athiyana?

⁵ Yesu aanaattittimiha vanceene athiyana. Yesu khaatakiha aFarisi, yaawo yahaavaha efaita athiyana. Mwa ntakiheryo, aFarisi khiyaalavula ni athiyana opuro woowaatta atthu ni khiyaawiixuttiha Soolempwa. Moovirikana ni aFarisi, Yesu aaniwiixuttiha ikeekhai athiyana ni alopwana. * (Mmusome Luka 10:38, 39, 42.) Nave aaniweemererya athiyana omuhoola mikwaha sawe sa olaleerya. (Luka 8:1-3) Ohiya-vo, Yesu aahaavaha eparakha athiyana yoowaaleela arummwa awe wira Yesu aahihihimuxiwa.—Yoh. 20:16-18.

6. Murummwa Paulo oonihenrye sai wira anaattittimiha athiyana?

⁶ Murummwa Paulo aahimuupuxerya Timootheyo wira aahaana waattittimiha athiyana. Nave Paulo aahimutumererya Timootheyo wira aahaana waathokoreyaka arokora oowuuluvala ntoko aximaama awe “nave athiyana oohuuluvala” athokoreryeke ntoko axirokora awe. (1 Tim. 5:1, 2) Nnaamwi Paulo aamukhalihenrye vanceene Timootheyo okhalana waamini woolipa, owo aahisuwela oratteene wira Timootheyo aahikhaliheriwa ni maama awe vamosa ni piipi awe osuwela “soolempwa soowaarya”. (2 Tim. 1:5; 3:14, 15) Epaphelo aalepenle awe aRoma, Paulo aahaakhomasa arokora oromolaka masina aya. Ohiya paahi oweha muteko arokora yaavara aya, Paulo ohimmye wira aanixukhurela muteko wotheene yaavara aya.—aRom. 16:1-4, 6, 12; aFil. 4:3.

7. Makoho xeeni ninrowa ahu othokorerya?

⁷ Ntoko niwenhe ahu ettima evinre, Biibiliya khonihimya wira anna aakhalana efaita yinceene waavikana arokora. Maana arokora awo oophenta ni oovaha annikhaliherya vanceene muloko. Nave axitokweene annisuwela wira arokora awo, annikhaliherya muloko okhala woowiirana ni wa murettele. Masi aakhala makoho ninreerela ahu waakhula. Makoho ene taala: Xeeni okathi mukina Yehova onaavekela awe arokora owara nleeso? Okhala wira anna paahi tanithanliwa wira akhaleke axitokweene ni arumeyi orumeela, nto niireke eyo enooniherya wira khula munna muhooleli a khula murokora a mmulokoni?

8. Moovarihana ni aEefeso 5:23, niireke khula munna muhooleli a khula murokora? Mutthokiherye.

⁸ Niireke khula munna muhooleli a khula murokora? Ohimya ekeekhai nnaari! Maana Kristu tori muhooleli a arokora otheene mmulokoni. (Mmusome aEefeso 5:23.) Vatthokoni muhooleli a muthiyana mulopwana. Nave akhala wira mwaana mwaamulopwana a vatthokoni oopatisiwa khonkhala muhooleli a maama awe. (aEef. 6:1, 2) Nave-tho, nnaamwi axitokweene a mmulokoni yaahoolelaka anna ni arokora, okhulupale aya wookhalana mukano. (1 aTes. 5:12;  aHeeb. 13:17) Ankhi arokora oohitheliwa ahinkhala ni anamuyari aya? Ekeekhai wira ahaana ovikaniha waattittimiha anamuyari aya masi awo khanihooleliwa-tho ni apapaya. Nave awo ahaana ovikaniha waattittimiha axitokweene. Masi ntoko khula munna a mmulokoni, muhooleli a murokora, Yesu.

9. Xeeni okathi mukina arokora anireerela aya owara nleeso?

⁹ Ekeekhai wira Yehova ohaathanla alopwana wira yiixuttiheke ni ohoolela miteko sinivariwa mmulokoni, nto muritti owo khaavanhe athiyana. (1 Tim. 2:12) Mwaha wa xeeni? Mwaha woowi Yehova oomuthanla Yesu wira okhale muhooleli a mulopwana wira mutthenkeso okhale wootthokiheya. Akhala wira murokora onrowa ovara muteko waarowa ovariwa ni munna, Yehova oniphavela wira murokora owo owareke nleeso. * (1 aKor. 11:4-7) Yehova onnaavekela arokora opaka eyo ohiya mwaha wa ohaavaha efaita, masi oniphavela wira attittimiheke mareheryo a okhulupale opanke awe. Nuupuwelaka itthu iyo sotheene, nrowe naakhule nikoho nna: Okhulupale xeeni Yehova aavanhe awe ahooleli a itthoko ni axitokweene?

10. Etthu xeeni yaarowa omwiiriha mutokweene opaka malamulo?

¹⁰ Axitokweene annimphenta Kristu nave anniphenta “ipwittipwitthi” Yehova ni Yesu aavanhe awe wira akhapeleleke. (Yoh. 21:15-17) Okhala wira awo annikhapelela muloko, mutokweene pooti wuupuwelaka wira ori ntoko tiithi a atthu ale onaakhapelela awe. Owo pooti wuupuwelaka wira okhala wira muhooleli a etthoko ookhalana ehakhi ya  opaka malamulo wira okhapelele etthoko awe, nto owo nave ookhalana ehakhi ya opaka malamulo wira aakhapelele atthu a Muluku. Anna ni arokora akina pooti owiiriha axitokweene opaka eyo akhala wira annaavekela opaka soothanla saya. Masi niireke okhulupale wa axitokweene onoolikana ni okhulupale wa ahooleli a itthoko?

11. Mwa enamuna xeeni okhulupale wa ahooleli a itthoko onlikana aya ni okhulupale wa axitokweene?

¹¹ Murummwa Paulo, ohooniherya wira okathi mukina okhulupale wa axitokweene pooti olikanaka ni okhulupale wa ahooleli a itthoko. (1 Tim. 3:4, 5) Mwa ntakiheryo, Yehova oniphavela wira atthu a vatthokoni, amwiiweleleke muhooleli a etthoko eyo. (aKol. 3:20) Nave owo oniphavela wira anna ni arokora awiiweleleke axitokweene. Yehova oniphavela wira axitokweene ni ahooleli a itthoko awiixuttiheke ale aanaahoolela aya omphenta Yehova. Ohiya-vo, owo oniphavela wira ale avahiwe okhulupale, yooniheryeke wira annaaphenta ale aanaahoolela aya. Nave ntoko muhooleli a vatthokoni ooloka, Yehova oniphavela wira axitokweene yaakhaliheryeke anna ni arokora oothoiwa. (Yak. 2:15-17) Nave-tho Yehova oniphavela wira axitokweene ni ahooleli a itthoko yaakhaliheryeke atthu aanaahoolela  aya wiiwelela malamulo awe ni atthareke itthu silempwale mBiibiliyani.—1 aKor. 4:6.

12-13. Ntoko onooniherya awe aRoma 7:2, okhulupale wa axitokweene ovirikanne sai ni okhulupale wa ahooleli a itthoko?

¹² Hata vari siiso, okhulupale wa axitokweene woovirikana ni okhulupale wa ahooleli a itthoko. Mwa ntakiheryo, Yehova ohaavaha axitokweene, ohiya ahooleli a itthoko muritti woowaaphukela ale anipaka itampi. Nave, ohaavaha muritti woowaakumiha mmulokoni ale anipaka itampi ahinattharuwa.—1 aKor. 5:11-13.

¹³ Nave musuweleke wira Yehova, ohaavaha muritti ahooleli a itthoko yoowo ohaavanhe awe axitokweene. Mwa ntakiheryo, Yehova ohaavaha ahooleli a itthoko ehaakhi ya opaka malamulo ni oweha akhala wira atthu a vatthokoni vaya annitthara malamulo awo. (Mmusome aRoma 7:2.) Mwa ntakiheryo, muhooleli a etthoko pooti othanla okathi anaawe akhanle aya oophiya vate ohiyu. Nave oovahiwa ehakhi ya waahukhumu anaawe akhala wira khaniiwelela malamulo awo. (aEef. 6:1) Nto muhooleli a etthoko oophenta onnimukoha mwaarawe ohinatthi opaka malamulo, okhala wira oowanli aya ari “erutthu emosa”. *—Math. 19:6.

14. (a) Marko 10:45, onooniherya sai wira Yesu onniphwanelela okhala muhooleli? (b) Tuuvi ori muteko wa Nikhuuru Noolamulela? (Nwehe ekaaxa eni: “Muteko wa Nikhuuru Noolamulela”.)

¹⁴ Orumeelaka mukuttho wa Yesu Kristu, Yehova oomuthuma khula mmosa a mmulokoni ni atthu otheene aniphavela omutthara.  (Mmusome Marko 10:45; Mit. 20:28; 1 aKor. 15:21, 22) Tivonto, Yesu oniphwanelela awe okhala muhooleli a muloko okhala wira oovaha okumi awe wira onoopole. Nave Yesu ookhalana ehakhi ya waavaha malakiheryo atthu otheene ohela muhina imusi vatthokoni, ni atthu otheene a mmulokoni voohimya sa etthu otheene ahu nikhanle ahu oopaka. Ohiya-vo, owo onniweha akhala wira ninniiwelela aahiiso nnaari malamulo awe. (aGal. 6:2) Masi khahiyo paahi Yesu onnivaha malakiheryo maana owo onniniphenta ni onninikhapelela.—aEef. 5:29.

15-16. Itthu olavunle awe murokora Marley ni munna Benjamin siwiixuttinheni exeeni?

¹⁵ Arokora annooniherya wira annimwiiwelela Kristu yiiwelelaka malakiheryo anivahiwa aya ni anna yaawo athanliwe wira yaakhapeleleke. Arokora anceene arina moonelo mmosaru orina awe murokora oniihaniwa Marley. Owo onihimya so: “Kinnivaha efaita yinceene muteko aka wa okhala muthiyana ootheliwa ni murokora mmulokoni. Kinniimananiha vanceene wira kittittimiheke okhulupale Yehova onvahe awe iyaka ni axitokweene. Nto iyaka ni axitokweene annikikhweiherya opaka eyo, maana annikittittimiha ni annikixukhurela mwaha wa itthu kinipakaka”.

¹⁶ Anna anaattittimiha arokora, annooniherya wira annisuwela mareheryo a okhulupale Yehova opanke awe. Munna oniihaniwa Benjamin onikhala wInglaterra onihimya so: “Arokora annikiixuttiha itthu sinceene, ntoko moota anivaha aya ikomentaariyo, moota aniiriha aya soosoma sa Biibiliya ni moota anipaceriha aya ovaanela okathi awo anilaleerya aya. Tthiri muteko anivara aya wookhalana efaita yinceene”.

17. Xeeni vari aya vooloka ottittimiha malakiheryo a okhulupale?

¹⁷ Vaavo otheene ahu mmulokoni, alopwana, athiyana, ahooleli a itthoko ni axitokweene anisuwela aya ni ottittimiha malakiheryo a okhulupale, muloko onnihakalala ni onnikhalana murettele. Tthiri ti vooloka onvuwiha Tiithi ihu oophenta Yehova.—Esal. 150:6.