1. Itthu xeeni sikhanle ooniiriha ovahiwa miruku? Nave xeeni otheene ahu ninreerela ahu weemererya?

 OOTHEENE ahu nihaana ovahiwa miruku ikwaha sikina. Okathi mukina hiyo pooti onvekela miruku iyo mutthu nimmuttittimiha ahu. Woonasa wene, munna onnoona wira nihanle orowa “ephiro yootakhala”, eyo piiyo, opaka etthu yoohiloka, nto onanivaha miruku. (aGal. 6:1) Ikwaha sikina, hiyo pooti ovahiwaka miruku aahiiso opwapweliwa, mwaha wa etthu yoohiloka nipanke ahu. Miruku iyo pooti ovahiwaka mwa inamuna soovirikana. Masi hata vari siiso, vannireerela weemererya. Opaka eyo, onoonikhaliherya, nave-tho pooti woopola okumi ahu.—Mir. 6:23.

2. Ntoko onihimya awe Miruku 12:15, xeeni vanreerela aya weemya ovahiwa miruku?

² Yoolepa okumihiwe aya mwaha ola enihimya wira, nihaana owiriyana ‘moolumo àsuweli’. (Mir. 22:17) Khuuvo mutthu onisuwela itthu sootheene. Ekeekhai ti yoowi: Khula okathi onookhala mutthu onsuwela itthu sinceene onivikana hiyo. (Musome Miruku 12:15.) Nto okathi nneemererya ahu miruku, ninnooniherya wira na atthu oowiiyeviha. Eyo enooniherya wira ninneemererya wira sihaavo itthu sikina nihinsuwela ahu, nave ninreerela ahu okhaliheriwa. Yehova aahimuruma Mwene Salomoni olepa so: “Yattá anvaha miruku sorera, miteko iyo sinokelela oholo”.—Mir. 15:22.

3. Inamuna xeeni ninvahiwa ahu miruku?

³ Ephiro emosa ninvahiwa ahu miruku, okathi yoole nimmusoma ahu Biibiliya ni iliivuru sa mutthenkeso ahu. Okathi owo, pooti wuupuwelaka etthu yoohiloka nimpaka ahu ninreerela ahu olokiherya. (aHeeb. 4:12) Masi ikwaha sikina hiyo pooti ovahiwaka miruku ni mutokweene aahiiso munna mukina oophwanelela. Anna awo pooti onihimeeryaka etthu ehikhanle saana enreerela ahu olokiherya. Nto akhala wira mutthu mukina onninivaha miruku  sinikhuma mBiibiliyani, nihaana wooniherya oxukhurela wahu niwiriyanaka ni weettela.

4. Ntoko onihimya awe Musuweli 7:9, exeeni ninreerela ahu osyaka okathi ninvahiwa ahu miruku?

⁴ Ohimya ekeekhai, okathi ninvahiwa ahu miruku, khivanikhweya weemererya ni ovarihela muteko. Hiyo ninneemererya wira na anatampi. Masi pooti okhala vooxankiha weemererya miruku, vakhala wira mutthu owo onninleela etthu enreerela ahu olokiherya. (Mmusome Musuweli 7:9.) Ikwaha sikina hiyo pooti woothereryaka itthu. Aahiiso pooti onyoonyiwaka ni mutthu onivanhe miruku iyo, nnapacerya wuupuwelaka wira onooninyokha. Hiyo pooti wuupuwelaka so: ‘Ale tani wira ekivaheke miruku miyo? Ale-tho annittheka!’ Nto akhala wira miruku iyo nivahiwe ahu khasinisivenle, hiyo pooti okhoottaka wiiwelela, nnamuhaavya mutthu mukina onrowa onivaha miruku sinrowa onisivela.

5. Ninrowa othokorerya exeeni mwaha ola?

⁵ Mwaha ola, nnooweha matakiheryo a mBiibiliyani anaaromola atthu yaakhoottale wiiwelela miruku, ni akina yaiwelenle. Nave-tho nnooweha etthu enrowa onikhaliherya weemererya ni weettela miruku ninvahiwa ahu.

6. Mwene Robowamu oonenle sai miruku aavahiwe awe? Nave ntakiheryo nawe ninniixuttiha ni?

⁶ Ntakiheryo noopacerya, ti na Robowamu. Okathi aakhanle awe mwene a wIsarayeli, atthu yaahinvekela opaka etthu emosa. Yaaphavela wira Robowamu ovukule miteko Salomoni aakhanyererya awe ovara. Woopaceryani aahipaka etthu yooreera, maana aahirowa waavekela miruku makhulupale a wIsarayeli wira osuwele etthu yoopaka. Makhulupale ale, yaahimuleela Robowamu wira vaanireerela owiiwelela atthu ale, maana iira siiso, yammurumeelaka. (1 Mam. 12:3-7) Vanikhala wira miruku iye khisaamusivenle Robowamu, tivonto, aahirowa waavekela miruku apatthani eettana awe okhuma enamwane awe. Woonasa wene apatthani awe yaarina iyaakha 40, nave sookhala itthu sikina yaasuwela aya. (2 Wah. 12:13) Masi miruku yanvanhe aya khisaalonke. Awo yaahimuleela wira aahaana wuncererya miteko atthu ale yaavara aya. (1 Mam. 12:8-11) Nuumala ovahiwa miruku iye soovirikana, Robowamu aahaana omukoha Yehova wira osuwele miruku aareerela awe otthara. Ohiya opaka eyo, Robowamu aatthanre miruku sa apatthani awe, seiyo aaphavela awe owiriyana. Etthu aathanlale awe opaka, yaahimphwanyiha maxakha yena ni atthu ootheene. Hiyo-tho pooti onikhumelela etthu emosaru. Ikwaha sikina, pooti ovahiwaka miruku sihinnisivela. Masi akhala wira miruku iyo sinkhuma mBiibiliyani, nihaana weemererya.

7. Ntakiheryo na Mwene Oziya, ninniixuttihani?

⁷ Mwene Oziya aahikhootta miruku. Nihiku nimosa Oziya, aahivolowa mutemplo opuro yeemereriwa anamukuttho paahi, ni aahimananiha opaha erupani aahiiso nsenso. Alipa a mukuttho yaahimuleela wira: “Nyuwo mwené Oziya! Khahiyó muteko anyu wapaherya erupani Apwiya: owo muteko w’alipa a mukuttho”. Oziya oonenle sai? Vakhanle wira aaheemererya miruku iye ni okhuma mutemplo okathi ene yoole, woonasa wene Yehova aammulevelela. Ohiya opaka eyo, Oziya “ahinanariwa vanjene”. Xeeni Oziya aakhoottale awe Miruku? Mwaha wookhala mwene, woonasa wene uupuwela wira aahikhalana etireitu yoopaka khula etthu aaphavela awe. Masi Yehova khaamweemererya opaka ele. Mwaha wa etthu yoohiloka aapanke awe, Oziya yaahimphwanya makuttula aahiiso maretta. Nto “ahikhala namakuttula mpakha okhwa wawe”. (2 Wah. 26:16-21) Ninniixuttihani ntakiheryo na Oziya? Etthu nniixutta ahu tiila: Naaphavelaka weemereriwa ni Yehova, nihikhootteke miruku sa mBiibiliyani, hata nirineene iparakha sinceene aahiiso nnaari.

8. Yobi oonenle sai okathi aavahiwe awe miruku?

⁸ Moovirikana ni matakiheryo oohiloka noonale ahu mpakha va, Biibiliya onnaalavula atthu yaatthuveliwe ni Yehova mwaha wooweemya miruku. Nkahaya muthokorerye ntakiheryo na Yobi. Owo aanimphenta vanceene Yehova, ni aaniphavela omusiveliha. Okathi samphwannye aya mixankiho sinceene, aahilavula itthu sikina soohiloka ohuupuwenle saana. Mwaha waivaavo, Yehova ni Elihu yaahinvaha miruku. Nto Yobi oonenle sai? Aahiiyeviha ni aaheemererya miruku iye. Aahimmye so: “Miyo kolavula kihisuwelaka . . . Tivó vanùliwaka muru n’itthu sothene sihimyalyaka: kottharuwa, kìyevihaka vantthupini ni vatturwani”. Yehova aahimutthuvela Yobi mwaha wa wiiyeviha wawe.—Yobi 42:3-6, 12-17.

9. Moise oonenle sai okathi aavahiwe awe miruku? Nave ntakiheryo xeeni onivanhe awe?

⁹ Moise, oovaha ntakiheryo nooloka na mutthu eemerenrye ottaruxiwa nuumala opaka etampi yuulupale. Nihiku nimosa Moise aahinanariwa mpakha oliyala onvuwiha Yehova. Mwaha wa etthu eyo yoohiloka aapanke awe, Yehova aahimuleela wira khaarowa okela Elapo Yooleiheriwa. (Moth. 20:1-13) Okathi Moise oonihenrye awe wira aahiriipiwa murima mwaha wa etthu Yehova aathanlale awe opaka, Yehova aamwaakhunle so: “Pahi vo! Muhikilavulihé-tho mwaha w’etthu ene yeeyo!” (Otum. 3:23-27) Hata vari siiso, Moise khaananariwe. Eyo yaahooniherya wira aaheemererya etthu Yehova aathanlale awe opaka. Tivonto Yehova khaamwaakhale muritti wookhala muhooleli a nloko na aisarayeli. (Otum. 4:1) Yobi ni Moise, aavaha ntakiheryo nooreera ninreerela ahu otthara okathi ninvahiwa ahu miruku. Yobi aahilokiherya moonelo awe, ni khootherenrye itthu sinceene wira iixaakihe paahi. Nave Moise aaheemererya miruku sa Yehova, ohihiyaka ororomeleya hata okathi aahiihiwe awe ovara muteko waamusivela vanceene.

10. (a) Ntoko onihimya awe Miruku 4:10-13, xeeni vari aya vooloka weemererya miruku? (b) Anna akina yoonenle sai okathi yaavahiwe aya miruku?

¹⁰ Okathi nintthara ahu matakiheryo a arumeyi awo oororomeleya a khalai, ntoko Moise ni Yobi, ninniphwanya mureerelo. (Musome Miruku 4:10-13.) Anna anceene ni arokora anneemererya ovahiwa miruku. Nrowe niwehe etthu yaamwiiranenle munna mmosa oniitthaniwa Emmanuel, onikhala oCongo. Ohimmye so: “Anna oororomeleya a muloko ahu, yaahoona wira ompatthani aka ni Yehova khiwaakhanle saana, ni yaahikikhaliherya. Kaahitthara miruku yaakivanhe aya. Eyo yaahikikhaliherya ohiphwanya mixankiho sinceene”. * Olavulaka sa ovahiwa miruku, pioneera mmosa a oCanadá oniitthaniwa Megan, ohimmye so: “Khahiyo ti etthu eniphavela aka wiiwa okathi wootheene, masi hata vari siiso kihaana ovahiwa miruku”. Nave munna mmosa onikhala oCroácia oniitthaniwa Marko, ohimmye so: “Khalai kaahiyeleela iparakha saka mmulokoni. Okathi kinuupuwelaka itthu saakhumelenle, kinniweha wira miruku kaavahiwe aka saahikikhaliherya olipiha opatthani aka ni Yehova”.

11. Etthu xeeni munna Karl Klein aalavunle awe voohimya sa weemererya miruku?

¹¹ Ntakiheryo nikina na mutthu eemerenrye miruku ni aaphwanye mureerelo, ti na munna Karl Klein, yoowo aari a Nikhuuru Noolamulela. Okathi munna Klein aatthokiherya awe yowiiraneya ya mweekumini mwawe, aahimmye wira mukwaha mmosa, aahivahiwa miruku ni munna Joseph F. Rutherford yoowo aari mpatthani awe. Woopaceryani miruku iye khisaamusivenle munna Klein. Yena onitthokiherya so: “Mukwaha mukina kaakumanne aka ni munna Rutherford, aahikilavuliha ohimyaka so: ‘Ehaali Karl?’ Masi okhala wira miruku aakivanhe  awe khisaareere okiwereya, kaamwaakhunle kivolonle ene. Owo aahihimya wira: ‘Phoole munna Karl! Diabo ori ottuli wanyu!’ Kaahoona ehaaya ni kaahaakhula so: ‘Nkinyonyiwe mwaha wa nyuwo’. Munna Rutherford aanisuwela itthu sinceene, nto aahikilopola-tho ohimyaka so: ‘Vaareera. Masi mwiikasoopeke. Diabo ori ottuli wanyu munna’. Tthiri munna ole aahimya ekeekhai! Okathi ninnanariwa ahu ni munna mwaha wa etthu onilenle awe, masi aarina awe etireitu yoohimya . . . , ti vookhweya omorela vantaphani va Diabo”. * (aEef. 4:25-27) Munna Klein aaheemererya miruku aavahiwe awe ni munna Rutherford, ni opatthani aya khiwaamanle.

12. Exeeni enrowa onikhaliherya weemererya miruku? (Esalimo 141:5)

¹² Exeeni enrowa onikhaliherya weemererya miruku? Nihaana okhala oowiiyeviha ni ohiliyala wira na atthu oottheka, ni wira ikwaha sikina ninnipaka itthu soohiloka. Ntoko niwenhe ahu, Yobi aahikhalana moonelo woohiloka. Masi aahilokiherya muupuwelo awe, nave Yehova aahimureeliha. Mwaha wa xeeni? Mwaha woowi Yobi aari mutthu oowiiyeviha. Eyo yaahooneya okathi eemerenrye miruku sa Elihu, hata Elihu aari mmiravo onvikana yena. (Yobi 32:6, 7) Wiiyeviha onoonikhaliherya weemererya miruku, hata nuupuwelaka wira khinaaphwanela ovahiwa miruku iyo aahiiso nivahiwe ene ni mutthu orina iyaakha vakhaani onivikana hiyo. Mutokweene mmosa a oCanadá, ohimmye so: “Sookhala itthu sikina siniiraneya mookumini mwahu nihinwerya ahu oweha, masi sinooniwa ni atthu akina. Nto ninrowa owerya sai olokiherya itthu iyo?” Khivanikhweya olokiherya mweettelo ahu, vakhala wira khuuvo mutthu onnivaha miruku. Ekeekhai wira khula mmosa a hiyo ookhalana etthu enreerela awe olokiherya. Ntoko makristau, vannireerela wiimananiha wira nooniheryeke mikhalelo sooreera sinikumiheriwa ni munepa woowaarya. Nave nihaana osuwela olaleerya ni wiixuttiha ihapari sooreera.—Musome Esalimo 141:5.

13. Nooneleke sai miruku ninvahiwa ahu?

¹³ Okathi munivahiwa anyu miruku, mooneke ntoko ophenta wa Muluku. Yehova omphavela oniphwanyiha mureerelo. (Mir. 4:20-22) Okathi onnivaha awe miruku orumeelaka nuulumo nawe, iliivuru sinimutthokiherya Biibiliya, ni munna aahiiso murokora a mmulokoni, eyo enooniherya wira onniniphenta. Yoolepa ya aHeeberi 12:9, 10 enihimya wira Yehova onnipaka eyo, “wira niphwanyeke mureerelo”.

14. Exeeni ninreerela ahu owehexexa okathi ninvahiwa ahu miruku?

¹⁴ Nweheke miruku, ohiya moota munivahiwa anyu miruku iyo. Ikwaha sikina hiyo pooti wuupuwela wira khanivahiwe miruku mwa enamuna yooreerela. Ekeekhai wira mutthu onvaha miruku  ohaana ovaha mwa enamuna yooreerela. * (aGal. 6:1) Masi ankhi akhala wira hiyo ti ninvahiwa miruku iyo? Akhala wira ti hiyo, nihaana owehexexa etthu sinniixuttiha aya, ni ohuupuwela etthu yaakhanle opakiwa wira nivahiwe saana. Niikoheke so: ‘Hata ehikisivenle enamuna kivahiwe aka, masi kiireke etthu ehimmwale ekeekhai? Kiireke owehexexa itthu soohiloka munna ole otonko awe opaka khalai, onookikhaliherya wiixutta etthu ni miruku onkivaha awe?’ Vakhala wira nnimooniherya wira na atthu a ankhili, nnimwiixutta itthu sooreera ni miruku ninvahiwa ahu.—Mir. 15:31.

15. Xeeni vari aya vooloka oveka miruku?

¹⁵ Biibiliya onninitumererya oveka miruku. Miruku 13:10 onihimya so: “Ankhili annaholela ale anvekela miruku”. Tthiri eyo ekeekhai! Okhala wene atthu anveka miruku, annipaka soothanla sooreera. Nave annilipiha opatthani aya ni Yehova, waavikana ale ahinveka miruku. Tivonto, nvekeleke miruku.

16. Woonasa wene okathi xeeni nikhanle ahu ooveka miruku?

¹⁶ Woonasa wene okathi xeeni nikhanle ahu onvekela miruku mukristau mukina? Nrowe nthokorerye matakiheryo vakhaani. (1) Murokora mmosa onninvekela murokora mukina opacenrye khalai olaleerya wira omuhoole iirihe yoosoma awe ya Biibiliya. Nuumala-vo, murokora ole onnimukoha ole aamuhonle etthu okhanle awe oopaka wira okhale mutthu oosuwela wiixuttiha. (2) Murokora mmosa oohitheliwa orina iyaakha vakhaani, onninvekela miruku murokora mukina oowunnuwa, wira omukhaliherye oweha ikuwo xeeni okhanle awe oothuma. (3) Munna mmosa oothanleliwa olavula mwaha awe woopacerya mmulokoni. Nto onninvekela munna mukina oosuwela olavula myaha wira owiriyane ni ephoole etthu olokihenrye awe. Nuumala-vo, munna owo onninvekela munna ole oosuwela olavula myaha wira omukhaliherye olokiherya saana mwaha awe wira okhale woovara murima. Hata anna anilavula myaha mwa iyaakha sinceene, annireerela waavekela miruku anna akina apacenrye khalai. Eyo enimwaakhaliherya oweha moota akhanle aya oolokiherya enamuna aya yoowiixuttiha.

17. Exeeni ninreerela ahu opaka okathi ninvahiwa ahu miruku?

¹⁷ Vanapisaru, nnoovahiwa miruku. Akhala wira eyo enimwiiraneya, mmananiheke wuupuwela itthu niixuntte ahu mwaha ola. Mwiiyeviheke. Nwehexexeke miruku iyo, ohiya moota sivahiwe aya. Nuumala-vo mweemereryeke. Khuuvo mutthu oyariwe osuwelaka itthu sootheene. Hata vari siiso, Biibiliya onihimya wira, akhala wira ‘nnoowiriyana miruku’ ni weemererya itthu ‘siniixuttiha aya, nnokhala asuweli’.—Mir. 19:20.