1-2. (a) Exeeni enrowa oniiraneela vakhala wiira nnimuupuwelela miteko ni okumi wa Yesu? (b) Exeeni ninrowa ahu othokorerya mwaha ola?

 OKATHI onikhwa awe ole nnimphenta ahu, hiyo ninninkheliwa vanceene ni mutthu owo! Wanipacerya, hiyo pooti oriipiwa murima mwaha wookhweliwa mmusi ahu, otepexa wene vakhala wiira aahiwereiwa vanceene ohinatthi okhwa. Masi vakhaani-vakhaani hiyo pooti otthikelaka otteeliwa murima, okathi nnuupuwela ahu itthu sooreera aahimmye awe ni aapanke awe wiira onilipihe.

² Moolikanasa, hiyo ninniriipiwa murima okathi ninsoma ahu sa moota Yesu aahaawale awe ni okhwa wawe. Okathi wa wuupuwelela, hiyo nnimwiira saana wuupuwelela ele entaphulela aya mukuttho wa Yesu. (1 aKor. 11:24, 25) Masi wuupuwelela itthu Yesu opanke awe ni ohimmye awe okathi aari awe valaponi, sinoonikhaliherya ophwanya ohakalala wuulupale. Nave-tho eyo ennintumererya wuupuwelela itthu onipaka awe nenna-va ni iye onrowa awe opaka muhoolo. Wuupuwelela itthu iyo ni niphento nawe, enooniiriha wooniherya oxukhurela wahu ni miteko, ntoko ninrowa ahu othokorerya mwaha ola.

3. Exeeni enniiriha oxukhurela mukuttho wa Yesu?

³ Ninnixukhurela okathi nnuupuwela ahu okumi ni okhwa wa Yesu. Okathi aari awe valaponi, Yesu aahiwiixuttiha atthu mareeliho Omwene wa Muluku waarowa aya oruuha. Nto ninnixukhurela vanceene mwaha woowiixutta ikeekhai iyo sa Omwene. Nave-tho, ninnixukhurela mukuttho ovanhe awe okhala wiira onniniiriha okhalana waataana wooloka ni Yehova vamosa ni Yesu. Ale anooniherya omwaamini Yesu, aakhalana nlipelelo na okhala mahiku ootheene ni otthikela waaweha  amusi aya yaakhwiiye. (Yoh. 5:28, 29; aRom. 6:23) Hiyo khanimphwanela waakhela mareeliho awo ni khaninwerya omuliva Muluku vamosa ni Kristu mwaha wa itthu anipakenle aya. (aRom. 5:8, 20, 21) Masi hata vari siiso, nnoowerya wooniherya oxukhurela wahu. Moota xeeni?

4. Moota xeeni Maria Madalena aamuxukhurenle awe Yesu? (Nwehe elatarato.)

⁴ Nrowe nthokorerye ntakiheryo na muthiyana mmosa muyuda iitthaniwa Maria Madalena. Owo anihaawa vanceene mwaha wa malaikha ootakhala 7 yaamuhaaxa. Nto woonasa wene, uupuwela wiira khuuvo aarowa omukhaliherya ni muxankiho awe ole. Munniwerya wuupuwelela moota Maria Madalena aamuxukhurenle awe Yesu, nuumala woomola malaikha ale 7 ootakhala! Owo aahooniherya oxukhurela wawe, okhalaka mutthareli a Yesu, orumeelaka okathi awe, ikuru sawe, ni mireerelo sawe wiira omukhaliherye Yesu ni muteko woolaleerya. (Luka 8:1-3) Nnaamwi Maria Madalena aamuxukhurenle vanceene Yesu, woonasa wene, owo khaasuwela wiira aamutthuveliwa muhoolo. Nave khaasuwela wiira Yesu aamuleva okumi awe wa mureerelo wa atthu ootheene, “wira ootheene ale anooniherya omwaamini yoowo” aphwanye okumi woohimala. (Yoh. 3:16) Nlelo, Maria Madalena aahooniherya omuxukhurela wawe Yesu okhalaka oororomeleya. Okathi Yesu aakhomeliwe awe vamwirini va nihaaxeryo, Maria Madalena aahimwaattamela okhala wiira aanimuthokorerya ni aaphavela waamaaliha atthu akina. (Yoh. 19:25) Nuumala Yesu okhwa, Maria Madalena ni athiyana anli, yaahiruuha makhura oowunkhela wiira ottikittheliwe murutthu wa Yesu. (Mar. 16:1, 2) Maria aahireelihiwa vanceene, mwaha woohihiya okhala oororomeleya. Maana aahikhalana eparakha yootthikela onweha ni olavulana Yesu nuumala ohihimuxiwa, eyo yaari eparakha yuulupale awiixutti akina yahaarina aya. — Yoh. 20:11-18.

5. Ninrowa wooniherya sai oxukhurela wahu ele Yehova ni Yesu anipakenle aya?

 ⁵ Nave hiyo nnoowerya wooniherya omuxukhurela wahu Yehova vamosa ni Yesu nrumeelaka okathi ahu, ikuru sahu ni mireerelo sahu wiira nikhaliherye miteko sa Omwene. Mwa ntakiheryo, hiyo pooti wiivahererya wiira nikhaliherye muteko wooteka ni olokiheriwa Ipa sa Omwene.

6. Xeeni ninhimya ahu wiira mukuttho wowoopola yoovaha ya khula mutthu?

⁶ Okathi ninthokorerya ahu moota Yehova ni Yesu aniphentale aya, eyo enniniiriha ni hiyo waaphenta. (1 Yoh. 4:10, 19) Nave waaphenta wahu onnitepa olipa, mwaha woosuwela wiira Yesu okhwiiye mwaha wa mureerelo ahu. Nave-tho murummwa Paulo aahooniherya oxukhurela wawe okathi aalepenle awe ekarta agalasia. Owo aahimmye so: ‘Mwaana a Muluku, . . . ookiphenta ni oovahererya okumi awe mwaha wa miyo’. (aGal. 2:20) Mwaha wa mukuttho wowoopola wa Yesu, Yehova onninaattamela wiira nikhale apatthani awe. (Yoh. 6:44) Tthiri ninnimuxukhurela vanceene Yehova, mwaha woowi ooliva esisapo yuulupale wiira nikhale apatthani awe. Nto eyo ennilipiha omphenta wahu Yehova ni Yesu. Masi niikoheke so: ‘Niphento na Yehova ni Yesu nikiiriheke opaka exeeni?’

7. Moovarihana ni efootu, ninrowa wooniherya sai omphenta wahu Yehova ni Yesu? (2 aKorinto 5:14, 15; 6:1, 2.)

⁷ Omphenta wahu Yehova ni Yesu, onniniiriha waaphenta atthu akina. (Mmusome 2 aKorinto 5:14, 15; 6:1, 2.) Enamuna emosa nikhanle ahu owooniherya ophenta wahu, ori oluttuweliwa muteko woolaleerya. Hiyo ninnaalaleerya atthu ootheene nnaaphwanya ahu, nihithanlaka eraasa aya, nloko naya, yaari oothaaciri aahiiso oohaawa, wala elapo anikhuma  aya. Mwa enamuna emosaru, hiyo ninvara muteko moovarihana ni yoolakela ya Yehova “yoowo oniphavela wira atthu a makhalelo ootheene yoopowe, ni akhalane osuwela weekeekhai”. — 1 Tim. 2:4.

8. Ninrowa wooniherya sai wiira ninnaaphenta anna ni arokora?

⁸ Ninnooniherya omphenta wahu Muluku ni Kristu naaphentaka anna ni arokora. (1 Yoh. 4:21) Nave ninnooniherya wiira ninnaathokorerya anna awo naakhaliheryaka okathi wa mixankiho. Ninnaamaaliha okathi anikhweliwa aya, ninnaaxukurya okathi aniwereiwa aya nave ninnipaka sootheene ninwerya ahu wiira naalipihe okathi aniriipiwa aya murima. (2 aKor. 1:3-7; 1 aTes. 5:11, 14) Masi-tho ninnaavekelela maana ninnisuwela wiira “mavekelo ooxonttela a naxariya, aakhalana owerya wuulupale”. — Yak. 5:16.

9. Enamuna xeeni ekina nikhanle ahu owooniherya wiira ninnaaphenta anna ni arokora?

⁹ Enamuna ekina nnooniherya ahu waaphenta wahu anna ni arokora, ori okhaliha murettele naawo. Nave hiyo ninnitthara ntakiheryo na Yehova, naalevelelaka atthu akina. Vakhala wiira Yehova aahimuleva Mwanawe wiira okhwe mwaha wa itampi sahu, niireke khanikhanle oowaalevelela anna ni arokora okathi annitthekela aya? Hiyo khanimphavela okhala ntoko epottha eniromoliwa nlikanyiho na Yesu. Nnaamwi pwiya awe aawenrye omulevelela musurukhu munceene aalokiha awe, epottha yootakhala khiyaawenrye omulevelela mukhwaawe musurukhu vakhaani aamulokiha awe. (Math. 18:23-35) Vakhala wiira ookhala munna oonyoonyinheni mmulokoni, niireke munoowerya opacerya okhaliha murettele nuuwo nihinatthi ophiya nihiku na Wuupuwelela? (Math. 5:23, 24) Nto mwapaka eyo, munimooniherya wiira munnimphenta vanceene Yehova ni Yesu.

10-11. Axitokweene anrowa wooniherya sai omphenta waya Yehova ni Yesu? (1 Pedru 5:1, 2.)

¹⁰ Axitokweene anrowa wooniherya sai wiira annimphenta Yehova ni Yesu? Enamuna emosa ori okhapelela saana ipwittipwitthi sa Yesu. (Mmusome 1 Pedru 5:1, 2.) Yesu aahiiwanyeiha eyo okathi aalavula awe ni murummwa Pedru. Nuumala omukhootta Yesu ikwaha tthaaru, Pedru aahilakela wooniherya wiira aanimphenta Yesu. Nuumala Yesu ohihimuxiwa aahimukoha wiira: “Nyuwo Simoni, mwaana a Yohani, munnikiphenta?” Nikupaliki wiira Pedru ampaka sootheene aawerya awe wiira ooniherye omphenta wawe Pwiya awe. Nto Yesu aahimuleela Pedru wiira: “Mukukhuleke ipwittipwitthi saka”. (Yoh. 21:15-17) Pedru ooniheryaka omphenta wawe, owo aahikhapelela ipwittipwitthi sa Yesu okumi awe wootheene.

¹¹ Axitokweene, munrowa wooniherya sai wiira moolumo Yesu aamulenle awe Pedru ta faita, nihinatthi opakiwa niira na Wuupuwelela aahiiso nuuvira? Nyuwo munoowerya wooniherya omphenta wanyu Yehova ni Yesu mukukhulaka ipwittipwitthi, aahiiso waalipiha anna ni arokora ni mwaakhaliheryaka ale ahiyale orowela mithukumano. (Ezek. 34:11, 12) Enamuna ekina ori waatumererya ale animusoma Biibiliya ni ale anisiveliwa ekeekhai, orwa oweha muthukumano wa Wuupuwelela. Nto nimphavela wiira awo yooneke wiira annaakheliwa saana. Maana woonasa wene awo pooti okhala atthareli a Kristu.

12. Xeeni wuupuwelela moolumo Yesu aalavunle awe ohinatthi okhwa onnilipiha aya? (Yohani 16:32, 33.)

¹² Ohiyu omosa Yesu ohinatthi okhwa, aahaaleela awiixutti awe wiira: “Nyuwo munookhalana maxakha moolumwenkuni-mu, masi, mulipihe murima! Miyo kooxintta  olumwenku”. (Mmusome Yohani 16:32, 33.) Exeeni yaamukhalihenrye Yesu okhala oolipa murima ni oororomeleya mpakha okhwa, hata oopopihiwa ni awanani awe? Okhala wiira owo aanimuroromela Yehova. Mwaha woosuwela wiira awiixutti awe yaanikumana mixankiho simosaru, Yesu aahinvekela Yehova wiira aakhapelele awiixutti awe. (Yoh. 17:11) Xeeni osuwela eyo onnilipiha aya? Okhala wiira Yehova ookhalana owerya waavikana awanani ahu. (1 Yoh. 4:4) Yehova onniweha itthu sootheene. Nto nikupali wiira, namuroromela Yehova nnoowerya oxintta woova ni okhala oolipa murima.

13. Yosefe a wArimathaya oonihenrye sai olipa murima?

¹³ Nrowe nithokorerye ntakiheryo na Yosefe a wArimathaya. Owo aari mutthu oottittimihiwa vanceene ni ayuda akina. Yosefe iirela mpantta etribunaali ya etiini ya eyuda, nave aari mphuki muulupale. Masi owo khoonihenrye olipa murima, okathi wa muteko woolaleerya wa Yesu valaponi. Yohani aahimmye wiira Yosefe “aari mwiixutti awe Yesu, masi moohisuweliwa, okhala wiira aaniwoova ayuda”. (Yoh. 19:38) Nnaamwi Yosefe aamwaamini Yesu, masi owo khaaphavela wiira atthu akina asuwele eyo. Woonasa wene, Yosefe oova waakhiwa iparakha sawe ni ayuda. Biibiliya onihimya wiira nuumala Yesu okhwa, Yosefe a wArimathaya “aahilipa murima onarowa okumana ni Pilato, onvekela murutthu wa Yesu”. (Mar. 15:42, 43) Yosefe khaawerya-tho wiipithiha wiira vano ari mutthareli a Kristu.

14. Exeeni mukhanle anyu oopaka akhala wiira munniwoova atthu?

¹⁴ Niireke nyuwo munniwoova atthu sintoko Yosefe? Niireke ikwaha sikina munnoovelela waaleela ale munvarana anyu muteko aahiiso munisomana anyu oxikola wiira mwa Namoona a Yehova? Munnoovelela okhala namalaleerya aahiiso opatisiwa muupuwelaka moota atthu akina anrowa aya owoonelakani? Muheemererye miyuupuwelo iyo soohiihakani opaka itthu munoona anyu wiira ti sooloka. Mmuxontteleke Yehova. Munvekeleke wiira oovaheeni olipa murima wiira nwerye opaka yootthuna awe. Nto okathi munrowa anyu owehaka moota Yehova onaakhula awe mavekelo anyu, munootepaka olipa murima. — Yes. 41:10, 13.

15. Nuumala Yesu waakhumelela awiixutti awe, eyo yaawiirinhe opaka exeeni? (Luka 24:52, 53.)

¹⁵ Awiixutti yaahiriipiwa murima vanceene nuumala Yesu okhwa. Nkahaya muupuwele muryeene nyuwo. Ohiya paahi okhweliwa  mpatthani yamphenta aya, masi-tho yaakhala ntoko wiira khiyaarina nlipelelo. (Luka 24:17-21) Nuumala Yesu ohihimuxiwa, aahiviriha okathi aakhaliheryaka awiixutti awe wiiwexexa moota aamalelinhe awe iprofesia sa mbiibiliyani. Nave owo aahaavaha muteko wa faita awiixutti awe. (Luka 24:26, 27, 45-48) Okathi Yesu aatthikenle awe wiirimu nuuvira mahiku 40, awiixutti awe yaahitthikela otteeliwa murima. Okhala wiira yaahisuwela wiira pwiya aya aari mukumi ni aari oolikaneene wiira aakhaliherye omaleliha muteko aya. Nave ohakalala waya waahiwiiriha ohihiya omurumeela Yehova. — Mmusome Luka 24:52, 53; Mit. 5:42.

16. Ninrowa waatakiha sai atthareli a Yesu?

¹⁶ Ninrowa waatakiha sai awiixutti a Yesu? Nnoowerya ophwanya ohakalala muteko nninvarela ahu Yehova ohiya paahi okathi wa wuupuwelela, masi eyaakha yootheene. Eyo entaphulela wiira, nihaana ohela nipuro noopacerya Omwene wa Muluku mookumini mwahu. Mwa ntakiheryo, anna anceene aavekela ovukuliwa miteko omutekoni waya wiira aweryeke orowa olaleerya, orowela mithukumano, ni wiira aweryeke omulompa Muluku ni emusi aya. Anna akina aaleva mireerelo seiyo atthu akina anoona aya okhala sa faita, wiira yakhaliheryeke mmulokoni aahiiso yarumeeleke mapuro oothowa anamalaleerya. Nnaamwi nireerelaka ovilela wiira nihihiye omurumeela Yehova, owo onnileiherya onireeliha akhala wiira nnoohela nipuro noopacerya Omwene awe mookumini mwahu. — Mir. 10:22; Math. 6:32, 33.

17. Exeeni mulakenle anyu oopaka okathi wa wuupuwelela? (Nwehe efootu.)

¹⁷ Tthiri ninnilipelela orowa muthukumano wa wuupuwelela okhwa wa Yesu, yoowo onrowa okhala Namanli 4 a Abril. Masi, nihilipelele ophiya okathi owo wiira nuupuweleleke okumi, okhwa ni niphento Yesu ni Yehova annooniherya aya. Nviriheke okathi musomaka aahiiso wuupuwelela itthu iyo, ohinatthi aahiiso nuumala muthukumano wa Wuupuwelela. Mwa ntakiheryo, nyuwo pooti oviriha okathi wiira musome ni wuupuwelela soowiiraneya sa okumi wa Yesu siri ekaaxa eni: “Munrowa Wiilokiherya Sai Okathi wa Wuupuwelela” eri Ekaderno Enirumeeliwa Omuthukumanoni ya 2019 mweeri wa Abril epaaxina 4. Okathi munrowa anyu osomaka myaha voohimya sa Yesu, nweheke moota eyo enrowa aya wookhaliheryani okhala ooxukhuru, oophenta, oolipa murima, ni oohakalala. Nweheke moota mukhanle anyu oowooniherya oxukhurela wanyu. Tthiri mukupaliki wiira Yesu onoorowa ovaha efaita khula etthu munrowa anyu opaka wiira muupuwelele nihiku nno. — Wiis. 2:19.