MWAHA ONITHOKORERIWA 4
Yehova Onnireeliha Wiimananiha Wahu Okathi wa Wuupuwelela
“Muthipeleleke opaka ela mukuupuwelaka miyo”. — LUKA 22:19.
NSIPO 19 Yoolya ya Ohiyu ya Apwiya
ELE NINROWA AHU WIIXUTTA a
1-2. Xeeni ninrowela ahu muthukumano wa wuupuwelela khula mwaakha?
IYAAKHA 2.000 sivinre, Yesu aahivaha okumi awe wiira niphwanye okumi woohimala. Ohiyu omosa ohinatthi okhwa, Yesu aahaaruma awiixutti awe wiira yahaana wuupuwelela okhwa wawe apakaka niira noohattiheriwa itthu ninhela muhina ephaawu ni eviinyu. — 1 aKor. 11:23-26.
2 Hiyo ninnimwiiwelela Yesu maana ninnimphenta vanceene. (Yoh. 14:15) Khula mwaakha nihinatthi ophiya nihiku nlo wala nuuvira, ninnooniherya omuxukhurela wahu Yesu nivirihaka okathi wiira nivekele ni wuupuwelela ele enitaphulela aya okhwa wa Yesu. Nave ninnihakalala okathi nniimananiha ahu wiira nilaleerye ni waalattula atthu anceene wiira arwe awehe muthukumano owo. Tthiri niheemererye wiira itthu sikina sinikhoottiherye orowa nihiku nlo na Wuupuwelela.
3. Exeeni ninrowa ahu othokorerya mwaha ola?
3 Mwaha ola, nnoothokorerya itthu tthaaru siniwiiriha arumeyi a Yehova wiimananihaka orowa wuupuwelela okhwa wa Yesu. (1) Otthara malakiheryo a Yesu a moota wowuupuwelela, (2) waalattula atthu akina wiira yuupuwelele, ni (3) wiimananiha orowa muthukumano owo hata arina ene mixankiho.
OTTHARA MALAKIHERYO A YESU A MOOTA WOOWUUPUWELELA
4. Itthu xeeni nnuupuxeriwa ahu khula mwaakha okathi wa Wuupuwelela, ni xeeni vari aya wa faita osuwela ikeekhai iyo? (Luka 22:19, 20.)
4 Khula mwaakha okathi wa Wuupuwelela, ninniwiriyana mwaha onikhuma mbiibiliyani yoowo onaakhula makoho manceene sa okhwa wa Yesu. Nave ninniixutta efaita erina aya yowoopola ni moota okhwa wa mutthu mmosa paahi oniliverya aya itampi sa atthu anceene. Nave-tho, ninnuupuxeriwa ele entaphulela aya ephaawu ni eviinyu ni atthu anireerela owurya eviinyu aahiiso okhuura ephaawu. (Mmusome Luka 22:19, 20.) Ohiya-vo, ninnuupuwela mareeliho anrowa aya waakhela atthu yaale anrowa okhalaka valaponi. (Yes. 35:5, 6; 65:17, 21-23) Hiyo khaninrowa ophwanya mareeliho awo mahala ene. Imilyau sinceene sa atthu, khansuwela ele entaphulela aya okhwa wa Yesu ni efaita orina aya mukuttho wowoopola wa Yesu. Nave awo khanuupuwelela okhwa wa Yesu ntoko aawiixuttinhe awe atthareli awe. Mwaha wa xeeni?
5. Nuumala okhwa arummwa ootheene, atthu akina yuupuwelela sai okhwa wa Yesu?
5 Nuumala atthareli a Yesu ootheene okhwa, atthu akina yoothererya okhala makristau, yaahiikeliha mmulokoni. (Math. 13:24-27, 37-39) Nave ale yaikelinhe mmulokoni ‘yaanivirikanya ekeekhai’. Atthu ‘awo yaanipaka eyo aphavelaka waahapuxa awiixutti wira yaatthareke’. (Mit. 20:29, 30) Etthu yoopacerya yaapaka aya wiira ‘avirikanyihe ekeekhai’, yiixuttiha wiira Yesu khaavanhe mukuttho awe wiira owoopole atthu “ekwaha emosa paahi”. Masi awo yiixuttiha wiira mukuttho wa Yesu waahaana ovahiwa ikwaha sinceene. (aHeeb. 9:27, 28) Atthu anceene ooreera murima olelo-va, annikupali soowiixuttiha iyo soowoothiwa. Nto annirowa okerexa khula esumana aahiiso khula nihiku, wiira yuupuwelele okhwa wa Yesu, yoowo aniitthana aya okhala “Eucaristia”. b Itiini sikina khasinuupuwelela ikwaha sinceene okhwa wa Yesu masi atthu anceene aniirela mpantta itiini iyo khanisuwela ele entaphulela aya mukuttho wa Yesu. Atthu akina anniikoha so: ‘Niireke okhwa wa Yesu onnilevelela itampi sahu tthiri?’ Exeeni eniwiiriha atthu awo wiikohaka siiso? Mwaha woowi, awo anitthara miyuupuwelo sa atthu ahinikupali wiira mukuttho wa Yesu tthiri onnilevelela itampi sahu. Atthareli eekeekhai a Yesu yaahiwiixuttiha atthu akina ele entaphulela aya mukuttho wa Yesu ni moota wowuupuwelela mukuttho owo.
6. Mwaakha wa 1872, etthu xeeni yaiwexenxe aya alipa-oomusoma Biibiliya?
6 Mwaakha wa 1870, ekhurupu emosa ya anamasoma a Biibiliya, yaahooleliwa ni munna Charles Taze Russell, yaahipacerya otokosa soolepa sa mbiibiliyani. Awo yaaphavela osuwela ekeekhai voohimya sa efaita orina aya mukuttho wa Yesu ni moota yaarowa aya wuupuwelelaka. Nto mwaakha wa 1872, anamasoma awo a Biibiliya yaahiiwexexa wiira Yesu aahivaha mukuttho awe wiira owoopole atthu ootheene. Awo khahiyo yaaroosuwela paahi, masi yaanaaleela atthu akina arumeelaka iliivuru, irevista, ni ixornaale. Yaatakihaka makristau a okathi wa arummwa, awo yaahipacerya wuupuwelela okhwa wa Yesu ekwaha emosa vamwaakhani.
7. Itthu yiixuntte aya anamasoma a Biibiliya sinniphwanyiha mureerelo xeeni?
7 Itthu yiixuntta aya makristau ale, hiyo ninnittottela mureerelo olelo-va. Moota xeeni? Nireelihiwaka ni Yehova, ninnisuwela ekeekhai sa mukuttho wa Yesu ni mureerelo onrowa aya waaphwanyiha apinaatamu ootheene valaponi. (1 Yoh. 2:1, 2) Nihiixutta mbiibiliyani wiira atthu 144.000 anrowa okhalaka moohimala wiirimu, nave atthu imilyau sinceene anrowa okhalaka moohimala valaponi. Vaavo nnoona ahu moota Yehova onniphenta awe ni efaita orina aya mukuttho wa Yesu, waataana wahu ni Yehova onnilipa. (1 Ped. 3:18; 1 Yoh. 4:9) Naatakihaka anna oororomeleya a khalai, hiyo olelo-va ninnaalattula atthu anceene wiira yawehe muthukumano owo wa wuupuwelela moovarihana ni malakiheryo a Yesu.
NAALATTULEKE AKINA WIIRA ARWEELE WUUPUWELELA
Etthu xeeni mukhanle anyu oopaka wiira muncererye muteko anyu woolaleerya okathi wa ekampaanya ya wuupuwelela? (Nwehe ittima 8-10) e
8. Etthu xeeni arumeyi a Yehova anipaka aya wiira yaalattule atthu akina orowa Wuupuwelela? (Nwehe efootu.)
8 Okhuma khalai, arumeyi a Yehova annaalattula atthu anceene wiira arweele wuupuwelela. Mwaakha wa 1881, anna ni arokora a wEstados Unidos, yaahilattuliwa wiira yuupuwelele okhwa wa Yesu empa ya munna aakhala epooma ya wAllegheny, oPensilvânia. Muhoolo mwaya, khula munna aanuupuwelela niira nlo muloko awe. Março a 1940, anamalaleerya yaahitumereriwa waalattula atthu ootheene a muttetthe aya yaarowa wooniheryaka osiveliwa ekeekhai. Mwaakha wa 1960, eBetheli yaahipacerya oroiha malattulo oowimpirimiriwa mmilokoni. Okhuma vaavale ibilyau sinceene sa malattulo oowimpirimiriwa annikaiwa. Masi exeeni enniiriha oluttuweliwaka vanceene waalattula atthu akina?
9-10. Tani anittottela mureerelo okathi nnaalattula ahu atthu orweela wuupuwelela? (Yohani 3:16.)
9 Etthu yuulupale enniiriha waalattulaka atthu akina orowa wuupuwelela, mwaha woowi nimphavela wiira awo arwe ekwaha yoopacerya ni yiixutte ekeekhai sa ele Yehova ni Yesu apanke aya mmureerelo ahu. (Mmusome Yohani 3:16.) Ninnilipelela wiira atthu awo animwiixutta itthu sinceene ni omurumeela Yehova, okathi anrowa aya owehaka ni owiriyanaka muthukumano wa wuupuwelela. Nave aakhala mareeliho makina.
10 Ninnaalattula ale ahiyale omurumeela Yehova. Ninnipaka eyo, wiira niwuupuxerye wiira Yehova nlelo onnaaphenta. Anamunceene anneemererya nlattulo nahu nave ninnihakalala vanceene okathi nnaweha ahu arwaaka mmuthukumanoni. Nave okathi anrweela aya muthukumano owo, annuupuwelela ohakalala yaarina aya okathi yaamurumeela aya Yehova. Nrowe nithokorerye ntakiheryo na murokora Mônica. c Yoowo aatthikenle olaleerya okathi wa Coronavírus. Nuumala orowela muthukumano wa wuupuwelela mwaakha wa 2021, owo ohimmye so: “Muthukumano ola khiwaareere oreera. Saahivira iyaakha 20 kihiyale ene olaleerya. Nto otthikela olaleerya ni waalattula atthu orowela muthukumano wa Wuupuwelela, waahikihakalaliha vanceene. Kaahiimananiha waalattula atthu maana kinnixukhurela vanceene etthu Yehova ni Yesu akiirenle aya”. (Esal. 103:1-4) Hata atthu anceene yeemereryaka aahiiso akina aheemereryaka, hiyo khannihiya waalattula atthu maana ninnisuwela wiira Yehova onnivaha efaita wiimananiha wahu.
11. Yehova onireeliha sai wiimananiha wahu wiira naalattule atthu arweele wuupuwelela? (Hagayo 2:7.)
11 Yehova onnireeliha wiimananiha wahu wiira naalattule atthu anceene orweela wuupuwelela. Mwaakha wa 2021, nnaamwi waari okathi wa Coronavírus, atthu yaarwenle muthukumano wa wuupuwelela yaari imilyau 21.367.603. Eyo entaphulela wiira nummuru nno ti noowaatta ovikana nummuru na Anamoona a Yehova olumwenku wootheene. Yehova khonivaha efaita paahi mwaattelo wa atthu anirweela muthukumano owo, masi etthu onivaha awe efaita wiimananiha wa khula mutthu onirweela muthukumano owo. (Luka 15:7; 1 Tim. 2: 3, 4) Nto nihiliyale wiira okathi nnaalattula ahu atthu awo, Yehova onninikhaliherya waaphwanya atthu arina murima wooloka. — Mmusome Hagayo 2:7.
ORWEELA WUUPUWELELA HATA OKATHI WA MIXANKIHO
Yehova onnireeliha wiimananiha wahu wiira nawehe muthukumano wa wuupuwelela (Nwehe ettima 12) f
12. Mixankiho xeeni sikhanle ooniiriha ohiwerya orowa wuupuwelela okhwa wa Yesu? (Nwehe efootu.)
12 Yesu aahihimya wiira mahiku ookiserya, naamukhalanaka mixankiho sinceene, ntoko onyokhiwa ni amusi, olupatthiwa, ikhotto, ikwerere ni itthu sikina. (Math. 10:36; Mar. 13:9; Luka 21:10, 11) Ikwaha sikina mixankiho iyo pooti oniirihaka ohiwerya orowa wuupuwelela okhwa wa Yesu. Exeeni anna ni arokora anipaka aya wiira axintte mixankiho iyo, nave Yehova onaakhaliherya sai?
13. Yehova aareelinhe sai olipa murima ni wiimananiha wa munna Artem wiira uupuwelele okathi aari awe mukhatteya?
13 Anna atthukweliwe mukhatteya. Anna atthukweliwe mukhatteya mwaha wa waamini waya, anniimananiha vanceene wiira awerye wuupuwelela okhwa wa Yesu. Nithokorerye ntakiheryo na munna Artem. Mwaakha wa 2020, nihinatthi ophiya nihiku na wuupuwelela, munna owo aahitthukweliwa vamosa ni apereso 5 ekhatteya yoophunyeya. Nnaamwi aatthukweliwe, owo aahiwerya ophwanya ithoonyeryo aarowa awe orumeela okathi wa wuupuwelela, ni aahiwerya olavula mwaha ori ene mukhatteya. Masi atthu ale aarina awe ekhatteya emosa yaanimpaha sikaro ni yaaniruwana vanceene. Exeeni aapanke awe? Owo aahaavekela wiira avirihe ewoora emosa paahi ahimpanhe sikaro ni ahiruwanne. Mootikiniha, awo yaahimwiiwelela. Artem onihimya so: “Okathi ene yoole kaahiivahererya wiira kaatthokiherye ele nintaphulela aya niira na Wuupuwelela”. Nnaamwi yaahimmye wiira khiyaarowa onwiriyana okathi aarowa awe opakaka niira na wuupuwelela, nuumala onweha ni onwiriyana okathi wa wuupuwelela, awo yaahimukoha ele yaataphulela aya itthu aapaka awe.
14. Mareheryo xeeni yaapakiwe wiira vaweryaneye owehiwa muthukumano wa wuupuwelela okathi wa Coronavírus?
14 Okathi wa Coronavírus. Mwaha wa Coronavírus, arumeyi a Yehova khiyaawenrye orowa oweha wuupuwelela Empa ya Omwene. Masi eyo khiyaanikhoottinhe Wuupuwelela okhwa wa Yesu. d Miloko seiye sirina internet, saahiwerya opaka muthukumano owo simurumeelaka video-conferência. Ankhi miloko iye sihirina internet? Ilapo sikina, anna yaahipaka mareheryo, wiira mwaha wa muthukumano owo owehiwe muTV aahiiso owiriyaniwe muraadioni. Nto ifiliyaali saahikaravari mwaha mattaava anivikana 500, wiira anna ale anikhala mapuro oorakamela aweryeke oweha muthukumano owo aahiiso owiriyana. Nto anna awo yaahipaka mareheryo wiira yaavahe ale yaakhala mapuro oorakamela ikaravasau iyo.
15. Ntakiheryo na naxikola a Biibiliya oniitthaniwa Sue ninwiixuttihani exeeni?
15 Olupatthiwa ni amusi. Atthu akina muxankiho muulupale anikhalana aya wiira awehe muthukumano wa Wuupuwelela, ori olupatthiwa ni amusi. Nrowe nthokorerye ntakiheryo na naxikola aamusoma Biibiliya oniitthaniwa Sue. Mwaakha wa 2021, nihinatthi ophiya nihiku na Wuupuwelela, mwaha woolupatthiwa Sue aahimuleela ole aamusomiha Biibiliya wiira khaarowa owerya ophwanyaneya okathi wa wuupuwelela. Ole aamusomiha Biibiliya aahimusoma Luka 22:44, ni yena. Nuumala-vo, owo aahimutthokiherya wiira okathi ninkumana ahu mixankiho, nihaana otthara ntakiheryo na Yesu ninvekelaka Yehova ni omuroromela ni murima ahu wootheene. Nihiku naattharelana Sue aahilokiherya ephaawu ni eviinyu ni aahiweha eprokrama ya Omulompa Muluku Voosiisu va jw.org. Ohiyu yoole owo aahirowa okwaartu wawe ni aahiweha muthukumano ole omurumeelaka telefoni awe. Nuumala-vo, Sue aahimuxukhurela ole aamusomiha Biibiliya ohimyaka so: “Nyuwo khimwaareere okilipiha nsana. Kaahipaka sootheene kaawerya aka wiira kiwiriyane muthukumano ole, nave Yehova aahikikhaliherya. Kinnihakalala vanceene ni kinnimuxukhurela Yehova!” Vakhala wiira muniwanana mixankiho simosa-ru, niireke munnimuroromela Yehova wiira onimookhaliheryani?
16. Exeeni ennikupaliha wiira Yehova onooreeliha wiimananiha wahu wiira nuupuwelele okhwa wa Yesu? (aRoma 8:31, 32.)
16 Yehova onniweha wiimananiha wahu wiira nuupuwelele okhwa wa Yesu. Vaavo ninvaha ahu efaita ele Yesu opanke awe, nikupaliki wiira Yehova onoonireeliha. (Mmusome aRoma 8:31, 32.) Nto nikhale oolikana ene wiira niwehe muthukumano wa wuupuwelela mwaakha ola ni opaka ele eniwerya ahu wiira nincererye miteko sinlipiha waataana wahu ni Yehova okathi wa wuupuwelela.
NSIPO 18 Ninnixukhurela Yowoopola
a Namanli, 4 a Abril 2023, atthu imilyau sinceene a olumwenku wootheene anrowa Wuupuwelela Okhwa wa Kristu. Anceene a yaawo anrowa ompaceryaka oweha muthukumano owo. Akina yaahiyale orowela muthukumano owo okhuma khalai, animoorwa wuupuwelela nihiku nlo. Nave akina anoorowa wiimananiha vanceene wiira aphwanyaneye muthukumano owo. Moohicikha makhalelo anyu aahiiso mixankiho sanyu, mukupaliki wiira Yehova onoohakalala vanceene oweha wiimananiha wanyu wiira mphwanyaneye nihiku nlo.
b Atthu aneettela etiini ya ekatoolika anikupali wiira nihiku na wuupuwelela, ephaawu ni eviinyu enthatuwa ephome ni erutthu ya Kristu. Nave awo anikupali wiira mukuttho wa Yesu onivahiwa khula okathi awo aniirela aya mpantta niira nlo.
c Masina makina aaturukiwa.
d Nwehe nave va jw.org myaha sini “Celebração de 2021”.
