NUULUMO noowi “ekaaro” nirumeeliwe Biibiliya a Elapo Esya a Soolempwa Soowaarya, pooti otaphulelaka ikaaro soovirikana. (Mit. 8:28, 29, 38) Vanikhala wiira, mulopwana ole a wEthiyopia awenle ekaaro yuulupale ovikana ikaaro sinirumeeliwa ni anakhotto. Nrowe nthokorerye itthu vakhaani, sinniiriha ohimya eyo.

Mulopwana owo a wEthiyopia ari mukhulupale nave aaheetta mukwaha woorakama. Owo ari “mukhulupale a ekuvernu ya pwiyamwene Kandasi a wEthiyopia, yoowo tho aasuka muhakhu wa pwiyamwene owo”. (Mit. 8:27) WEthiyopia wa khalai, waahela muhina elapo olelo-va enisuweliwa okhala oSudão, mpakha mpantta wa oSuuli wa elapo ya wExiitu. Nnaamwi mulopwana ole ahaawenle ekaaro emosa paahi okathi eetta awe mukwaha ole wootheene, woonasa wene, aanipirisari ekaaro yuulupale okhala wiira aahikuxa miritti sinceene. Ikaaro sikina saarumeeliwa mahiku opacerya Nuumala Kristu Orwa wiira saakuxeke atthu ni miritti saya, saahikhalana maroota maxexe ni seettihiwa ni ikhavalo. Eliivuru ya miteko, eniitthaniwa comentário exagético, enihimya so: “Ekaaro eyo, yaaniwerya okuxa miritti sinceene, yaanikhaliherya weetta saana mukwaha, ni woonasa wene, yaaneetta mukwaha woorakama”.

Mulopwana ole a wEthiyopia iira osomaka okathi Filipe aamwaattamela awe. Soolepa sinihimya wiira “Filipe aahitthimakela ekaaro ele eemela vakhiviru vaya, onamwiiwa mulopwana ole osomaka voowiiwanyeya eliivuru ya profeta Yesaya”. (Mit. 8:30) Ikaaro iyo seettihiwa ni ikhavalo, khisaapakiwe wiira seetteke mukwaha moowakuveya. Okhala wiira seetta mukwaha vakhaani-vakhaani, eyo yaahimwiiriha mulopwana ole a wEthiyopia oweryaka osoma, nave-tho yaahimweemererya Filipe ophwanya ekaaro ele eettaka mwentto.

Mulopwana ole a wEthiyopia, “aahinvekela Filipe owela mukaaroni wiira okilaathi nuuwo”. (Mit. 8:31) Ikaaro seetta mukwaha moowakuveya, ale yaawela aahiiso yeettiha yaamweemela. Masi ekaaro ele, yaahikhalana opuro wiira Filipe vamosa ni mulopwana ole a wEthiyopia akilaathi.

Moovarihana ni itthu silempwe eliivuru ya Miteko ekapiitulu 8 ni soowiiraneya siniphwanyaneya nenna va, iliivuru sahu sinnitthokiherya wiira mulopwana ole a wEthiyopia, aawenle ekaaro yuulupale enivikana ikaaro sa ekhotto aahiiso sineetta moowakuveya.