1. Itthu xeeni ikwaha sikina sinniiriha woova?

 ATTHU ootheene, ikwaha sikina annoova. Ekeekhai wiira yoosoma ahu ya Biibiliya, yoonikhaliherya oxintta woova okhwa, ihasara sa ephattu ni itthu sinrowa okhumelela muhoolo. Masi ninkhala okathi sinikhumelela aya “itthu soowoopiha” ntoko, ikhotto, ikrime ni iretta. (Luka 21:11) Nave ninniwoova atthu, ohela muhina anamalamulela a mulaponi ni amusi ahu annilupattha mwaha woomurumeela Yehova. Akina annixanka yuupuwelaka wiira khanrowa owerya oxintta muxankiho arina aya aahiiso onrowa okhumelela muhoolo.

2. Mutthokiherye muxankiho aarina awe Davidi okathi aari awe epooma ya oGathi.

² Davidi aanoova. Mwa ntakiheryo okathi Mwene Sawuli aaphavela awe omwiiva, Davidi aahithanla otthyawela epooma ya aFilisti, oGathi. Mwene oGathi, Akixi, aahuupuwela wiira Davidi nakhotto yoole ootupa ni oolipa murima atthu yaamwiipela aya ari: “Owiivale ikonto muloko” sa afilisti. Nuumala Davidi osuwela etthu mwene uupuwela awe, “aahipacerya omoova vanceene”. (1 Sam. 21:10-12) Owo aahixanka vanceene uupuwelaka etthu mwene Akixi aakela awe omwiiriha. Exeeni Davidi aapanke awe wiira oxintte woova?

3. Moovarihana ni Esalimo 56:1-3, 11, Davidi aaxinttale sai woova wawe?

³ Moolumo ari Esalimo 56, Davidi onnitthokiherya moota oonela awe okathi aari awe epooma ya oGathi. Esalimo ela, Davidi oohimya etthu yaamwiiriha woova ni etthu yaamukhalihenrye oxintta woova. Okathi oova awe, Davidi aanimuroromela Yehova. (Musome Esalimo 56:​1-3, 11.) Davidi khaakhulumunwe. Okhaliheriwaka ni Yehova, aahiwerya opaka etthu yaamwiirinhe woopowa mwa enamuna ahaalipelela awe. Owo aahiikhaliha ntoko namukhwanepa! Nto Akixi ohiya ophavela omwiiva  Davidi, owo aahirumiha okumihiwa namukhwanepa ole ohoolo wawe. Nuumala-vo, Davidi aahiwerya woopowa. — 1 Sam. 21:13-22:1.

4. Ninrowa olipiha sai omuroromela wahu Yehova? Mutthokiherye.

⁴ Nave hiyo nnoowerya oxintta woova wahu, namuroromela Yehova. Masi ninrowa olipiha sai omuroromela wahu Yehova, otepexa wene okathi nnoova ahu? Nwehe ntakiheryo nla. Nkuupuwelani musuwenle ene wiira mookhalana eretta, nyuwo mwaamoova vanceene. Masi etthu ekhanle oovukula woova wanyu, ori ovaanela ni meediku oororomeleya. Woonasa wene, owo ootoko waataratari atthu anceene yaarina eretta emosa-ru. Onimoowiriyanani ni ephoole nave nyuwo munoosuwela wiira ohiiwexexa saana muxankiho anyu. Pooti wooleelani enamuna ya olooliwa enrowa wookhaliheryani ni yaakhalihenrye atthu akina. Mwa enamuna emosa-ru, nnoowerya olipiha omuroromela wahu Yehova, vakhala wiira nnimuupuwelaka itthu onipakenle awe, onnipakela awe nenna-va ni onrowa awe onipakela muhoolo. Ti yeeyo Davidi aapanke awe. Okathi munisoma anyu moolumo a Davidi ari Esalimo 56, muupuweleleke moota mukhan­le anyu oolipiha omuroromela wanyu Yehova ni owerya oxintta woova.

EXEENI YEHOVA OPANKE AWE?

5. Exeeni Davidi uupuwela awe wiira oxintte woova wawe? (Esalimo 56:12, 13)

⁵ Nnaamwi okumi wa Davidi waari wooxankiha, owo aawehexexa paahi itthu Yehova aapanke awe. (Musome Esalimo 56:​12, 13.) Davidi aahilimalela opaka eyo mookumini mwawe. Mwa ntakiheryo, ikwaha sikina, owo aanuupuwela soopattuxiwa, sa Yehova. Eyo yaanimukhaliherya wuupuwela wiira Yehova toowerya sootheene ni onnaavaha efaita apinaatamu. (Esal. 65:6-⁠9) Nave aanuupuwelela itthu Yehova aapakenle awe atthu akina. (Esal. 31:19; 37:25, 26) Etthu yoohakalaliha ookhala wiira yena anuupuwelela itthu aapakeliwe awe ni Yehova. Davidi aanikhapeleliwa ni okhaliheriwa ni Yehova okhuma enamwane awe. (Esal. 22:9, 10) Moohaanyiherya wuupuwelela itthu iyo sootheene, saahimukhaliherya Davidi olipiha omuroromela wawe Yehova!

6. Okathi nnoova ahu, exeeni enrowa onikhaliherya wuncererya omuroromela wahu Yehova?

⁶ Okathi munoova anyu, mwiikoheke so:  ‘Etthu xeeni Yehova okipakenle awe?’ Muupuweleleke soopattuxiwa. Mwa ntakiheryo, “nkaaweheeni saana” moota axipalame anikhapeleliwa aya ni Yehova. Nnaamwi ahiweryaka omukokhorela Muluku ni ohaapattunxe iilikanyihaka, Yehova onnaakhapelela axipalame awo. Ankhi hiyo niireke khanirina efaita? Wuupuwelela eyo enoonikhaliherya wuncererya omuroromela wahu Yehova. (Math. 6:25-32) Nave muupuweleleke itthu Yehova aapakenle awe arumeyi awe. Nyuwo pooti osoma mbiibiliyani soowiiraneya sa atthu yaarina waamini woolipa, aahiiso pooti osoma soowiiraneya sa arumeyi a Yehova a mahiku ala. a Nave muupuweleleke moota munikhapeleliwa anyu ni Yehova. Mwa ntakiheryo, etthu xeeni opan ke awe wiira mwiixutte ekeekhai? (Yoh. 6:44) Moota xeeni Yehova aakhunle awe mavekelo anyu? (1 Yoh. 5:14) Itthu xeeni siwiiranenleni mookumini mwanyu mwaha wa mukuttho woowoopola? — aEef. 1:7; aHeeb. 4:14-16.

7. Yoowiiraneya ya Daniyeli yaamukhalihenrye sai Vanes­sa oxintta woova wawe?

⁷ Murokora mmosa oniitthaniwa Vanessa, b onikhala elapo ya oHaiti, waahimphwanya muxankiho muulupale. Mulopwana mmosa a epairo awe, aamakela omulikarela ni omwinviyarela mensagem khula nihiku onvekaka. Masi Vanessa aahimutthokiherya wiira khaaphavela. Mulopwana ole, aahinanariwa vanceene ni onapacerya omoopopiha. Vanessa ohimmye so: “Kaanoova vanceene”. Nto owenrye sai oxintta woova wawe? Owo aahipaka itthu sootheene aawerya awe wiira iikhapelele. Mutokweene mmosa aahimukhaliherya murokora ole wiira ahaana orowa waaleela makhulupale a mulaponi wala okaxari. Ohiya-vo, yena aaniwehexexa moota Yehova aakhalihenrye awe arumeyi awe a khalai. Vanessa onihimya so: “Mutthu oopacerya kaamuupuwelaka, aari profeta Daniyeli. Owo khaapanke etthu yootakhala masi aanithokoreriwa moohixariya ni aahiriheliwa mulittini mwa akharamu. Hata vari siiso, Yehova aanimukhaliherya. Nave miyo kaahinvekela Yehova wiira okikhaliherye oxintta muxankiho ole. Masi nuumala ovekela, khiivo-tho etthu koovaaka”. — Dan. 6:12-22.

EXEENI YEHOVA ONIPAKA AWE NENNA-VA?

8. Exeeni Davidi aakupali awe? (Esalimo 56:8)

⁸ Nnaamwi Davidi okumi awe waari wooxankiha okathi aari awe elapo ya oGathi, owo khaawehexexa itthu saamwiiriha woova. Ohiya-vo, aanuupuwelela itthu Yehova aapaka awe okathi ole. Davidi aaniwerya woona moota aakhapeleliwa awe ni Yehova ni malakiheryo aavahiwa awe. Nave aanisuwela wiira Yehova aaniweha oxanka wawe. (Musome Esalimo 56:⁠8.) Davidi, aanikhaliheriwa ni apatthani awe ntoko: Yonathani ni Mukhulupale Anamukuttho Ahimeleki, awo yaanimukhaliherya olipiha waamini wawe ni yaaninvaha itthu sikina saamuthowa. (1 Sam. 20:41, 42; 21:6, 8, 9) Hata aalupatthiwa ni Mwene Sawuli, Davidi aahiwerya woopowa. Owo aanikupali wiira Yehova aanisuwela oratte ene mixankiho iye samphwanya.

9. Exeeni Yehova onisuwela awe wa khula mmosa a hiyo okathi sinniphwanya aya mixankiho?

⁹ Okathi sinoophwanyani mixankiho siniwiirihani woova, muupuweleleke wiira Yehova onnisuwela oratteene etthu enooxankihani ni moota munoonela anyu. Mwa ntakiheryo, Yehova ohiya paahi woona mixankiho saaphwanya aisarayeli wExiitu, owo aahihimya wiira “kosuwela tthiri ohawa waya”. (Okhum. 3:7) Davidi aahimwiipela Yehova ohimyaka wiira ‘aahoona  ohaawa wawe’ ni ‘aanisuwela ovelavela wawe’. (Esal. 31:7) Vaavo atthu a Muluku yaahaawa aya ikwaha sikina mwaha wa soothanla saya, Yehova mwaneene ‘aaniwoopola’. (Yes. 63:9) Okathi munoova anyu, mukupaliki wiira Yehova onnisuwela oratteene oxanka wanyu, nave onniphavela wookhaliheryani oxintta woova wanyu.

10. Xeeni munireerela nyu okupali wiira Yehova onnisuwela mixankiho sanyu ni onniphavela wookhaliheryani?

¹⁰ Niireke ikwaha sikina munniikoha akhala wiira Yehova onnookhaliheryani ovilela mixankiho sanyu? Munoonela sai onvekela Yehova wiira ookhaliheryeni osuwela moota onipaka awe eyo? (2 Mam. 6:15-17) Nkuupuwelani ela: Niireke wookhala mwaha aahiiso ekomentaario yaavahiwe mmulokoni yaatonko woolipihani? Niireke yookhala erevista, eviidiyu aahiiso nsipo naatonko woovarani murima? Niireke ookhala mutthu aatonko owooniheryani yoolepa ya mbiibiliyani yoolipinheni? Ikwaha sikina, hiyo pooti oliyala moota ophenta wa anna ni arokora ni moolumo oolipiha nimphwanya ahu mbiibiliyani, annikhaliherya aya. Masi nisuweleke wiira iyo soovaha sinikhuma wa Yehova. (Yes. 65:13; Mar. 10:29, 30) Nave sinooniherya wiira Yehova onninthokorerya vanceene. (Yes. 49:14-16) Nave-tho sinninikupaliha wiira nihaana omuroromelaka Yehova.

11. Exeeni yaamukhalihenrye Aida oxintta woova wawe?

¹¹ Murokora mmosa onikhala oSenegal, oniitthaniwa Aida, oowerya osuwela moota Yehova aamukhalihenrye awe okathi wa mixankiho. Okhala wiira topacenrye oyariwa, anamuyari awe, yaakupali wiira anweryaka ophwanya musurukhu munceene wiira aakhaliheryeke. Masi nuumala Aida opaka yoothanla ya okhala pioneera, owo khaarina musurukhu waaphiyerya. Amusi awe yaahinanariwa vanceene anapacerya omunyokha. Owo onihimya so: “Miyo kaanoova ohiwerya waakhaliherya anamuyari aka ni ohooniwa saana mmuttettheni. Nave kaahipacerya onvaha nthowa Yehova mwaha wa itthu iye saakikhumelela”. Muhoolo mwaya, Aida aahiiwa mwaha waalavuliwe waasembeleeyani. Owo onihimya so: “Mulipa aalavula mwaha, aahinuupuxerya ohimyaka wiira khuuvo muxankiho onniriipiha murima, Yehova ohinsuwela awe. Vakhaani-vakhaani, kikhaliheriwaka ni axitokweene vamosa ni anna ni arokora a ­mmulokoni, kaahipacerya woona ophenta wa Yehova. Nuuvira okathi, kaahipacerya  onvekela Yehova ni muupuwelo wooloka, nave okathi koonaaka wiira Yehova anaakhula mavekelo aka, kaanimaaleleya”. Moottharelana, Aida aahiwerya ophwanya muteko waarowa omukhaliherya ohihiya okhala pioneera ni owerya waakhaliherya amusi awe ni atthu akina. Owo onnimaliherya ohimyaka so: “Kihiixutta omuroromela Yehova moomalela, nave okathi kinivekela aka, woova waka onnimala”.

EXEENI YEHOVA ONROWA AWE OPAKA MUHOOLO?

12. Moovarihana ni Esalimo 56:9, etthu xeeni Davidi aaroromela awe?

¹² Musome Esalimo 56:9. Eversiikulu ela, ennooniherya etthu ekina yaamukhalihenrye Davidi okathi oova awe. Hata okumi awe waari wooxankiha, yena aanuupuwela itthu Yehova aarowa awe ompakela muhoolo. Davidi aanisuwela wiira Yehova ammoopola okathi wooreerela. Yehova aahihimya wiira Davidi aarowa okhala mwene aattharelana wIsarayeli. (1 Sam. 16:1, 13) Mwa moonelo wa Davidi, itthu sootheene Yehova aaleiherya awe, saakhala ntoko sihiiraneya.

13. Itthu xeeni ninreerela ahu okupali wiira Yehova onoopaka?

¹³ Itthu xeeni Yehova ooleihenryaaweni? Nihilipeleleke wiira Yehova onoomaliha mixankiho sahu sootheene nenna-va. c Hata vari siiso, nikupaliki wiira mixankiho sinniphwanya mahiku ala ookiserya, Yehova onoomaliha muhoolo. (Yes. 25:7-⁠9) Moohaanyiherya, mpattuxa ahu ookhalana owerya wa waahihimuxa ale akhwiiye, waapenuxa aretta ni waapwetexa awanani ahu. — 1 Yoh. 4:4.

14. Itthu xeeni ninreerela ahu wuupuwelelaka?

¹⁴ Okathi munoova anyu, muupuweleleke itthuYehova onrowa awe opaka muhoolo. Mwa ntakiheryo, muupuweleleke moota munrowa anyu okhalaka nuumala Satana opwetexiwa, omala-malihiwa atthu ootakhala ni elapo yootheene osareya atthu ooreera murima ni oohittheka. Konkresu a muttetthe a 2014, aahooniherya moota ninreerela ahu wuupuwelelaka nlipelelo nahu. Emusi emosa, yaanuupuwelela moota okumi onrowa aya okhala mparayiisu. Nave annupuwelela moota anrowa aya oturukeya moolumo ari 2 Timootheyo 3:1-⁠5 elapo esya. Awo atthokihenrye so: “Musuwele wiira elapo esya, onookhala okathi woohakalaliha ohinatoko okhala. Tthiri atthu anrowa ophentanaka mukina ni mukhwawe, anrowa ophentaka ikeekhai sa mbiibiliyani, oowiisuumaaliha, oowiiyeviha, anrowa omphentaka Muluku, anrowa owiiwelelaka anamuyari aya, ooxukhuru, oororomeleya, anaaphenta vanceene amusi aya, oowiiwanana, anrowa waapakelaka itthu sooreera atthu akina, oowiihiiha, ooreera murima, anrowa ophentaka itthu sooreera, arina muupuwelo wooloka, anrowa omphentaka Muluku ohiya ophentaka musurukhu ni oosareya othunku. Atthu siisa, mwaataaneke”. Niireke munnivaanela ni amusi anyu aahiiso anna ni arokora a mmulokoni voohimya sa okumi ninrowa ahu okhalana elapo esya?

15. Nnaamwi Tânia oova, exeeni yaamukhalihenrye oxintta woova wawe?

¹⁵ Murokora mmosa onikhala oNorte wa oMasedonia, oniitthaniwa Tânia, oowerya oxintta woova wawe uupuwelelaka mareeliho onrowa awe ophwanya muhoolo. Anamuyari awe, khiyaaphavela wiira owo omusomeke Biibiliya, nto yaanimulupattha vanceene. Owo onitthokiherya so: “Itthu sikina koovaka, saahikiiraneela. Okathi kaatthikaaka omithukumanoni, amaama yaanikimana vanceene. Anamuyari aka ale, yaanikoopopiha ahimyaka wiira yaamukiiva vakhala wiira kaamukhala Namoona a Yehova”. Nuumala-vo, Tânia aahoomoliwa owaani. Owo  oonenle sai? Tânia onihimya-tho so: “Miyo kaanuupuwelela moota kaarowaka okhala kaahihiye ororomeleya. Nave, kaanuupuwela moota Yehova onrowa awe okitthuvela elapo esya, vakhala wiira nenna-va, kinooyeleela itthu sikina. Nave-tho kinnuupuwelela moota itthu sootheene sootakhala, kinrowaaka oliyala”. Tânia, khohiyale okhala oororomeleya. Okhaliheriwaka ni Yehova, oowerya ophwanya opuro wookhala. Vano, Tânia ootheliwa ni munna oororomeleya ni anivarasa hoothe muteko wa Muluku wa okathi wootheene.

MULIPIHEKE OMUROROMELA WANYU YEHOVA NENNA-VA

16. Exeeni enrowa onikhaliherya okhala oolipa murima, okathi ninrowa ahu woonaka yiiraneyaka moolumo ari Luka 21:26-28?

¹⁶ Okathi wa maxakha maalupale, anamunceene “anrowa okhwa woova”. Masi atthu a Muluku, anrowa okhala oororomeleya ni oolipa murima. (Mmusome Luka 21:​26-​28.) Exeeni enrowa onikhaliherya okhala oolipa murima? Okhala wiira, ninrowa wiiraka niixun­tte ene omuroromela Yehova. Tânia, nimuromonle ahu ettima evinre, ohimmye wiira itthu simwiiranenle, soomukhaliherya ovilela mixankiho sawe sikina. Owo ohimmye so: “Miyo kihiixutta wiira khuuvo muxankiho onniphwanya Yehova ohinwerya awe onikhaliherya ni onireeliha. Ikwaha sikina, hiyo pooti woonaka wiira Yehova onniweemererya atthu akina onikumiherya mixankiho, masi ekeekhai ti yoowi Yehova khahiyo tonikumiherya mixankiho. Waphiya okathi aya, Yehova onoomaliha mixankiho sootheene”.

17. Yoolepa ahu ya mwaakha wa 2024, enrowa onikhaliherya sai? (Nwehe efootu ya vakaapani.)

¹⁷ Olelo-va, sookhala itthu sinceene sikhanle ooniiriha woova. Ntoko Davidi, hiyo khanimphavela wiira woova oneettiheke. Yoolepa ahu ya mwaakha wa 2024, nivekelo Davidi ampaken­le awe Yehova ohimyaka so: “Okathi onòvaka, kinnororomelani nyuwo”. (Esal. 56:4) Elavulaka sa eversiikulu ela, ereferensiya emosa ya mbiibiliyani, ehimmye so: “Davidi khaawehexexa paahi mixankiho sawe aahiiso woova wawe, ohiya-vo, aanimuroromela ole aarowa omoopola”. Miyeeri sinttharelana, wuupuwelela yoolepa ahu ya mwaakha, enimookhaliheryani oxintta woova ni omuroromela Muluku, otepexa wene okathi sinoophwanyaayani mixankiho. Mwiivaheke okathi wiira muupuwelele itthu Yehova opanke awe khalai, onipaka awe nenna-va ni onrowa awe opaka muhoolo. Nave ntoko Davidi, nyuwo munoowerya ohimya so: “Kinnimukupali Muluku mwaha wa masu awe: kinnimuroromela Muluku, nkinova-tho etthu”. — Esal. 56:5.