1. Xeeni nihiku na Wuupuwelela okhwa wa Kristu, niri aya na faita yuulupale vamwaakhani? (Luka 22:19, 20)

 ARUMEYI a Yehova, annoona nihiku na Wuupuwelela okhwa wa Kristu, okhala na faita yuulupale vamwaakhani. Okhala wiira niira nimosa, Yesu aarumme awe awiixutti awe wiira yaahaana wuupuwelelaka khula mwaakha. (Mmusome Luka 22:19, 20.) Tthiri nookhalana itthu sinceene sinniiriha olipelelaka ophiya nihiku nno ni murima wootheene. Nrowe nithokorerye itthu sene.

2. Itthu xeeni sinniiriha olipelelaka muthukumano wa Wuupuwelela?

² Muthukumano wa Wuupuwelela, onninikhaliherya osuwela itthu sirina efaita ni mareeliho ootheene anikhumela mwaha wa muthukumano owo. Nave onninuupuxerya moota nikhanle ahu owooniherya oxukhurela wahu mukuttho wa Yesu. (2 aKor. 5:14, 15) Ohiya-vo, muthukumano wa Wuupuwelela onninivaha eparakha ya ‘olipihana’ mukina ni mukhwaawe. (aRom. 1:12) Khula mwaakha, anna ni arokora anceene ahiyale olaleerya ni orowela mithukumano sahu, anniimananiha wiira yiirele mpantta muthukumano owo wa Wuupuwelela. Mwaha wa niphento anooniheriwa aya okathi wa wuupuwelela, akina annithanla otthikela omurumeela Yehova. Nave atthu akina annithanla omusoma Biibiliya mwaha wa itthu yiiwale aya ni yoonale aya okathi wa muthukumano owo. Moohaanyiherya, nihiku nno nookhalana efaita yuulupale wa hiyo!

3. Anna ni arokora a olumwenku wootheene, aniiraana sai nihiku na wuupuwelela? (Nwehe efootu.)

³ Nave nihiku na Wuupuwelela, ninnaakhaliherya anna ni arokora a olumwenku wootheene, okhala oowiiraana. Nuumala nsuwa okela aahiiso ovolowa, Anamoona a Yehova annithukumana wiira yuupuwelele nihiku nno. Ootheene ahu, ninniwiriyana  mwaha onittittimiherya efaita orina aya mukuttho woowoopola. Ninniipa masipo manli, ennivirihiwa ephaawu ni eviinyu nave ninniira “amen” wanikisa wa mavekelo 4 anipakiwa muthukumano ole. Nihiku nimosa paahi miloko sootheene sinipaka etthu emosa-ru. Niireke munnuupuwela moota Yehova ni Yesu anihakalala aya, okathi ootheene ahu ninkhala ahu oowiiraana mwa enamuna emosa-ru nihiku nno?

4. Makoho xeeni ninrowa ahu othokorerya mwaha ola?

⁴ Mwaha ola, ninrowa othokorerya makoho ala anittharelana: Ninrowa wiilokiherya sai okathi wa wuupuwelela? Ninrowa waakhaliherya sai atthu akina ottottela mureerelo nihiku nlo? Ninrowa waakhaliherya sai anna ni arokora ahiyale olaleerya ni orowela mithukumano sahu? Osuwela waakhuliwa wa makokho ala, anoonikhaliherya okhala oolikana ene wiira niirele mpantta nihiku nno na efaita yuulupale.

NINROWA WIILOKIHERYA SAI OKATHI WA WUUPUWELELA?

5. a) Xeeni ninreerela ahu wuupuwelelaka efaita orina aya mukuttho woowoopola? (Esalimo 49:7, 8) b) Exeeni mwiixuntte anyu ni eviidiyu eni: Exeeni Yaamwiirinhe Yesu Okhwa?

⁵ Enamuna emosa nikhanle ahu oowiilokiherya, ori wuupuwelela efaita orina aya mukuttho woowoopola wa Yesu Kristu. Khiivo etthu naakhanle ahu oopaka, yaarowa onoopola etampi ni okhwa. (Musome Esalimo 49:7, 8; ni nwehe eviidiyu eni: Exeeni Yaamwiirinhe Yesu Okhwa?) a Yehova oopaka mareheryo omweemereryaka Yesu ovaha okumi awe wiira onoopole. Yehova ni Yesu ahiimananiha vanceene wiira avahe mukuttho owo. (aRom. 6:23) Vaavo nnuupuwelela ahu etthu Yehova ni Yesu anipakenle aya, oxukhuru wahu onrowa otepaka wuncerereya. Nrowe nthokorerye itthu sootepa oxankiha Yehova ni Yesu apanke aya wa mureerelo ahu. Masi nihinatthi, nrowe nithokorerye ele enitaphulela aya yoowoopola.

6. Yoowoopola exeeni?

⁶ Yoowoopola eperesu mutthu onirumeela awe wiira oliverye etthu aapweteiwale awe. Mulopwana oopacerya, Adamu, aari mutthu oohittheka okathi aapattuxiwe awe. Nuumala omutthekela Muluku, yena ni osuulu awe, yaahipweteiwa eparakha yaarina aya ya okhala mahiku ootheene. Wiira oliverye etthu Adamu yaapweteiwale aya, Yesu aahivaha okumi awe woohittheka ntoko mukuttho woowoopola. Okathi wa muteko awe woolaleerya valaponi, Yesu “khonapake etampi, nave khonaphwanyaniwe wootha mwaano mwawe”. (1 Ped. 2:22) Yesu okhwiiye ohirina etampi ntoko Adamu yaari aya ahinatthi ottheka. Orumeelaka okumi awe ntoko mukuttho woowoopola, Yesu ooliverya okumi Adamu apweteiwale aya. — 1 aKor. 15:45; 1 Tim. 2:6.

7. Sooweeha xeeni Yesu aavilenle awe okathi aari awe valaponi?

⁷ Okathi Yesu aari awe valaponi, aanimwiiwelela Yehova hata okathi yoole vaamuxankiha aya opaka eyo. Okathi aari awe mwaana, nnaamwi aari oohittheka, Yesu aaniwiiwelela anamuyari awe hata yaari atthu oottheka. (Luka 2:51) Nuumala okhala mmiravo, Yesu aanivilela vaavo atthu akina yaamukhanyererya aya ohiya owiiwelela anamuyari awe ni omuroromela Yehova. Nave nuumala wunnuwa, Yesu aanivilela sooweeha sa Satana Diabo, yoowo aaphavela wiira owo ohiye okhala oororomeleya wa Muluku. (Math. 4:1-11) Satana aanipaka sootheene aawerya awe, wiira omwiirihe Yesu ottheka ni ohiwerye owoopola apinaatamu.

8. Mixankiho xeeni sikina Yesu aavilenle awe?

⁸ Okathi wa muteko awe woolaleerya valaponi, Yesu saahimphwanya mixankiho sikina. Owo aanilupatthiwa ni awanani awe ni yaaniphavelasa omwiiva. (Luka 4:28, 29; 13:31) Ohiya-vo, owo aahaana ovilela soovonya sa awiixutti awe. (Mar.  9:33, 34) Nave okathi aaphukeliwe awe, owo aahivilela ohasuliwa ni omaniwa. Wanikisa waya, owo aahiiviwa mwa enamuna yoowereya ni yoomoriha ikharari. (aHeeb. 12:1-3) Okathi aakhwa awe, owo aahaana ovilela mekhawe ohikhaliheriwaka ni Yehova. b — Math. 27:46.

9. Ninkhala sai vaavo nnuupuwelela ahu itthu sootheene Yesu onipakenle awe? (1 Pedru 1:8)

⁹ Moohaanyiherya, Yesu khaareere ohaawa wiira ovahe okumi awe wa mureerelo ahu. Okathi nnuupuwelela ahu itthu sootheene Yesu onipakenle awe, eyo enniniiriha omphenta vanceene. — Mmusome 1 Pedru 1:8.

10. Xeeni Yehova aaxanka awe nuumala onweha mwanawe ohaawaka?

¹⁰ Exeeni yaamwiirinhe Yehova omuruma Yesu wiira oliverye itampi sahu? Yehova ni Yesu anivara moowiiraana ntoko tiithi ni mwanawe. (Mir. 8:30) Nkuupuwelani moota Yehova ariipiwe awe murima vanceene, nuumala onweha Yesu simphwanyaka mixankiho sinceene valaponi. Moohaanyiherya, Yehova khaareere oxanka nuumala onweha mwanawe ahasuliwaka, onyokhiwaka ni ahaawaka vanceene.

11. Nvahe ntakiheryo nnooniherya moota Yehova oona awe owereya vaavo anweha awe mwanawe iiviwaka.

¹¹ Paapa aahiiso maama okhweliwe mwanawe, onnisuwela moota vaniwereya aya mutthu okhweliwa mwaana amphenta awe vanceene. Hiyo ninnaamini ohihimuxiwa, masi hata vari siiso, ninnoona owereya vanceene vaavo vanikhwa awe ole namphenta ahu. Eyo enninikhaliherya wiiwexexa moota Yehova oona awe owereya, okathi anweha awe mwanawe ahaawaka ni wiiviwa. c — Math. 3:17.

12. Exeeni nikhanle ahu oopaka vaavo nnaattamela aya nihiku na wuupuwelela?

¹² Munoonela sai okhuma nenna-va, wiimananiha wiixutta voohimya sa yoowoopola okathi Munimulompa Anyu Muluku Vatthokoni, aahiiso okathi wa yoosoma anyu ya omwaneene? Murumeeleke iliivuru ntoko Eliivuru Enaakhaliherya Anamoona a Yehova Otokosa Myaha Sikumiheriwe, aahiiso eliivuru ekina wiira mutokose voohimya sa yoowoopola. d Nave pooti otthara malakiheryo ari Okumi ni Orummwa Ahu wa Ekristau — Ekaderno Enirumeeliwa Omuthukumanoni. Nihiku na Wuupuwelela muhiliyale oweha eviidiyu ya Omulompa Muluku Voosiisu. Akhala wiira nnimwiilokiherya, nnoottottela mureerelo nihiku nlo na Wuupuwelela nave nnimwaakhaliherya atthu akina ottottela mureerelo. — Eezi. 7:10.

 MWAAKHALIHERYEKE AKINA OTTOTTELA MUREERELO

13. Etthu xeeni yoopacerya nikhanle ahu oopaka, wiira naakhaliherye atthu akina ottottela mureerelo nihiku na Wuupuwelela?

¹³ Ninrowa waakhaliherya sai atthu akina ottottela mureerelo nihiku na Wuupuwelela? Etthu yoopacerya nikhanle ahu oopaka, ori waalattula. Moottharelana, nihaana opaka elista ya atthu naaphavela ahu waalattula wiira nakhale hoothe okathi wa wuupuwelela. Atthu awo anihela muhina amusi ahu, apatthani ahu, ale ninvarana ahu muteko aahiiso ninsomana ahu oskola ni atthu akina. Akhala wiira khanrina malattulo manceene oowimpirimiriwa, hiyo pooti waalattula niwinviyarelaka mensagem aahiiso elinkhi ya nlattulo nlo. Vanrowa ookhala voohakalaliha osuwela wiira nihaakhaliherya atthu akina orweela muthukumano wa wuupuwelela! — Mus. 11:6.

14. Mutthokiherye owerya orina aya ovaha nlattulo mmansinyu ene.

¹⁴ Vaavo nimmulattula ahu mutthu mmansihu, eyo ennimwiiriha ophavela orowela muthukumano owo. Murokora mmosa aahitikinihiwa vanceene, nuumala omwiiwa iyawe yoowo ohinimurumeela Yehova, ahimyaka wiira onoorowela muthukumano wa Wuupuwelela. Mwaha wa xeeni? Mwaha woowi murokora ole aahimulattula iyawe ikwaha sinceene, masi yena khaatonko orowela. Vano exeeni yaamwiirinhe mukwaha ola? Iyawe onihimya so: “Miyo kaakhenle nlattulo na mutokweene kaamusuwela aka”. Owo aahirowela muthukumano wa Wuupuwelela mwaakha ole ni aanirowela iyaakha sikina saattharelana.

15. Exeeni nikhanle ahu oopaka naaphavelaka omulattula mutthu wiira orowele muthukumano wa Wuupuwelela?

¹⁵ Muhiliyale wiira ale nnaalattula ahu pooti okhalanaka makoho, otepexa wene akhala wiira khatonko orowa Empa aya Omwene. Ti vooloka wuupuwelela itthu akhanle aya ookoha ni wiilokiherya moota woowaakhula. (aKol. 4:6) Mwa ntakiheryo, akina pooti wiikohaka so: ‘Exeeni enrowa wiiraneya omuthukumanoni iwo? Onrowa oviriha iwoora ikavi? Ikuwo xeeni kinireerelaka owara? Kiireke muthukumano owo onniliviwa? Kiireke nkinrowa ovekeliwa musurukhu kaphiya?’ Okathi nimmulattula ahu  mutthu wiira arowele muthukumano wa Wuupuwelela, nihaana omukoha so: “Niireke yookhala etthu muniphavela anyu okoha?” Nuumala-vo, ninwiriyaneke etthu onrowa awe waakhula. Wiira nimukhaliherye mutthu owo wiiwexexa moota sinipakiwa aya mithukumano sahu, hiyo pooti omooniherya iviidiyu sini: Wuupuwelela Okhwa wa Yesu ni Exeeni Eniiraneya mMithukumano sa Empa ya Omwene? Yoosoma 28 ya eliivuru Okumi woohimala! enninivaha malakiheryo a iponto nikhanle ahu oovaanela ni mutthu owo.

16. Itthu xeeni woonasa wene akhanle aya oophavelaka osuwela ale anirweela muthukumano wa Wuupuwelela?

¹⁶ Nuumala muthukumano wa Wuupuwelela, ale yaarwenle pooti okhalanaka makoho makina. Mwa ntakiheryo, akhala wiira muloko owo khuuvo mutthu okhunre ephaawu ni owunrye eviinyu, awo pooti wiikohaka nthowa naya. Nave akhala wiira muloko owo atthu akina aakhuura ephaawu ni aawurya eviinyu, awo pooti wiikohaka xeeni ari aya vakhaani. Woonasa wene, awo pooti ophavelaka osuwela ikwaha ikavi nnuupuwelela ahu okhwa wa Yesu. Nave awo pooti ophavelaka osuwela akhala wiira mithukumano sootheene sa Anamoona a Yehova, sinipakiwa mwa enamuna emosa-ru. Nnaamwi iponto sikina silavuliwaka okathi wa mwaha wa Wuupuwelela, awo pooti ophavelaka otthokiheriwa oratteene. Mwaha ori va jw.org oni: “A Ceia do Senhor – porque é que as Testemunhas de Jeová a celebram de modo diferente?” pooti onikhaliherya ophwanya waakhuliwa wa makoho makina. Nihaana wiimananiha vanceene wiira naakhaliherye ‘ale arina murima wooloka’ wiira attottele mureerelo muthukumano wa Wuupuwelela, vahinatthi, waphiya ni nuumala muthukumano owo. — Mit. 13:48.

NAAKHALIHERYEKE ALE AHIYALE OLALEERYA NI ORWEELA MITHUKUMANO

17. Axitokweene anrowa waakhaliherya sai ale ahiyale olaleerya ni orweela mithukumano? (Ezekiyeli 34:12, 16)

¹⁷ Okathi wa muthukumano wa Wuupuwelela, axitokweene anrowa waakhaliherya sai ale ahiyale olaleerya ni orweela mithukumano? Nwooniheryeke wiira munnaathokorerya. (Mmusome Ezekiyeli 34:12, 16.) Ohinatthi muthukumano wa Wuupuwelela, mwiimananiheke waaxukurya ale ahiyale olaleerya ni orweela mithukumano. Nwooniheryeke wiira awo aniphentiwa  ni mwaaleeleke wiira muri oolikana ene yakhala etthu aniphavela aya okhaliheriwa. Mwaavaheke nlattulo na Wuupuwelela. Akhala wiira anoorweela muthukumano owo, nwaakheleke mooreera murima. Nuumala muthukumano owo, mwiimananiheke waakhaliherya anna ni arokora awo wiira alipihe waataana waya ni Yehova ni atthikele wa yena. — 1 Ped. 2:25.

18. Anna ni arokora akina a mmulokoni, anrowa waakhaliherya sai ale ahiyale olaleerya ni orweela mithukumano? (aRoma 12:10)

¹⁸ Okathi ale ahiyale olaleerya ni orweela mithukumano, anirweela aya muthukumano wa Wuupuwelela, anna ni arokora akina a mmulokoni anrowa waakhaliherya sai? Anoowerya waakhaliherya, yaathokoreryaka mwa niphento, mooreera murima ni mwa nttittimiho. (Mmusome aRoma 12:10.) Muhiliyale wiira ti vooxankiha anna ni arokora awo otthikela othukumana Empa ya Omwene. Woonasa wene awo pooti woovelelaka ohaakheliwa saana. e Muhilavuleke aahiiso opaka etthu yaarowa owuulihiha muru ni waariipiha murima. (1 aTes. 5:11) Anna ni arokora awo, annimphenta Yehova ntoko hiyo. Ninnihakalala okathi anitthikela aya omurumeela Yehova vamosa ni hiyo! — Esal. 119:176; Mit. 20:35.

19. Mareeliho xeeni nimphwanya ahu mwaha wa wuupuwelela okhwa wa Yesu?

¹⁹ Ninnixukhurela vanceene, Yesu oniruma wiira nihaana Wuupuwelelaka okhwa wawe khula eyaakha. Nave ninnisuwela efaita orina aya muthukumano owo. Ohiya-vo, hiyo ni atthu akina ninniphwanya mureerelo mwaha woopaka eyo. (Yes. 48:17, 18) Mwa ntakiheryo, omphenta wahu Yehova ni Yesu onnitepa wuncerereya. Nave nookhalana eparakha ya wooniherya oxukhurela wahu mukuttho, Yehova ni Yesu anivaha aya. Nave-tho, ninnikhalana waataana wooloka ni anna ni arokora. Nookhalana eparakha ya waakhaliherya atthu akina, wiixutta voohimya sa yoowoopola ni okhalana eparakha ya waakhela mareeliho Yehova oleihenrye awe. Tivonto, nihaana opaka ele eniwerya ahu, wiira niilokiherye ni niirele mpantta nihiku nno nuulupale na vamwaakhani!