1-2. Mixankiho xeeni, woonasa wene sinaaphwanya arumeyi oororomeleya a Yehova?

 OKATHI sinniphwanya aya mixankiho mootutuxerya, okumi ahu onniturukeya moowaakuveya. Mwa ntakiheryo, munna mmosa oororomeleya, oniitthaniwa Luis, a waahimphwanya oretta wa Kanser. Meetiku aahimuleela wiira okumi awe waahalanne miyeeri vakhaani paahi wiira okhweeke. Monika ni iyawe, yaanikhalela nthiti ovara miteko sa Yehova. Masi nihiku nimosa, Monika aahisuwela wiira iyawe, yoowo aari mutokweene, aanipaka itthu sinceene soohiloka masi iipithiha awe mwa iyaakha sinceene. Olivia murokora mmosa oohitheliwa, aahikhanyereriwa okhuma owannya awe mwaha wa munamukhaya aarowa okhumelela muttetthe ole. Masi nuumala otthika, owo aaphwannye empa awe enyaanyiwene ni munamukhaya ole. Anna ala naathokorenrya ahu, okumi aya waahiturukeya moowaakuveya. Niireke munniwerya olikanyiha muxankiho murina anyu ni mixankiho yaarina aya? Niireke wookhala muxankiho woophwannyeni masi waaturunke okumi anyu moowaakuveya?

² Ntoko arumeyi oororomeleya a Yehova, sinniniphwanya mixankiho ni sooweeha seiyo sinaaphwanya apinaatamu ootheene. Nave nihaana ovilela okathi ninlupatthiwa ahu ni ninnyokhiwa ahu ni atthu ahinaaphavela arumeyi a Muluku. Nnaamwi Yehova ohikhoottiheryaka mixankiho iyo onikhumelela, masi owo onnileiherya onikhapelela. (Yes. 41:10) Nikhaliheriwaka ni Yehova, nnoowerya ohihiya okhala oohakalala, opaka soothanla sooloka ni okhala oororomeleya wa yena hata okathi wa mixankiho. Mwaha ola, nnoothokorerya itthu 4 Yehova onipaka awe wiira onikhaliherye, okathi wa mixankiho. Nave, nnoothokorerya itthu nikhanle ahu oopaka wiira nittottele mureerelo nikhaliheryo na Yehova.

 YEHOVA ONIMOOKHAPELELANI

3. Okathi sinniphwanya aya mixankiho nahaalipelela ahu, exeeni ekhanle oonivila opaka?

³ Okathi wa mixankiho. Okathi sinniphwanya aya mixankiho, hiyo pooti ohiweryaka okhalana muupuwelo wooloka ni opaka soothanla sooloka. Mwaha wa xeeni? Mwaha woowi itthu iyo pooti oniwereihaka murima vanceene. Nave muupuwelo ahu pooti ohivaraka muteko saana mwaha wa mixankiho iyo. Vanakhala ntoko wiira niri mpakitini nnaphempa masi nihisuwelaka opuro ninrowa ahu. Nrowe niwehe miyoonelo yaarina aya arokora naaromonle ahu ittima sivinre okathi saaphwanye aya mixankiho iye. Olivia onihimya so: “Okathi munamukhaya ole aanyaanyale awe empa aka, kaahixanka vanceene vanakhala ntoko kiroorimeela”. Monika olavulaka muxankiho wa iyawe, onihimya so: “Miyo nkaivaha efaita nave murima aka waanikiwereya vanceene. Nkaasuwela etthu yoopaka. Etthu ele nkaakupali wiira yaamukiiraneela”. Yehova onileiherya sai onikhaliherya okathi sinniphwanya aya mixankiho?

4. Moovarihana ni aFilipi 4:6, 7, exeeni Yehova onnileiherya awe?

⁴ Etthu Yehova onipaka awe. Owo onninivaha ele Biibiliya onihimya awe okhala “murettele wa Muluku”. (Mmusome aFilipi 4:6, 7.) Murettele owo, onitaphulela omaaleleya wa murima ni muupuwelo ahu ni ovaha efaita waataana wahu ni yena. Murettele owo ‘onnivikana osuwela wootheene’ nave onninikhaliherya mwa enamuna nahuupuwela ahu. Niireke mootoko oxanka, masi moowaakuveya mukhala oomaaleleya mwaha wonvekela Yehova moohihiyererya? Etthu yaawiirinheni okhala oomaaleleya, “murettele wa Muluku”.

5. Murettele wa Muluku onisuka sai muupuwelo ni murima ahu?

⁵ Yoolepa emosa-ru, enihimya wiira murettele wa Muluku, “onoosuka” aahiiso onookhapelela “mirima sanyu ni miyuupuwelo sanyu”. Nuulumo noowi “osuka” naarumeeliwa ephavelaka ohimmwa anakhotto yaakhapelela epooma ni yaakhaliherya wiira ehipwetexiwe ni awanani aya. Atthu yaakhala epooma ele yaakhapeleliwa, yaanirupa ni murettele mwaha woosuwela wiira vamukhora va epooma ele, yaahikhala atoropa yaawehaweha. Mwa enamuna emosa-ru, okathi murettele wa Muluku onisuka aya murima ni muupuwelo ahu, ninnikhala oomaaleleya maana ninnisuwela wiira niri oovareleleya. (Esal. 4:8) Ti etthu yaamwiiranenle Ana, nnaamwi muxankiho awe wahaaturunke okumi awe moowaakuveya, owo aahikhalana murettele. (1 Sam. 1:16-18) Okathi ninkhala ahu oomaaleleya, ikwaha sinceene ninnoona okhweya wuupuwela saana ni opaka soothanla sooloka.

6. Exeeni nikhanle ahu oopaka wiira nttottele mureerelo murettele wa Muluku? (Nwehe elatarato.)

⁶ Etthu nikhanle ahu oopaka. Okathi munixanka anyu, ookhala munireerela anyu omwiitthana, yoowo nikhanle ahu oomuhimya okhala  “kwarta”. Moota xeeni? Nvekelaka wiira Muluku oovaheeni murettele awe. (Luka 11:9; 1 aTes. 5:17) Luis, yoowo nimuromonle ahu ittima sivinre, onnitthokiherya moota yena ni mwaara awe, Ana, yaawenrye aya ovilela nuumala osuwela wiira, aahalanne miyeeri vakhaani wiira okhweeke. Luis onihimya so: “Okathi ntoko ole, ti woovila opaka soothanla voohimya sa okumi ni itthu sikina. Masi mavekelo, anninikhaliherya okhalana murettele okathi wooxankiha”. Luis ni amwaarawe anihimya wiira onvekela Yehova moohihiyererya wiira aavahe murettele, waahaakhaliherya okhala oomaaleleya ni opaka soothanla sooloka. Nave aahoona wiira yaanikhaliheriwa ni yena. Akhala wiira ohoophwanyani muxankiho, nvileleke munvekelaka Yehova wiira oovaheeni murettele awe nave owo onoosuka murima ni muupuwelo anyu. — aRom. 12:12.

YEHOVA ONIMOOLIPIHANI

7. Ninkhala sai vaavo sinniphwanya aya mixankiho suulupale?

⁷ Okathi wa mixankiho. Okathi sinniphwanya aya mixankiho suulupale, moonelo ahu, muupuwelo ahu ni moota nimpaka ahu itthu pooti ohikhala ntoko nlimalenle ahu. Siisale ntoko parku okathi wa munamukhaya oniroihiwa awe khula mpantta, nave hiyo okathi sinniphwanya aya mixankiho, pooti ohoonaka etthu yoopaka. Ana, yoowo nimulavunle ahu ittima sivinre, onihimya wiira nuumala iya awe, Luis, okhwa, owo aahiriipiwa murima vanceene. Ana ohimmye so: “Okathi kaatepa aka wuupuwela wiira kihanle mekhaka, kaaniivaha nthowa. Nave miyo kaanitepa oriipiwa murima vanceene mwaha wa iyaka okhwa”. Ohiya-vo, Ana aaniixona okhala mekhawe ni aanixanka otepexawene okathi aareerela awe opaka itthu seiyo Luis aawerya awe opaka saana. Ikwaha sikina aixoona oryeene mphareya okathi wa munamukhaya. Yehova onnikhaliherya sai okathi ninriipiwa ahu murima nave ninkhalana ahu muupuwelo wooxankiha?

8. Ntoko onihimya awe Yesaya 3:6, exeeni Yehova onnileiherya awe?

⁸ Etthu Yehova onipaka awe. Owo onninleiherya wiira onoonikhaliheryaka. (Mmusome Yesaya 33:6.) Okathi parku oniphwanyiwa awe ni munamukhaya muulupale, owo onnipacerya orowa ninno-ninno masi mwa enamuna yoowoopiha. Wiira parku owo ohipittuwe, aparku akina annikhalana mapawe anaataliwa mukerekhere wa parku owo ni maasi. Mapawe awo annimukhaliherya parku okathi wa munamukhaya ni annaakhaliherya atthu awenle-mo okhala oovareleleya. Moolikanasa, Yehova onninivarelela vaavo nimmuroromela ahu okathi sinniphwanya aya mixankiho.

9. Itthu ninrumeela ahu wiira nitokose, sinrowa onikhaliherya sai okhala oomaaleleya? (Nwehe efootu.)

⁹ Etthu nikhanle ahu oopaka. Okathi sinoophwanyaayani mixankiho, mwiimananiheke opaka ele muniwerya anyu wiira mulipihe waamini  wanyu. Ekeekhai wiira khamunrowa owerya opaka itthu ntoko mwaapaka anyu khalai, masi muhiliyale wiira Yehova tooreera murima. (Munwehe-tho Luka 21:1-4.) Enamuna emosa mukhanle anyu oolipiha waamini wanyu, ori wiivaha okathi wiira mukhalane yoosoma ya omwaneene ni wuupuwelela. Xeeni ninhimya ahu siiso? Okhala wiira Yehova orumeelaka mutthenkeso awe, onninivaha malakiheryo anikhuma mbiibiliyani yaawo anrowa onikhaliherya wiira nilipihe waamini wahu. Wiira mphwanye itthu muniphavela anyu osuwela, pooti otokosa murumeelaka itthu nirina ahu olelo-va ntoko, aplikativo JW Library^® ni Eliivuru Enaakhaliherya Anamoona a Yehova Otokosa Myaha Sikumiheriwe. Monika yoowo nimulavunle ahu ittima sivinre, onihimya wiira okathi samphwanya aya mixankiho ahinoona etthu yoopaka, aanitokosa orumeelaka itthu iya niromonle ahu. Mwa ntakiheryo, owo aahitokosa nuulumo noowi “onanariwa”. Nave ikwaha sikina owo aahitokosa nuulumo noowi “owokiwa” ni “ororomeleya”. Nuumala-vo, aanisoma myaha iyo mpakha okhala oomaaleleya. Owo onihimya so: “Waanipacerya, kaahixanka vanceene. Masi nuumala otokosa ni osoma myaha iye, koona ntoko Yehova okikupaarelaka. Okathi kaasoma aka, kaahoona wiira Yehova aanisuwela mixankiho saka sootheene ni aanikikhaliherya”. Nave osuwela wiira Yehova onniweha mixankiho sahu, eyo pooti onikhaliherya okhala oomaaleleya okathi ninxanka ahu. — Esal. 119:143, 144.

YEHOVA ONIMOOKHALIHERYANI

10. Ninkhala sai hata nuumala muxankiho ahu ovira?

¹⁰ Okathi wa mixankiho. Hata nuumala muxankiho ahu ovira, mahiku makina hiyo pooti ohikhalanaka ikuru ni muupuwelo ahu ohikhala saana. Hiyo pooti wiilikanyihaka ni mutthu aawerya otthimaka vanceene, masi nenna-va oneetta ohorokonnye ene mwetto ohinawerya otthimaka ntoko khalai. Hiyo pooti wiimananihaka ovara miteko naawerya ahu khalai ovara moowaakuveya, aahiiso ohikhalana ikuru wiira nivare miteko naalimalenle ahu ni saanisivela. Ntoko Eliya, pooti ohinikhweelaka ovenya masi nnatthuna orupa paahi. (1 Mam. 19:5-7) Exeeni Yehova onileiherya awe opaka okathi nihinkhalana ahu ikuru?

11. Mwa enamuna xeeni ekina Yehova onnikhaliherya awe? (Esalimo 94:18)

¹¹ Etthu Yehova onipaka awe. Owo onnileiherya onilipiha. (Musome Esalimo 94:18.) Ntoko siisale mulipa onitthimaka ohorokonnye mwetto onipirisari awe etthu wiira owerye weetta, nave hiyo nihaana okhaliheriwa wiira nihihiye ovara miteko sa Yehova. Okathi owo, Yehova onninleiherya ohimyaka so: “Okhala wiira miyo  Apwiya, ka Muluku anyu, kinimoovarelani ntata nanyu noolopwana kiwiirelekeni: Muhoove , miyo kinimookhaliheryani”. (Yes. 41:13, Piipiliya Emakhuwa.) Mwene Davidi aaheemya nikhaliheryo nno. Okathi wa mixankiho ni aalupatthiwa awe ni awanani awe, Davidi aahimuleela Yehova ohimyaka so: “Ntata nanyu noolopwana ti ninkivarelela”. (Esal. 18:35, Piipiliya Emakhuwa.) Yehova onnikhaliherya sai?

12. Atthu xeeni Yehova onaarumeela awe wiira onikhaliherye okathi nihinkhalana ahu ikuru?

¹² Ikwaha sinceene, Yehova onnikhaliherya aarumeelaka atthu akina. Mwa ntakiheryo, ekwaha emosa Davidi aakhulumunwe awe, mpatthani awe iitthaniwa, Yonathani, aahimuxukurya wiira omulipihe orumeelaka moolumo awe. (1 Sam. 23:16, 17) Mwa enamuna emosa-ru, Yehova aahimuthanla Eliseyo wiira amukhaliherye Eliya. (1 Mam. 19:16, 21; 2 Mam. 2:2) Olelo-va, Yehova pooti waarumeela amusi ahu, apatthani aahiiso axitokweene wiira onikhaliherye. Tthiri ikwaha sikina ninriipiwa ahu murima aahiiso ninxanka ahu, hiyo pooti ophavelasaka okhala mekhihu. Eyo enniiraneya. Exeeni nikhanle ahu oopaka wiira Yehova onikhaliherye?

13. Exeeni nikhanle ahu oopaka wiira nttottele mureerelo nikhaliheryo na Yehova? (Nwehe efootu.)

¹³ Etthu nikhanle ahu oopaka. Mwiimananiheke wiira muhikhaleke mekhinyu. Akhala wiira nnimwiivalaanya ni atthu akina, yoophavela ahu enrowa okhala paahi owehexexa mixankiho sahu aahiiso itthu sinnikhumelela. Oviriha okathi munceene nuupuwelelaka itthu iyo, pooti oniiriha opaka yoothanla yoohiloka. (Mir. 18:1) Ekeekhai wiira ikwaha sikina ninnipirisari okhala mekhihu, otepexa wene okathi yoowo sinniphwanya aya mixankiho. Nihiliyale wiira atthu awo yoovaha Yehova onirumeela awe wiira onikhaliherye, nto nihiviriheke okathi munceene niri ene mekhihu. Hata ikwaha sikina vavilaka opaka eyo, mweemereryeke okhaliheriwa ni amusi anyu, apatthani aahiiso axitokweene. Mukupaliki wiira eyo enamuna Yehova onirumeela awe wiira ookhaliheryeni. — Mir. 17:17; Yes. 32:1, 2.

YEHOVA ONIMOOMAALIHANI

14. Itthu xeeni sikhanle ooniiriha woova?

¹⁴ Okathi wa mixankiho. Ikwaha sikina pooti oniphwanya mixankiho sinrowa oniiriha woova. Biibiliya onnaalavula arumeyi a Muluku oororomeleya, yaawo ikwaha sikina, yoova mwaha wa awanani aya ni itthu sikina. (Esal. 18:4; 55:1, 5) Moolikanasa, ikwaha sikina hiyo pooti olupatthiwaka oskola, omutekoni ni amusi aahiiso kuvernu. Nave okathi onniphwanya aya oretta, ikwaha sikina ninnoova okhwa. Okathi itthu iyo  sinnikhumelela aya, woonasa wene hiyo pooti wuupuwelaka ntoko mwaana onoona wiira khonikhapeleliwa. Yehova onnikhaliherya sai okathi sinnikhumelela aya itthu ntoko iyo?

15. Moovarihana ni Esalimo 94:19, exeeni Yehova onrowa awe opaka?

¹⁵ Etthu Yehova onipaka awe. Owo onninimaaliha ni onihakalaliha. (Musome Esalimo 94:19.) Esalimo ela, woonasa wene pooti owiirihani omuupuwela mwaana yoowo otutuxiwe mwaha wa etari ohinawerya orupa. Nkamuupuweleni paapa omuyanre ene mwaana owo onammaaliha mpakha orupa! Nnaamwi vaweryaneya aka mwaana owo otthikela-tho wiiwa itari, paapa onnimmaaliha nto eyo ennimwiiriha wiixoona okhala oovareleleya. Okathi sinniphwanya aya mixankiho soowoopiha, hiyo pooti ohimya wiira nimpirisari oyariwa ni omaalihiwa ni Tiithi ahu a wiirimu, Yehova, mpakha miyuupuwelo sahu soohiloka ovira. Masi Yehova onrowa onimaaliha sai?

16. Exeeni nikhanle ahu oopaka, wiira nttottele mureerelo moota Yehova onnimaaliha awe? (Nwehe efootu.)

¹⁶ Etthu nikhanle ahu oopaka. Nviriheke okathi munceene mulavulaka ni Yehova munvekelaka, ni osoma Nuulumo nawe. (Esal. 77:1, 12-14) Vakhala wiira munoopaka eyo, okathi sinoophwanyaayani mixankiho etthu yoopacerya munrowa anyu opaka, ori onvekela Yehova wiira ookhaliheryeni. Mmuleeleke Yehova itthu sootheene siniwiirihani woova ni sinooxankihani. Nuumala-vo, nwiriyaneke etthu Yehova onihimya awe mmusomaka Biibiliya. Mwiira siiso, munimoona wiira Yehova onnoomaalihani. (Esal. 119:28) Okathi munoova anyu, nyuwo pooti ophwanya nimaaliho musomaka soowiiraneya siri mbiibiliyani. Mwa ntakiheryo, nyuwo pooti ophwanya nimaaliho musomaka eliivuru ya Yoobi, Esalimo ni Miruku aahiiso moolumo a Yesu ari eliivuru ya Matheyo ekapiitulu 6. Okathi muninvekela anyu Yehova ni omusoma Biibiliya, munimoona wiira yena onnoomaalihani.

17. Exeeni ninreerela ahu okupaliki?

¹⁷ Nikupaliki wiira khula okathi, Yehova ori oolikaneene wiira onikhaliherye okathi sinniphwanya aya mixankiho mookumini mwahu. Khonikhala-khala, onihiyaka mekhihu. (Esal. 23:4; 94:14) Yehova onnileiherya onikhapelela, onilipiha, onikhaliherya ni onimaaliha. Yesaya 26:3, onnihimya etthu ekina Yehova onnilipiherya awe. Owo onihimya so: “Nyuwo, Apwiya, munnalipiha ni murettele ale anthipelela owiwelelani ni wororomelani”. Nto mmuroromeleke Yehova ni muttotteleke mureerelo itthu sootheene Yehova onipaka awe wiira ookhaliheryeni. Mwapaka eyo khamunrowa ohiya okhalana ikuru hata okathi wa mixankiho.