1. Nyuwo munuupuwela wiira Yehova ori sai?

 NIIREKE mootoko wuupuwela moota Yehova ori awe? Okathi munninvekela anyu, exeeni munuupuwela anyu? Nnaamwi apinaatamu ahiweryaka onweha Yehova, masi Biibiliya onnimulavula mwa inamuna soovirikana. Owo onihimya wiira Muluku ‘tonnivaha ikuru’ nave onlikana ni “mooro onipwetexa”. (Esal. 84:11; aHeeb. 12:29) Ezekiyeli aahoonihiwa Yehova olikanaka ni nluku noowaryexa, eyuuma yoowooxiwa ni ekhweyi erina waarya wootutha. (Ezek. 1:26-28) Itthu iyo onilikanyihiwa awe Yehova, pooti onitikiniha aahiiso onoopiha.

2. Exeeni eniwiiriha atthu akina ohikupaliki wiira Yehova onnaaphenta?

² Okhala wiira khaninwerya onweha Yehova, pooti onivilaka okupali wiira onniniphenta. Mwaha wa itthu siwiiranenle mweekumini mwaya, atthu akina anuupuwela wiira Yehova khonaaphenta. Woonasa wene, khatonko okhalana paapa onaaphenta. Yehova onnisuwela miyoonelo iyo ni moota vannixankiha aya omwaattamela. Wiira onikhaliherye, owo oorumiha olempwa mukhalelo awe wootepa ooreera mbiibiliyani.

3. Xeeni ninreerela ahu ovahaka efaita ophenta wa Yehova?

³ Biibiliya onnimuhimya Yehova okhala Muluku oophenta. (1 Yoh. 4:8) Tthiri mukhalelo muulupale wa Yehova, ophenta. Eyo enooniherya wiira Yehova onnipaka itthu sootheene mwa niphento. Ophenta wa Yehova ti wuulupale ni khorina mukano nave onniwooniherya ale ahinimphenta. (Math. 5:44, 45) Mwaha ola, nnimwiixutta voohimya sa Yehova ni ophenta wawe. Okathi nniixutta ahu voohimya sa yena, omphenta wahu onnincerereya.

YEHOVA ONNINIPHENTA VANCEENE

4. Nvahe ntakiheryo nnooniherya moota ophenta wa Yehova onnikhaliherya aya. (Nwehe efootu.)

⁴ “Yehova toophenta vanceene”. (Yak. 5:11) Mbiibiliyani, Yehova onnilikanyihiwa ni maama onimmaaliha mwanawe. (Yes. 66:12,  13) Mwa ntakiheryo, nkamuupuweleni maama onimukhapelela saana mwanawe. Owo onnimuhela vapeeto mwaana owo ni onnimututheela ni moolumo oomaaliha. Okathi oninla awe aahiiso onoona awe owereya, maama owo onniimananiha vanceene wiira omukhapelele. Nto okathi sinniphwanya aya mixankiho, nihaana ororomela ophenta wa Yehova. Nasalimo aalempe so: “Ovelavela n’uxanka wahìniha murim’aka: vano nyuwo mokihakalaliha, khukitteliha murima”. — Esal. 94:19.

5. Yehova onnileiherya exeeni mwaha wa ophenta wawe woororomeleya?

⁵ Yehova toororomeleya. (Esal. 103:8) Hata nivonyaka, yena khonrowa oninyanyala. Aisarayeli yaanimutthekela Yehova ikwaha sinceene, hata vari siiso, mwaha wa niphento nawe nuulupale owo aanaalevelela. Owo aahimmye so: “Nyuwo ti moophaveleyaxa ohoolo waka, miyo kinnottittimihani ni kinnoophentani vanci-ene”. (Yes. 43:4, 5, Piipiliya Emakhuwa.) Yehova khoturukeyale. Khula okathi nihaana omuroromelaka. Hata nipanke ene itampi suulupale, Yehova khonrowa oninyanyala. Okathi ninttharuwa ahu ni nnatthikela waataana ni yena, nnimoonaka wiira onniniphenta. Owo onnileiherya wiira, ‘ononlevelela’. (Yes. 55:7) Biibiliya onihimya wiira Yehova ‘onimoolevelelani itampi sanyu ni onimooruuhelani mahiku a murettele’. — Mit. 3:19.

6. Zakariya 2:8, onniixuttiha exeeni voohimya sa Yehova?

⁶ Mmusome Zakariya 2:8. Okhala wiira Yehova toophenta, onnoona oxanka wahu ni onniphavela onikhaliherya. Owo onniriipiwa murima okathi sinniphwanya aya mixankiho. Nto nihaana onvekela nikupaliki wiira ‘ononsuka ntoko nitho nawe’. (Esal. 17:8) Niitho epantta yaamukhaani ni erina efaita yuulupale mweerutthuni mwahu. Vaavo Yehova onnilikanyiha awe ni niitho nawe, vanoolikana ohimyaka wiira ‘ole onaahaaxa atthu aka, onihaaxa etthu ya faita wa miyo’.

7. Xeeni ninreerela ahu olipiha ororomela wahu ophenta wa Yehova?

⁷ Yehova oniphavela nikupaliki wiira yena onniniphenta. Masi mwaha wa itthu sinikhumelenle, owo onnisuwela wiira hiyo pooti wiikohaka, akhala wiira onniniphenta. Aahiiso pooti wiira sinniniphwanya mixankiho sineehererya ororomela wahu ophenta wa Yehova. Nto exeeni enrowa olipiha ororomela wahu? Etthu enrowa olipiha, ori wiixutta moota Yehova onimphenta  awe Yesu, onaaphenta awe ale oothanliwa ni ootheene ahu.

MOOTA YEHOVA ONOONIHERYA AWE OPHENTA

8. Exeeni yaamukupaliha Yesu wiira aaniphentiwa ni Tiithi awe?

⁸ Okhuma khalai, Yehova ni Yesu anikhala vamosa. Ohinatthi orwa valaponi, Yesu ni Yehova yaakhala vamosa wiirimu mwa iyaakha sinceene. Nto awo yaalipiha ophentana waya mukina ni mukhwaawe. Ntoko onihimya awe Matheyo 17:5, Yehova aahooniherya wiira aanimphenta vanceene Yesu. Yehova anwerya ohimya paahi wiira ‘ola ti yoowo kimuthanlale aka’. Masi ophavelaka onisuweliha moota onimphenta awe Yesu, owo aahimmye wiira “ola Mwanaka, kinimphentexa aka”. Yehova aanittottopela mukhalelo wa Yesu ni itthu aarowa awe opaka muhoolo. (aEef. 1:7) Yesu khaahoverya moota Tiithi awe aamoonela awe. Ophenta wa Yehova waari wa ekeekhai ni waanimwiiriha Yesu okupali. Nto okupali iwo, waanimwiiriha ohimya ikwaha sinceene wiira Tiithi onnikiphenta. — Yoh. 3:35; 10:17; 17:24.

9. Yehova oniwooniherya sai waaphenta wawe ale oothanliwa? Mutthokiherye. (aRoma 5:5)

⁹ Yehova onnooniherya moota onaaphenta awe ale oothanliwa. (Mmusome aRoma 5:5.) Nkawehani nuulumo noowi “onnivaha awe”. Disionaario mmosa onihimya wiira, ophenta Yehova onnivaha awe, onlikana ni ‘maasi oowaatta a mmuro’. Tthiri moolumo ala annooniherya ophenta wuulupale oniwooniherya awe ale oothanliwa! Ale oothanliwa annisuwela wiira Muluku “onnaaphenta”. (Yuda 1) Murummwa Yohani aahihimya moota oonela awe ophenta wa Yehova, vaavo aalempe awe so: “Mooneke ophenta wuulupale Muluku, Tiithi, onoonihenrye awe, okhala wira ooneemererya wiihaniwa okhala anaawe!” (1 Yoh. 3:1) Niireke Yehova onaaphenta paahi atthu oothanliwa? Nnaari, okhala wiira oniwooniherya ophenta wawe atthu ootheene.

10. Etthu xeeni yuulupale enooniherya wiira Yehova onniniphenta?

¹⁰ Etthu xeeni yuulupale enooniherya wiira Yehova onniniphenta? Oonooniherya oniphenta wawe, onivahaka yoowoopola! (Yoh. 3:16; aRom. 5:8) Yehova oonivaha mwanawe onimphentexa awe, ni oheemererya okhwa wiira apinaatamu ootheene, aleveleliwe itampi saya ni vaweryaneye okhala apatthani awe. (1 Yoh. 4:10) Wiira niiwexexe moota animphenta aya khula mmosa a hiyo, nihaana wuupuwelela eperesu Yehova ni Yesu alinve aya wiira noopoliwe. (aGal. 2:20) Yehova khovanhe yoowoopola mwaha wookhala naxariya paahi. Eyo entaphulela ophenta wawe. Owo ohooniherya oniphenta wawe onivahaka etthu ya faita wa yena, Yesu. Yehova oheemererya wiira mwanawe ohaawe ni iiviwe mwaha wa mureerelo ahu.

11. Yeremiya 31:3, oniixuttiha exeeni?

¹¹ Ntoko niixuntte ahu, ohiya paahi Yehova oweha mixankiho sahu, masi owo onninooniherya oniphenta wawe. (Mmusome Yeremiya 31:3.) Yehova oonithanla okhala wiira onniniphenta. (Munwehe-tho Otumererya 7:7, 8.) Khiivo etthu nnakhala mutthu onrowa onivalaanya ni ophenta iwo. (aRom. 8:38, 39) Nyuwo munoonela sai ophenta wa Yehova? Musome Esalimo 23, nwehe moota Davidi oonela awe ophenta wa Yehova ni etthu nniixutta ahu ni ophenta iwo.

MUNOONELA SAI OPHENTA WA YEHOVA?

12. Mwarowa otthokiherya sai Esalimo 23?

¹² Musome Esalimo 23:1-6. Esalimo 23, eri ntoko nsipo ninnikhaliherya ororomela ophenta ni moota Yehova onnikhapelela awe voohimala. Mulipa-oolepa Esalimo ela, Davidi, onnihimya waataana aarina awe ni makampusi awe, Yehova. Davidi aanimuroromela ni aanimweemererya Yehova wiira omweettiheke. Nave okumi awe wootheene aamulipana yoowo. Davidi aanikupali wiira Yehova aamumphentaka yena mahiku ootheene. Exeeni yaamukupaliha?

13. Exeeni yaamukupaliha Davidi wiira anikhapeleliwa ni Yehova?

 ¹³ “Khivo enikihalela”. Davidi aanikupali wiira aanikhapeleliwa ni Yehova, okhala wiira khula okathi aanivahiwa itthu aapirisari awe. Nave owo aanisuwela wiira aahikhalana opatthani woolipa ni Yehova nave aanittottela mureerelo oreera murima wa Yehova. Ti etthu yaamwiiriha okupali wiira moohicikha etthu enrowa okhumelela muhoolo, Yehova aari oolikana ene wiira omukhapelele mwa inamuna sootheene aapirisari awe. Nroromelo Davidi aarina awe ni ophenta wa Yehova, naari nuulupale ovikana mixankiho sootheene samphwanya. Nto eyo yaanimwiiriha okhala oohakalala. — Esal. 16:11.

14. Yehova onnikhapelela sai mwa niphento?

¹⁴ Yehova onnimukhapelela khula mmosa a hiyo, otepexa wene okathi sinnikhumelela aya mixankiho mookumini mwahu. Claire, a yoowo orumenle oBeteli mwa iyaakha sinivikana 20, khoona moota woowaakhapelela amusi awe, okathi saaphwanya aya mixankiho suulupale. Mwa ntakiheryo, paapa awe waahimphwanya oretta oniitthaniwa trombose cerebral, oniiriha ottoopare aahiiso oramattha ohivara saana muteko. Nave muhima awe aahikumihiwa mmulokoni ni amusi awe yaahipwata nakoso yaamweetta aya ni khiyaarina empa yookhala. Yehova oonihenrye sai wiira aanaakhapelela mwa niphento? Claire onihimya so: “Yehova aanaakhapelela amusi aka ni aanaavaha itthu yaapirisari aya khula nihiku, ovikana iye kuupuwelaka! Khula okathi kinnuupuwelela moota Yehova aanikhaliherya awe ni nkinrowa oliyala ophenta wawe. Wuupuwelela nikhaliheryo ni ophenta wa Yehova, wookikhaliherya ovilela mixankiho”.

15. Exeeni yaamwiirinhe Davidi okhala oolipa? (Nwehe eteseenyo.)

¹⁵ “Awo t’anilipiha murim’aka”. Ikwaha sikina, Davidi aanixanka mwaha wa mixankiho ni  sooweeha sinceene samphwanya. (Esal. 18:4-6) Masi osuwela wiira aaniphentiwa ni okhapeleliwa ni Yehova, waahimwiiriha Davidi okhala oolipa. Yehova aanimukuxa Davidi oxankale ene omurowanaka “mapuro òwatta yolya” ni ‘omuró ori màsi òrirya wira amumuleke’. Moottharelana, Davidi aahiphwanya ikuru ni khaahiyale omurumeela Yehova moohakalala. — Esal. 18:28-32.

16. Ophenta wa Yehova onoolipihani sai?

¹⁶ Mwa enamuna emosa-ru, olelo-va ninniwerya oxintta ni ovilela okathi sinniphwanya aya mixankiho, mwaha wa ‘ophenta ohinimala’ wa Yehova. (Wikh. 3:22, Piipiliya Emakhuwa; aKol. 1:11) Nrowe nthokorerye yoowiiraneya ya Rachel. Owo aahixanka vanceene nuumala iyawe okumihiwa mmulokoni ni omwalana ni yena okathi wa koronaviiru. Yehova aamukhalihenrye sai Rachel? Owo onihimya so: “Yehova aahikikhaliherya woona wiira kaaniphentiwa. Owo aahikivaha apatthani yaaviriha okathi ari ene ni miyo, yaakivaha eyoolya, yaakinviyarela mensagem, yaanimusoma Biibiliya ni miyo, yaanikitteeliha murima ni yaanikuupuxerya wiira Yehova onnikikhapelela. Kinnimuxukhurela ni murima aka wootheene Yehova, mwaha wookivaha emusi ela yoophenta”.

17. Xeeni Davidi ‘ahoova awe etthu yootakhala’?

¹⁷ “Nkinova etthu yotakhala, mana nyuwo Apwiya, munkhala ni miyo”. Okumi wa Davidi ikwaha sinceene waari mmaxakhani, okhala wiira aahikhalana awanani awe ooweryexa onvikana yena. Hata vari siiso, ophenta wa Yehova waanimukhaliherya okhala oovareleleya ni woona wiira aanikhapeleliwa. Davidi aanisuwela wiira Yehova ari ni yena okathi wa mixankiho, nto eyo yaanimukhaliherya okhala oomaaleleya. Owo aahimwiipela Yehova ohimyaka so: ‘[Yehova] ookaakiherya sowopiha sothene’. (Esal. 34:4) Woova wa Davidi waari weekeekhai, masi ophenta wa Yehova waahikhalana owerya ovikana woova wawe.

18. Ororomela ophenta wa Yehova, onrowa wookhaliheryani sai okathi munoova anyu?

¹⁸ Ororomela ophenta wa Yehova onrowa onikhaliherya sai, okathi sinniphwanya aya mixankiho soowoopiha? Pioneera mmosa oniitthaniwa Susi, onnihimya moonelo yena ni iyawe yaarina aya nuumala mwanaya wiixiiva. Owo onitthokiherya so: “Okathi sinimukhumelela aya mutthu itthu sootakhala mootutuxerya, pooti omwiiriha oxanka vanceene. Masi ophenta wa Yehova onnimukhaliherya mutthu okhala oovareleleya ni osuwela wiira onnikhapeleliwa”. Rachel yoowo nimulavunle ahu ittima sivinre, onihimya so: “Ohiyu omosa, okathi murima waakiwereya aya vanceene, kaahinvekela Yehova. Okathi ole, kaahoona wiira Yehova aahikilipiha ni okimaaliha ntoko maama onimmaaliha  mwanawe, nuumala-vo, kaahirupa. Nkinikhala-khala kiliyalaka okathi ole”. Mutokweene mmosa oniitthaniwa Tasos, aahiviriha iyaakha 4 ori ene mukhatteya mwaha wa okhootta orowa etoropa. Aawenrye sai woona ophenta ni okhapelela wa Yehova? Owo onihimya so: “Yehova aahikivaha itthu sootheene kaapirisari aka ni itthu sikina. Nto eyo yoolipiha omuroromela waka khula okathi. Ohiya-vo, Yehova orumeelaka munepa awe woowaarya, aahikikhaliherya okhala oohakalala nnaamwi kaari opuro wooxankiha. Nto eyo yookilipiha wiira kaahihiye onvarela muteko, kinrowa otepaka ottottela mureerelo oreera wawe murima. Kaahipacerya orumeela ntoko pioneero ookilaatheya kiri ene mukhatteya”.

MMWAATTAMELEKE MULUKU A MAHIKU OOTHEENE

19. a) Osuwela wiira Yehova onniniphenta, onnikhaliherya sai okathi nimpaka ahu mavekelo? b) Ophenta xeeni wa Yehova onoovarani murima? (Nwehe ekaaxa eni: “ Soolepa Sinnikhaliherya Woona Ophenta Weekeekhai wa Yehova”.)

¹⁹ Soowiiraneya sootheene nithokorenrye ahu mwaha ola, sinnooniherya wiira “Muluku oophenta” ori ni hiyo! (2 aKor. 13:11) Nto owo onnimuthokorerya khula mmosa a hiyo. Ninnikupali wiira ale animuroromela Muluku anooreeriwa ni ‘ophenta wawe’. (Esal. 32:10) Vaavo nnuupuwelela ahu moota onooniherya awe ophenta wawe, nnimoonaka wiira owo Muluku a ekeekhai ni nnootepaka omwaattamela. Hiyo pooti omwaattamela ninvekelaka nimuleelaka wiira ninnipirisari niphento nawe okathi wootheene. Nihaana omuleela itthu sootheene sinnixankiha, nikupaliki wiira owo onniniwiriyana ni onimphavela onikhaliherya. — Esal. 145:18, 19.

20. Moota xeeni ophenta wa Yehova onnikhaliherya aya omwaattamela?

²⁰ Ntoko siisaale onnisivela aya woora mooro okathi wooriirya, mwa enamuna emosa-ru, nihaana osiveliwaka ni ophenta weekeekhai wa Yehova. Ophenta wa Yehova ti wuulupale nave owo onikhala mahiku ootheene. Tivonto, muttotteleke mureerelo ophenta wa Yehova mweekumi mwanyu okhuma nenna-va. Nto mwaha wa ophenta wa Yehova ootheene ahu nihaana ohimya wiira “miyo kinnaphenta Apwiya”! — Esal. 116:1.