1. Nipakeke exeeni wiira nimuhakalalihe Yehova?

 NKUUPUWELANI munvahale ene mutthu munimphenta anyu, etthu yooreera ni ekhanle awe oovarihela muteko. Nyuwo mwaamuriipiwa murima nuumala osuwela wiira mutthu owo ohenle mukaaxani osuka ni oliyala. Moovirikana ni vo, mwaamuhakalala mwasuwela wiira mutthu owo onnirumeela etthu eyo ni ohooxukhurelani. Nlikanyiho nla, ninvarihana sai ni yoowoopola Yehova onivahale awe? Yehova oonivaha Mwanawe wiira okhwe mmureerelo ahu. Mweekeekhai, Yehova onnihakalala aaniwehaka nixukhurelaka yoowoopola onivahale awe ni ophenta wawe omwiirihale onivaha yoowoopola. — Yoh. 3:16; aRom. 5:​7, 8.

 2. Mwaha ola, ninrowa othokorerya exeeni?

² Vaavo iyaakha sinivira aya, hiyo pooti opaceryaka ohivaha efaita yoowoopola Muluku onivahale awe. Nto eyo yaarowa olikanaka ni ohela mukaaxani etthu yooreera Yehova onivahale awe. Hata nihakalanle ene mwaha woovahiwa, masi nroosuka ni niliyala opuro nipwehale ahu. Wiira eyo ehiiraneye, nihaana oxukhurelaka etthu Muluku ni Kristu aniirenle aya. Mwaha ola, nnoorowa othokorerya eyo. Ninrowa oweha mareeliho yoowoopola anniphwanyiha aya ni anrowa aya oniphwanyiha muhoolo. Nave nnimoona moota woowooniherya omphenta wahu Yehova, otepexa wene okathi wa Wuupuwelela okhwa wa Yesu.

MOOTA YOOWOOPOLA ENNIKHALIHERYA AYA OLELO-VA

 3. Mwa enamuna xeeni ninttottela ahu mureerelo yoowoopola olelo-va?

³ Mukuttho woowoopola wa Kristu onninikhaliherya olelo-va. Mwa ntakiheryo, orumeelaka yoowoopola, Yehova onninlevelela itampi sahu. Yehova khonikhanyereriwa onilevelela. Masi owo onniphavela onilevelela. Nasaalimu mmosa aahooniherya oxukhurela  wawe mwaha wa Yehova okhala oolevelela. Owo iipale so: “Yehova, nyuwo ti mooreera murima, nave okathi wootheene muri oolikana ene wiira mulevelele”. — Esal. 86:5; 103:​3, 10-13.

 4. Tani anittottela mureerelo yoowoopola? (Luka 5:32; 1 Timootheyo 1:15)

⁴ Atthu akina pooti wuupuwelaka wiira khanireerela oleveleliwa ni Yehova. Ekeekhai wiira ootheene ahu khinaareerela oleveleliwa. Murummwa Paulo aanisuwela wiira ‘khaaphwanela wiitthaniwa murummwa’. Hata vari siiso, owo aahimmye wiira: “Masi oreera murima wuulupale wa Muluku, wookiiriha okhala murummwa”. (1 aKor. 15:​9, 10) Okathi ninttharuwa ahu soottheka sahu, Yehova onninlevelela. Mwaha wa xeeni? Khahiyo mwaha woowi nnooreerela oleveleliwa, masi okhala wiira owo onniniphenta. Tivonto, akhala wiira munniriipiwa murima muupuwelaka wiira khamunireerela oleveleliwa ni Yehova, musuweleke wiira Yehova khovahale yoowoopola para atthu oohittheka. Owo oovaha owiirelaka atthu oottheka, yaawo anittharuwa itampi saya. — Mmusome Luka 5:32; 1 Timootheyo 1:15.

 5. Niireke ootheene ahu ninniphwanela oleveleliwa ni Yehova? Mutthokiherye.

⁵ Nihuupuweleke wiira Yehova ohaana onilevelela mwaha woowi nipacenrye khalai omurumeela. Ekeekhai wiira, Yehova onnivaha efaita okhala wahu oororomeleya wa yena. (aHeeb. 6:10) Yehova khonivahale yoowoopola mwaha woowi hiyo noovara itthu sooreera nimwiirelaka yena. Masi oonivaha vootthuna vawe. Tivonto, vaarowa okhala voohiloka wuupuwela wiira okhala wiira noopaka itthu sinceene para Yehova, ninnireerela oleveleliwa. Akhala wiira nnimuupuwela siiso, vaarowa olikanaka ni ohimya wiira Yesu khaapirisari okhwa mmureerelo ahu. — Mulikanyihe ni aGalasia 2:21.

 6. Xeeni murummwa Paulo aimananiha awe ovara miteko sa Yehova?

⁶ Paulo aanisuwela wiira hata aimananiha vanceene wiira omurumeele Muluku, khaarowa oleveleliwa ni Muluku mwaha waivaavo. Nto xeeni ohaareere awe wiimananiha vanceene omurumeela Yehova? Owo khaapaka eyo wiira ooniherye ophwanelela, masi mwaha woowi aanixukhurela oreereliwa murima ni Yehova. (aEef. 3:7) Ntoko Paulo, hiyo ninnimurumeela Yehova mooluttuweliwa, ohiya mwaha woowi nimphavela ophwanelela omoreliwa ikharari, masi mwaha woowi nimphavela wooniherya oxukhurela wahu onireerela wawe murima.

 7. Enamuna xeeni ekina ninttottela ahu mureerelo yoowoopola olelo-va? (aRoma 5:1; Yakobo 2:23)

⁷ Enamuna ekina ninttottela ahu mureerelo yoowoopola olelo-va, okhala wiira nnoowerya okhalana waataana wooloka ni Yehova. a Ntoko nithokorenrye ahu mwaha ovinre, okathi naayariwa ahu, khaniirela mpantta emusi ya Muluku. Masi okhala wiira yoovahiwa yoowoopola, hiyo nnoowerya okhalana “murettele ni Muluku” ni okhala apatthani awe. — Mmusome aRoma 5:1; Yakobo 2:23.

 8. Xeeni ninreerela ahu omuxukhurela Yehova mwaha wa onivaha eparakha ya ovekela?

⁸ Nrowe niwehe etthu emosa yooreera nimphwanya ahu mwaha wookhalana waataana wooloka ni Yehova, eyo piiyo, eparakha ya ovekela. Yehova khoniwiriyana paahi mavekelo nimpaka ahu niri ene mmithukumanoni aahiiso ni atthu akina. Nave-tho, onniwiriyana mavekelo nimpaka ahu niri ene mekhihu. Okathi ninvekela ahu ninnivukula oxanka. Masi eyo khahiyo etthu emosa paahi nimphwanya ahu okathi ninvekela ahu. Ovekela pooti olipiha ompatthani nrina ahu ni Muluku. (Esal. 65:2; Yak. 4:8; 1 Yoh. 5:14) Okathi aari awe valaponi, Yesu aahivekela ikwaha sinceene maana aanisuwela wiira Yehova aaninwiriyana. Nave aanisuwela wiira ovekela, waamulipiha waataana aarina awe ni Tiithi awe. (Luka 5:16) Ninnixukhurela vanceene  mwaha wa mukuttho wa Yesu, okhala wiira ninniwerya okhala apatthani a Yehova ni owerya olavulana, naavekelaka!

YOOWOOPOLA ENROWA ONIKHALIHERYA SAI MUHOOLO?

 9. Yoowoopola enrowa waakhaliherya sai arumeyi oororomeleya muhoolo?

⁹ Yoowoopola enrowa waakhaliherya sai arumeyi oororomeleya a Yehova muhoolo? Orumeelaka yoowoopola, Yehova onrowa waavaha okumi woohimala. Atthu anceene anihimya wiira khivanrowa oweryaneya okhala mahiku ootheene, okhala wiira okhuma khalai atthu annookhwa. Masi Yehova aapattunxe apinaatamu wiira akhaleke mahiku ootheene. Vaakhanle wiira Adamu khatthenke, khuuvo aarowa wuupuwelaka wiira okhala mahiku ootheene khivaniweryaneya. Nnaamwi olelo-va nihiweryaka okhala mahiku ootheene, nihaana okupali wiira vanooweryaneya. Ninnihimya siiso, okhala wiira noosuwela wiira Yehova ooliva etthu yuulupale, eyo piiyo, onvaha Mwanawe mmoseene. — aRom. 8:32.

10. Exeeni anlipelela aya ale oothanliwa ni ale a ipwittipwitthi sikina?

¹⁰ Nnaamwi okumi woohimala eri ene etthu ninrowa ahu ophwanya muhoolo, Yehova oniphavela wiira nuupuweleleke olelo-va. Makristau oothanliwa, annuupuwelela ari ene wiirimu alamulelaka ni Kristu. (Wiis. 20:6) Ipwittipwitthi sikina, sinnuupuwelela siri ene mparayiisu valaponi, weiwo sihinrowa aya woonaka owereya, ohaawa aahiiso oriipiwa murima. (Wiis. 21:​3, 4) Niireke nyuwo muniirela mpantta ipwittipwitthi sikina mulipelelaka okhala mahiku ootheene valaponi? Ela khahiyo yoovaha yaamukhaani, nalikanyiha ni okumi anrowa aya ovahiwa ale anrowa okhalaka wiirimu! Apinaatamu apattuxiwe wiira akhaleke valaponi. Nto okhala valaponi enrowa okhala etthu yoohakalaliha.

11-12. Mareeliho xeeni ninlipelela ahu waakhela mparayiisu? (Nwehe eteseenyu.)

¹¹ Nkahaya muupuwele moota vanrowa aya okhala vooloka okhala mparayiisu valaponi. Nyuwo khamunrowa oxankaka mwaha wa owereiwa ni okhwa. (Yes. 25:8; 33:24) Yehova onrowa woovahani itthu sootheene sooreera muniphavela anyu. Nto etthu xeeni munrowa anyu ophavela wiixutta okathi owo? Niireke munrowa ophavela osuwela oratteene inama? Niireke munrowa ophavela omwiixutta omoopa oratteene  viola? Niireke munrowa ophavela wiixutta otesenyari? Moohaanyiherya, mparayiisu anrowa opirisariki atthu anisuwela otesenyari, oteka ipa ni olima. Nave anrowa opirisariki atthu anrowa olokiheryaka ni opaka itthu, eyo piiyo, atthu anrowa olokiheryaka eyoolya, anrowa opakaka materiyaale anrowa orumeeliwaka, nave anrowa waalaka miri ni okhapelela. (Yes. 35:1; 65:21) Okhala wiira munrowa okhalaka mahiku ootheene, nyuwo munookhalana okathi wa wiixutta itthu iya ni sikina.

¹² Vanrowa okhala voohakalaliha owaakhela ale anrowa ohihimuxiwaka! (Mit. 24:15) Nave munoohakalala wiixutta itthu sinceene Yehova opattunxe awe. (Esal. 104:24; Yes. 11:9) Etthu yootepa oreera, okhala wiira munrowa ohakalalaka vanceene mwaha wa omukokhorela Yehova muhiivahaka nthowa! Niireke munoophavela oturuka mareeliho ala a muhoolo mwaha wa “opuha vakhaani miteko sa etampi”? (aHeeb. 11:25) Nnakhala vakhaani! Okumi ninrowa ahu okhalana muhoolo, onrowa okhala wootepa ohakalaliha ovikana khula etthu ninrowa ahu waakhela elapo ela. Muhiliyale wiira eparayiisu, khahiyo etthu ninrowa ahu omakelaka olipelela. Onoophiya okathi ninrowa ahu okhalaka memmo. Vanooweryaneya okhala mahiku ootheene, okhala wiira Yehova onniniphenta vanceene ni onvaha Mwanawe wiira okhwe mmureerelo ahu!

MOONIHERYEKE WIIRA MUNNIXUKHURELA OPHENTA WA YEHOVA

13. Ninrowa wooniherya sai oxukhurela wahu ophenta wa Yehova? (2 aKorinto 6:1)

¹³ Ninrowa wooniherya sai oxukhurela wahu mwaha wa Yehova onivaha yoowoopola? Nnoowerya opaka eyo, nipwehaka nipuro noopacerya omurumeela Yehova mookumini mwahu. (Math. 6:33) Mweekeekhai, Yesu ohookhwa “mwaha wa atthu otheene, wira ale ari akumi, ahiisiveliheke mmansaya, masi amusiveliheke Kristu, yoowo okhwiiye mwaha wa atthu awo, ni ohihimuxiwe”. (2 aKor. 5:15) Yehova oonireerela murima vanceene ni oonilevelela. Akhala wiira nnoopaka itthu sootheene ninwerya ahu wiira nimurumeele, nnimooniherya wiira ninnisuwela itthu opanke awe mmureerelo ahu ni ninnimuxukhurela ni murima wootheene. — Mmusome 2 aKorinto 6:1.

14. Ninrowa wooniherya sai wiira ninniroromela malakiheryo a Yehova?

¹⁴ Nave-tho, nnimooniherya oxukhurela ophenta wa Yehova, nimuroromelaka ni otthara malakiheryo awe. Moota xeeni? Okathi nimphavela ahu opaka yoothanla enivarihana ni osoma ni ovara muteko, nihaana osuwela ele Muluku onihimya awe voohimya sa mwaha owo. (1 aKor. 10:31; 2 aKor. 5:7) Okathi nnooniherya ahu waamini ni soothanla sahu, enniiraneya etthu yooreera, eyo piiyo, waamini wahu ni ompatthani ahu ni Yehova, onootepa olipa. Nave nlipelelo nahu na okhala mahiku ootheene ninnitepa olipa. — aRom. 5:​3-5; Yak. 2:​21, 22.

15. Ninrowa wooniherya sai oxukhurela ohinatthi ni nuumala muthukumano wa Wuupuwelela?

¹⁵ Yookhala enamuna ekina nikhanle ahu oowooniherya oxukhurela wahu ophenta wa Yehova. Enamuna eyo, ti opaka itthu sootheene ninwerya ahu vahinatthi ni nuumala nihiku na Wuupuwelela,  wiira nimooniherye Yehova moota ninxukhurela ahu yoowoopola. Ohiya wiilokiherya paahi wiira nirowele muthukumano owo, nihaana waalattula atthu akina wiira arowe. (1 Tim. 2:4) Mwaatthokiheryeke atthu awo munaalattula anyu, etthu enrowa wiiraneya okathi wa muthukumano wa Wuupuwelela. Nyuwo pooti owooniherya iviidiyu sini: Exeeni Yaamwiirinhe Yesu Okhwa? ni Wuupuwelela Okhwa wa Yesu, siri esaite jw.org. Nkuupuwelani ohakalala onikhala wiirimu, vaavo ale ahiyale olaleerya ni orowela mithukumano anitthikela aya ovara miteko iyo! (Luka 15:​4-7) Okathi owo wa muthukumano wa Wuupuwelela, nimananihe waakhomasa ale ahiyale olaleerya ni orowela mithukumano ni ale anampacerya muthukumano owo. Nimphavela owooniherya wiira ninniwaakhela! — aRom. 12:13.

16. Xeeni vanireerela aya wuncererya muteko woolaleerya ohinatthi ni nuumala muthukumano wa Wuupuwelela?

¹⁶ Niireke munoomananiha opaka sootheene muniwerya anyu, wiira muncererye muteko muninvarela anyu Yehova ohinatthi ni nuumala muthukumano wa Wuupuwelela? Tthiri opaka eyo, enamuna ya wooniherya oxukhurela wahu ele Yehova ni Yesu aniirenle aya. Vaavo nintepa ahu oluttuweliwa muteko woolaleerya, ninrowa otepaka onweha Yehova onikhaliheryaka, ni omuroromela wahu onrowa wuncerereyaka. (1 aKor. 3:9) Nave musomeke soolepa sa mbiibiliyani sinivarihana ni Wuupuwelela, siri eliviriinyu eni: Ovarerya Soolempwa Khuta Nihiku aahiiso mutthareke eprokrama eri Ekaderno Enirumeeliwa Omithukumanoni. Okathi wa yoosoma anyu ya omwaneene, nyuwo pooti othanla otokosa soowiiraneya iyo sa mbiibiliyani.

17. Exeeni enimuhakalaliha Yehova? (Nwehe ekaaxa eni: “ Inamuna sa Wooniherya Omuxukhurela Wahu Yehova”.)

¹⁷ Muhixanke akhala wiira makhalelo anyu, khaniweemereryani otthara malakiheryo ootheene nithokorenrye ahu mwaha ola. Muhiliyale wiira Yehova khonlikanyiha muteko muninvarela anyu ni wa atthu akina. Owo onnixukhurela ophenta munimooniherya anyu. Yehova onnihakalala okathi oniweha awe oxukhurela wanyu ni murima anyu wootheene yoovaha ela yooreera, eyo piiyo, yoowoopola. — 1 Sam. 16:7; Mar. 12:​41-44.

18. Exeeni enniiriha omuxukhurela Yehova ni Yesu Kristu?

¹⁸ Mwaha woovahiwa yoowoopola, vanniweryaneya oleveleliwa itampi sahu, okhalana ompatthani wooloka ni Yehova ni olipelela okumi woohimala. Tivonto, khula okathi nimuxukhureleke Yehova mwaha wa niphento onoonihenrye awe nenlo nimwiirinhe onivaha mareeliho awo ootheene. (1 Yoh. 4:19) Nave-tho, nimuxukhureleke Yesu yoowo olenve okumi awe mmureerelo ahu! — Yoh. 15:13.