MWAHA ONITHOKORERIWA 3
NSIPO 35 ‘Nisuweleke Othanla Itthu Sootepa Otthuneya’
Mpakeke Soothanla Sinimuhakalaliha Yehova
“Etthu yoopacerya wiira mutthu okhalane ankhili, ti omuttittimiha vanceene Yehova, nave mwamusuwela Muluku Oowaarya, munookhalana ankhili”. — MIR. 9:10.
ELE NINROWA AHU WIIXUTTA
Mwaha ola, nnooweha moota woowaarumeela ankhili, osuwela ni miruku wiira niwerye opaka soothanla sooloka.
1. Etthu xeeni yooxankiha ootheene ahu enireerela ahu opaka?
KHULA NIHIKU nihaana opaka soothanla. Soothanla sikina, ti sookhweya opaka ntoko othanla etthu ninrowa ahu olya voosiisu ni okathi woorowa orupa. Masi soothanla sikina, ti soovila osuwela etthu enireerela ahu opaka. Tivonto, soothanla nimpaka ahu pooti waafetari okumi ahu, ohakalala wahu, owaafetari atthu nnaaphenta ahu ni waafetari omukokhorela wahu Muluku. Nimphavela wiira soothanla sahu, siniphwanyiheke mureerelo hiyo ni amusi ahu. Nave etthu yuulupale, nimphavela wiira soothanla sahu simuhakalaliheke Yehova. — aRom. 12:1, 2.
2. Itthu xeeni sikhanle oowookhaliheryani opaka soothanla sooloka?
2 Munoowerya opaka yoothanla yooloka akhala wiira: (1) Munoophavela osuwela itthu sootheene sinihela muhina mwaha owo, (2) akhala wiira munoosuwela moota Yehova onoonela awe mwaha owo ni (3) akhala wiira munoovarerya saana mwaha owo. Mwaha ola, nnoothokorerya iponto iya tthaaru, seiyo sinrowa onikhaliherya osuwela orumeela muupuwelo ahu wiira niwerye opaka soothanla sooloka. — Mir. 2:11.
MPHAVELEKE OSUWELA ITTHU SOOTHEENE SA MWAHA OWO
3. Xeeni vari aya vooloka ophavela osuwela itthu sootheene sinihela muhina mwaha owo? Mutthokiherye.
3 Etthu yoopacerya enireerela wiira mutthu opake yoothanla yooloka, ori ophavela osuwela itthu sootheene sinihela muhina mwaha owo. Xeeni vari aya vooloka opaka eyo? Nkahaya muupuwele ela: Mutthu oniwereiwa eretta yuulupale, onnirowa okumana ni meetiku. Niireke meetiku aarowa onvaha murette mutthu owo oniwereiwa, ohinatthi onvekela omwiira anaalisi aahiiso osuwela etthu eninwereya? Khaarowa opaka eyo. Nyuwo muhaana ophavela osuwela itthu sootheene sinihela muhina mwaha owo. Munrowa owerya sai opaka eyo?
4. Moovarihana ni Miruku 18:13, ninrowa owerya sai osuwela itthu sootheene sinihela muhina mwaha owo? (Nwehe efootu.)
4 Munoowerya osuwela itthu sootheene sinihela muhina mwaha owo, akhala wiira munookoha. Mwa ntakiheryo, nkuupuwelani wiira moolattuliwa orowa ofestani. Niireke muhaana orowa? Akhala wiira khamunimusuwela mutthu oolattunleni ni yoolakela ya efesta eyo, nyuwo pooti opaka makoho ntoko ala: “Opuro xeeni ni okathi xeeni enrowa aya opakiwa efesta eyo? Atthu akavi alattuliwe? Ti pani onrowa ohoolela efesta eyo? Tani anrowa efesta eyo? Atthu anrowa ovaraka exeeni ofestani iwo? Niireke sinookhala soowurya soohapala?” Waakhuliwa wa makoho ala, onimookhaliheryani opaka yoothanla yooloka. — Musome Miruku 18:13.
Munoowerya osuwela itthu sootheene akhala wiira munookoha (Nwehe ettima 4) a
5. Etthu xeeni munireerela anyu opaka, akhala wiira moosuwela itthu sootheene sinihela muhina mwaha owo?
5 Nuumala osuwela itthu sootheene, nvareryeke mwaha owo. Mwa ntakiheryo, ankhi mwasuwela wiira atthu ahinittittimiha malamulo a mbiibiliyani anookhala ofestani iwo aahiiso sinookhala soowurya soohapala, masi khuuvo onrowa oweheryaka? Niireke munnoona wiira khula mutthu onrowa opakaka etthu enimusivela? (1 Ped. 4:3) Ohiya-vo, ankhi vakhala wiira okathi wa efesta eyo onrowa okhala okathi wa mithukumano aahiiso woolaleerya? Vaavo munisuwela anyu itthu sootheene sinihela muhina mwaha owo, onimookhaliheryani opaka yoothanla yooloka. Masi yookhala etthu ekina munireerela anyu opaka. Vano nyuwo moosuwela moota munoonela anyu mwaha owo. Nto mwiikoheke so: Yehova onoonela sai mwaha ola? — Mir. 2:6.
MUSUWELEKE MOOTA YEHOVA ONOONELA AWE MWAHA OWO
6. Moovarihana ni Yakobo 1:5, xeeni ninreerela ahu onvekela Yehova wiira onikhaliherye?
6 Munvekeleke Yehova wiira ookhaliheryeni osuwela moota onoonela awe mwaha owo. Yehova onnileiherya onivaha miruku, sinrowa onikhaliherya osuwela akhala wiira etthu enithanla ahu, enoomuhakalaliha. Owo onninivaha miruku iyo “ni murima wotheene, ohipwapwaka”. — Mmusome Yakobo 1:5.
7. Munrowa osuwela sai moota Yehova onoonela awe mwaha owo? Mutthokiherye.
7 Akhala wiira monvekela Yehova wiira ookhaliheryeni, muhaana ovaha ephoole moota onrowa awe owaakhulani. Nkuupuwelani ela: Akhala wiira muneetta mukwaha murimeela, nyuwo muhaana omukoha mutthu onikhala muttetthe owo wiira ookhaliheryeni. Niireke mwanvikanihaka weetta mukwaha anyu, muhinatthi wiiwa etthu onaakhula awe? Nnaari. Moohaanyiherya, nyuwo mwanwiriyana oratteene malakiheryo aarowa awe woovahani. Mwa enamuna emosa-ru, vaavo muninvekela anyu Yehova miruku, nweheke moota onaakhula awe orumeelaka malakiheryo ni malamulo a Biibiliya anivarihana ni mwaha anyu. Mwa ntakiheryo, okathi munithanla anyu orowa ofestani ntoko nithokorenrye ahu ittima sivinre, nyuwo pooti oweha etthu Biibiliya onihimya awe mutokosaka myaha ntoko iya: Ifesta sootakhala, apatthani oohiloka ni ohela nipuro noopacerya Omwene ohiya itthu sinnisivela. — Math. 6:33; aRom. 13:13; 1 aKor. 15:33.
8. Mpakeke exeeni akhala wiira mumphavela ophwanya malakiheryo muniphavela anyu? (Nwehe efootu.)
8 Hata vari siiso, ikwaha sikina, muhaana okhaliheriwa wiira mphwanye soohimmwa sa mwaha munitokosa anyu. Nyuwo pooti ophwanya malakiheryo awo, mmukohaka munna aahiiso murokora orina soowiiraneya sinceene. Ohiya-vo, pooti ophwanya malakiheryo mutokosaka mmansinyu. Sookhala iliivuru sinceene, sikhanle oonikhaliherya osuwela etthu nikhanle ahu oopaka sintoko: Eliivuru Enaakhaliherya Anamoona a Yehova Otokosa Myaha Sikumiheriwe ni Iversiikulu Sinaakhaliherya Makristau. Muupuweleke wiira yoophavela ahu tiila: Opaka yoothanla enrowa omuhakalaliha Yehova.
Musuweleke moonelo wa Yehova (Nwehe ettima 8) b
9. Ninrowa osuwela sai akhala wiira yoothanla ahu enoomuhakalaliha Yehova? (aEefeso 5:17)
9 Ninrowa osuwela sai akhala wiira yoothanla ahu enoomuhakalaliha Yehova? Wanipacerya, nihaana omusuwela oratteene Yehova. Biibiliya onihimya wiira “mwamusuwela Muluku Oowaarya, munookhalana ankhili”. (Mir. 9:10) Okhalana ankhili eekeekhai, onitaphulela osuwela mikhalelo sa Yehova, yoolakela awe, ele oniphenta awe aahiiso ele oninyokha awe. Mwiikoheke so: ‘Moovarihana ni ele kinsuwela aka voohimya sa Yehova, yoothanla xeeni enireerela aka opaka enrowa omusivela?’ — Mmusome aEefeso 5:17.
10. Xeeni malakiheryo a Biibiliya ari aya a faita ovikana soolema sa amusi aahiiso mapuro anikhala ahu?
10 Tivo, wiira nimuhakalalihe Yehova, ikwaha sikina nihaana opaka itthu sihinaasivela atthu anaattamenle. Mwa ntakiheryo, anamuyari aniphavela okhaliherya, pooti omukhanyererya mwanaya mwaamuthiyana otheliwa ni mulopwana orina musurukhu munceene, hata mulopwana owo ohiluttuweliwaka omurumeela Yehova. Ekeekhai wiira anamuyari aniphavela omukhaliherya, masi mwanaya owo pooti wiikoha so: “Kiireke mulopwana ola onookikhaliherya olipiha waataana waka ni Yehova?” Yehova onoonela sai mwaha ola? Waakhuliwa waya ori Matheyo 6:33. Yoolepa ela, makristau anitumereriwa ‘ohela nipuro noopacerya Omwene’. Nnaamwi naattittimihaka anamuyari ahu aahiiso atthu a mmuttettheni mwahu, masi etthu yuulupale eniphavela ahu ori opaka etthu enimuhakalaliha Yehova.
MUHAANA OVARERYA SAANA MWAHA OWO
11. Mukhalelo xeeni oniromoliwa aFilipi 1:9, 10 onrowa wookhaliheryani ovarerya moonelo anyu?
11 Okhala wiira moophwanya malakiheryo a mbiibiliyani anivarihana ni yoothanla anyu, vano muhaana ovarerya saana mwaha owo. (Mmusome aFilipi 1:9, 10.) Akhala wiira ankhili anyu ari saana, animookhaliheryani wuupuwela etthu ekhanle ookhumelela ni yoothanla anyu. Soothanla nimpaka ahu, pooti okhala sookhweya, masi ikwaha sikina, pooti ovila opaka soothanla iyo. Ankhili animookhaliheryani opaka soothanla sooloka hata vavilaka.
12-13. Ankhili anrowa wookhaliheryani sai opaka yoothanla yooloka mwaaphavelaka muteko?
12 Nkuupuwelani mphavelasaka muteko wiira mukhaliheryeke emusi anyu. Nto muhiiwa wiira aakhala mapuro manli aniphaveliwa aya anamuteko. Vano nyuwo munnivarerya itthu sootheene, ntoko muteko ene, okathi onivira ovariwaka muteko owo, okathi munrowa anyu oviriha mweettaka murowaka omutekoni ni itthu sikina. Masi miteko iyo soomiili khahiyo sootthekeya para makristau. Woonasa wene, munnithanla muteko mmosa okhala wiira onnoosivelani aahiiso mwaha woowi oniliviwa musurukhu munceene. Masi sookhala itthu sikina munireerela anyu ovarerya muhinatthi weemererya muteko owo.
13 Mwa ntakiheryo, niireke muteko munrowa anyu othanla khonivariwa okathi sinikhala aya mithukumano sa muloko anyu? Niireke muteko owo onrowa anyu othanla, khonrowa wookhoottiheryani okhalana okathi wookhaliherya emusi anyu okhala yoovareleleya, yoohakalala ni olipiha waataana waya ni Yehova? Wiipakela makoho ala, onimookhaliheryani ohela nipuro noopacerya “itthu sootepa oreera”, eyo piiyo, omukokhorela wanyu Muluku, okhapelela emusi anyu ohiya ophavelasa muhakhu. Mwiira siiso, munoopaka yoothanla Yehova onrowa awe oreeliha.
14. Moota xeeni waarumeela ankhili ni waaphenta atthu, sinrowa aya onikhaliherya ohaatthekiha akina?
14 Ankhili anoonikhaliherya ovarerya saana moota yoothanla ahu enrowa aya owaafetari atthu akina, nisyakaka ‘waatthekiha akina’. (aFil. 1:10) Nave ikuwo ninwara ahu aahiiso moota nniitthokiha ahu, pooti owaafetari atthu akina. Mwa ntakiheryo, hiyo pooti othanla etiipu emosa ya ikuwo ni moota woowiitthokiha. Masi ankhi akhala wiira anna ni arokora ni ale ahikhanle Anamoona a Yehova, annuuliwa muru ni ikuwo ninwara ahu aahiiso ni moota nniitthokiha ahu? Ankhili anoonikhaliherya ottittimiha moota atthu akina anoonela aya mwaha owo. Ophenta, onooniiriha ophavela mureerelo ‘wa atthu akina’ ni okhala oowiiyeviha. (1 aKor. 10:23, 24, 32; 1 Tim. 2:9, 10) Niira siiso, nnoowerya opaka yoothanla enrowa wooniherya wiira ninnaaphenta ni waattittimiha atthu akina.
15. Muhaana wuupuwela exeeni muhinatthi opaka yoothanla yuulupale?
15 Akhala wiira munoopaka yoothanla yuulupale, muupuweleke etthu mukhanle anyu oopaka wiira mmalelihe. Yesu oniixuttihale wiira ‘nihaana oweha naarina musurukhu oniphiyerya’. (Luka 14:28) Tivonto, muhaana oweha okathi onipirisari, mireerelo ni wiimananiha munireerela anyu opaka, wiira yoothanla anyu yeette saana. Ikwaha sikina, nyuwo muhaana waakoha atthu a etthoko anyu, etthu khula mutthu onireerela awe opaka wiira yoothanla anyu yeette saana. Xeeni vari aya vooloka opaka eyo? Opaka eyo, onimookhaliheryani oweha marukunuxo munireerela anyu opaka aahiiso othanla etthu ekina enrowa okhaliherya. Okathi munrowa anyu waaleela atthu a etthoko anyu ni owiriyana moonelo aya, anoowerya okhaliherya wiira yoothanla anyu ekhumele saana. — Mir. 15:22.
MPAKEKE YOOTHANLA ENROWA OKHUMELA SAANA
16. Iponto xeeni sinrowa wookhaliheryani opaka yoothanla yooloka? (Nwehe ekaaxa eni: “ Moota Woopaka Soothanla Mwa Miruku”.)
16 Akhala wiira munootthara iponto nithokorenrye ahu ittima sivinre, munoopaka yoothanla yooloka. Mpakha-va, nyuwo moosuwela itthu sootheene sinihela muhina mwaha owo ni moovarerya malakiheryo a Biibiliya, yaawo anrowa wookhaliheryani opaka yoothanla enimusivela Yehova. Vano pooti onvekela Yehova wiira yoothanla anyu yeette saana.
17. Exeeni ekhanle oowookhaliheryani opaka soothanla sooloka?
17 Hata soothanla sanyu siweettelakani saana okhuma khalai, muhiliyale wiira etthu enikhaliherya opaka soothanla sooloka, khahiyo ororomela osuwela wanyu aahiiso itthu siwiiranenleni, masi ororomela miruku sinikhuma wa Yehova. Yehova paahi toniwerya woovahani osuwela weekeekhai, miruku ni ankhili, eyo piiyo, mikhalelo sinooniherya okhalana ankhili. (Mir. 2:1-5) Yehova pooti wookhaliheryani opaka soothanla sinimuhakalaliha. — Esal. 23:2, 3.
NSIPO 28 Ti Pani Ophwanenle Okhala Mpatthani a Yehova?
