1. Exeeni emwiirihale Yehova okumiherya ekasamento?

 YEHOVA ti “Muluku oohakalala”. Owo oniphavela wiira hiyo nave nihakalaleke. (1 Tim. 1:11) Yehova onninivaha itthu sinceene sooreera ni soomalela, seiyo sinnikhaliherya okhala oohakalala. (Yak. 1:17) Itthu iyo sooreera Yehova onnivaha awe, sinihela muhina othela aahiiso otheliwa. Nihiku na ekasamento, mulopwana ni muthiyana, annileiheryana wiira anrowa ophentanaka ni ottittimihana mahiku ootheene. Anamathelana anlipiha ophentana waya, khula okathi annihakalala. — Mir. 5:18.

 2. Exeeni eniiraneya ni ikasamento sinceene mahiku ala?

² Mooriipiha murima, anamathelana anceene olelo-va, aaliyala yooleiherya yaapanke aya nihiku yaathelana aya. Mwaha waivaavo, awo khanihakalala. Yoohimmwa emosa enikhuma Organização Mundial da Saúde, enihimya wiira alopwana akina oothela, annimuhasula mwaaraya, ammanaka, anveehaka ni apakaka itthu sinooniherya wiira khaninvaha efaita. Alopwana akina oothela, annimuttittimiha mwaaraya yakhala ni atthu akina, masi okathi anikhala aya anli paahi, annimuhasula. Nave alopwana akina oothela aniweha epornokrafia, annimwiiriha mwaaraya oriipiwa murima ni wuupuwelaka wiira khoniphentiwa.

 3. Itthu xeeni siniwiiriha alopwana akina omuhasulaka mwaaraya?

³ Masi xeeni alopwana akina animuhasula aya mwaaraya? Woonasa wene, awo ahuuwale ni paapa oohiphenta. Nto eyo enniwiiriha wuupuwelaka wiira mweettelo aya owo khahiyo wootepa otakhala. Nave akina mwaha wa mapuro yinnuwale aya. Mwa ntakiheryo, alopwana akina annimuhasula mwaaraya, mwaha woowi alopwana anceene a muttetthe aya anipaka yeeyo. Awo anoona wiira ahaana omuhasula mwaaraya para osuweliwa wiira tanimantari. Alopwana akina khiyiixuttihiwe okhala oowiihiiha ni ohitepa onanariwa. Alopwana akina anniweha epornokrafia ikwaha sinceene, nto eyo enniwiiriha  waaphavelaka athiyana ni ophavelaka orupihana woohiloka. Irelatoorio sikina, sinihimya wiira okathi wa eretta ya koronaviiru, alopwana anceene yaamutepa omuhasula mwaaraya. Ekeekhai ti yoowi, mulopwana ohimuhaaxeke mwaarawe.

 4. Ephoole xeeni alopwana makristau oothela anireerela aya okhalana ni mwaha wa xeeni?

⁴ Mulopwana mukristau oothela, ohaana osyaka miyuupuwelo soohiloka arina aya atthu akina voohimya sa athiyana. a Mwaha wa xeeni? Mwaha woowi ikwaha sikina, hiyo nimpaka etthu nittharaka muupuwelo ahu. Murummwa Paulo aahaatumererya makristau oothanliwa a oRoma, wiira ‘ahitakiheke mweettelo wa atthu a olumwenku ola’. (aRom. 12:​1, 2) Okathi murummwa Paulo aalepa awe epaphelo aaroihelaka makristau a oRoma, muloko ole wiira opakiwe ene khalai. Moolumo Paulo aaroihenle awe muloko ole, annooniherya wiira yaahikhala atthu mmulokoni, yaawo yaarina soolema ni miyuupuwelo saavarihana ni mweettelo wa olumwenku. Ti maana aya, murummwa Paulo aatumerenrye awe wiira yaahaana oturuka muupuwelo ni mweettelo aya. Nave miruku iyo, sinnivareleya muteko para makristau oothela olelo-va. Mooriipiha murima, alopwana anceene oothela olelo-va, aneettihiwa ni muupuwelo woohiloka wa olumwenku ola. Nto eyo enniwiiriha omuhasula mwaaraya. b Yehova oniphavela wiira mulopwana oothela omuthokoreryeke sai mwaarawe? Waakhuliwa waya, ori yoolepa ya mwaha ola.

 5. Moovarihana ni 1 Pedru 3:​7, mulopwana omuthokoreryeke sai mwaarawe?

⁵ Mmusome 1 Pedru 3:7. Yehova oniphavela wiira mulopwana oothela, omuttittimiheke mwaarawe. Mulopwana onimuttittimiha mwaarawe, khula okathi onnimphenta ni omureerela murima. Mwaha ola, nnoothokorerya moota mulopwana oothela okhanle awe oowooniherya wiira onnimuttittimiha mwaarawe. Masi wanipacerya, nrowe nilavule voohimya sa mweettelo onooniherya wiira mulopwana khonimphenta ni omuttittimiha mwaarawe.

MUHIPAKAKE ITTHU SINOONIHERYA WIIRA KHAMUNIMUTTITTIMIHA MWAARINYU

 6. Yehova onimoonela sai mulopwana onimuhasula mwaarawe? (aKolosi 3:19)

⁶ Mulopwana ohimuhasuleke mwaarawe. Yehova onnimunyokha mutthu ootakhala. (Esal. 11:5) Nave-tho, Biibiliya onnooniherya wiira ti vootakhala mulopwana omuhasula mwaarawe. (Mal. 2:16; mmusome aKolosi 3:19.) Moovarihana ni 1 Pedru 3:​7, yeeyo eri yoolepa ya mwaha ola, akhala wiira mulopwana oothela khonimuttittimiha mwaarawe, owo onnihonona ompatthani awe ni Yehova. Nave Yehova pooti ohiwiriyana mavekelo awe.

 7. Moovarihana ni aEefeso 4:​31, 32, mikhalelo xeeni soohiloka mulopwana oothela onireerela awe osyaka? (Nwehe-tho “Moolumo Ootthokiheriwa”.)

⁷ Mulopwana oothela ohinveeheke mwaarawe. Alopwana akina oothela, anninveeha mwaaraya aahiiso omuhasula amulavulelaka itthu sikhanle onwereya. Masi Yehova onninyokha “onanariwa, oviruwa, owali, oruwana, vamosa ni sootakhala sa khula enamuna”. c (Mmusome aEefeso 4:​31, 32.) Yehova onniiwa ni onniweha itthu sootheene, tivonto owo onnivaha ephoole moota mulopwana oothela onilavula awe ni mwaarawe hata ari ene anli. Mulopwana onimulavulela moolumo ooveeha mwaarawe, khonihonona paahi ekasamento awe, masi-tho onnihonona waataana wawe ni Yehova. — Yak. 1:26.

 8. Yehova onoonela sai epornokrafia ni mwaha wa xeeni?

 ⁸ Oweha epornokrafia. Yehova onoonela sai epornokrafia? Owo onninyokha. Mulopwana oniweha epornokrafia onnihonona waataana wawe ni Yehova ni onnooniherya wiira khonimuttittimiha mwaarawe. Mulopwana oororomeleya ni mwaarawe, khonikhala-khala orupihanaka ni muthiyana mukina, nave khonikhala-khala uupuwelaka opaka eyo. Yesu aahimmye wiira mulopwana oninwehexexa muthiyana mpakha ophavela orupa ni yena, mutthu owo ooraruwana muthiyana owo “vamurimani”. d — Math. 5:​28, 29.

 9. Xeeni Yehova onimunyokha awe mulopwana onimukhanyererya mwaarawe opaka itthu sihinimusivela?

⁹ Mulopwana ohimukhanyereryeke mwaarawe opaka itthu sihinimusivela okathi woorupihana. Alopwana oothela, ahimukhanyereryeke mwaaraya opaka itthu sihinimusivela, seiyo sikhanle oomwiiriha oxanka mmuupuweloni ni vamurimani vawe. Yehova onninyokha mweettelo owo woohiloka ni ohinooniherya ophenta. Yehova oniphavela wiira mulopwana omphenteke ni ottittimiheke moonelo wa mwaarawe. (aEef. 5:​28, 29) Ankhi vakhala wiira mulopwana mukristau, onnipaka itthu sihinimusivela mwaarawe ni onniweha epornokrafia? Niireke pooti oturuka muupuwelo awe ni moota onipaka awe itthu?

MOOTA MULOPWANA OOTHELA OKHANLE AWE OOXINTTA MWEETTELO WOOHILOKA

10. Ntakiheryo na Yesu, ninrowa waakhaliherya sai alopwana oothela?

¹⁰ Exeeni enrowa omukhaliherya mulopwana, ohiya opaka itthu sihinimusivela mwaarawe? Enamuna emosa, ori wiimananiha omutakiha Yesu. Ekeekhai wiira Yesu khotonko othela. Masi enamuna aathokorerya awe awiixutti awe, ntakiheryo nooloka mulopwana oothela onireerela awe otthara. (aEef. 5:25) Nrowe niwehe ele mulopwana oothela, oniixutta awe ni enamuna Yesu aathokorerya awe ni moota aalavula awe ni awiixutti awe.

11. Yesu aathokorerya sai awiixutti awe?

¹¹ Okathi wootheene, Yesu aanaaphenta ni waattittimiha awiixutti awe. Owo khotonko waathokorerya mwa enamuna yoohiloka. Nnaamwi aarina owerya waavikana awo, owo khaarumenle owerya wawe wiira owoopopihe. Hata vari siiso, moowiiyeviha aanaavarela miteko awiixutti awe. (Yoh. 13:​12-17) Ekwaha emosa, Yesu aahimmye so: “Mwiixutteke ni miyo, okhala wira miyo ka mutthu oomaala ni oowiiyeviha. Mwiira siiso, eyo enimoolipihani”. (Math. 11:​28-30) Nwehe wiira Yesu aari mutthu oomaala. Mutthu oomaala khahiyo oolosowa, moovirikana ni vo, owo toolipa ni onniwerya wiihiiha. Hata okathi onipaciwa awe, mutthu oomaala onnivikaniha okhala oomaaleleya ni oowiihiiha ni miyuupuwelo soohiloka.

12. Moota xeeni Yesu aalavula awe ni atthu akina?

¹² Okathi aalavula awe, Yesu aanaamaaliha ni waalipiha ale yanwiriyana. Owo khaapwapwela ale yaamutthara. (Luka 8:​47, 48) Ikwaha sikina, awanani awe yaaninveeha ni omunyoonyiha, masi “owo khaaruwana”. (1 Ped. 2:​21-23) Okathi aaruwaniwa awe, ohiya waakhula mwa enamuna yoowereya, owo ammaala paahi. (Math. 27:​12-14) Tthiri nla ntakiheryo nooloka alopwana makristau anireerela aya otthara!

13. Moovarihana ni Matheyo 19:​4-6, mulopwana onrowa ‘okolarana sai ni mwaarawe’? (Nwehe efootu.)

¹³ Yesu aahimmye wiira alopwana, yaahaana ovikaniha okhala oororomeleya ni mwaaraya. Owo aahirumeela moolumo a Tiithi awe, vaavo aahimmye awe wiira mulopwana “okhaleke ni mwaarawe”. (Mmusome Matheyo 19:​4-6.) Nuulumo na ekereku nitaphuleliwe va noowi “okhaleke”, nintaphulela ‘okhala erutthu emosa-ru aahiiso okolarana’. Eyo enooniherya wiira ophenta mulopwana ni mwaarawe akhanle aya oowooniheryana, ohaana okhala woolipa, vanakhala ntoko arookolarana. Vakhala wiira mutthu mmosa onoopaka etthu enrowa omukumiherya muxankiho  mukhwaawe, oowanli aya annihaawa. Mulopwana onimphenta mwaarawe, onoorowa osyaka inamuna sootheene sa epornokrafia. Vakhala wiira enookhumelela etthu yoohiloka, moowaakuveya owo onoorowa ‘osyaka oweha itthu sihirina efaita’. (Esal. 119:37) Ntoko Yoobi, mulopwana oothela, ohaana olakela vamurimani vawe, ohinwehexexa muthiyana mukina ni muupuwelo woohikhalela. — Yoob. 31:1.

14. Mulopwana onimuhasula mwaarawe, opakeke exeeni wiira okhalane waataana wooloka ni Yehova vamosa ni mwaarawe?

¹⁴ Mulopwana onaaveeha aahiiso waahasula amwaarawe, ohaana opaka itthu sinittharelana wiira otthikele okhalana waataana wooloka ni Yehova vamosa ni mwaarawe. Itthu xeeni okhanle awe oopaka? Etthu yoopacerya, owo ohaana osuwela wiira etthu opanke awe ti yootakhala. Nave ohaana osuwela wiira Yehova onniweha itthu sootheene. (Esal. 44:21; Mus. 12:14; aHeeb. 4:13) Ya nenli, owo ohaana ohiya mweettelo awe ni ottharuwa omuhasula mwaarawe. (Mir. 28:13) Ya neeraru, owo ohaana onvekela musammaha mwaarawe. Moottharelana owo ohaana onvekela Yehova wiira omulevelele itampi sawe. (Mit. 3:19) Nave-tho, owo ohaana omuxonttela Yehova wiira onvahe ophavela ni ikuru wiira owerye oturuka mweettelo, muupuwelo, moolumo ni miteko sawe soohiloka. (Esal. 51:​10-12; 2 aKor. 10:5; aFil. 2:13) Ya neexexe, ohaana okhala moovarihana ni mavekelo awe ni wiixutta onyokha inamuna sootheene sa otakhala ni moolumo ooveeha. (Esal. 97:10) Ya neethanu, moowaakuveya, owo ohaana ovekela nikhaliheryo na axitokweene. (Yak. 5:​14-16) Ya neethanu namosa, owo ohaana ompaka palano wiira ohitthikele waahaaxa amwaarawe. Vakhala wiira mulopwana oothela onniweha epornokrafia, owo ohaana otthara mavalo ala 6 nithokorenrye ahu. Vakhala wiira onoopaka eyo, Yehova onooreeliha wiimananiha wawe ni onoomukhaliherya oturuka mweettelo awe. (Esal. 37:5) Khivamphiyerya paahi mulopwana ohiya opaka itthu sihinimusivela mwaarawe, nave-tho ohaana wiixutta omuttittimiha. Onrowa owerya sai opaka eyo?

MOOTA WOOMUTTITTIMIHA MWAARINYU

15. Mulopwana onrowa wooniherya sai wiira onnimphenta mwaarawe?

¹⁵ Mmooniheryeke wiira munnimphenta. Alopwana akina ni arina etthoko yoohakalala,  khula nihiku annipaka etthu wiira amooniherye omphenta waya mwaaraya. (1 Yoh. 3:18) Mulopwana pooti omooniherya mwaarawe wiira onnimphenta, opakaka itthu saamukhaani ntoko, onvarela ntata okathi aneetta aya aahiiso onvaha etthu. Nave-tho, owo pooti omwinviyarela mensaxe ohimyaka wiira: “Nkireere wunkheliwa”. Nave, nyuwo pooti omukoha so: “Muniviriha sai nihiku nla na olelo?” Ikwaha sikina, nyuwo pooti omulepela ekarta mulavulaka moolumo ooreera, yaawo anooniherya omphenta wanyu. Okathi mulopwana onipaka awe itthu iya, onnimuttittimiha mwaarawe ni onnilipiha ekasamento awe.

16. Xeeni mulopwana onireerela awe omuttottopela mwaarawe?

¹⁶ Mmuleeleke wiira ookhalana efaita para nyuwo. Mulopwana onnooniherya wiira onnimuttittimiha mwaarawe, olavulaka itthu sinimuhakalaliha. Mwa ntakiheryo, owo ohaana omuxukhurela mwaha wa itthu sinceene onipaka awe. (aKol. 3:15) Okathi mulopwana onimuttottopela awe mwaarawe ni onimuleela awe wiira onimphenta vanceene, muthiyana owo onnilipa ni onnoona wiira onniphentiwa ni ottittimihiwa. — Mir. 31:28.

17. Mulopwana onrowa wooniherya sai wiira onnimuttittimiha mwaarawe?

¹⁷ Mmuthokoreryeke mooreerela murima ni nttittimiho. Mulopwana onimphenta mwaarawe, onninvaha efaita ni onnimuthokorerya saana. Owo onnimoona ntoko yoovaha yooreera enikhuma wa Yehova. (Mir. 18:22; 31:10) Tivonto, owo onnimureerela murima ni omuttittimiha hata okathi woorupihana. Mwaha waivaavo, owo khaarowa opaka etthu yaarowa ohimusivela aahiiso omwiiriha oxanka mmuupuweloni ni vamurimani vawe. e Ohiya-vo, onimwiimananiha opaka ele eniwerya awe wiira okhalane murima wooloka ohoolo wa Yehova. — Mit. 24:16.

18. Nyuwo alopwana oothela, exeeni mulakenle anyu opaka? (Nwehe ekaaxa eni: ““ Inamuna 4 Sinrowa Wookhaliheryani Omuttittimiha Mwaarinyu”.)

¹⁸ Nyuwo alopwana, Yehova onnihakalala vanceene okathi onoowehaaweni mmuttittimihaka mwaarinyu ni moolumo ni miteko sanyu. Tivonto, muhihiye omuttittimiha mwaarinyu. Muhipakeke itthu saarowa omuriipiha murima. Ohiya-vo, mumphenteke, mmuttittimiheke ni mmuthokoreryeke mooreera murima. Mwapaka eyo, owo onooweha wiira munnimphenta ni omuthokorerya. Vakhala wiira munoomuttittimiha mwaarinyu, eyo enimookhaliheryani olipiha waataana orina anyu ni Yehova. — Esal. 25:14.