MWAHA ONITHOKORERIWA 4
NSIPO 18 Ninnixukhurela Yowoopola
Yoowoopola, Enniixuttiha Exeeni?
“Moota Muluku oonihenrye awe oniphenta wawe”. — 1 YOH. 4:9.
ELE NINROWA AHU WIIXUTTA
Mwaha ola, nnooweha moota yoowoopola enooniherya aya mikhalelo sootepa oreera sa Yehova Muluku ni Yesu Kristu.
1. Mureerelo xeeni nimphwanya ahu mwaha wa orowa muthukumano wa Wuupuwelela okhwa wa Kristu?
YEHOVA oonivaha etthu erina efaita yinceene, okathi aamurumme awe Mwanawe wiira okhwe mmureerelo ahu! (2 aKor. 9:15) Nyuwo munoowerya okhalana ompatthani wooloka ni Yehova, mwaha woowi Yesu oovaha okumi awe mmureerelo ahu. Nave-tho, munnilipelela ophwanya okumi woohimala muhoolo. Veekeekhai, vannikhalela omuxukhurela Yehova yoowo ovahale yoowoopola, okhala wiira onniniphenta vanceene! (aRom. 5:8) Nto wiira onikhaliherye ohihiya oxukhurela ni ohiliyala yoowoopola, Yesu ooniruma Wuupuwelela okhwa wawe khula mwaakha. — Luka 22:19, 20.
2. Mwaha ola, ninrowa othokorerya exeeni?
2 Mwaakha ola wa 2025, ninrowa Wuupuwelela okhwa wa Yesu, Saabadu 12 a Abril. Moohaanyiherya, ootheene ahu nnimwiilokiherya wiira nirowe muthukumano owo. Hiyo nnoottottela mureerelo vanceene, akhala wiira okathi owo nnimuupuwelela a etthu Yehova ni Mwanawe, apanke aya mmureerelo ahu. Mwaha ola, nnoorowa oweha ele yoowoopola enniixuttiha aya voohimya sa Yehova ni Mwanawe. Nave mwaha onittharelana, onoonikhaliherya oweha mureerelo nimphwanya ahu mwaha wa yoowoopola, ni moota nikhanle ahu oowooniherya oxukhurela wahu.
YOOWOOPOLA ENNIIXUTTIHA EXEENI VOOHIMYA SA YEHOVA?
3. Moota xeeni okhwa wa mutthu mmosa paahi oniwoopola aya atthu imilyau sinceene? (Nwehe eteseenyu.)
3 Yoowoopola enniixuttiha wiira Yehova, Muluku onisiveliwa exariya. (Otum. 32:4) Moota xeeni? Nkuupuwelani ela: Okhala wiira Adamu khiyaamwiiwelenle Muluku, awo aattheka ni ahookhwa. Nave okhala wiira na anamwane a Adamu, noottheka nto ti maana aya, ninkhwa ahu. (aRom. 5:12) Vano wiira naakiheriwe etampi ni okhwa, Yehova oomuruma Yesu wiira onoopole. Masi vaniweryaneya sai, mukuttho wa mutthu mmosa oohittheka, owoopola atthu imilyau sinceene? Murummwa Paulo, onitthokiherya so: “Tthiri, mwaha wa ohiiwelela wa mulopwana mmosa [Adamu], atthu anceene yaahikhalihiwa anatampi, siiso-tho, mwaha wa wiiwelela wa mulopwana mmosa [Yesu], atthu anceene anookhalihiwa anaxariya”. (aRom. 5:19; 1 Tim. 2:6) Paulo aahimya wiira apinaatamu ootheene aattheka ni annookhwa, okhala wiira mulopwana oohittheka khaamwiiwelenle Muluku. Tivonto, wiira naakiheriwe etampi ni okhwa, vaapirisari mulopwana mmosa oohittheka omwiiwelela Muluku.
Mwaha wa mulopwana mmosa, Adamu, ootheene ahu noottheka, nave ninnookhwa. Mwaha wa mulopwana mmosa Yesu, ootheene ahu ninnaakiheriwa etampi ni okhwa (Nwehe ettima 3)
4. Xeeni Yehova ohaahiyale awe anamwane a Adamu yaarowa omwiiwelela, akhalaka mahiku ootheene?
4 Niireke vaanipirisari Yesu okhwa wiira onooopole? Xeeni Yehova ohaahiyale awe anamwane a Adamu yaarowa omwiiwelela, akhalaka mahiku ootheene? Hiyo pooti woonaka wiira eyo yaarowa okhala enamuna yootepa oreera wiira ophukiwe muxankiho ole. Masi opaka eyo, khiyaarowa ovarihanaka ni exariya ya Yehova. Nave vaarowa okhalaka ntoko wiira Adamu ni anaaya, khatthenke. Masi ekeekhai ti yoowi, Adamu ni anaaya aattheka.
5. Xeeni ninkupali ahu wiira okathi wootheene Yehova onoopaka etthu ya xariya?
5 Masi ankhi vaakhanle wiira Yehova khovahale yoowoopola, ni khottharihale exariya awe onaahiya anamwane oottheka a Adamu, akhalaka mahiku ootheene? Opaka eyo, anwiiriha atthu oxanka ni wuupuwela wiira Muluku, khonrowa otthara exariya ni myaha sikina. Mwa ntakiheryo, niireke atthu akina khiyaarowa waaniheryaka vakhala wiira Yehova aamurowa waamaliherya anatiri awe? Tthiri eyo, pooti wiira yaamwiiraneya. Vano okhala wiira Yehova khohiyale otthara exariya awe hata eyo yaavekela oliva etthu yuulupale, eyo piiyo, onvaha Mwanawe onimphentexa awe, eyo enninikupaliha wiira okathi wootheene Yehova onoopakaka exariya.
6. Mukhalelo xeeni mukina omwiirihale Yehova omuruma Mwanawe? (1 Yohani 4:9, 10)
6 Yoowoopola enninikhaliherya oweha wiira Yehova, Muluku a xariya. Mukhalelo mukina muulupale omwiirihale Muluku omuruma Mwanawe, ti oniphenta wawe. (Yoh. 3:16; mmusome 1 Yohani 4:9, 10.) Yehova oomuruma Mwanawe wiira okhwe mmureerelo ahu, maana oniphavela wiira niphwanye okumi woohimala ni niirele mpantta emusi awe. Nkuupuwelani ela: Okathi Adamu yaatthenke aya, awo yaahihiya wiirela mpantta emusi ya Yehova. Yookhumelela aya tiila: Ootheene ahu niyariwe nihiirelaka mpantta emusi ya Muluku. Masi orumeelaka mukuttho woowoopola, Yehova onninlevelela itampi sahu. Nto Yehova onrowa waahela mweemusini mwawe, atthu ootheene animwaamini ni animwiiwelela. Hata niinaano-va, nnoowerya okhalana waataana wooloka ni Yehova vamosa ni anna ni arokora. Veekeekhai, Yehova onniniphenta vanceene! — aRom. 5:10, 11.
7. Moota xeeni ohaawa wa Yesu onnikhaliherya aya woona wiira Yehova onniniphenta vanceene?
7 Nnoowerya oweha moota Yehova onniphenta awe vanceene, nuupuwelaka owereya oonale awe okathi anweha awe Mwanawe ohaawaka. Satana onihimya wiira murumeyi a Muluku onoohiya okhala oororomeleya, akhala wiira itthu sinooxankiha. Para wooniherya wiira eyo khahiyo ekeekhai, Yehova aaheemererya wiira Yesu ohaawe ohinatthi wiiviwa. (Yoob. 2:1-5; 1 Ped. 2:21) Yehova aanaaweha atthu anveehaka Yesu, atoropa ammanaka ni amukhomelaka vamwirini va nihaaxeryo. Nuumala-vo, Yehova aahinweha Mwanawe onimphentexa awe ohaawaka vanceene mpakha okhwa. (Math. 27:28-31, 39) Yehova anwerya okhoottiherya etthu ele wiira ehiiraneye. Mwa ntakiheryo, okathi awanani awe yaahimya aya wiira: “Vakhala wira Muluku owo onnimoonela vatthu, weeso omoopole”, Yehova anwerya opaka eyo. (Math. 27:42, 43) Vaakhanle wiira Muluku oopaka eyo, khinaarowa ovahiwa yoowoopola ni khinaakhalana nlipelelo. Nto Yehova aaheemererya wiira Mwanawe ovilele ohaawa iwe, mpakha okhwa.
8. Niireke Yehova aahoona owereya okathi anweha awe Mwanawe ohaawaka? Mutthokiherye. (Nwehe eteseenyu.)
8 Nnaamwi Muluku ori ene oowerya sootheene, nihuupuweleke wiira owo khonoona owereya! Muluku ohaapattuxa apinaatamu ailikanyihaka mwaneene. Nave okhala wiira apinaatamu annoona owereya, Yehova onnoona owereya. Omuhimyaka Muluku, Biibiliya onirumeela moolumo oowi “yaaninwereiha murima” ni “yaanimuriipiha murima”. (Esal. 78:40, 41) Nrowe nthokorerye yoowiiraneya ya Abrahamu ni Isakhi. Yehova aahimuleela Abrahamu wiira onvahe mwanawe mmoseene ntoko mukuttho. (Maph. 22:9-12; aHeeb. 11:17-19) Nkahaya muupuwele moota Abrahamu oonela awe, okathi ailokiherya awe wiira omwiive mwanawe Isakhi, orumeelaka mwaalo! Nave nkahaya muupuwele moota Yehova oonenle awe, okathi anweha awe Mwanawe ohaaxiwaka ni atthu ootakhala mpakha wiiviwa! — Nwehe eviidiyu eni: Mutakiheke Waamini Waya — Abrahamu, Mpantta 2, eri va jw.org.
Yehova aahoona owereya vanceene okathi anweha awe Mwanawe ohaawaka (Nwehe ettima 8)
9. ARoma 8:32, 38, 39 oniwiixuttihani exeeni sa moota Yehova onoophentaaweni?
9 Yoowoopola enniixuttiha wiira Yehova onniniphenta vanceenexa, waavikana amusi ahu aahiiso mpatthani ahu. (Mmusome aRoma 8:32, 38, 39.) Mweekeekhai, Yehova onniniphenta vanceenexa, ovikana moota nniiphenta ahu. Niireke munniphavela okhala mahiku ootheene? Yehova onniphavela vanceene wiira mukhaleke mahiku ootheene. Niireke munniphavela wiira muleveleliwe soottheka sanyu? Yehova onniphavela vanceene olevelela soottheka sanyu. Etthu onnivekela awe tiila: Hiyo nihaana weemererya yoowoopola, omwaamini ni omwiiwelela. Yoowoopola ennooniherya wiira Yehova onniniphenta vanceenexa. Nave elapo esya, nnimwiixutta itthu sinceene voohimya sa ophenta wa Yehova. — Mus. 3:11.
YOOWOOPOLA ENNIIXUTTIHA EXEENI VOOHIMYA SA YESU?
10. a) Exeeni yaatepa omuxankiha Yesu, okathi aarowa awe wiiviwa? b) Mwa inamuna xeeni Yesu aavuwihale awe nsina na Yehova? (Nwehe ekaaxa eni: “ Ororomeleya wa Yesu Woovuwiha Nsina na Yehova”.
10 Yesu onnixanka ni moota atthu animoonela aya Tiithi awe. (Yoh. 14:31) Yesu aahiriipiwa murima vanceene, okhala wiira atthu yaarowa wuupuwelaka itthu soohiloka voohimya sa Tiithi awe, maana owo aarowa wiiviwa ntoko mutthu ahaamuttittimiha Muluku ni ntoko nakrime. Ti maana aya, aavekenle awe oriki: “Tiithi, vaaweryaneyaka, muhiye ekaalisi ela eviraka”. (Math. 26:39) Masi okhala wiira Yesu khaahiyale okhala oororomeleya wa Yehova mpakha okhwa, aahooniherya wiira Satana, ammootherya Tiithi awe.
11. Yesu oonihenrye sai wiira aanaaphenta vanceene atthu? (Yohani 13:1)
11 Nave-tho, yoowoopola enniixuttiha wiira Yesu onnaathokorerya vanceene atthu, otepexa wene awiixutti awe. (Mir. 8:31; mmusome Yohani 13:1.) Mwa ntakiheryo, itthu sikina Yesu aarowa awe ovara valaponi, saarowa okhala sooxankiha, otepexa wene, owo aahaana ovilela mpakha okhwa. Masi Yesu aahivara itthu iya sootheene sooxankiha, ohiya mwaha woorummwa ni Yehova wiira ovareke, masi mwaha woowi aanaaphenta vanceene atthu. Ti maana aya, owo aanaalaleerya, aaniwiixuttiha ni aanaakhaliherya. Hata nihiku aarowa awe wiiviwa, Yesu aahiivaha okathi wiira orapihe inawu sa arummwa awe, owiixuttihe, aavahe malakiheryo ni waalipiha. (Yoh. 13:12-15) Hata okathi Yesu aakhomeliwe awe vamwirini va nihaaxeryo, aahimuleela nakrime aamwaattamenle, voohimya sa eparayiisu, ni aahinvekela Yohani wiira omukhapeleleke maama awe. (Luka 23:42, 43; Yoh. 19:26, 27) Yesu aahooniherya wiira aanaaphenta vanceene atthu, ohiya paahi okhwa mmureerelo aya, masi-tho mwaha woowaathokorerya moophenta ni mooreerela murima.
12. Yesu onnikhaliherya sai olelo-va?
12 Ekeekhai wiira Kristu “ohookhwa ekwaha emosa paahi”, masi hata vari siiso, owo nlelo onnipaka itthu sinceene mmureerelo ahu. (aRom. 6:10) Itthu xeeni onipaka awe mmureerelo ahu? Nlelo Yesu onninivaha itthu sinceene sooreera, seiyo ninwerya ahu ophwanya, okhala wiira oonoopola. Nrowe niwehe etthu onivara awe olelo-va mmureerelo ahu. Owo onirumeela ntoko Mwene ahu, Namukuttho Muulupale ni muru wa muloko. (1 aKor. 15:25; aEef. 5:23; aHeeb. 2:17) Yesu tonihoolela muteko wa othukumanyiwa wa ale oothanliwa ni muttitthi muulupale, muteko yoowo onrowa omala ohinatthi ophiya wanikisa wa maxakha maalupale. b (Math. 25:32; Mar. 13:27) Nave-tho, owo onnimurumeela murumeyi oororomeleya ni ankhili, wiira onivaheke itthu sinnikhaliherya ohihiya omurumeela Yehova moororomeleya mahiku ala ookiserya. (Math. 24:45) Nave okathi onrowa awe olamulelaka iyaakha 1.000, Yesu nlelo onoovara itthu mmureerelo ahu. Mweekeekhai, Yehova onvaha Mwanawe mmureerelo ahu!
MUHIHIYE WIIXUTTA ITTHU ISYA
13. Moota xeeni wuupuwelela onookhaliheryaayani ohihiya wiixutta sa ophenta Muluku ni Kristu arina aya ni hiyo?
13 Nyuwo, munoowerya ohihiya wiixutta voohimya sa ophenta Yehova ni Kristu Yesu orina aya ni hiyo, akhala wiira khamunihiya wuupuwelela oratteene itthu awiirenlyaayani. Woonasa wene, nihinatthi ni nuumala nihiku na Wuupuwelela na mwaakha ola, nyuwo pooti osoma oratteene Ivangelyo. Muhisomeke ikapiitulu sinceene okathi omosa-ru. Ohiya-vo, musomeke vakhaani-vakhaani ni nweheke itthu sikina sinniiriha omphenta Yehova ni Yesu. Nave-tho, muhiliyale waaleela atthu akina itthu mphwannye anyu okathi mwaasoma anyu Ivangelyo iyo.
14. Esaalimu 119:97 ni enoota, ennikhaliherya sai ohihiya otokosa voohimya sa yoowoopola ni myaha sikina? (Nwehe efootu.)
14 Akhala wiira mpatisiwe khalai, nyuwo pooti wiikohaka vakhala wiira munoowerya wiixutta itthu isya ni myaha ntoko iya: Exariya ya Muluku, ophenta wawe ni yoowoopola. Ekeekhai tiila: Okathi wootheene, hiyo nnimwiixuttaka itthu isya voohimya sa myaha iya ni myaha sikina. Nto, muhaana opaka exeeni? Muhaana osoma ni otokosa soohimmwa siri iliivuru sahu sinimutthokiherya Biibiliya. Mwa ntakiheryo, okathi munisoma anyu mwaha mmosa ori mbiibiliyani muhinaiwexexa, mutokoseke oratteene mwaha owo. Nuumala osoma, muupuweleleke etthu ephwannya anyu eniwiixuttihaayani voohimya sa moota Yehova ni Mwanawe anoophentaayani. — Musome Esaalimu 119:97 ni enoota.
Hata nipatisiwe ene khalai, hiyo nnoowerya wiixutta itthu isya voohimya sa yoowoopola ni wooniherya oxukhurela wahu yoowoopola eyo (Nwehe ettima 14)
15. Xeeni ninreerela ahu ohihiya wiixutta itthu isya sa mbiibiliyani?
15 Okathi munisoma anyu aahiiso munitokosa anyu, muhikhulumuwe vakhala wiira khamuniphwanya etthu esya aahiiso etthu yoovara murima. Muupuweleke wiira, muri ntoko mutthu oniphavelasa eweero. Ikwaha sinceene, mutthu oniphavelasa eweero, onniviriha iwoora ni mahiku manceene ophavelasaka wiira ophwanye. Hata vari siiso, owo khonihiyererya ophavelasa, maana onnisuwela wiira hata ophwanyaka eweero vakhaani, enoomukhaliherya. Masi khula etthu esya nniixutta ahu mbiibiliyani, yookhalana efaita yuulupale ovikana eweero! (Esal. 119:127; Mir. 8:10) Tivonto, muhihiye omusoma Biibiliya ni otokosa itthu isya munisoma anyu. — Esal. 1:2.
16. Ninrowa omutakiha sai Yehova ni Yesu?
16 Okathi munimusoma anyu Biibiliya, nweheke moota mukhanle anyu oovarihela muteko etthu muniixutta anyu. Mwa ntakiheryo, mutakiheke exariya ya Yehova, muhaathanyaka atthu akina. Mutakiheke moota Yesu amphenta awe Tiithi awe ni aaphenta awe atthu akina, mweemereryaka ohaawa mwaha wa nsina na Yehova ni mwiivahereryaka wiira mwaakhaliherye anna ni arokora. Nave-tho, mmutakiheke Yesu mwaalaleeryaka atthu akina wiira asuwele itthu sooreera Yehova onipaka awe mmureerelo wa apinaatamu, wiira awo-tho, yaamini yoowoopola.
17. Mwaha onittharelana, ninrowa othokorerya exeeni?
17 Akhala wiira khannihiya wiixutta voohimya sa yoowoopola, ninrowa otepaka omphenta Yehova ni Yesu. Niira siiso, awo anrowa otepaka oniphenta. (Yoh. 14:21; Yak. 4:8) Tivonto, nihihiye orumeela oratteene itthu sootheene Yehova onnivaha awe, wiira nitepeke wiixutta voohimya sa yoowoopola. Mwaha onittharelana, ninrowa othokorerya inamuna sikina ninttottela ahu mureerelo yoowoopola. Nave nnoorowa oweha moota woowooniherya oxukhurela wahu ophenta wa Yehova.
NSIPO 107 Yehova ti Ntakiheryo Nuulupale na Ophenta
a MOOLUMO OTTHOKIHERIWA: Nuulumo noowi “wuupuwelela”, nintaphulela wiixutta oratteene itthu sikina sa mwaha owo ni wuupuwela saana mwaha owo.
b Nuulumo noowi othukumanyiwa wa “itthu siri wiirimu” Paulo onihimya awe, eliivuru ya aEefeso 1:10, ti noovirikana ni nuulumo noowi othukumanyiwa wa ‘oothanliwa’ Yesu onilavula awe eliivuru ya Matheyo 24:31 ni Marko 13:27. Paulo onilavula okathi Yehova onaathanla awe orumeelaka munepa awe woowaarya ale anrowa olamulelaka ni Yesu wiirimu. Yesu onilavula okathi ale oothanliwa ari valaponi anrowa aya othukumanyiwa wiirimu, okathi wa maxakha maalupale.
