1-2. (a) Exeeni Yehova oniweha awe okathi wa wuupuwelela Yoolya ya Ohiyu ya Apwiya? (Nwehe efootu ya vakaapani.) (b) Mwaha ola ninrowa othokorerya exeeni?

NKAHAYA muupuwele moota Yehova onoonela awe, vaavo onaaweha awe atthu a olumwenku wotheene athukumanne ene wira yuupuwelele Yoolya ya Ohiyu ya Apwiya. Yehova khonweha paahi muttitthi wa atthu awo, masi onninweha khula mutthu. Nave onnaaweha ale anrweela muthukumano owo khula mwaakha. Atthu akina annoorwa hata akumanaka mixankiho sinceene. Mwaha wa mixankiho, atthu akina khanwerya orowela mithukumano sahu sa khula esumana, masi annirweela muthukumano wa Wuupuwelela maana annisuwela wira ti wootepa otthuneya. Yehova onnaaweha atthu ale anrweela muthukumano wa Wuupuwelela ekwaha yoopacerya, woonasa wene aphavelaka osuwela etthu eniiraneya.

² Moohaanyiherya, Yehova onnisiveliwa aawehaka atthu anceene arowelaka muthukumano wa Wuupuwelela. (Luka 22:19) Masi Yehova khonvaha efaita nummuru na atthu paahi anrowela muthukumano owo. Yehova onnivaha efaita nthowa ninwiiriha atthu orowela muthukumano wa Wuupuwelela. Mwaha ola, ninrowa othokorerya nikoho nna nootthuneya: Xeeni ninrowela ahu mithukumano sotheene sinipakiwa khula esumana ohiya paahi muthukumano wa Wuupuwelela?

3-4. (a) Xeeni ninrowela ahu mithukumano? (b) Mukhalelo xeeni onniiriha ohicompela mithukumano? (c) Moovarihana ni ele onihimya awe 1 aKorinto 11:23-26, xeeni nihincompela ahu muthukumano wa Wuupuwelela?

³ Etthu yuulupale enniiriha orowela mithukumano sa mmulokoni okhala wira siniirela mpantta okokhorela wahu. Nave  omithukumanoni ti opuro Yehova onniixuttiha awe. Atthu oowiixinnuwiha khanikupali wira ahaana wiixuttihiwa. (3 Yoh. 9) Moovirikana ni atthu awo, hiyo ninneemererya wiixuttihiwa ni Yehova orumeelaka mutthenkeso awe.​—Yes. 30:20; Yoh. 6:45.

⁴ Orowela wahu mithukumano ninnooniherya wira na atthu oowiiyeviha ni ninniphavela wiixuttihiwa. Ohiyu wa Wuupuwelela okhwa wa Yesu, ninnirowela muthukumano owo okhala wira ti wootepa otthuneya ni moowiiyeviha ninniiwelela yooruma ya Yesu eni: “Mwireke iya, mukùpuwelaka miyo”. (Mmusome 1 aKorinto 11:23-26.) Muthukumano owo onnilipiha nlipelelo nahu na muhoolo ni onninuupuxerya ophenta wa Yehova. Masi, Yehova onnisuwela wira ninnitthuneya olipihiwa ni omaalihiwa ohiya paahi ekwaha emosa vamwaakhani. Tivonto onivanhe awe mithukumano sa khula esumana ni oniphavela wira nihicompeleke. Nto wira niiwelele yooruma eyo, nihaana okhala atthu oowiiyeviha. Tthiri ninniviriha iwoora sinceene wira nilokiherye ni orowela mithukumano iyo.

5. Atthu oowiiyeviha anoonela sai nlattulo na Yehova?

⁵ Khula mwaakha atthu anceene oowiiyeviha anneemererya nlattulo na wiixuttihiwa ni Yehova. (Yes. 50:4) Awo annisiveliwa orowela muthukumano wa Wuupuwelela, nto okhuma nihiku nno annipacerya orowela mithukumano sotheene. (Zak. 8:20-23) Tthiri otheene ahu ninnisiveliwa wiixuttihiwa ni olakiheriwa ni Yehova, yoowo ori ‘ntthyawelo nahu ni mòpoli ahu’. (Esal. 40:18) Khiivo etthu yootepa otthuneya ovikana weemererya nlattulo na wiixuttihiwa ni Yehova vamosa ni Yesu.​—Math. 17:5; 18:20; 28:20.

6. Wiiyeviha waamukhalihenrye sai mulopwana mmosa orowela muthukumano wa Wuupuwelela?

⁶ Khula mwaakha, ninniimananiha waalattula atthu anceene wira arwe Wuupuwela okhwa wa Yesu ni hiyo. Nto atthu anceene oowiiyeviha anneemererya nlattulo nno. Nwehe ntakiheryo nimosa. Iyaakha sinceene sivinre, mulopwana mmosa aahivahiwa nlattulo na Wuupuwelela, nto aahimuleela munna ole anvanhe wira khaarowa orwa. Masi, ohiyu ole wa Wuupuwelela, munna ole aahitikinihiwa nuumala onweha mulopwana ole ori ene Mpani mwa Omwene. Mulopwana ole aahisiveliwa enamuna aakheliwe awe, nto aahipacerya orowela mithukumano sotheene sa vasumanani. Mwaakha wotheene, mulopwana ole aacompale mithukumano miraru paahi. Exeeni yaamukhalihenrye opaka eyo? Okhala wira aari oowiiyeviha, aahituruka muupuwelo awe. Vano munna aamulattunle aahimmye so: “Owo mutthu oowiiyeviha vanceene”. Moohaanyiherya owo oothanliwa ni Yehova wira omukokhoreleke Yena ni ohiivahererya, vano munna oobatiziwa.​—2 Sam. 22:28; Yoh. 6:44.

7. Itthu nniixutta ahu mmithukumanoni ni okathi nimmusoma ahu Biibiliya sinnikhaliherya sai okhala oowiiyeviha?

⁷ Itthu nniixutta ahu mmithukumanoni ni naamusomaka Biibiliya sinoonikhaliherya okhala oowiiyeviha. Nto sihalaka isumana vakhaani wira niphiye nihiku na Wuupuwelela, mithukumano sahu sinnittittimiherya wiiyeviha wa Yesu oonihenrye awe vaavo aavanhe awe okumi awe ntoko yowoopola. Nto nihalaka nihiku nimosa wira niphiye nihiku na Wuupuwelela, ninnitumereriwa osoma mBiibiliyani sowiiraneya sa wiiviwa ni ohihimuxiwa wa Yesu. Tthiri itthu nniixutta ahu mmithukumanoni ni okathi ninsoma ahu sowiiraneya sa wiiviwa ni ohihimuxiwa wa Yesu, sinniniiriha oxukhurela vanceene mukuttho wowoopola wa Yesu. Eyo enninikhaliherya otakiha wiiyeviha wa Yesu ni opaka yootthuna ya Yehova hata nikumanaka mixankiho sinceene.​—Luka 22:41, 42.

8. Yesu oonihenrye sai olipa murima?

⁸ Hiyo ninnimananiha otakiha olipa murima wa Yesu. Nkahaya muupuwele olipa murima Yesu oonihenrye awe nihalaka nihiku nimosa wira iiviwe. Owo aanisuwela wira moohipisa, awanani awe yaarowa omuramusa, ommana ni omwiiva. (Math. 20:17-19) Hata vaari siiso, Yesu aaheemererya wiiviwa. Nto vaavo okathi waaphiyale aya, owo aahaaleela arummwa aarina awe ejardim ya oJeseemani wira: “Venyani, nrowé! Ole onrwa okivariha, òphiya!”. (Math. 26:36, 46) Nave, vaavo waaphiyale aya muttitthi waakunxe ikatana wira onvare, Yesu aahiisooniherya ni aahaaleela anakhotto wira yaahiye arummwa awe aroweke. (Yoh. 18:3-8) Tthiri Yesu aahooniherya olipa murima vanceene. Olelo-va, maKristau oowoottihiwa ni a ipwittipwitthi sikina annitakiha olipa murima wa Yesu. Moota xeeni?

9. (a) Xeeni nintthuneya ahu olipa murima wira nihicompeleke mithukumano? (b) Ntakiheryo nahu ninrowa waakhaliherya sai anna ni arokora atthukweliwe mukhatteya?

⁹ Wira nihicompeleke mithukumano, nihaana olipa murima okathi ninkumana ahu mixankiho. Anna ni arokora anceene, annirowela mithukumano hata ariipiwe ene murima, okhulumuwa aahiiso awereyasiwaka. Moolipa murima anna akina annirowela mithukumano nnaamwi alupatthiwaka ni amusi aahiiso ni makhulupale a guvernu. Nkahaya muupuwele moota ntakiheryo nahu nooloka nnaakhaliherya aya anna ni arokora atthukweliwe mwaha wa waamini waya. (aHéb. 13:3) Nto vaavo aniiwa aya wira ninnivikaniha omurumeela Yehova hata nikhalanaka mixankiho, awo annilipiha waamini waya, olipa murima ni ovikaniha ororomeleya. Murummwa Paulo saahimphwanya mixankiho ntoko iyo. Okathi atthukweliwe awe mukhatteya oRoma, owo aahihakalala nuumala wiiwa wira annawe yaanimurumeela Muluku moororomeleya. (aFil. 1:3-5, 12-14) Moohipisa, nuumala okumihiwa mukhatteya, Paulo aahilepa epaphelo ya aHeeberi. Epaphelo eyo, Paulo aahaatumererya maKristau oororomeleya wira ‘áhihiyé ophentana’ ni orowela mithukumano.​—aHéb. 10:24, 25; 13:1.

10-11. (a) Tani nimphavela ahu waalattula wira arwe Wuupuwelela? (b) Moota xeeni aÉfeso 1:7 onnikhaliherya awe opaka eyo?

¹⁰ Nihaana olipa murima wira naalattule, amusi ihu, ale anivarana ahu muteko ni ale naattamanne ahu wira arwe Wuupuwelela ni hiyo. Xeeni nimphavela ahu waalattula atthu awo? Okhala wira ninnixukhurela ele Yehova ni Yesu anipakenle aya, nto nimphavela wira atthu awo arwe Wuupuwela ni hiyo. Nave nimphavela wira yiixutte moota akhanle aya oottottela mureerelo oreera murima Yehova oonihenrye awe orumeelaka yowoopola.​—Mmusome aÉfeso 1:7; Wis. 22:17.

¹¹ Vaavo ninthukumana ahu, ninnooniherya olipa murima, nave ninnooniherya mukhalelo mukina wootepa otthuneya. Muluku ni Mwanawe annooniherya mukhalelo owo mwa enamuna ya vameekhaaya. Mukhalelo xeeni?

12. (a) Mithukumano sinlipiha sai omphenta wahu Yehova ni Yesu? (b) 2 aKorinto 5:14, 15 onnitumererya opaka exeeni wira nimutakihe Yesu?

¹² Omphenta wahu Yehova ni Yesu tonniiriha orowela mithukumano. Nto itthu nniixutta ahu mmithukumanoni sinnilipiha omphenta wahu Yehova ni Mwanawe. Mithukumano iyo sinninuupuxerya ele Yehova ni Yesu anipakenle aya. (aRom. 5:8) Nave, muthukumano wa Wuupuwelela oninuupuxerya ophenta wuulupale Yehova owoonihenrye awe apinaatamu, hata ale ahinxukhurela yowoopola. Nto mwaha wooxukhurela iwo, ninniimananiha omutakiha Yesu khula nihiku. (Mmusome 2 aKorinto 5:14, 15.) Nave murima ahu onniniiriha onvuwiha Yehova mwaha woonivaha yowoopola. Enamuna emosa nninvuwiha ahu Yehova ori okomentari okathi wa mithukumano.

13. Ninrowa wooniherya sai wira ninnimphenta vanceene Yehova ni Mwanawe? Mutthokiherye.

¹³ Nnimooniherya omphenta wahu vanceene Yehova ni Mwanawe nlevaka itthu saanisivela wira naahakalalihe. Ikwaha sinceene ninnipaka eyo, nrowelaka mithukumano. Miloko sinceene, sinnikhalana muthukumano mmosa wanikisa wa nihiku na muteko, okathi yoowo atthu anceene anikhulumuwa aya. Nave mithukumano sikina sinkhala wanikisa wa esumana, okathi yoowo atthu anceene amphavela aya ophumurya. Niireke Yehova onnoona wiimananiha wahu orowela mithukumano hata nikhulumunwe ene? Aayo! Yehova onniweha ni onnivaha efaita wiimananiha wahu orowela mithukumano hata nikhulumuwaka, maana ninnooniherya wira ninnimphenta.​—Mar. 12:41-44.

14. Yesu onivanhe sai ntakiheryo nooloka na wooniherya ophenta wekeekhai?

¹⁴ Yesu oonivaha ntakiheryo vaavo oonihenrye awe ophenta wekeekhai. Aahipaka eyo, ohelaka soophavela sa arummwa awe nipuro noopacerya ohiya sawawe ni vaavo aavanhe awe okumi awe wira owoopole arummwa awe. Okathi mukina, Yesu aanikhala ni arummwa awe hata okhulumunwe ene aahiiso oxankale ene. (Luka 22:39-46) Nave-tho, Yesu aaniimananiha waarumeela atthu akina ohiya ophavela orumeeliwa. (Math. 20:28) Vaavo omphenta wahu Yehova ni anna onlipa aya, nnoopaka itthu sotheene ninwerya ahu wira nrowele muthukumano wa Yoolya ya Ohiyu ya Apwiya ni mithukumano sikina.

15. Tani nintthuneya ahu waakhaliherya mwa enamuna ya vameekhaaya?

 ¹⁵ Hiyo nniirela mpantta emusi ya maKristau eekeekhai a olumwenku wotheene ni ninniimananiha waalattula atthu akina wira nithukumaneke vamosa. Nave nihaana waakhaliherya mwa enamuna ya vameekhaaya “amus’ihu òwamini”, yaawo ahiyale olaleerya. (aGal. 6:10) Ninnooniherya waaphenta wahu, vaavo nnaalipiha ahu ni waatumererya orowela mithukumano sahu otepexa wene muthukumano wa Wuupuwelela. Nimutakihaka Yehova ni Yesu, hiyo ninnihakalala vanceene vaavo ale ahiyale olaleerya anhokolowela aya wa Yehova, Tiithi ihu ophenta ni Makampusi ahu ooreera murima.​—Math. 18:14.

16. (a) Ninrowa olipihana sai mukina ni mukhwaawe? Mithukumano sinnikhaliherya opaka exeeni? (b) Okathi xeeni wa vamwaakhani ori aya vooloka wuupuwela masu a Yesu ari Yohani 3:16?

¹⁶ Nto isumana sinittharelana, niimananihe waalattula atthu anceene wira arwe Namathanu 19 a Abril, 2019 Wuupuwelela okhwa wa Kristu ni hiyo. (Nwehe ekaaxa eni: “ Niireke Munimwaalattula?”) Nto mwakha onirwa, nihaana otepa olipihana mukina ni mukhwaawe nihicompelaka mithukumano sotheene Yehova onnivaha awe. Nave vaavo olumwenku ola wootakhala ontepa aya waattamela wanikisa, nihaana othukumana wira nivikanihe okhala oowiiyeviha, oolipa murima ni oophenta. (1 aTes. 5:8-11) Ni murima ahu wotheene, nrowe nimooniherye Yehova ni Mwanawe wira ninnimuxukhurela mwaha wooniphenta vanceene!​—Mmusome Yohani 3:16.