1-2. (a) Xeeni Yesu ohalaka onivaha enamuna yookhweya ya wuupuwelela okhwa wawe? (b) Mikhalelo xeeni sa Yesu ninrowa ahu othokorerya?

NIIREKE munnuupuwela itthu siniiraneya nihiku na Wuupuwelela okhwa wa Kristu? Tthiri, anamunceene a hiyo ninnuupuwela itthu sinipakiwa nihiku na Yoolya ya Ohiyu ya Apwiya. Nthowa xeeni? Mwaha woowi, yoolya eyo ti yohaattiheriwa itthu. Masi yookhalana yootaphulela yuulupale. Woonasa wene, ninniikoha wira: ‘Xeeni yoolya eyo ehinaattiheriwa aya itthu?’

² Okathi aalaleerya awe valaponi, Yesu aaniixuttiha ikeekhai suulupale mwa enamuna yowiiwanyeya ni yookhweya wiiwexexa. (Math. 7:28, 29) Nto ooniixuttiha enamuna yookhweya wuupuwelela * okhwa wawe. Nrowe nithokorerye yoolya eyo ya Wuupuwelela wira niwehe itthu Yesu aahimmye awe ni aapanke awe. Ninrowa woona wira Yesu toowiiyeviha, oolipa murima ni oophenta. Nave ninrowa wiixutta moota wootakiha oratteene mikhalelo iyo sa Yesu.

3. Ntoko enooniherya aya yoolepa ya Matheyo 26:26-28, Yesu aakhweihenrye sai Wuupuwelela okhwa wawe? Ithoonyeryo aarumenle awe, sintaphulela exeeni?

³ Okathi aapacerinhe awe Wuupuwelela okhwa wawe, Yesu aari ni arummwa awe 11 oororomeleya. Owo aakunxe itthu saahanle sa niira na Paasikha wira opacerihe niira na wuupuwelela. (Mmusome Matheyo 26:26-28.) Owo aarumenle  ephaawu yoohiheliwa miropo ni eviinyu yaahanle. Yesu aahaaleela arummwa awe wira ithoonyeryo iye saataphulela erutthu awe ni ephome awe yoomalela, yeeyo moohipisa aarowa awe ovaha ntoko mukuttho wowoopola. Arummwa ale khiyaatikinihiwe ni enamuna ele esya ya Wuupuwelela mwaha wookhala yookhweya aahiiso yohaattiheriwa itthu. Nthowa xeeni?

4. Moota xeeni miruku Yesu anvanhe awe Martha sinnikhaliherya aya osuwela nthowa naya Yesu aakhweihenrye awe Wuupuweleliwa okhwa wawe?

⁴ Nrowe nthokorerye ele yaakhumelenle myeeri vakhaani saavinre, mwaakha wa neeraru wa muteko woolaleerya wa Yesu. Owo aari etthoko ya apatthani, Laazaro, Martha ni Maria. Nto okathi aaphumurya awe, aahipacerya wiixuttiha. Martha aahikhala, masi owo aahikhummwa murima ni ovelavela ophavelaka olokiherya yoolya yinceene wira aavahe aletto awe. Nuumala oweha eyo, mooreera murima Yesu aahimukhaliherya Martha woona wira khivaatthuneya olokiherya yoolya yinceene. (Luka 10:40-42) Muhoolo mwaya, sihalaka iwoora vakhaani paahi wira iiviwe, Yesu aahivarihela muteko miruku sawe. Aahimananiha wira Wuupuweleliwa okhwa wawe okhale wookhweya. Eyo enniixuttiha exeeni voohimya sa Yesu?

5. Mwaha wookhweiherya yoolya ya wuupuwelela, enooniherya exeeni voohimya sa Yesu, ni enivarihana sai ni aFilipi 2:5-8?

⁵ Itthu sotheene Yesu aahimmye awe ni aapanke awe sinnooniherya wira toowiiyeviha. Tivonto nihintikhina ahu woona wira aahooniherya wiiyeviha ohiyu ole wookiserya aari awe valaponi. (Math. 11:29) Yesu aanisuwela wira aamurowa wiiviwa wira owoopole apinaatamu ni wira Yehova ammuhihimuxa wira akhale mwene wiirimu. Hata vaari siiso, Yesu khaivuwinhe opakaka etthu yoovila wira epakiweke okathi wa wuupuwelela okhwa wawe. Masi owo aahaaleela arummwa awe wira ekwaha emosa vamwaakhani, yaahaana omuupuwelela apakaka yoolya yookhweya aahiiso yohaattiheriwa itthu. (Yoh. 13:15; 1 aKor. 11:23-25) Yoolya ele yookhweya ennooniherya wira Yesu khahiyo mutthu oowiixinnuwiha. Tthiri ninnihakalala osuwela wira Mwene ahu a wiirimu mutthu oowiiyeviha vanceene.​—Mmusome aFilipi 2:5-8.

6. Ninrowa otakiha sai wiiyeviha wa Yesu okathi wa mixankiho?

⁶ Ninrowa otakiha sai wiiyeviha wa Yesu? Nihelaka nipuro  noopacerya sootthuneya sa atthu akina ni owoonela vatthu. (aFil. 2:3, 4) Nkahaya muupuwele ohiyu ole wookiserya Yesu aari awe valaponi. Owo aahisuwela wira moohipisa aamwiiviwa mwa enamuna yowooniha othunku, owo aahixanka voohimya sa arummwa awe oororomeleya mwaha woowi yaamuriipiwa murima vanceene. Tivonto, Yesu aavirinhe awe okathi munceene owiixuttihaka, waalipiha ni waamaaliha. (Yoh. 14:25-31) Moowiiyeviha, Yesu aahihela nipuro noopacerya sootthuneya sa atthu akina. Tthiri oonivaha ntakiheryo nooloka wira nitthareke!

7. Yesu oonihenrye sai olipa murima nuumala opaceriha Yoolya ya Ohiyu ya Apwiya?

⁷ Nuumala Yesu opaceriha Yoolya ya Ohiyu ya Apwiya, owo ahooniherya olipa murima. Moota xeeni? Yesu aaheemererya yootthuna ya Tiithi awe, hata aasuwela wira opaka eyo aamwiiviwa vowooniha othunku ntoko nakrime. (Math. 26:65, 66; Luka 22:41, 42) Yesu aahivikaniha ororomeleya wira ovuwihe nsina na Yehova, okhaliherye okhulupale wa Muluku ni wira apinaatamu anttharuwa itampi saya akhalane eparakha yoophwanya okumi woohimala. Masi okathi omosaru, Yesu aahaalokiherya atthareli awe mwaha wa etthu yaarowa waakhumelela mohipisa.

8. (a) Yesu aalenle exeeni arummwa awe oororomeleya? (b) Muhoolo mwaya, awiixutti a Yesu anitthara sai ntakiheryo nawe na olipa murima?

⁸ Yesu aahooniherya-tho olipa murima ohiwehexexaka mixankiho saarowa omukhumelela masi owehexexaka sootthuneya sa arummwa awe oororomeleya. Yoolya yookhweya aapanke awe nuumala omulaxerya Yuda, yaaniwuupuxerya ale yaarowa okhala aatthareli awe oowoottihiwa, mireerelo yaarowa aya ophwanya mwaha wa ephome ya Yesu ni yaamwiirela  mpantta nivarihano na niinaano aapanke awe. (1 aKor. 10:16, 17) Wira aakhaliherye ovikaniha okhala oororomeleya ni wira yakhale vamosa ni Yesu wiirimu, owo aahaaleela atthareli awe ele yena ni Yehova anlipelela aya wira apakeke. (Yoh. 15:12-15) Nave-tho, Yesu aahaaleela arummwa awe wira samwaaphwanya mixankiho. Nto owo aahaalipiha wira atthareke ntakiheryo nawe ottittimiheryaka wira: “Mulipihe murima”. (Yoh. 16:1-4a, 33) Okhuma vaavale Yesu aalenle awe awiixutti awe, awo annivikaniha otthara ntakiheryo nawe ahelaka nipuro noopacerya soophavela sa atthu akina ni alipaka murima. Hata yaasuwela wira yaarowa ohaaxiwaka, awo yanikhaliheryana mukina ni mukhwaawe okathi wa mixankiho.​—aHéb. 10:33, 34.

9. Ninrowa otthara sai ntakiheryo na Yesu na olipa murima?

⁹ Olelo-va, hiyo-tho ninnitthara ntakiheryo na olipa murima wa Yesu. Okathi mukina, nintthuneya olipa murima wira naakhaliherye anna ni arokora anlupatthiwa mwaha wa waamini waya. Nave, okathi mukina moohixariya annihu annitthukweliwa mukhatteya. Nto vaavo enikhumelela aya eyo, nihaana opaka itthu sotheene ninwerya ahu, ohela muhina ilavulelo sahu wira naakhaliherye. (aFil. 1:14; aHéb. 13:19) Enamuna ekina nnooniherya ahu olipa murima ori olaleya ihapari sooreera ‘mowilipiha’ aahiiso moolipa murima. (Mit. 14:3) Nimutakihaka Yesu, hiyo ninnivikaniha olaleya muhupi wa Omwene, nnaamwi atthu akina anlupatthaka. Masi okathi mukina ninniyeleela olipa murima. Nto nihaana opaka exeeni?

10. Sihalaka isumana vakhaani wira niphiye nihiku na Wuupuwelela, nihaana opaka exeeni ni nthowa xeeni?

¹⁰ Nnoowerya ovikaniha olipa murima vaavo nnuupuwela ahu mireerelo mukuttho wowoopola wa Kristu onniphwanyiha aya. (Yoh. 3:16; aÉf. 1:7) Sihalaka isumana vakhaani wira niphiye nihiku na Wuupuwelela, nookhalana eparakha ya olipiha oxukhurela wahu mukuttho wowoopola wa Yesu. Okathi owo, nihaana osoma iveersu sa omusoma Biibiliya wa okathi wa Wuupuwelela, ovekela ni wuupuwelela itthu siiraneyale ohalaka okathi vakhaani wira Yesu iiviwe. Nto  vaavo ninthukumana ahu wira nuupuwelele Yoolya ya Ohiyu ya Apwiya, nnimwiiwexexa saana ele ithoonyeryo sa Wuupuwelela sintaphulela aya ni wira mukuttho wa Yesu wookhalana yootaphulela yuulupale. Nave osuwelexa ele Yehova ni Yesu aapanke aya ni woona wira anniniphenta vanceene, nlipelelo nahu na muhoolo nnoolipa ni enoonikhaliherya ovilela mpakha wanikisa.​—aHéb. 12:3.

11-12. Mpakha-va itthu xeeni niixuntte ahu?

¹¹ Mpakha-va, nihiixutta wira Yoolya ya Ohiyu ya Apwiya enninuupuxerya ohiya paahi otthuneya waya mukuttho wowoopola masi-tho mikhalelo sa Yesu ntoko wiiyeviha ni olipa murima. Tthiri ninnimuxukhurela Yesu, mwaha woovikaniha wooniherya mikhalelo iyo ntoko Mukhulupale a Anamukuttho yoowo onnivekelela ohoolo wa Muluku! (aHéb. 7:24, 25) Wira nooniherye oxukhurela wahu, nihaana wuupuwelela okhwa wa Yesu ntoko wuupuweleliwa aya khalai. (Luka 22:19, 20) Ninnipaka eyo nihiku na 14 a Nisani, nenlo nri nihiku nootepa otthuneya vamwaakhani.

¹² Nnoowerya wiixutta itthu sikina sa ohaattiheriwa itthu wa Yoolya ya Ohiyu ya Apwiya, nthokoreryaka mukhalelo mukina waamwiirinhe Yesu onikhwela. Nto okathi aari awe valaponi aahooniherya mukhalelo owo. Mukhalelo xeeni?

13. Yohani 15:9 ni 1 Yohani 4:8-10 onooniherya sai ophenta wa Yehova ni Yesu anoonihenrye aya? Munttottela sai mureerelo oniphenta waya?

¹³ Itthu sotheene Yesu aapaka awe, ahooniherya wira aanitakiha moomalela ophenta wa Yehova. (Mmusome Yohani 15:9; 1 Yohani 4:8-10.) Etthu yootepa otthuneya okhala wira moohikhanyereriwa Yesu oovaha okumi awe wira onoopole. Hata nri ene oowoottihiwa aahiiso a “ipwittipwitthi sikina”, ninnittottela mureerelo ophenta wa Yehova ni Mwanawe. (Yoh. 10:16; 1 Yoh. 2:2) Nave, itthu Yesu aarumenle awe wira opacerihe yoolya ya Wuupuwelela sinnooniherya wira aanaaphenta ni waavaha efaita awiixutti awe. Moota xeeni?

14. Mwa inamuna xeeni Yesu oonihenrye awe waaphenta atthareli awe?

¹⁴ Yesu aahooniherya waaphenta wawe atthareli awe oowoottihiwa, ohipakaka yoolema yooxankiha, masi opakaka yoolya yookhweya wira yuupuweleleke. Khula mwaakha, atthareli a Yesu oowoottihiwa, yaahaana Wuupuwelela okhwa wawe, nto yaarowa opakaka eyo mapuro oovirikana ohela muhina mukhatteya. (Wis. 2:10) Niireke anniwerya omwiiwelela Yesu? Aayo!

15-16. Atthu akina yaawenrye sai wuupuwelela Yoolya ya Ohiyu ya Apwiya hata yaarina makhalelo oxankiha?

¹⁵ Okhuma eseekulu yoopacerya mpakha olelo-va, maKristau ekeekhai anniimananiha wuupuwelela okhwa wa Yesu. Awo antakiha moota yaapakiwa aya Yoolya ya Ohiyu ya Apwiya hata akhalanaka mikhalelo sooxankiha. Nkahaya nwehe matakiheryo vakhaani anittharelana. Okathi Munna Harold King atthukweliwe awe mukhatteya mekhawe oChina, aahiimananiha vanceene wira Uupuwelele okhwa wa Kristu. Moohisuweliwa, aahilokiherya ithoonyeryo sa Wuupuwelela orumeelaka itthu vakhaani arina awe. Hata ahaasuwela, owo ahikontari mahiku wira osuwele nihiku na Wuupuwelela okhwa wa Yesu. Nto vaavo naaphiyale aya nihiku na wuupuwelela, Harold King aahiipa isipo sa omwene, opaka nivekelo ni olavula mwaha wa wuupuwelela mekhawe.

¹⁶ Ntakiheryo nikina ti na egrupu emosa ya  arokora yaaroihiwe opuro waavariwa muteko mookhanyereriwa okathi wa Ekhotto ya Nenli ya Olumwenku wotheene. Awo yaahiileva wira yuupuwelele Yoolya ya Ohiyu ya Apwiya. Masi, okhala wira itthu sinirumeeliwa okathi owo ti sookhweya, yaahiwerya Wuupuwelela moohisuweliwa. Awo ahimmye so: “Otheene ahu naaheemela ohoolo wa ebanko naakhunenle ahu ni ekuwo yootteela, vaavo naahenle ahu ithoonyeryo sa wuupuwelela. Nto eveela yaanipatta ntoko maluuxu, yeeyo yaakhanle oonooneleliha. . . . Vano naahitthikela ommanela natiri Tiithi ihu a wiirimu nimooniheryaka wira naaphavela orumeela ikuru sahu sotheene wira nivuwihe nsina Nawe”. Tthiri arokora ale yaahooniherya waamini wuulupale! Nave ophenta Yesu onoonihenrye awe onninikhaliherya Wuupuwelela okhwa wawe hata nrine ene makhalelo ooxankiha!

17. Makoho xeeni nintthuneya ahu wiikoha?

¹⁷ Vaavo nnaattamela aya nihiku na Wuupuwelela nihaana wiikoha makoho ala: ‘Kinrowa otakiha sai ophenta wa Yesu? Kiireke kinnihela nipuro noopacerya sootthuneya sa maKristau akhwaaka? Kiireke kinuupuwela wira anna ni arokora ahaana okhala oomalela aahiiso kinnisuwela wira sookhala itthu ahinwerya aya?’ Nto okathi wotheene, nihaana omutakiha Yesu ni ‘okhupanyeryana’.​—1 Ped. 3:8.

18-19. (a) Etthu xeeni nikhanle ahu ookupali? (b) Mulakenle opaka exeeni?

¹⁸ Wuupuwelela okhwa wa Yesu khonrowa okhala wa mahiku otheene. Vaavo Yesu onrowa awe ‘orwa’ okathi wa maxakha maalupale, owo onimwaathukumanya “atthu àthanlalyawe” ahanle valaponi wira arowe wiirimu. Okathi owo nnoohiya Wuupuwelela okhwa wa Yesu.​—1 aKor. 11:26; Math. 24:31.

¹⁹ Hata omalaka Wuupuwelela okhwa wa Yesu, nikupaliki wira atthu a Yehova animuupuwelaka yoolya ela yohaattiheriwa itthu ntoko ethoonyeryo ya wiiyeviha, olipa murima ni ophenta wa Yesu. Nto okathi owo, otheene ale yaarowela wuupuwelela anrowa waaleelaka itthu iyo ale anrowa okhala akumi. Nto wira nipacerye niinaano-va ottottela mureerelo yoolya eyo, nihaana ovikaniha otakiha wiiyeviha, olipa murima ni ophenta wa Yesu. Akhala wira nnoopaka eyo, nikupaliki wira Yehova onoonitthuvela.​—2 Ped. 1:10, 11.