1-2. Nlaikha naalenle exeeni athiyana omahiye aavithiwe Yesu? Malakiheryo xeeni Yesu aavanhe awe?

WAARI oxaka, nihiku 16 a Nisani mwaakha wa 33 nuumala Kristu orwa. Ariipiwe ene murima, egrupu emosa ya athiyana yamphenta Muluku yaahirowa omahiye. Yiira avinre ene mahiku manli okhuma vaavale murutthu wa Pwiya Yesu Kristu, waavithiwe awe mahiye ale. Okathi yaaphiyale aya omahiye opuro aavithiwe Yesu wira attikitthele makhura oowunkhela murutthu wa Yesu, awo yaahixanka mwaha woowi murutthu khiwaakhanle mmahiye! Vano nlaikha nimosa naahaaleela athiyana ale wira Yesu oohihimuxiwa. Nave naahincererya nihimyaka wira: “Vano-nto onohola orowa oGalileya: weiwo t’unrowanyu omona”.​—Math. 28:1-7; Luka 23:56; 24:10.

² Nuumala athiyana ale okhuma omahiye, Yesu aahiwaattamela aavaha malakiheryo ala ani: “Murowé mwàhimerye axinn’aka wira evenye eroke oGalileya. Weiwo t’anrowaya okòna”. (Math. 28:10) Etthu yoopacerya Yesu aapanke awe nuumala ohihimuxiwa, waari opaka mareheryo wira othukumane ni awiixutti awe. Muthukumano ole, Yesu aahaavaha awiixutti awe malakiheryo ootthuneya.

3-4. Xeeni ohimyaka wira yooruma eri Matheyo 28:19, 20, khahiyo yaavahiwe arummwa 11 oororomeleya paahi? (Nwehe elatarato ya ekaapa.)

³ Mmusome Matheyo 28:16-20. Muthukumano Yesu aapanke awe ni awiixutti awe, aahaaleela voohimya sa muteko wootepa otthuneya yaarowa aya ovaraka, yoowo nave hiyo ninvara ahu olelo-va. Yesu aahimmye wira: “Murowé, mwawixuttiheke atthu a maloko othene, . . . wettela sothene sòrumalyakani”.

⁴ Yesu aaphavela wira awiixutti awe otheene alaleeryeke. Khahiyo paahi Yesu aarumme arummwa awe oororomeleya 11 ovara muteko owo. Ninsuwela sai eyo? Okathi Yesu aavanhe awe yooruma  eyo omwaako wa oGalileya khahiyo paahi yaakhanle arummwa ale oororomeleya 11. Ninsuwela sai? Muhiliyale wira nlaikha naalenle so athiyana ale: “Weiwo t’unrowanyu omona [oGalileya]”. Eyo enooniherya wira athiyana ale oororomeleya yaahikhala okathi ole Yesu aavanhe awe yooruma ele. Masi khahiyo yaawo paahi. Maana, murummwa Paulo aahimmye wira Yesu “ahìsoniherya-tho okathi omosá w’atthu òwamini yavikanne miloko miloko mithanu [500]”. (1 aKor. 15:6) Atthu awo 500 oowaamini yaathukumanne opuro xeeni?

5. Exeeni ennikupaliha wira 1 aKorinto 15:6, Paulo aahimya atthu yaathukumanne omwaako wa oGalileya onilavuliwa Matheyo ekapiitulu 28?

⁵ Tthiri nookhalana mathowa ooloka anniiriha ohimya wira 1 aKorinto 15:6, Paulo aahimya atthu yaathukumanne omwaako wa oGalileya onilavuliwa Matheyo ekapiitulu 28. Mathowa xeeni? Nthowa noopacerya, awiixutti anceene a Yesu yaari a oGalileya. Nto vaamukhweya othukumana ni atthu anceene omwaako wa oGalileya ohiya othukumana empa aahiiso nipuro nikina oYerusalemu. Nthowa na nenli, nuumala ohihimuxiwa, Yesu aahithukumana ni arummwa awe 11 oororomeleya empa ya mutthu mmosa oYerusalemu. Vaakhanle wira Yesu aaphavela wira aavahe muteko woolaleerya arummwa awe 11 paahi, owo ampaka eyo oYerusalemu ohiya waavekela athiyana ni atthu akina othukumana ni Yesu oGalileya.​—Luka 24:33, 36.

6. Xeeni ohimyaka wira Matheyo 28:20 onnivariheleya muteko olelo-va? Atthu anceene aniiwelela sai yooruma eyo?

⁶ Nwehe nthowa na neeraru ni nootthuneya. Yooruma ya Yesu ya waapaka awiixutti khahiyo aavanhe paahi maKristau yaakhala okathi ole. Ninsuwela sai? Yesu aahimaliha malakiheryo aavanhe awe atthareli awe yaathukumanne opuro ole ni moolumo ala ani: “Miyo kinokhala ni nyuwo mahiku othene, mpakha elapo omala”. (Math. 28:20) Tthiri ntoko Yesu aahimmye awe, mpakha olelo-va, atthu anceene annaapaka awiixutti. Nkahaya muupuwele ela! Khula mwaakha, atthu anaattamela 300.000 annipatisiwa anakhala Anamoona a Yehova ni awiixutti a Yesu Kristu. Tthiri eyo etthu yoohakalaliha!

7. Mwaha ola ninrowa othokorerya exeeni ni nthowa xeeni?

⁷ Atthu anceene anisomihiwa Biibiliya annikela vahoolo mpakha opatisiwa. Masi vannooneya wira atthu akina nnaasomiha ahu Biibiliya, annoovelela okhala awiixutti a Yesu. Awo annisiveliwa osoma, masi khanikela vahoolo mpakha opatisiwa. Akhala wira munnimusomiha mutthu Biibiliya, ninnikupali wira munniphavela omukhaliherya ovarihela muteko ele oniixutta awe wira okhale mutthareli a Kristu. Mwaha ola, onrowa onikhaliherya woona etthu nikhanle ahu oopaka wira naakhaliherye ale nnaasomiha ahu, omphenta Yehova ni okela vahoolo momunepani. Xeeni vari aya vooloka othokorerya mwaha owo? Mwaha woowi, okathi mukina nihaana woona akhala wira vannireerela ovikaniha omusomiha mutthu owo aahiiso nnaari.

8. Xeeni okathi mukina onivila aya omukhaliherya naxikola ahu omphenta Yehova?

⁸ Yehova oniphavela wira atthu amurumeeleke mwaha wa omphenta. Tthiri yoolakela ahu, waakhaliherya ale nnaasomiha ahu woona wira Yehova onnaathokorerya ni onnaaphenta vanceene. Nave nimphavela waakhaliherya woona wira Yehova “tithi ànamwane ikwasuni, owo onniwakiha athiyana anamukhweli”. (Esal. 68:6) Vaavo anaxikola anyu anoona aya wira Yehova onnaaphenta vanceene, woonasa wene awo anoopacerya omphenta vanceene Yehova. Atthu akina nnaasomiha ahu Biibiliya pooti waavila omoona Yehova ntoko Tiithi oophenta, mwaha woowi khatonko ophentiwa ni othokoreriwa saana ni anamuyari aya. (2 Tim. 3:1, 3) Nto vaavo muniiriha anyu yoosoma ya Biibiliya, muttittimiheryeke  mikhalelo sookuxa murima sa Yehova. Mmukhaliheryeke osuwela wira Muluku ahu oophenta oniphavela wira aphwanye okumi woohimala ni onimwaakhaliherya ophwanya. Etthu xeeni ekina nikhanle ahu oopaka?

9-10. Iliivuru xeeni ninrumeela ahu wira naasomihe atthu Biibiliya, nto xeeni nintumereriwa ahu orumeela iliivuru iyo?

⁹ Murumeeleke eliivuru “Biibiliya Onniixuttiha Exeeni?” ni “Mukhaleke Mophentani Mwa Muluku”. Iliivuru iyo sipakiwe mwa enamuna enrowa waavara murima ale munaasomiha anyu Biibiliya. Mwa ntakiheryo, Muru 1 wa eliivuru Biibiliya Onniixuttiha, onnaakhula makoho ntoko ala: Niireke Muluku khonoona othunku ni tootakhala murima? Muluku onoonela sai ohaawa wa apinaatamu? Niireke munoowerya okhala mpatthani a Yehova? Ankhi eliivuru Omphenta Muluku? Eliivuru ela enoomukhaliherya ole munimusomiha anyu Biibiliya woona wira ovarihela muteko malakiheryo a mBiibiliyani mookumini mwawe onoomukhaliherya okhalana okumi wooloka ni okhala mpatthani a Yehova. Hata mwaasominhe ene iliivuru iyo anaxikola anyu akina, ti vooloka wiilokiherya saana khula yoosoma wira mmukhaliherye naxikola anyu moovarihana ni makhalelo awe.

 ¹⁰ Munrowa opaka exeeni akhala wira ole munimusomiha anyu Biibiliya onnimusivela mwaha mmosa onithokoreriwa eliivuru ehikhanle Ekaaxa ya Ikaruma Sinnikhaliherya Wiixuttiha? Nyuwo muhaana omutumererya osoma mwaha owo mekhawe. Eyo enimookhaliheryani ovikaniha wiiriha yoosoma anyu murumeelaka iliivuru nintumereriwa ahu waasomiha atthu ntoko Biibiliya Onniixuttiha ni Omphenta Muluku.

11. Okathi xeeni ninreerela ahu opacerya ovekela okathi nniiriha ahu yoosoma ya Biibiliya? Ninrowa omukhaliherya sai naxikola ahu woona otthuneya waya opaka eyo?

¹¹ Mpaceriheke khula yoosoma ni nivekelo. Okhala wene, ti vooloka ovekela muhinatthi opacerya omusomiha naxikola anyu Biibiliya ni wanikisa muhaana ovekela. Vannireerela opaka eyo voohipisa nuumala opaceriha yoosoma ya Biibiliya enikela vahoolo. Nihaana waakhaliherya anaxikola ahu woona wira anoomwiiwexexa Biibiliya akhaliheriwaka ni munepa wootteela wa Muluku. Anamalaleerya akina, wira yooniherye otthuneya waya opaka nivekelo ahinatthi osoma, awo annimusoma Yakobo 1:5, yoowo onihimya so: “Akhalá mwa nyuwo ohirina ankhili, anvekele Muluku”. Nuumala-vo, annimukoha ole animusomiha aya Biibiliya wira: “Ninrowa onvekela sai ankhili Muluku?” Woonasa wene, naxikola owo onimwaakhula wira nipakaka nivekelo.

12. Mwaarowa orumeela sai Esalimo 139:2-4, wira mmukhaliherye naxikola anyu onvekela Yehova mootaphuwa?

¹² Mmwiixuttiheke moota woovekela. Mmulipiheryeke wira Yehova onniphavela owiriyana ni waakhula mavekelo awe. Mmooniheryeke wira nirumeelaka mavekelo ahu a omwaneene, pooti omuleela Yehova moonelo ahu ni itthu nihaarowa ahu waaleela atthu akina. Muhiliyale wira Yehova onnisuwela moonelo ni muupuwelo ahu. (Musome Esalimo 139:2-4.) Nave nihaana omutumererya onvekela Yehova wira omukhaliherye oturuka miyuupuwelo soohiloka ni ohiya soolema soohiloka. Mwa ntakiheryo, nkahaya mmuupuwele mutthu onisomihiwa Biibiliya ni onoona ovila ohiya wiirela mpantta iferiyatu ni ifesta sa etiini yoowootha. Owo onnisuwela wira ifesta iyo ti soohiloka, hata vari siiso onnivikaniha wiirela mpantta. Akhala wira ti siiso, mmutumereryeke omuleela Yehova moonelo awe ni onvekela wira omukhaliherye ophenta itthu Yehova oniphenta awe ni onyokha itthu oninyokha awe.​—Esal. 97:10.

13. (a) Xeeni vari aya vooloka waalattula anaxikola ahu orowela mithukumano voohipisa? (b) Ninrowa omukhaliherya sai naxikola ahu okhala ootaphuwa mmithukumanoni?

¹³ Mmulattuleke naxikola anyu orowela mithukumano sa mmulokoni moohipisa. Itthu naxikola anyu onrowa awe owiriyana omithukumanoni pooti omwiiriha omurumeela Yehova ni okela vahoolo momunepani. Mmooniheryeke eviidiyu eni Exeeni Eniiraneya Mmithukumanoni sa Empa ya Omwene?, nuumala vo, mmutumereryeke orowa ni nyuwo omuthukumanoni. Mmukuxeke mukaaroni mwanyu aahiiso mpakeke mareheryo a orowa omithukumanoni. Ti vooloka waalattula anamalaleerya akina woohoolani okathi munrowa anyu omusomiha. Opaka eyo enoomukhaliherya naxikola anyu waasuwela oratteene atthu akina a mmulokoni. Woonasa wene eyo enoomukhaliherya waalimalela ni okhala ootaphuwa mmithukumanoni.

14. Exeeni enrowa omukhaliherya naxikola anyu wunnuwa momunepani?

¹⁴ Yoolakela ahu waakhaliherya ale nnaasomiha ahu Biibiliya wunnuwa momunepani. (aÉf. 4:13) Vaavo mutthu oneemererya awe omusoma Biibiliya, owo onniphavela osuwela moota yoosoma eyo enrowa aya omukhaliherya mookumini mwawe. Nto vaavo omphenta wawe Yehova oninnuwa aya, woonasa wene onoopacerya wuupuwela moota okhanle awe oowaakhaliherya atthu akina, waahela muhina atthu a mmulokoni. (Math. 22:37-39) Akhala wira vannireerela opaka eyo, muhooveleleke omuleela naxikola anyu eparakha ya  ovaha musurukhu ahu wira nikhaliherye miteko sa Omwene.

15. Exeeni enrowa omukhaliherya naxikola anyu opaka etthu yooloka okathi sinikhumelela aya mixankiho?

¹⁵ Mmwiixuttiheke naxikola anyu etthu yoopaka sakhumelela mixankiho. Mwa ntakiheryo, nkahaya muupuwele wira naxikola anyu yoowo ori namalaleerya oohipatisiwa onnooleelani wira khoniiwanana ni mutthu mmosa a mmulokoni. Munrowa opaka exeeni? Musyakeke omuleela tani orina erasau ni tani ohirina. Masi mmooniheryeke ele Biibiliya onihimya awe sa etthu nikhanle ahu oopaka wira niphuke ohiiwanana. Owo pooti omulevelela ni oliyala mwaha owo aahiiso ohaana ovaanela ni mutthu owo. Mmooniheryeke wira ohaana opaka eyo mwa enamuna yoophenta ophavelaka okhaliha murettele. (Mulikanyihe ni Matheyo 18:15.) Mmukhaliheryeke naxikola anyu olokiherya etthu onrowa awe ohimya. Nyuwo pooti omooniherya aplikativo JW Library^®, Eliivuru Enaakhaliherya Anamoona a Yehova Otokosa Myaha Sikumiheriwe ni jw.org^® wira ophwanye malakiheryo a moota woophuka muxankiho awe. Akhala wira onimwiixutta ophuka mixankiho sawe ni atthu akina ohinatthi opatisiwa, woonasa wene onookhalana waataana wooloka ni atthu akina mmulokoni nuumala opatisiwa.

16. Xeeni vari aya vooloka waalattula anamalaleerya akina naarowaka wiiriha yoosoma ahu?

¹⁶ Mwaalattuleke atthu akina a mmulokoni orowa omusomiha ni nyuwo ni mutokweene a esirkwiitu okathi onixukurya awe muloko anyu. Mwaha wa xeeni? Mwaha woowi, ntoko nihimmye ahu wanipacerya, anamalaleerya akina pooti omukhaliherya naxikola anyu mwa enamuna nyuwo mwahaarowa anyu owerya. Mwa ntakiheryo, muupuwele wira naxikola anyu onniimananiha ohiya ompaha soona ikwaha sinceene masi khoniwerya. Mmulattuleke Namoona a Yehova owenrye oxintta muxankiho owo, pooti wira aahiimananiha ikwaha sinceene ohinawerya. Woonasa wene, munna owo onoowerya onvaha malakiheryo anrowa omukhaliherya naxikola anyu okathi owo. Akhala wira munnoovelela wiiriha yoosoma ya Biibiliya muri ene ni munna orina sookumanana sinceene, munvekele wira yena ohooleleke yoosoma eyo nyuwo muri ene vaavo. Tthiri vaavo munaalattula anyu atthu akina orowa omusomiha Biibiliya naxikola anyu, owo onnittottela mureerelo itthu anisuwela aya. Xontte, muhiliyale wira yoolakela ahu waakhaliherya anaxikola ahu a Biibiliya wunnuwa momunepani.

17-18. Muhaana othokorerya exeeni muhinatthi ohiya omusomiha naxikola anyu?

¹⁷ Akhala wira naxikola anyu khonipaka marukunuxo mookumini mwawe, okathi mukina pooti wiikoha so: ‘Kiireke kihaana ohiya omusomiha?’ Muhinatthi ohiya omusomiha, muhaana wuupuwela saana voohimya sa mikhalelo sa mutthu owo ni moonelo awe. Muhiliyale wira atthu akina anniviriha okathi munceene ahinatthi okela vahoolo. Mwiikoheke so: ‘Kiireke naxikola aka onnikela vahoolo momunepani moovarihana ni mikhalelo sawe?’ ‘Kiireke oopacerya “wettela” aahiiso ovarihela muteko itthu oniixutta awe?’ (Math. 28:20) Pooti ovira okathi wira naxikola anyu okhale mutthareli a Kristu. Masi vakhaani-vakhaani ohaana  opaka marukunuxo mookumini mwawe, moovarihana ni mikhalelo sawe.

¹⁸ Masi, nihaana opaka exeeni akhala wira naxikola ahu okhumme khalai omusoma Biibiliya masi khonooniherya wira onnivaha efaita yoosoma awe? Nkahaya muupuwele ela: Naxikola anyu oomaliha osoma eliivuru Biibiliya Onniixuttiha, nave woonasa wene oopacerya oosoma eliivuru Omphenta Muluku, masi khonarowele mithukumano nnakhala mmosa wala muthukumano wa Wuupuwelela Okhwa wa Yesu! Nave ikwaha sinceene onihimya wira khonrowa osoma mwaha wa itthu sihirina efaita. Akhala wira naxikola anyu onnipaka eyo, nyuwo muhaana ovaanela saana ni yena. *

19. Muhaana opaka exeeni akhala wira naxikola anyu khonisiveliwa omusoma Biibiliya, ni etthu xeeni munireerela anyu othokorerya?

¹⁹ Nyuwo pooti opaceriha ovaanela mmukohaka so: ‘Etthu xeeni yuulupale enookhoottiheryani okhala Namoona a Yehova?’ Woonasa wene, ole munimusomiha anyu Biibiliya pooti waakhula so: ‘Khonikisivela omusoma Biibiliya ni nkinikhala-khala kikhalaka Namoona a Yehova!’ Akhala wira okhuma okathi opacenrye awe omusoma Biibiliya orina moonelo owo, niireke khivaareerela ohiya omusomiha mutthu owo? Masi pooti wira okhuma wanipacerya, ole munimusomiha anyu Biibiliya onnooniherya etthu enimukhoottiherya okela vahoolo. Mwa ntakiheryo, pooti uupuwelaka wira khoniwerya olaleerya empa ni empa. Nto mwasuwela ele enimuxankiha, munoowerya omukhaliherya oxintta mixankiho sawe.

20. Miteko 13:48 onnikhaliherya sai waaweha atthu nikhanle ahu oowaasomiha?

²⁰ Mooriipiha murima, atthu akina nnaasomiha ahu Biibiliya anoolikana ni aIsarayeli a okathi wa Ezekiyeli. Nkahaya nwehe ele Yehova aamulenle awe Ezekiyeli ikwaha sinceene oriki: “Mwa yawo, nyuwo munlikana ni mulipa-òwipa isipo sorera s’ophentana, walá ni mulipa-omòpa tthakare: awo annìwa molumo anyu, nto khavo onìwelela”. (Ezek. 33:32) Pooti onivila omuleela ole nimmusomiha ahu Biibiliya wira nnoohiya omusomiha. Masi muhiliyale wira “okathi onnihalela ori vakhani”. (1 aKor. 7:29) Ohiya oyiiha okathi ahu naasomihaka atthu ahinikela vahoolo ni ahiniphavela, nihaana orumeela okathi owo naaphavelaka atthu ale aniphavela “ekumi ehinimala”.​—Musome Miteko 13:48.

21. Yoolepa ya mwaakha wa 2020, enrowa onikhaliherya opaka exeeni?

²¹ Tthiri yoolepa ya mwaakha wa 2020, enoonikhaliherya olokiherya mikhalelo sahu vaavo nnaapaka ahu awiixutti. Moohaanyiherya, Yesu aahihela muhina mwaha owo okathi aapanke awe muthukumano wootepa otthuneya omwaako wa oGalileya oriki: “Murowé, mwawixuttiheke atthu . . .  mwabatizaka”.​—Math. 28:19.