1-2. Mixankiho xeeni sinaaphwanya arumeyi anceene a Yehova ni sinikumiherya exeeni?

NKAHAYA nwehe matakiheryo ala mararu: Munna mmiravo onnileeliwa ni meediku awe wira ookhalana eretta yookhulumula vanceene. Vano munna oowiimananiha orina iyaakha sinivikana 50, onnoomoliwa omutekoni wawe, nto hata ophavelasaka muteko mukina owo khoniphwanya. Vano murokora oowuuluvala ni oororomeleya khoniwerya ovara itthu sinceene mmutthenkesoni mwa Yehova ntoko aaphavela awe.

² Akhala wira mookhalana muxankiho ntoko mixankiho silavuliwe, woonasa wene munuupuwela wira Yehova khonrowa woorumeelani ni khamurina efaita. Mixankiho iyo pooti oniiyerya ohakalala wahu, wuupuwela wira khanrina efaita ni ohonona waataana wahu ni atthu akina.

3. Satana ni ale anitakiha muupuwelo awe anipaka exeeni?

³ Olumwenku ola onnooniherya moonelo wa Satana voohimya sa okumi wa apinaatamu. Okhala wene, Satana khonaavahe efaita apinaatamu. Mwa enamuna yootakhala, Satana aahimuleela Eva wira aarowa okhala ootaphuwa aahimwiiwelele Muluku, nnaamwi Satana aasuwela wira Eva aahimwiiwelele Muluku aamookhwa. Satana tonilamulela olumwenku wa nakoso, epoliitika ni mutthenkeso wa itiini sowootha siri olumwenku ola. Nto khanintikhina vaavo ninwoona ahu alipa a nakoso anceene, a epoliitika ni ahooleli a etiini ahaavahaka efaita apinaatamu ni ahittittimihaka moonelo ni muupuwelo wa atthu.

4. Mwaha ola, ninrowa othokorerya exeeni?

⁴ Moovirikana ni Satana, Yehova oniphavela wira nisuweleke wira nookhalana efaita ni onninikhaliherya okathi ninkumana ahu mixankiho seiyo sinniiriha wuupuwela wira khanrina efaita. (Esal. 136:23; aRom. 12:3) Mwaha ola, ninrowa woona moota Yehova  onnikhaliherya awe mwa inamuna tthaaru sinittharelana: (1) Vaavo ninwereiwa ahu, (2) vaavo ninthoiwa ahu musurukhu ni (3) vaavo wuuluvala onniiriha aya wuupuwelaka wira khaninwerya opaka etthu enrowa okhaliherya muteko wa Yehova. Wanipacerya, nrowe niwehe etthu ennikupaliha wira khula mmosa a hiyo onnivahiwa efaita ni Yehova.

5. Exeeni enookupalihani wira Yehova onnaavaha efaita apinaatamu?

⁵ Nnaamwi nipakiwe ene erumeeliwaka etthaya, hiyo nookhalana efaita yinceene ovikana ntthupi. (Maph. 2:7) Nwehe itthu vakhaani sinniiriha okupali wira Yehova onninivaha efaita. Owo onipattunxe mwa enamuna ninwerya ahu otakiha mikhalelo sawe. (Maph. 1:27) Mwaha woonipaka mwa enamuna eyo, Yehova ohaapattuxa apinaatamu mwa enamuna yootepexa oloka ovikana itthu sotheene opattunxe awe valaponi.​—Esal. 8:5-9.

6. Etthu xeeni ekina ennikupaliha wira Yehova onnaavaha efaita apinaatamu oohimalela?

⁶ Hata nuumala Adamu ottheka, Yehova aahivikaniha waavaha efaita apinaatamu. Owo onninivaha efaita yinceene mpakha onivaha Mwanawe, Yesu, wira onoopole itampi sahu. (1 Yoh. 4:9, 10) Orumeelaka mukuttho wowoopola, Yehova onrowa waahihimuxa atthu otheene akhwiiye mwaha wa etampi ya Adamu, akhale “ale òrera murima n’ale òtakhala murima”. (Mit. 24:15) Biibiliya onnooniherya wira nookhalana efaita wa Yehova hata niwereiwaka, nihaawale ene ni nuuluvanle ene.​—Mit. 10:34, 35.

7. Etthu xeeni ekina-tho enaakupaliha arumeyi a Muluku wira annivahiwa efaita yinceene ni Yehova?

⁷ Aakhala mathowa annikupaliha wira Yehova onninivaha efaita. Owo oonaataaniha ni yena mwaha woowi niheemererya ihapari sooreera. (Yoh. 6:44) Vaavo nimpacerya ahu omwaattamela Yehova, owo nave onninaattamela. (Yak. 4:8) Ohiya-vo, Yehova onniviriha okathi wira oniixuttihe onooniheryaka wira nookhalana efaita vamaithoni vawe. Yehova onnisuwela omutthu ahu ni onninikhaliherya olokiherya. Nave Yehova onninipwapwela mwaha woowi onniniphenta. (Mir. 3:11, 12) Tthiri itthu iyo sinnooniherya wira Yehova onninivaha efaita yinceene!

8. Moolumo ari Esalimo 18:28-30 annikhaliherya sai okhalana moonelo wooloka voohimya sa mixankiho?

⁸ Atthu akina anihimya wira Mwene Davidi khaarina efaita, masi owo aanisuwela wira aaniphentiwa ni okhaliheriwa ni Yehova. Osuwela eyo yaahimukhaliherya ovilela muxankiho ole ni moonelo wooloka. (2 Sam. 16:5-7) Akhala wira ninnixanka aahiiso nookhalana mixankiho, Yehova pooti onikhaliherya oweha mixankiho sahu mwa enamuna yooloka ni oxintta muxankiho ahu. (Musome Esalimo 18:28-30.) Moolumo ari Esalimo 18:28-30 anninikhaliherya okhalana moonelo wooloka voohimya sa mixankiho ni anninikhaliherya woona wira khiivo etthu ekhanle oonihiiha omurumeela Yehova ni ohakalala. (aRom. 8:31) Vano nrowe niwehe mixankiho iyo miraru ninreerela ahu wuupuwela wira Yehova onniniphenta ni onivaha efaita.

9. Owereiwa pooti oniiriha okhalana moonelo xeeni?

⁹ Owereiwa pooti ohonona muupuwelo ni moonelo ahu, nnuupuwela wira khanrina efaita ni khaninrumeeliwa-tho. Nave pooti oxanka vanceene vaavo nnoona ahu wira atthu akina aasuwela mixankiho sahu, aahiiso vaavo ninlipana ahu nikhaliheryo na atthu akina. Hata atthu akina ahisuwelaka wira nnoowereiwa, hiyo pooti owanana moonelo woohiloka mwaha woowi khaninwerya ovara itthu naavara ahu khalai.  Okathi ninkhalana ahu mixankiho iyo, Yehova onoonilipiha. Moota xeeni?

10. Miruku 12:25 onihimya exeeni enrowa onikhaliherya okathi ninwereiwa ahu?

¹⁰ Okathi ninwereiwa ahu, “nulumo nowepesa” pooti onlipiha vanceene. (Musome Miruku 12:25.) Omurumeelaka Biibiliya, Yehova onninleela itthu sinceene sooloka sinnuupuxerya wira nookhalana efaita hata niwereiwaka. (Esal. 31:20; 41:4) Akhala wira nnoosoma aahiiso otthikela osoma Nuulumo na Muluku, Yehova onoonikhaliherya oxintta oxanka wahu mwaha woowereiwa.

11. Munna mmosa aakhaliheriwe sai ni Yehova?

¹¹ Nkahaya nwehe yowiiraneya ya Jorge. Okathi aari awe mmiravo, Jorge aahikhalana eretta yannuwa mowaakuveya ni yaanimutepela, eyo yaanimwiiriha wuupuwelaka wira khaarina efaita. Jorge onihimya so: “Miyo nkaalipelela wira oretta aka waamukuulihaka muru mwaha woowi atthu anceene yaanikiwehexexa. Vaavo oretta aka waatepa aya, kaanuupuwela moota okumi aka waarowa aya oturukeya. Kaahiriipiwa murima vanceene ni kaahimuxonttela Yehova wira okikhaliherye”. Yehova aamukhalihenrye sai? Jorge onihimya wira: “Okhala wira nkaawerya wuupuwela itthu sinceene, kaanisoma iveersu vakhaani paahi siri eliivuru ya Esalimo seiyo sinooniherya moota Yehova onaakhapelela awe arumeyi awe. Kaanitthikela osoma iveersu iyo ikwaha sinceene vanihikuni, nto saanikilipiha vanceene ni okimaaliha. Nuuvira okathi, atthu akina yaahoona wira kaanihakalala. Nto yaanikileela wira moonelo aka wooloka waanaalipiha vanceene. Tthiri kaahoona wira Yehova aahaakhula mavekelo aka! Owo ookikhaliherya oturuka moonelo aka. Vano kinniwehexexa ele nuulumo nawe ninhimya aya sa moota onikoonela awe hata kiwereiwaka”.

12. Akhala wira munoowereiwa, muhaana opaka exeeni wira Yehova ookhaliheryeni?

 ¹² Akhala wira munoowereiwa, mukupaliki wira Yehova onnisuwela muxankiho anyu. Mmuxontteleke wira ookhaliheryeni okhalana moonelo wooloka voohimya sa muxankiho muniwanana anyu. Nuumala-vo, mphavelaseke mBiibiliyani moolumo oolipiha Yehova orumme awe olempwa. Muupuweleleke vanceene iveersu sinooniherya wira Yehova onnaavaha efaita arumeyi awe. Mwiira siiso, munimoona wira Yehova onnaareerela murima arumeyi awe oororomeleya.​—Esal. 84:12.

13. Ahooleli a etthoko anikhalana muupuwelo xeeni yoomoliwa omutekoni?

¹³ Khula muhooleli a etthoko, oniphavela wira aavaheke atthu otheene a etthoko awe itthu sinaathowa. Okathi mukina, munna pooti woomoliwa omutekoni wawe hata ohipanke etthu yoohiloka. Vano owo onniimananiha ophavelasa muteko mukina, masi khoniphwanya. Mixankiho ntoko iyo, pooti omukhulumula mutthu mpakha onuupuwela wira khorina efaita. Okathi owo, ninrowa ororomela sai nikhaliheryo na Yehova?

14. Xeeni Yehova onimaliherya awe sooleiherya sawe?

¹⁴ Okathi wotheene Yehova onnimaliherya sooleiherya sawe. (Yox. 21:45; 23:14) Aakhala mathowa manceene animwiiriha opaka eyo. Noopacerya, eyo ennaakiherya nsina nawe ni omutthu awe. Yehova ooleiherya wira onimwaakhapelela arumeyi awe oororomeleya, nto owo onniphavela omaliherya yooleiherya awe eyo. (Esal. 31:2-4) Nave, Yehova onnisuwela wira ninnixanka vaavo nihinwerya ahu waavaha itthu sinaathowa atthu a etthoko ahu. Owo ooleiherya wira onoonivaha itthu sinnithowa wira nivikaniheke okhala akumi ni omurumeela moororomeleya. Nto khiivo etthu enrowa omukhoottiherya  omaliherya yooleiherya awe eyo!​—Math. 6:30-33; 24:45.

15. (a) Mixankiho xeeni saaphwannye maKristau a eseekulu yoopacerya? (b) Esalimo 37:18, 19 ennikupaliha exeeni?

¹⁵ Nikupaliki ni murima wotheene wira Yehova onoonikhaliherya hata okathi ninthoiwa ahu musurukhu. Nkahaya nwehe ntakiheryo na maKristau a eseekulu yoopacerya. Okathi muloko wa oYerusalemu waalupatthiwa aya vanceene, “atthu othene òwamini yahimwarela ilapo” sikina waahiya arummwa paahi. (Mit. 8:1) Nkahaya muupuwele etthu yaakhumelenle. Okhala wira yaanilupatthiwa, awo khiyaarina musurukhu waaphiyerya. Woonasa wene, awo yaahipweteiwa ipa saya ni anakoso aya. Masi Yehova khaanyanyanle, nave yaahivikaniha ohakalala. (Mit. 8:4; aHéb. 13:5, 6; Yak. 1:2, 3) Yehova aahaakhaliherya maKristau ale oororomeleya, nave owo onoonikhaliherya.​—Musome Esalimo 37:18, 19.

16. Etthu xeeni ekhanle ooniiriha wuupuwelaka wira Yehova khonnivaha efaita?

¹⁶ Vaavo nnuuluvala ahu, pooti opacerya wuupuwelaka wira khaninwerya onvaha etthu Yehova ni khinrina efaita. Mwene Davidi aahikhalana muxankiho owo vaavo uuluvala awe. (Esal. 71:9) Yehova onrowa onikhaliherya sai?

17. Ntakiheryo na murokora Jheri, ninniixuttiha exeeni?

¹⁷ Nwehe ntakiheryo na murokora oniihaniwa Jheri. Owo aahilattuliwa wiirela mpantta muthukumano waarowa opakiwa Empa ya Omwene. Muthukumano ole, yaarowa wiixuttihiwa moota woolokiherya ipa sinrumeeliwa ni mutthenkeso ahu, nto murokora ole khaaphavela orowela. Owo onihimya so: “Miyo kihuuluvala, kanaamukhweli ni nkinwerya opaka nnakhala etthu emosa enrowa okhaliherya muteko  woolokiherya ipa sa Omwene. Miyo nkirina efaita”. Ohiyu nihinatthi ophiya nihiku waarowa aya opakiwa muthukumano, Jheri aahinvekela Yehova. Nihiku naattharelana, nuumala ophiya Empa ya Omwene, nlelo aaniikoha etthu yaamwiirinhe orowa opuro ole. Nto okathi muthukumano waapacenrye aya, mulipa oolavula mwaha mmosa, aahittittimiherya wira etthu yootepa otthuneya khahiyo itthu ninsuwela ahu, masi ophavela wahu wiixuttihiwa ni Yehova. Jheri onihimya wira: “Miyo kaahuupuwela so: ‘Kinniwerya opaka eyo!’ Kaahipacerya omoroxa maithori mwaha woowi kaahoona wira Yehova aahaakhula nivekelo naka. Munna ole aahikilipiherya wira kookhalana etthu ya faita kikhanle aka oovaha ni aaniphavela okiixuttiha ovara muteko saana!” Uupuwelaka itthu saamwiiranenle, Jheri onihimya so: “Kirowaka opuro ole waapakiwa muthukumano kaahixanka, kaahikhulumuwa ni kaahivolola. Masi kaahikhuma opuro ole kilimpe ene vanceene ni kisuwelaka wira kookhalana efaita!”

18. Biibiliya onooniherya sai wira Yehova onnivaha efaita muteko nninvarela ahu hata nuuluvanle ene?

¹⁸ Tthiri vaavo nnuuluvala ahu, nikupaliki wira Yehova onninivaha muteko nikhanle ahu oovara. (Esal. 92:13-16) Yesu ooniixuttiha wira hata nihiweryaka opaka itthu sinceene, itthu seiye saamukhaani nimpaka ahu nuupuwelaka wira khasirina efaita mmutthenkesoni mwawe, Yehova onnivaha efaita. (Luka 21:2-4) Nto nwehexexeke itthu muniwerya anyu opaka. Mwa ntakiheryo, nyuwo pooti waalaleerya atthu akina, waavekelela ni waalipiha anna wira avikaniheke ororomeleya. Yehova onnoovahani efaita ohiya mwaha wa itthu muniwerya anyu opaka, masi mwaha woowi munnimwiiwelela ni murima wotheene.​—1 aKor. 3:5-9.

19. Yoolepa ya aRoma 8:38, 39 ennikupaliha exeeni?

¹⁹ Tthiri eparakha yuulupale omukokhorela Yehova, Muluku yoowo onaavaha efaita yinceene ale animurumeela! Owo onipattunxe wira nipakeke yootthuna awe. Moohaanyiherya, okokhorela wekeekhai onninihakalaliha vanceene. (Wis. 4:11) Atthu anceene a olumwenku ola anuupuwela wira khanrina efaita, masi muhiliyale wira Yehova khonnithokorerya siiso. (aHéb. 11:16, 38) Hiyo ninnikhulumuwa akhala wira ninniwereiwa, noothoiwa musurukhu aahiiso nihuuluvala. Okathi owo nihaana wuupuwela wira khiivo etthu ekhanle oonimwalanyiha ophentiwa ni Tiithi ahu a wiirimu.​—Mmusome aRoma 8:38, 39.