1. Mwaha waalavuliwe okongresuni mwaakha wa 1935 waamwiirinhe munna opaka exeeni?

MUNNA mmosa aarina iyaakha 18 vaavo aapatisiwe awe mwaakha wa 1926. Anamuyari awe yaari Anamasoma a Biibiliya yaawo olelo-va anisuweliwa okhala Anamoona a Yehova. Awo yaahikhalana anamwane araru aaxilopwana ni anamwane anli aaxithiyana. Nave yaahaahuwa wira amurumeeleke Yehova ni omutakiha Kristu. Okhala wira yaari yoolema ya Anamasoma a Biibiliya a okathi ole, mmiravo ole aanikhuura ephaawu ni aaniwurya eviinyu nihiku na wuupuwela Yoolya ya Ohiyu ya Apwiya. Masi makhalelo awe yaahiturukeya vaavo aiwale awe mwaha waahimya so: “Muttitthi Muulupale”. Mwaha ole, waalavuliwe mwaakha wa 1935 ni Munna Joseph Franklin Rutherford okongresuni oWashington wEstados Unidos. Etthu xeeni Anamasoma a Biibiliya yiixuntte aya kongresu ole?

2. Ekeekhai xeeni Munna Rutherford aatthokihenrya awe okathi aalavula awe mwaha awe?

² Olavulaka mwaha awe, Munna Rutherford aahaahimya atthu aniirela mpantta “muttitthi muulupale” onilavuliwa Wiisuupulula 7:9. Mpakha okathi ole, Anamasoma a Biibiliya yuupuwela wira muttitthi muulupale ekrupu ya apinaatamu yaarowa orowa wiirimu yaawo yaaroromeleyale vakhaani waavikana maKristau oothanliwa. Omurumeelaka Biibiliya, Munna Rutherford aahitthokiherya wira muttitthi muulupale khiwaathanliwe wira wakhaleke  wiirimu, masi ipwittipwitthi sikina * sa Yesu Kristu saarowa woopowa okathi wa ‘maxakha maalupale’ wira sikhaleke mahiku otheene valaponi. (Wiis. 7:14) Yesu aahimmye so: “Kookhalana-tho ipwittipwitthi sikina sihikhanle sa nikoto nenla. Seiyo-tho kihaana othukumanya, nave iyo sinrowa owiriyanaka nsu naka. Sinrowa okhala nikoto nimosa ni okhalana makampusi mmosa”. (Yoh. 10:16) Ipwittipwitthi iyo sikina anihimmwa Anamoona a Yehova arina nlipelelo na okhalaka mparayiisu valaponi. (Math. 25:31-33, 46) Vano, ninrowa oweha moota wiiwexexa iwo wa ekeekhai eyo ya mBiibiliyani yaaturunke aya okumi wa atthu anceene omuhela muhina munna ole aarina iyaakha 18.—Esal. 97:11; Mir. 4:18.

3-4. Okathi wa kongresu a mwaakha wa 1935 atthu anceene yaasuwenle sai nlipelelo naya ni nthowa xeeni?

³ Okathi woohakalaliha wa kongresu ole, waari okathi yoole mulipa-oolavula mwaha aavekenle awe alipa-oowiriyana wira: “Atthu otheene arina nlipelelo na okhala mahiku otheene valaponi, xontte yeemele”. Moovarihana ni mutthu mmosa aawenhe yowiiraneya ele, atthu oowiiraka 20.000 yaaheemela. Nto Munna Rutherford aahihimya wira: “Nweheke! Muttitthi muulupule!” Moottharelana, atthu yaahoopa makuphi moohakalala. Nto atthu ale yeemenle yaahoona wira khiyaathanliwe wira yakhaleke wiirimu, maana yaahisuwela wira kiyaathanliwe ni munepa woowaarya wa Muluku. Nihiku naattharelana na konkresu ole atthu oowiiraka 840 yaahipatisiwa, nto anamunceene yaari a ipwittipwitthi sikina.

⁴ Nuumala owiriyana mwaha ole, mmiravo ole nimulavunle ahu wanipacerya ni atthu akina yaahihiya okhuura ephaawu ni owurya eviinyu okathi wa wuupuwelela Yoolya ya Ohiyu ya Apwiya. Anamunceene yaarina moonelo mmosaru wa munna oowiiyeviha yoowo aahimmye so: “Mwaakha wa 1935 waari mwaakha wookiserya kaakhuurale aka ephaawu ni kaawunrye aka eviinyu mwaha woowi kaahoona wira Yehova khaakithanlale ni munepa awe woowaarya wira kakhaleke wiirimu. Ohiya-vo, Yehova ookivaha nlipelelo na okhala mahiku otheene valaponi ni okhaliherya wiiriha elapo okhala eparayiisu”. (aRom. 8:16, 17; 2 aKor. 1:21, 22) Okhuma okathi ole mpakha vano, muttitthi muulupale onnincerereya ni onnivara vamosa ni maKristau oothanliwa ahanle * valaponi.

5. Yehova oniwoonela sai ale anihiya okhuura ithoonyeryo sa Wuupuwelela?

⁵ Nuumala mwaakha wa 1935 Yehova oniwoonela sai atthu ale anihiya okhuura ithoonyeryo sa Wuupuwelela? Ankhi olelo-va, Yehova onimoonela sai munna wala murokora onikhuura ithoonyeryo sa Wuupuwelela nuumala-vo onoona wira khothanliwe ni munepa woowaarya wa Muluku? (1 aKor. 11:28) Atthu akina annikhuura ithoonyeryo mwaha woowi khansuwelexa nlipelelo arina aya. Nto akhala wira annikupali wira aavonya anahiya okhuura ithoonyeryo ni anavikaniha omurumeela moororomeleya Yehova, owo onooweemererya wiirela mpantta ipwittipwitthi sikina. Nnaamwi ahikhuuraka ephaawu ni owurya eviinyu ya Wuupuwelela awo annirowela muthukumano wa Wuupuwelela okhwa wa Yesu mwaha woowi annixukhurela ele Yehova ni Yesu apanke aya.

6. Yesu orumme malaikha opaka exeeni?

⁶ Okhala wira maxakha maalupale ahanle opacerya, ti vooloka othokorerya ele yoolepa ya  Wiisuupulula ekapiitulu 7 enilavula aya voohimya sa maKristau oowoottihiwa ni muttitthi muulupale a ipwittipwitthi sikina. Nlelo Yesu onniruma malaikha ohihiya ovarela ipheyo xexe sa opwetexa. Malaikha awo khanrowa ohiya ovarela ipheyo iyo sa opwetexa mpakha maKristau otheene oothanliwa ovahiwa ithoonyeryo, eyo piiyo, weemereriwa ni Yehova. (Wiis. 7:1-4) Axinna awe Kristu, anootthuveliwa mwaha wa ororomeleya waya akhalihiwaka anamukuttho ni mamwene wiirimu. (Wiis. 20:6) Yehova, Yesu ni malaikha anoohakalala vanceene waaweha maKristau oothanliwa 144.000 avahiwaka etthuvo aya wiirimu.

7. Moovarihana ni Wiisuupulula 7:9, 10, Yohani aawenhe exeeni ni exeeni yaapaka aya? (Nwehe efootu ya ekaapa.)

⁷ Nuumala waaweha mamwene ni anamukuttho 144.000, Yohani onniweha etthu yoohakalaliha, niire so, “muttitthi muulupale” wa atthu yaawo yooponwe okathi wa ekhotto ya Armagedoni. Moovirikana ni ekrupu ele yoopacerya, Yohani onniweha ekrupu ekina ya nenli yaawo yaari atthu anceene oohikontareya. (Mmusome Wiisuupulula 7:9, 10.) Atthu awo aawara “malaya oottela” yooniheryaka wira “annikhootta onanarihiwa” ni olumwenku ola wa Satana ni anniroromeleya wa Muluku ni Kristu. (Yak. 1:27) Awo annikhuwela wira ahoopoliwa mwaha wa ele Yehova ni Yesu yoowo ori Mwaapwittipwitthi a Muluku apanke aya. Nave aavarela makukhu a korooro yooniheryaka wira annikupali wira Yesu Mwene othanliwe ni Yehova.—Mulikanyihe ni Yohani 12:12, 13.

8. Moovarihana ni Wiisuupulula 7:11, 12, malaikha yoonenle sai nuumala oweha muttitthi muulupale wa atthu?

⁸ Mmusome Wiisuupulula 7:11, 12. Malaikha yoonenle sai nuumala oweha muttitthi ole muulupale? Yohani aahoona malaikha otheene a wiirimu ahakalanle ene nuumala oweha muttitthi muulupale wa atthu anvuwihaka Muluku. Tthiri vannooneya wira malaikha otheene a wiirimu anoohakalala vaavo anrowa aya woona yiiraneyaka yowoonihiwa ele ya Yohani okathi muttitthi muulupale onrowa awe woopowa okathi wa maxakha maalupale.

9. Moovariha ni Wiisuupulula 7:13-15, olelo-va muttitthi muulupale onipaka exeeni?

⁹ Mmusome Wiisuupulula 7:13-15. Yohani ahoona muttitthi muulupale yoowo “aarapinhe malaya aya ni aatteelinhe mphomeni mwa Mwaapwittipwitthi”. Nto eyo enooniherya wira awo aakhalana murima wooloka ni annimusiveliha Yehova. (Yes. 1:18) Tthiri awo maKristau oopatisiwa, annaamini mukuttho wa Yesu Kristu ni aakhalana waataana wooloka ni Yehova. (Yoh. 3:36; 1 Ped. 3:21) Tivonto awo aniphwanelela aya weemela ohoolo wa ehice ya Muluku ‘anvarelaka muteko othana ni ohiyu’ vate va etemplo awe ya omunepani, valaponi vaava. Olelo-va, awo anniluttuweliwa olaleya Omwene ni waapaka awiixutti mwaha woowi Omwene wa Muluku etthu yootepa otthuneya mookumini mwaya.—Math. 6:33; 24:14; 28:19, 20.

10. Muttitthi muulupale onikupali exeeni? Nto yooleiherya xeeni onilipelela awe?

¹⁰ Muttitthi muulupale yoowo onrowa woopowa okathi wa maxakha maalupale onrowa okhapeleliwaka ni Muluku. Mwaha woowi “Ole okilanthi veehiceni onrowa owookolela eheema awe”. Nto okathi owo enimwiiraneya yooleiherya ipwittipwitthi sikina saalipelela aya eni: “[Muluku] onoopuputtha maithori aya otheene, khunrowa-tho okhala okhwa, nnakhala oriipiwa murima, wala wunla, hata woona owereya”.—Wiis. 21:3, 4.

11-12. (a) Moovarihana ni Wiisuupulula 7:16, 17, mareeliho xeeni muttitthi muulupale onilipelela awe? (b) Etthu xeeni ipwittipwitthi sikina sinipaka aya okathi wa Wuupuwelela ni nthowa xeeni?

¹¹ Mmusome Wiisuupulula 7:16, 17. Olelo-va, arumeyi akina a Yehova annikhalana mixankiho ntoko ohikhalana musurukhu oniphiyerya wira athume yoolya ni mixankiho sikina sinikumiheriwa mwaha wa ekhotto. Arumeyi akina  aatthukweliwe mukhatteya mwaha wa waamini waya. Hata vari siiso, muttitthi muulupale onnihakalala mwaha woosuwela wira onimoopowa okathi onrowa awe opwetexiwa olumwenku ola wootakhala wa Satana. Nave onnikupali wira onookhalana yoolya yinceene ya omunepani ni ya weerutthuni. Okathi Yehova onrowa awe opwetexa olumwenku ola wootakhala wa Satana, Yehova onimwaakhapelela atthu awe wira ahoone oviha wa onanariwa wawe onrowa awe waaroihela atthu a mulaponi. Nuumala ovira maxakha maalupale, Yesu onimwaakuxa ale anrowa woopowa aroihaka mapuro aniphattuwa “maasi a ekumi”. Nkahaya muupuwele ela: Muttitthi muulupale wookhalana nlipelelo na vameekhaaya. Nave ibilyau sinceene sa atthu anrowa okhala akumi okathi owo, khanrowa otthikela-tho okhwa!—Yoh. 11:26.

¹² Tthiri atthu a ipwittipwitthi sikina aakhalana nlipelelo noohakalaliha ni annimuxukhurela vanceene Yehova ni Yesu. Nnaamwi Yehova ohaathanlale wira yakhaleke wiirimu, owo onnaaphenta vanceene ntoko onaaphenta awe ale anrowa okhalaka wiirimu. MaKristau otheene oothanliwa ni a ipwittipwitthi sikina, anninvuwiha Muluku ni Kristu. Enamuna emosa anipaka eyo ori orowela muthukumano wa Wuupuwelela okhwa wa Yesu Kristu.

13-14. Xeeni atthu otheene anrowela aya muthukumano wa Wuupuwelela okhwa wa Yesu Kristu?

¹³ Mahiku ala ookiserya, eriyari ya atthu 1.000 mmosa paahi tonikhuura ephaawu ni toniwurya eviinyu okathi wa Wuupuwelela. Eyo enooniherya wira miloko sinceene olumwenku wotheene khokhanle mutthu onikhuura ephaawu ni oniwurya eviinyu okathi wa Wuupuwelela. Tthiri atthu anceene anrowela muthukumano wa Wuupuwelela arina nlipelelo noorowa okhalaka valaponi. Nto xeeni anrowela aya muthukumano owo wa Wuupuwelela? Awo annirowela muthukumano wa Wuupuwelela ntoko siisaale anrowela aya efesta ya ekasamento ya mpatthani aya. Tthiri awo annirowela efesta eyo ya ekasamento wira yooniherya wira annimphenta ni aniphavela omukhaliherya mpatthani aya owo onithela wala onitheliwa. Mwa enamuna emosaru, maKristau a ipwittipwitthi sikina annirowela muthukumano owo wa Wuupuwelela wira yooniherye wira annimphenta ni annimukhaliherya Kristu ni maKristau makina oothanliwa. Nave-tho, awo annirowela muthukumano owo wira yooniherye oxukhurela waya mukuttho wa Yesu Kristu yoowo onaavaha eparakha ya okhala mahiku otheene valaponi.

 ¹⁴ Etthu yuulupale eniwiiriha maKristau a ipwittipwitthi sikina orowela muthukumano wa Wuupuwelela awo anniiwelela yooruma ya Yesu Kristu. Okathi Yesu aapacerinhe awe Yoolya ya Ohiyu ya Apwiya ni arummwa awe oororomeleya, owo aalenle so: “Muthipeleleke opaka ela mukuupuwelaka miyo”. (1 aKor. 11:23-26) Nlelo maKristau oothanliwa ari ene valaponi, maKristau a ipwittipwitthi sikina khanrowa ohiya orowela muthukumano wa Wuupuwelela. Tivonto, maKristau a ipwittipwitthi sikina aniimananiha aya waalattula atthu anceene orowela muthukumano wa Wuupuwelela.

15. Ninrowa onvuwiha sai Muluku ni Kristu okathi wa Wuupuwelela?

¹⁵ Okathi wa Wuupuwelela, vaavo ninvekela ahu ni wiipa masipo ninninvuwiha Muluku ni Kristu. Mwaha wa Wuupuwelela wa mwaakha ola, orina muru oni: “Muxukhureleke Ele Muluku ni Kristu Apanke Aya Mwa Mureerelo Anyu”. Mwaha owo onoonikhaliherya olipiha omuxukhurela wahu Yehova ni Kristu. Vaavo ephaawu ni eviinyu enrowa aya ovirihiwaka, ninrowa wuupuwelaka ele enithoonyerya aya wa hiyo, eyo piiyo, erutthu ni ephome ya Yesu Kristu. Nave, ninrowa wuupuwelaka wira Yehova ooniphenta vanceene vaavo aamurumme awe Mwanawe wira okhwe wira niwerye ophwanya ekumi ehinimala. (Math. 20:28) Nto khula mutthu onimphenta Yehova ni Mwanawe onoorowela muthukumano wa Wuupuwelela.

16. Mwa enamuna xeeni maKristau a ipwittipwitthi sikina ni maKristau oothanliwa anlikana aya?

¹⁶ MaKristau oothanliwa ni maKristau a ipwittipwitthi sikina anoolikana. Nto eyo enooniherya wira khiivo ekrupu Muluku enitepexa awe ophenta ovikana ekina, maana ikrupu sotheene sookhalana efaita yinceene vamaithoni vawe. Musuweleke wira Muluku ohaathuma maKristau a ipwittipwitthi sikina ni maKristau oothanliwa ni esisapo emosaru, eyo piiyo, ni ekumi ya Mwanawe onimphentexa awe. Ikrupu iyo soopiili sivirikanne paahi yoolipelela aya. Ikrupu iyo sotheene sihaana ororomeleya wa Muluku ni wa Kristu. (Esal. 31:24) Muhiliyale wira munepa woowaarya wa Muluku onninikhaliherya otheene ahu. Eyo enooniherya wira Yehova onninvaha khula mutthu munepa awe woowaarya moovarihana ni makhalelo awe moohicikha ari ene a ipwittipwitthi sikina wala oothanliwa.

17. Etthuvo xeeni maKristau oothanliwa anlipelela aya?

¹⁷ MaKristau oothanliwa khaniyariwa arina ene nlipelelo na orowa okhalaka wiirimu. Maana Muluku paahi tonaavaha nlipelelo nlo na orowa okhalaka wiirimu. Awo annuupuwela nlipelelo naya, annivekela ni anniimananiha wira yaphwanye etthuvo aya wiirimu nave khanisuwela enamuna ya erutthu anrowa aya okhalana. (aFil. 3:20, 21; 1 Yoh. 3:2) Hata vari siiso, awo annilipelela orowa okhalaka hoothe ni Yehova, Yesu, malaikha  ni maKristau makina oothanliwa ari Moomweneni wa wiirimu.

18. Itthu xeeni maKristau a ipwittipwitthi sikina anlipelela aya?

¹⁸ MaKristau a ipwittipwitthi sikina annilipelela okhala mahiku otheene valaponi. Tthiri eyo ti etthu apinaatamu otheene aniphavela aya. (Mus. 3:11) Tthiri awo annilipelela okathi anrowa aya wiiriha elapo okhala eparayiisu. Nave-tho annilipelela okathi anrowa aya otekaka ipa saya, anrowa aya ophatteyaka miri saya ni waahuwa anaaya arina ekumi yooloka. (Yes. 65:21-23) Okathi owo, apinaatamu anoottottelaka mureerelo itthu sikhanle valaponi. Ntoko myaako, itakhwa, iphareya, ni wiixutta itthu sikina Yehova opattunxe awe. Nave ninnihakalala vanceene osuwela wira okathi owo khula nihiku ninrowa olipihaka waataana wahu ni Yehova.

19. Muthukumano wa Wuupuwelela onnivaha eparakha xeeni? Nto mitano onrowa opakiwa nihiku xeeni?

¹⁹ Yehova ohaavaha arumeyi awe otheene nlipelelo noohakalaliha na muhoolo. (Yer. 29:11) Wuupuwelela okhwa wa Kristu onnaavaha eparakha maKristau a ipwittipwitthi sikina ni oothanliwa onvuwiha Muluku ni Kristu mwaha wa itthu sotheene apanke aya wira niphwanye ekumi yoohimala. Moohaanyiherya, maKristau a ekeekhai annivaha efaita muthukumano wa Wuupuwelela okhwa wa Yesu Kristu onipakiwa khula mwaakha. Mitano, muthukumano owo onrowa okhala Esaabadu, 27 a Março a 2021 nsuwa nikenle ene. Tthiri mwaakha ola, atthu anceene anoopaka muthukumano ola moovarihana ni makhalelo aya. Akina anoowerya Wuupuwelela hata alupatthiwaka vanceene. Nave-tho aakhala akina anrowa opaka muthukumano ola ari ene mukhatteya. Nto Yehova, Yesu, malaikha ni maKristau makina ahihimuxiwe aniphavela wira khula muloko, khula ekrupu ni khula mutthu okhalane Wuupuwelela woohakalaliha!