1. Muxankiho xeeni wamphwannye Davidi?

DAVIDI aanitthyawa wira ohiiviwe. Sawuli yoowo aari mwene oowerya a wisarayeli, aaphavela omwiiva Davidi. Nihiku nimosa okathi Davidi aatthyawa awe aaheemela epooma ya oNobi, ni aahinvekela namukuttho Ahimelekhi wira onvahe iphaawu 5 paahi. (1 Sam. 21:2, 4) Nuumala-vo, Davidi ni atthu aarina awe yaahitthyawela munikhukuni. (1 Sam. 22:1) Exeeni yaamwiirinhe Davidi omukhumelela muxankiho ole?

2. Itthu xeeni soohiloka Sawuli aapanke awe? (1 Samuweli 23:16, 17)

² Sawuli aanimukhalela nrima Davidi, mwaha woowi atthu anceene yaanisiveliwa ni yena ni yaanimuttottopela mwaha wa ikhotto sinceene aaxintta awe. Sawuli aahisuwela wira ohiiwelela wawe, waahimwiiriha Yehova omukhootta okhala mwene a wisarayeli. Nave Muluku aahimuthanla Davidi wira omuranttele. (Mmusome 1 Samuweli 23:16, 17.) Masi nlelo Sawuli taari mwene a wisarayeli. Ti nthowa naya aarina awe anakhotto ni aakhaliheriwa awe ni atthu anceene. Nto Davidi aahaana otthyawa wira ohiiviwe. Niireke Sawuli uupuwela wira anwerya owana ni Muluku, ni omukhoottiherya Davidi okhala mwene? (Yes. 55:11) Biibiliya khonaakhula nikoho nla, masi yookhala etthu emosa ensuwela ahu: Sawuli aathweeliha mooro. Khuuvo mutthu oniwana ni Muluku onaxintta!

3. Davidi oonela sai makhalelo awe nnaamwi yaari ooxankiha?

³ Davidi khahiyo aari nanrima. Yena khahiyo taathanlale okhala mwene a wisarayeli. Yehova tanvanhe muritti ole. (1 Sam. 16:1, 12, 13) Sawuli aamoona Davidi ntoko nwanani awe muulupale. Masi Davidi khanvaha nthowa Yehova mwaha wa itthu sootheene saamukhumelela. Nave khaikhupanyerya mwaha woohikhalana eyoolya yinceene ni wiipithaka mmakhukuni.  Masi vanikhala wira okathi ene yoole aipitha awe, taalempe awe moolumo a yoolepa ahu ya mwaakha ola, enihimya wira: Ale “anarumela Apwiya [Yehova] khivo enahalela”.—Esal. 34:11.

4. Makoho xeeni ninrowa ahu othokorerya yoosoma ela? Nave, xeeni arina aya efaita yuulupale?

⁴ Olelo-va, arumeyi anceene a Yehova kharina eyoolya eniphiyerya ni itthu sikina sinaathowa. * Nave oretta wa Coronavírus ohincererya mixankiho iyo. Okathi ola nintepa ahu waattamela “maxakha maalupale”, nave mixankiho sinrowa otepaka wuncerereya. (Math. 24:21) Nto yoosoma ela enoonikhaliherya wiiwa waakhuliwa wa makoho 4: Mwa enamuna xeeni Davidi ‘yahaamuhalenle aya etthu’? Xeeni ninreerela ahu ohakalalaka ni itthu nirina ahu? Exeeni ennikupaliha wira Yehova onoonikhapelela? Nave, ninrowa wiilokiherya sai olelo-va wira nivilele mixankiho sa muhoolo?

5-6. Esalimo 23:1-6 ennikhaliherya sai wiiwexexa moolumo a yoolepa ahu ya mwaakha?

⁵ Davidi aahimmye wira ale animurumeela Yehova, “khivo enahalela”. Masi aaphavela ohimyani ni moolumo ala? Okathi aalempe awe Esalimo 23 aahirumeela moolumo oolikanasa ni ale ari Esalimo 34:11. Tivonto Esalimo ela enoonikhaliherya wiiwexexa etthu Davidi aaphavela awe ohimya. (Musome Esalimo 23:1-6.) Davidi aapacenrye ni moolumo anihimya so: “Apwiya [Yehova] ti Makampusi aka: khivo enikihalela”. Nuumala-vo Davidi aahitthikela olavula itthu sirina efaita yuulupale, eyo piiyo, itthu sooreera aavahiwe awe mwaha woomweemererya Yehova okhala Makampusi awe. Yehova aanimukhaliherya Davidi ovira “iphiro soloka”, aahiiso sa xariya, nave aanikhala ni yena okathi woohakalaliha ni okathi wa mixankiho. Davidi, uupuwela wira omurumeela Yehova waalikana ni omumula mapuro oomaaleleya ni “òwatta yolya”. Masi aanisuwela wira, saamumphwanya  mixankiho ni aamukhalana awanani. Ikwaha sikina aaniriipiwa murima, vanakhala ntoko aavira “mwepiphini mowopiha”. Masi okhala wira Yehova aari Makampusi awe, khiivo “etthu yotakhala” oova awe.

⁶ Nto nikoho ninkhumelela ti nla: Mwa enamuna xeeni Davidi ‘yahaamuhaleela aya’ etthu? Davidi aahikhalana itthu sootheene saarowa omukhaliherya omwaattamela Yehova. Ohakalala wawe, khiwaalipa ni okhalana itthu sinceene, masi waalipa ni itthu aavahiwa awe ni Yehova. Etthu aahela awe nipuro noopacerya, waari oreelihiwa ni okhapeleliwa ni Muluku.

7. Ntoko onihimya awe Luka 21:20-24, muxankiho xeeni waaphwannye makristau a oYudeya?

⁷ Moolumo a Davidi, annooniherya wira vannireerela okhalana ephoole wira nihitepeke ovaha efaita itthu nirina ahu. Ekeekhai wira khahiyo ti vootthekeya okhalana mireerelo, masi itthu iyo sihikhaleke opuro woopacerya mookumini mwahu. Eyo ti etthu yaixuntte aya makristau yaakhala elapo ya oYudeya. (Mmusome Luka 21:20-24.) Yesu aahaalopola wira wamphiya okathi Yerusalemu aarowa awe ‘orukureriwa ni anakhotto’. Okathi eyo yaarowa aya wiiraneya, atthu yaahaana “otthyawela omiyaakoni” wira ehiiviwe. Masi yaahaana oleva itthu sinceene wira yoopole ikumi saya. Iyaakha sivinre, erevista Owehaweha yaahaalavula makristau ale a oYudeya ehimyaka so: “Yaahihiya imatta ni ipa saya, ni khiyaakuminhe mireerelo saya mpaani mwaya. Yaahiroromela okhapeleliwa ni okhaliheriwa ni Yehova. Nave yaahooniherya wira yaanihela opuro woopacerya okokhorela weekeekhai ovikana itthu sootheene”.

8. Exeeni nniixutta ahu ni itthu saakhumelenle makristau yaakhala oYudeya?

⁸ Exeeni nniixutta ahu ni itthu saakhumelenle makristau a oYudeya? Owehaweha oromoliwe ettima evinre, onihimya so: “Muhoolo pooti weehereriwaka ni moota nnoonela ahu itthu nirina ahu. Masi exeeni erina efaita yuulupale? Niireke mireerelo iyo, aahiiso woopowa wa atthu animwiiwelela Yehova? Woonasa wene okathi olumwenku ola onrowa awe ophiya wanikisa vanoopirisariki ovilela ni oleva itthu sikina. Nihaana wiilokiherya wira nipake itthu sikina sinrowa otthuneyaka, ntoko yiirale aya axinnihu a oYudeya a eseekulu yoopacerya”. *

9. Miruku sa murummwa Paulo siri aHeeberi 13:5, 6, etthu xeeni sinnikupaliha aya?

⁹ Tthiri khahiyo vaari vookhweya makristau ale oleva itthu saya sootheene ni opacerya makhalelo a niinaano. Yaahaana waamini ni ororomela wira Yehova aamwaavaha itthu sootheene saarowa waathowa. Nave etthu ekina yaakhalihenrye, saari miruku murummwa Paulo aavanhe awe makristau aheeberi, sihalaka iyaakha 5 wira aroma arukurerye epooma ya oYerusalemu. Aahimmye so: “Muhiphenteke musurukhu, masi muhakalaleke ni itthu murina anyu, maana Muluku onihimya wira: ‘Miyo nkinikhala-khala koohiyakani, nave nkinikhala-khala koonyanyalakani’. Tivo, nihimyeke ni nroromelo wira: ‘Yehova tonikikhaliherya. Miyo nkinrowa woova etthu. Exeeni mutthu oniwerya awe okiiriha?’” (aHeeb. 13:5, 6) Makristau yaiwelenle miruku iye sa Paulo, khiyoonale okhala vooxankiha wiilimaleliha makhalelo masya ni ohakalala ni itthu vakhaani yaarina aya opuro ole yathaamenle aya. Yaanikupali wira Yehova aamwaakhaliherya, aavahaka itthu saarowa waathowa. Nave moolumo a Paulo anninikhaliherya ororomela etthu emosaru. Nikupaliki wira okathi wootheene Yehova onoonivaha itthu sinnithowa.

10. Exeeni yaamwiiriha Paulo otteeliwa murima?

¹⁰ Murummwa Paulo aahinvaha Timootheyo miruku simosaru sinnikhaliherya olelo-va. Aahimmye so: “Tivo, naakhalanaka-ru yoolya ni yoowara, nitteeliweke murima ni itthu iyo”. (1 Tim. 6:8) Niireke eyo entaphulela wira ti vootthekeya orumeela musurukhu ahu nithumaka eyoolya yoosiva, okhalana empa yooreera ni othuma ikuwo sooreera okathi mukina? Nnaari, khahiyo ti yeeyo Paulo aaphavela awe ohimya. Paulo aaphavela ohimya wira nihaana otteeliwa murima hata nirina ene itthu soowaatta aahiiso vakhaani. (aFil. 4:12) Ela ti yaari “esiiri” yaamwiiriha Paulo okhala oohakalala. Etthu yuulupalexa nirina ahu, ompatthani ahu ni Yehova, ohiya itthu nrina ahu.—Hab. 3:17, 18.

11. Moolumo Moise aalenle awe aisarayeli wira yaahaana ohakalala ni itthu saarina aya, anniixuttihani?

¹¹ Hiyo pooti wuupuwelaka wira yookhala etthu ennithowa. Masi niireke tthiri Yehova onoonela siiso? Nuumala aisarayeli omaliha iyaakha 40 yeettaka moothakoni, Moise aahaaleela so: “Mùpuwele wira Apwiya Muluku anyu ahorerihelani miteko sanyu sothene, ahosukani okathi wettettalyanyu ninno-ninno mothakoni-mu mulupale. Iyakha sivinre miloko mixexe (40), Apwiya Muluku anyu ekhalaka ni nyuwo, khivo yohalenleni”. (Otum. 2:7) Iyaakha iye 40, Yehova aahaavaha aisarayeli eyoolya ya emana. Ohiya-vo, ikuwo yaawanre aya iyaakha iye 40, saari seiye yaakhumanne aya wExiitu. (Otum. 8:3, 4) Nnaamwi aisarayeli akina yuupuwela wira itthu iye khisaaphiyerya etthu, Moise aahiwuupuxerya wira yaahikhalana itthu sootheene  saathowa. Nihaana omutakiha Moise, nitteeliwaka murima ni itthu nirina ahu. Akhala wira nnoovaha efaita itthu saamukhaani Yehova onnivaha awe, nnaweha itthu iyo ntoko mareeliho, nnoomuhakalaliha Muluku ahu.

12. Exeeni enooniherya wira Davidi aanimuroromela Yehova, ohiya itthu aasuwela awe opaka?

¹² Davidi aanikupali wira Yehova, Muluku oororomeleya ni wira onnaakhapelela atthu animphenta. Okathi Davidi samphwannye aya mixankiho ni aalempe awe Esalimo 34, aanikupali ni murima awe wootheene wira nlaikha na Yehova ‘nammusuka’. (Esal. 34:8) Woonasa wene Davidi aanilikanyiha nlaikha na Yehova ni nakhotto, okathi wootheene aakhala oowehaweha wira ohitupheliwe ni awanani awe. Davidi aari nakhotto oolipa murima, nave Yehova aahimuleiherya wira muhoolo aarowa okhala mwene. Hata vari siiso, yena kharoromenle osuwela wawe ovonya nluku ni mukhoi wala orumeela ekatana wira aaxintte awanani awe. (1 Sam. 16:13; 24:12) Davidi aanimuroromela Yehova ni murima awe wootheene. Nave aanikupali okathi wootheene wira nlaikha na Yehova ‘ninniwaakiha ale’ animurumeela Muluku. Ekeekhai wira khaninlipelela wira Yehova onoopaka itthu sootikiniha olelo-va, wira onaakiherye itthu sootakhala. Masi ninnikupalixa wira otheene yaale animuroromela Yehova, anoophwanya okumi ohinimala, hata akhwaaka.

13. Okathi Gogi a oMagogi onrowa awe onituphela, xeeni ninrowa ahu okhalaka ntoko atthu ookhweya waatuphela? Masi xeeni nihinreerela ahu woova? (Nwehe elatarato ya ekaapa.)

¹³ Moohipisa, omuroromela wahu Yehova onimweehereriwa. Okathi Gogi a oMagogi, nihimye so, ekrupu ya maloko oowiiraana anrowa aya waatuphela atthu a Muluku, hiyo pooti wuupuwelaka wira nnimwiiviwa. Vanoopirisariki okupali wira Yehova onoowerya onikhapelela. Ninrowa okhalaka ntoko ipwittipwitthi sihirina makampusi. (Ezek. 38:10-12) Atthu anceene anrowa onoonaka ntoko atthu ookhweya waatuphela, maana khanitonko wiixuttihiwa owana ekhotto. Mwaha woohimwaamini Yehova, atthu awo khanrowa oweha itthu hiyo ninrowa ahu owehaka mwaha wa waamini wahu: malaikha manceene yaarukurenrye ene atthu a Muluku wira awaakihe. Tthiri atthu anceene anooxanka nuumala osuwela wira anakhotto a wiirimu anoowana wira anaakihe!—Wiis. 19:11, 14, 15.

14. Exeeni nikhanle ahu oopaka vano, wira niilokiherye mwaha wa mixankiho sinrowa okhumelela muhoolo?

¹⁴ Exeeni nikhanle ahu oopaka wira niilokiherye mwaha wa mixankiho sinrowa okhumelela muhoolo? Yoopacerya, nihitepeke ovaha efaita itthu sirina ahu, okhala wira meelo nnoohiya itthu iyo sootheene. Nave nitteeliweke murima ni itthu nirina ahu ni ele erina efaita yuulupale, eyo piiyo, opatthani ahu ni Yehova. Akhala wira nnoomusuwela saana Muluku ahu, nnookupaliki wira okathi Gogi a oMagogi onrowa awe onituphela, Yehova onoonaakiha.

15. Itthu xeeni saamukhumelenle Davidi okathi aari awe mmiravo, saamwiixuttinhe wira Yehova khaarowa omunyanyala?

¹⁵ Nrowe niwehe etthu yaamukhalihenrye Davidi okathi wa mixankiho. Etthu eyo enoonikhaliherya-tho olelo-va. Owo aahimmye so: “Mwererye, mone orera waya murima Apwiya: òreriwa t’ale anatthyawelela”. (Esal. 34:9) Moolumo ala annooniherya wira Davidi, aaniroromela wira Yehova ammukhaliherya. Ti maana aya Yehova ahaamunyanyanle awe. Okathi Davidi aari awe mmiravo ni  aaronwe awe owana ni nakhotto oowoopiha aitthaniwa Goliyathi, aahimmye so: “Olelo vava, Apwiya [Yehova] anokivaha nyuwo mmatatani mwaka”. (1 Sam. 17:46) Nuumala-vo, mwene Sawuli aaheererya ikwaha sinceene omwiiva Davidi, masi Yehova aari ni yena. (1 Sam. 18:12) Davidi aanikupali wira Yehova aarowa okhala ni yena, ni ammukhaliherya ovilela mixankiho.

16. Okathi xeeni nikhanle ahu ooweha oreera murima wa Yehova?

¹⁶ Namuroromela Yehova olelo-va, nnootepaka okupali wira muhoolo onoonikhaliherya. Mwa ntakiheryo, nihaana omwaamini ni omuroromela Yehova, okathi ninrowa ahu olavula ni patarau ahu ninvekelaka efolga wira nanwehe asembeleya aahiiso konkresu. Nave wira ninvekele patarau ovukula iwoora ninvara ahu muteko wira niweryeke oweha mithukumano ni orowa olaleerya, nihaana okhalana waamini. Masi ankhi akhala wira khoneemererya yooveka ahu eyo ni onninoomola muteko? Niireke nnoomwaamini Yehova, niroromelaka wira khonikhala-khala oninyanyalaka ni wira okathi wootheene onoonivaha itthu sinnithowa? (aHeeb. 13:5) Anna anceene anivara muteko wa Muluku wa okathi wootheene, anihimya wira Yehova ohaakhapelela ni waakhaliherya okathi yaaphavela aya okhaliheriwa. Yehova ti Muluku oororomeleya.

17. Tiivi eri yoolepa ya mwaakha wa 2022? Nave exeeni yiirinhe othanliwa yoolepa eyo?

¹⁷ Nikhaliheriwaka ni Yehova, khannoova itthu sinrowa okhumelela muhoolo. Nave akhala wira nnoohela Omwene opuro woopacerya mookumini mwahu, owo khonrowa oninyanyala. Nikhuuru Noolamulela noothanla Esalimo 34:11, wira ekhale yoolepa ya mwaakha wa 2022. Yoolepa eyo enoonikhaliherya wiilokiherya nenna-va wira nimuroromeleke Yehova mwaha wa mixankiho sinrowa okhumelela muhoolo. Esalimo eyo enihimya so: Ale “anarumela Apwiya [Yehova] khivo enahalela”.