1-3. Itthu xeeni sikhanle ooninliha?

NIIREKE munnuupuwela ekwaha yookiserya mwanlale anyu? Ikwaha sikina ninninla mwaha wootteeliwa murima. Masi ikwaha sinceene nninla mwaha wooriipiwa murima. Okathi mukina khivanikhweya ohinla vaavo onikhwa awe mutthu naamphenta ahu. Murokora mmosa a wEstados Unidos, oniitthaniwa Laura olempe so: “Okathi mukina kaanixanka vanceene mwaha wookhweliwa mwanaka mpakha kinuupuwela wira khiivo etthu yaakhanle ookimaaliha. Murima waanikiwereya vanceene ni nkaasuwela moota kaarowaka ovilela muxankiho ole”. *

² Nave hiyo, pooti wunla mwaha wa itthu sikina. Murokora mmosa pioneera a oJapão oniitthaniwa Hiromi ohimmye so: “Ikwaha sikina okathi kinaaweha aka atthu ahiphavelaka wiixutta itthu sa mBiibiliyani, kinniriipiwa murima vanceene. Okathi mukina kinninvekela Yehova kimoroxaka maithori wira okikhaliherye omphwanya mutthu oniphavela wiixutta ekeekhai”.

³ Niireke mwaahitoko oriipiwa murima vanceene sintoko Hiromi ni Laura? Anamunceene nootoko. (1 Ped. 5:9) Ekeekhai wira nimphavela omurumeela Yehova moohakalala. Masi mooriipiha murima ikwaha sikina nimmurumeela nimoroxaka maithori mwaha wookhweliwa, oriipiwa murima ni itthu sikina sineehererya ororomeleya wahu. (Esal. 6:7; 100:2) Exeeni enrowa onikhaliherya ovilela mixankiho iyo sootheene?

4. Exeeni ninrowa ahu othokorerya mwaha ola?

⁴ Ntakiheryo na Yesu pooti onikhaliherya. Nave okathi mukina saanimukhumelela itthu sooxankiha saamwiiriha ‘wunla’. (Yoh. 11:35; Luka 19:41; 22:44; aHeeb. 5:7) Mwaha ola nnoothokorerya ikwaha sikina Yesu anlale awe ni etthu nniixutta ahu  voohimya sa yena ni Tiithi awe Yehova. Nave nnooweha moota woovilela mixankiho sinniiriha omoroxa maithori.

5. Exeeni nniixutta ahu ni yowiiraneya eri Yohani 11:32-36 voohimya sa Yesu?

⁵ Mwaakha wa 32 Nuumala Kristu Orwa, Laazaro mpatthani awe Yesu aahiwereiwa mpakha okhwa. (Yoh. 11:3, 14) Laazaro aahikhalana axirokora awe anli, Maria ni Marta. Nave Yesu aaniphenta vanceene emusi ele. Athiyana ale anli yaahiriipiwa murima vanceene mwaha wookhweliwa murokora aya yamphenta aya. Nuumala Laazaro okhwa, Yesu aahirowa oBethania, owannya awe Maria ni Marta. Nto ewoora Marta aasuwenle awe wira Yesu aahirwa, aaheetta moowakuveya orowaka okumana nuuwo. Nkahaya muupuwele moota Marta aariipiwe awe murima okathi aalavunle awe so: “Pwiya, mwaari vaava, murokoraka khaarowa okhwa”. (Yoh 11:21) Moohipisa nuumala Yesu onweha Maria ni atthu akina yinlaka, “aahimoroxa maithori”.—Mmusome Yohani 11:32-36.

6. Xeeni Yesu anlale awe?

⁶ Xeeni Yesu anlale awe okathi ole? Eliivuru Estudo Perspicaz das Escrituras, enaakhula so: “Okhwa wa mpatthani awe, Laazaro, ni moota axirokora awe Laazaro yaariipiwe aya murima, waahimwiiriha Yesu ‘omoroxa maithori’.” * Woonasa wene Yesu aahuupuwela moota mpatthani awe aahaawale awe mwaha wa oretta ole, ni moota Laazaro aariipiwe awe murima vaavo aasuwenle awe wira aamookhwa. Nave moohaanyiherya onweha Marta ni Maria ariipiwe ene murima vanceene mwaha wookhweliwa murokora aya, waahimwiiriha Yesu wunla. Akhala wira mootoko okhweliwa mpatthani aahiiso mmusi anyu, moohaanyiherya munnisuwela moota Yesu aariipiwe awe murima. Vano, nrowe niwehe itthu tthaaru enniixuttiha aya yowiiraneya ela.

7. Maithori Yesu aamoronxe awe mwaha wa apatthani awe, anniixuttiha exeeni voohimya sa Yehova?

⁷ Yehova onnisuwela oriipiwa wanyu murima. Biibiliya onihimya wira Yesu “ti ethoonyeryo yoomalela ya makhalelo” a Tiithi awe. (aHeeb.  1:3) Nave ninnikupali wira okathi Yesu anlale awe, Tiithi awe aahiriipiwa-tho murima. (Yoh. 14:9) Akhala wira munniriipiwa murima mwaha wookhweliwa mutthu mwamphenta anyu, muhiliyale wira Yehova onniweha oriipiwa wanyu murima. Owo-tho onniriipiwa murima, nave onniphavela wookhapelelani ni omaliha oriipiwa wanyu murima.—Esal. 34:19; 147:3.

8. Exeeni ennikupaliha wira Yesu onimwaahihimuxa amusi ahu akhwiiye?

⁸ Yesu onniphavela vanceene waahihimuxa atthu mwaaphenta anyu akhwiiye. Ohinatthi wunla, Yesu aahimulipiherya Marta wira: “Murokorinyu onoohihimuxiwa”. Nave Marta aanisuwela wira Yesu aahimya ekeekhai. (Yoh. 11:23-27) Mwaha wookhala murumeyi ororomeleya a Yehova, Marta moohaanyiherya aahisuwela wira khalai, profeta Eliya ni Eliseyo, yaahitoko waahihimuxa atthu yaakhwiiye. (1 Mam. 17:17-24; 2 Mam. 4:32-37) Nave woonasa wene aahiiwa-tho wira Yesu aahitoko waahihimuxa atthu yaakhwiiye. (Luka 7:11-15; 8:41, 42, 49-56) Moolikanasa ni Marta, nyuwo-tho pooti okupali wira munootthikela waaweha atthu mwaaphenta anyu. Mwaha wa Yesu omoroxa maithori okathi aamaliha awe apatthani awe yaakhweliwe, onnooniherya wira yena onniphavela vanceene waahihimuxa atthu akhwiiye!

9. Moolikanasa ni Yesu, ninrowa waakhaliherya sai ale akhweliwe? Nvahe ntakiheryo.

⁹ Nyuwo pooti waakhaliherya ale akhweliwe. Khahiyo paahi Yesu aarimunla vamosa ni Marta ni Maria, masi-tho aahaamaaliha aaleelaka wira atthu akhwiiye anoohihimuwa. Hiyo-tho nnoowerya otthara ntakiheryo na Yesu. Mutokweene mmosa onikhala wAustrália oniitthaniwa Dan, ohimmye so: “Nuumala amwaaraka okhwa kaaniphavela vanceene okhaliheriwa. Anna anceene ni axaaraya yaahiivahererya okiwiriyana okathi wootheene, ohiyu ni othana. Yaanikihiya kihimyaka itthu sootheene kuupuwela aka, ni khiyaanyoonyiwa okathi kanlaka. Ohiya-vo yaahikikhaliherya mwa inamuna sinceene. Yaahikhala mahiku kaahaweryaka ovara etthu, masi anna awo yaanirapiha ekaaro aka, orowa othuma itthu ni yaanikaapela. Nave okathi wootheene yaanivekela ni miyo. Awo yaahooniheryasa wira yaari apatthani ni anna a ekeekhai, anikhaliherya ‘okathi w’oxanka’”.—Mir. 17:17.

10. Exeeni yaakhumelenle okathi Yesu aaphiyale awe oYerusalemu, 9 a Nisani?

¹⁰ Yesu aaphin’ye oYerusalemu 9 a Nisani mwaakha wa 33 Nuumala Kristu Orwa. Okathi aakela awe epooma ele, atthu anceene yaahithukumana wira emwaakhele, awo yaanaatala ikuwo saya opuro aarowa awe ovira. Atthu ale yaamuthokorenrye Yesu sintoko Mwene aya. Tthiri nle naari nihiku nootepa ohakalaliha. (Mmusome Luka 19:36-40.) Tivonto awiixutti awe yaahitikinihiwa ni itthu siiraneyale moottharelana. “Okathi Yesu aattamela awe oYerusalemu, aahiweha epooma ele ni aahinlela”. Ewoora aamoroxa awe maithori, aahihimya itthu saarowa waakhumelela atthu a oYerusalemu.—Luka 19:41-44.

11. Xeeni Yesu aawunlenle awe atthu a oYerusalemu?

¹¹ Yesu aahiriipiwa murima mwaha woosuwela wira nnaamwi atthu yaamwaakhenle saana, ayuda anceene khiyaarowa owiriyana moolumo aalaleya awe. Mwaha wa mweettelo aya ole, epooma ya oYerusalemu yaampwetexiwa nave ayuda yaarowa ohala, yanvariwa wira yaakhalihiwe ipottha. (Luka 21:20-24) Moolumo a Yesu yaahiiraneya, mooriipiha murima, atthu anceene yaahikhootta ihapari aalaleya awe. Niireke atthu a mmuttettheni mwanyu anneemya ihapari munlaleya anyu? Vakhala wira atthu anceene khanithokorerya, exeeni mukhanle  anyu oowiixutta ni maithori a Yesu? Nrowe niwehe itthu tthaaru nniixutta ahu.

12. Maithori Yesu aamoronxe awe mwaha wa atthu a oYerusalemu, anniixuttihani voohimya sa Yehova?

¹² Yehova onnaavaha efaita atthu. Maithori a Yesu anninuupuxerya moota Yehova onaathokorerya awe atthu. Biibiliya onihimya so: Yehova “khoniphavela wira mutthu opwetexiwe, nnakhala mmosa. Masi oniphavela wira atthu otheene arukunuxe murima”. (2 Ped. 3:9) Nave hiyo, nnimooniherya wira ninnaathokorerya akhwiihu, nikhalelaka nthiti waavara murima ni ihapari sooreera.—Math. 22:39. *

13-14. Yesu oonihenrye sai wira aaniwoonela othunku atthu? Nave hiyo ninrowa omutakiha sai?

¹³ Yesu aanikhalela nthiti olaleerya. Yena aanaaphenta atthu, ti nthowa naya aalaleerya awe okathi wootheene vaaweryaneya aya. (Luka 19:47, 48) Xeeni aapaka awe eyo? Mwaha woowi aaniwoonela othunku atthu. Ikwaha sikina yaanikhala atthu anceene yaaphavela okhaliheriwa ni onwiriyana Yesu. Nto mwaha waivaavo, “Yesu ni awiixutti awe khiyaarina okathi woolya”. (Mar. 3:20) Nave okathi omosa Yesu aahilaleerya ohiyu, vaavo mulopwana mmosa aaphavela awe owiriyana ihapari aalaleya awe. (Yoh. 3:1, 2) Ekeekhai wira atthu anceene, khiyaakhanle awiixutti awe. Masi veekeekhai othene aya yaahilaleeriwa. Hiyo-tho nimphavela wira atthu otheene akhalane eparakha yoowiiwa ihapari sooreera. (Mit. 10:42) Woonasa wene wira nipake eyo, nihaana olokiherya inamuna sahu soolaleerya.

¹⁴ Mwiilokiheryeke moowakuveya. Akhala wira okathi wootheene ninlaleerya ewoora emosaru, pooti oxankiha waaphwanya atthu aniphavela wiiwa ihapari sooreera. Pioneera mmosa oniitthaniwa Matilda, ohimmye so: “Miyo ni aiyaka ninniimananiha waalaleerya atthu iwoora soovirikana. Voosiisu ninlaleerya mapuro aniiriwa nakoso, othana vaavo atthu aneettakasa aya mustaraatani ni muruuwa, ninrumeela ikarinyu. Nave makaaripi ninniwerya waaphwanya atthu ari ene owannyaya”. Ohikhanle paahi omakelaka olaleerya iwoora sinnisivela, vannireerela olokiherya eprokrama ahu, wira niweryeke olaleerya okathi vaniweryaneya aya waaphwanya atthu anceene.  Niira siiso, nikupaliki wira Yehova onootteeliwa murima vanceene.

15. Moovarihana ni Luka 22:39-44, exeeni yiiraneyale ohiyu wookiserya Yesu aari awe valaponi?

¹⁵ Ohiyu wa 24 a Nisani mwaakha wa 33 Nuumala Kristu Orwa, Yesu aahirowa ojardim ya oXeseemani. Nuumala ophiya, aahimutthukulela murima awe Yehova. (Mmusome Luka 22:39-44.) Okathi ole wooxankiha Yesu “aahimuxonttela ni onvekela Muluku . . . okhuwelaka vanceene ni inlaka”. (aHeeb. 5:7) Itthu xeeni aahimmye awe okathi aavekela awe ohiyu ole wookiserya ohinatthi wiiviwa? Aavekenle ikuru wira ohihiye ororomeleya wa Yehova ni owerye omusiveliha. Yehova aahiiwa nivekelo nne nooxonttela na Yesu ni aahiruma nlaikha wira namulipihe.

16. Xeeni Yesu aaxankale awe okathi aavekela awe ojardim ya oXeseemani?

¹⁶ Moohaanyiherya etthu yaamwiiriha Yesu wunla okathi aavekela awe ojardim ya oXeseemani, waari oxankiheya vanceene mwaha woowi atthu yaarowa wuupuwelaka wira yena khaattittimiha nsina na Muluku. Nave aanisuwela wira aahikhalana muritti muulupale, eyo piiyo, okhala oororomeleya ni okhaliherya ediretu ya Tiithi awe ya olamulela. Akhala wira wookhala muxankiho oneehererya ororomeleya wanyu wa Yehova, exeeni mukhanle anyu oowiixutta ni maithori aahiiso wunla wa Yesu? Nwehe itthu tthaaru nniixutta ahu sinrowa wookhaliheryani.

17. Exeeni nniixutta ahu ni moota Yehova aakhunle awe mavekelo a Yesu?

¹⁷ Yehova onniiwa mavekelo ahu ooxonttela. Yehova aahiiwa itthu Yesu aavenke awe. Mwaha wa xeeni? Mwaha woowi etthu yuulupale Yesu aaphavela awe, waari ohihiya ororomeleya wa Tiithi awe ni waakiherya nsina Nawe. Akhala wira hiyo nnooxankiheya ni itthu simosaru, Yehova onoonakhula okathi ninrowa ahu onvekelaka wira onikhaliherye.—Esal. 145:18, 19.

18. Mwa enamuna xeeni Yesu onlikana awe ni mpatthani onsuwela mixankiho sahu?

¹⁸ Yesu onnisuwela oriipiwa wanyu murima. Okathi nnuupuwela ahu etthu yookhulumula, vannireerela ovaanela ni mpatthani ahu okhanle ooniwiriyana, vanceenexa vakhala wira mutthu owo wootoko omphwanya muxankiho mmosaru. Yesu ti mpatthani owo.  Yena ootoko otteettheya ni onareerela okhaliheriwa. Owo onnisuwela moota mutthu onikhala awe okathi onitteettheya awe ni onoopaka sootheene oniwerya awe wira onikhaliherye “okathi wooreerela”. (aHeeb. 4:15, 16) Okathi Yesu aari awe ojardim ya oXeseemani, aaheemya okhaliheriwa ni nlaikha. Hiyo-tho nihaana weemya nikhaliheryo Yehova onnivaha awe orumeelaka iliivuru, iviidiyu, myaha aahiiso, mpatthani ahu aahiiso mutokweene a mmulokoni.

19. Exeeni enrowa onikhaliherya ovilela mixankiho sikhanle ooniiriha opaka itthu sihinimusivela Muluku? Nvahe ntakiheryo.

¹⁹ Munoovahiwa murettele wa Muluku. Akhala wira nnoonvekela Yehova, owo onoonilipiha. Nave nnoophwanya “murettele wa Muluku yoowo onvikana osuwela wotheene wa apinaatamu”. (aFil. 4:6, 7) Murettele owo onoonikhaliherya okhala oomaaleleya ni otthokelela itthu mwa enamuna yoohakalaliha. Murokora mmosa oniitthaniwa Luz, aahoona wira eyo ekeekhai. Yena ohimmye: “Ikwaha sikina onnikiphwanya omeekha. Okathi mukina kinniriipiwa murima kinapacerya wuupuwela wira Yehova khonkiphenta. Okathi eyo eniiraneya aya, moowakuveya kinnimuleela Yehova itthu kinuupuwela. Nave ovekela onnikikhaliherya okhala oomaaleleya”. Moolumo a murokora Luz, anninooniherya saana wira ovekela pooti onikhaliherya okhala oomaaleleya.

20. Itthu xeeni anniixuttiha aya maithori a Yesu?

²⁰ Osoma itthu saamwiirinhe Yesu omoroxa maithori, onninimaaliha nave onniniixuttiha itthu sinceene. Nihuupuxeriwa wira nihaana waakhaliherya ale akhweliwe mmusi aya, mpatthani aya wala mutthu mukina yamphenta aya. Nave nooweha wira nihaana okupali wira Yehova ni Yesu anoonikhaliherya, akhala wira nnookhweliwa. Nave nihiixutta wira vannireerela waalaleerya atthu ni waareerela murima, maana Yehova ni Yesu Kristu annooniherya mikhalelo iyo sooreera. Osuwela wira Yehova ni Yesu annisuwela mixankiho sahu ni sootteettheya sahu, onninlipiha ni onikhaliherya ovilela. Tivonto, nihaana weettela itthu niixuntte ahu ni yoosoma ela, mpakha nihiku Yehova onrowa awe omaleliha yooleiherya awe ohimmye awe wira: ‘onoopuputtha maithori ahu otheene’!—Wiis. 21:4.