1. Ninrowa oviriha sai okathi niri ene ni Yehova?

OKHALA WENE onisivela okhala ni atthu nnaaphenta ahu. Mwa ntakiheryo, mulopwana ni mwaarawe aniphentana, waasivela oviriha okathi eri ene hoothe. Amiravo waasivela okhala ni apatthani aya. Nave otheene ahu, onisivela oviriha okathi niri ene ni axinnihu makristau. Masi etthu yuulupale erina efaita, oviriha okathi niri ene ni Muluku ahu. Nto ninrowa opaka sai eyo? Nivekelaka, omusoma Biibiliya, wuupuwelela itthu oleihenrye awe ni mikhalelo sawe sooreera. Tthiri okathi ninviriha ahu niri ene ni Yehova, wookhalana efaita yuulupale!—Esal. 139:17.

2. Xeeni ikwaha sikina vanixankiha aya oviriha okathi niri ene ni Yehova?

² Ekeekhai wira onisivela oviriha okathi niri ene ni Yehova, masi opaka eyo khivanikhweya. Okhala wira olelo-va ninnaatteliwa miteko, nto pooti okhala wooxankiha okhalana okathi woovara miteko sa Muluku. Muteko ahu wa mulaponi ni miritti sikina sa vatthokoni, pooti oniirihaka ohikhalana okathi woovara itthu sikina sinlipiha opatthani ahu ni Yehova. Tivonto hiyo pooti woonaka wira khanireere waatteliwa miteko ni khanirina okathi woovekela, osoma Nuulumo na Muluku aahiiso wupuwelela.

3. Etthu xeeni ekina ekhanle ooniherya okathi ahu?

³ Nave yookhala etthu ekina ekhanle ooniiyerya okathi ahu. Mooriipiha murima hiyo pooti oviriha okathi nivaraka miteko sikina sihikhanle sootthekeya, masi nihinakhalana okathi womwaattamela Yehova. Mwa ntakiheryo, nkahaya nuupuwele matthekulelo. Otheene ahu ninniphavela omumula ni otthekula. Masi hata matthekulelo ahu aari ene ooreera, akhala wira nnooviriha okathi munceene nitthekulaka aahiiso othweela, pooti ohikhalanaka okathi woovara miteko sa Muluku.—Mir. 25:27; 1 Tim. 4:8.

4. Exeeni ninrowa ahu othokorerya mwaha ola?

 ⁴ Yoosoma ela, nnooweha xeeni vanireerela aya osuwela itthu sirina efaita yuulupale mookumi mwahu. Nave nnooweha moota woorumeela mwa miruku okathi ninviriha ahu niri ene ni Yehova, ni moota opaka eyo onniphwanyiha aya mireerelo.

5. Yoolepa ya aEefeso 5:15-17, enrowa omukhaliherya sai mmiravo orumeela saana okumi awe?

⁵ Muthanleke saana enamuna yooloka yoorumeela okumi anyu. Okhala wene amiravo annixankiheya ni moota anrowa aya orumeela okumi aya. Waanyiheryasa maprusoore aya ni amusi ahikhanle makristau, pooti waatumereryaka orowa osoma wuniversidade wira ephwanye muteko onrowa waaphwanyiha musurukhu munceene. Opaka eyo pooti owiiyeryaka okathi aya. Nave-tho anamuyari akina ni anna a mmulokoni mwa ekristau pooti waatumereryaka amiravo awo orumeela okathi aya evaraka miteko sa Yehova. Exeeni enrowa omukhaliherya mmiravo onimphenta Yehova opaka yoothanla yooreera? Mmiravo owo onnireerela omusoma aEefeso 5:15-17, ni wuupuwelela ele osomme awe. (Mmusome.) Nuumala-vo, owo onnireerela otthokelela makoho ala onittharelana: ‘Etthu xeeni Yehova “oniphavela awe?” Yoothanla xeeni anrowa omusivela? Yoothanla xeeni enrowa okikhaliherya orumeela “oratteene” okathi aka?’ Ntoko onihimya awe aEefeso, “ninkhala mahiku ootakhala”. Nave olumwenku ola onlamuleliwa ni Satana, moohipisa onoomala. Tivonto vannireerela orumeela saana okumi ahu mwa enamuna enimusivela Yehova.

6. Yoothanla xeeni Maria aapanke awe? Nave xeeni yaari aya yooloka?

⁶ Muheleke nipuro noopacerya itthu sooreerela. Ikwaha sikina, wira nirumeele saana okathi ahu, nihaana oleva itthu sikina sihikhanle sootthekeya. Mwa ntakiheryo nkahaya nuupuwele okathi Yesu aamuxukunrye awe Maria ni Marta. Moohaanyiherya Marta khaareere ohakalala mwaha wooxukuriwa ni Yesu, ni aaphavela omwaapeela eyoolya yoosiva ni yoowunkhela. Masi muhima awe Marta, yoowo aitthaniwa Maria, aahirumeela okathi ole okilaathiki waattamela opuro ari awe Yesu wira owiriyaneke itthu aixuttiha awe. Ekeekhai wira etthu Marta aapaka awe khahiyo yaari yootthekeya, masi Maria aathanlale “epantta yootepa oreera”. (Luka 10:38-42) Woonasa wene nuuvira okathi, Maria aahiliyala etthu aalyiiye awe nihiku nle. Masi moohaanyiherya khaaliyanle itthu aixuttihiwe awe ni Yesu. Mwa moonelo wa Maria okathi avirinhe awe ori ene ni Yesu, waahikhalana efaita yuulupale. Ni hiyo-tho ninniivaha efaita yuulupale okathi ninviriha ahu niri ene ni Yehova. Ninrowa orumeela sai okathi owo mwa miruku?

7. Xeeni vanireerela aya ovekela, osoma Nuulumo na Muluku ni wuupuwelela?

⁷ Muhiliyale wira ovekela, omusoma Biibiliya ni wuupuwelela oniirela mpantta okokhorela wahu. Okathi ninvekela ahu, ninlavula ni Tiithi ahu a wiirimu, yoowo onniphenta. (Esal. 5:8) Okathi nimmusoma ahu Biibiliya ninniixutta “omuttittimiha Muluku”, yoowo onisuwela itthu sinceene waavikana atthu otheene. (Mir. 2:1-5) Nave okathi nnuupuwelela ahu itthu ninsoma ahu, ninnitthokelela mikhalelo sooreera sa Yehova, niitthu oleihenrye awe opaka muhoolo. Eyo enamuna yootepexa oreera mukhanle anyu oorumeela okathi anyu. Masi okhala wira ninnaatteliwa miteko, ninrowa orumeela sai okathi ahu oratteene?

8. Yesu aarumenle sai mwa miruku okathi aavirinhe awe ori ene moothakoni? Ni exeeni nniixutta ahu?

⁸ Vaaweryaneyaka, muthanleke opuro woomaaleleya. Nkahaya nuupuwele ntakiheryo  na Yesu. Ohinatthi opacerya muteko awe woolaleerya valaponi, Yesu aahiviriha mahiku 40 ori ene moothakoni. (Luka 4:1, 2) Okathi aari awe opuro ole woomaaleleya, aaniwerya onvekela Tiithi awe Yehova. Nave aanuupuwelela itthu Tiithi awe aaphavela awe wira yena opake. Moohaanyiherya, opaka eyo waahimukhaliherya Yesu wiilokiherya wira owerye ovilela mixankiho saarowa omphwanya muhoolo. Exeeni muniixutta anyu ni ntakiheryo na Yesu? Akhala wira owannyinyu opuro wowaatta atthu, pooti okhala vooxankiha ophwanya opuro woomaaleleya. Vakhala wira ti siiso vannireerela ohaavya opuro ohinivira-vira aya atthu. Eyo ti etthu onipaka awe murokora mmosa oniitthaniwa Julie, okathi oniphavela awe onvekela Yehova. Yena ni iyawe anikhala enupa yaamukhaani elapo ya oFrança. Nave ikwaha sikina khivaniweryaneya Julie okhala mekhawe opuro woomaaleleya. Yena onihimya so: “Nto, khula nihiku kinnirowa opasiyari oJardim. Okathi kiniphiya aka, kinniwerya okhala mekhaka ni ovaanela ni Yehova moohaakanyeriwa”.

9. Yesu oonihenrye sai wira aanivaha efaita opatthani awe ni Yehova?

⁹ Yesu aari mutthu oowaatteliwa miteko. Okathi aalaleerya awe valaponi, atthu anceene yaanimutthara khula opuro, nave yaaphavela okhala nuuwo. Nihiku nimosa ‘atthu otheene a epooma, yaahithukumana vamukhora’ wira anwehe Yesu. Masi hata vari siiso, yena aaniivaha etempo wira onvekele Yehova. Nihiku nikina “vahalaka oxa”, Yesu aahivenya “onarowa opuro wahaakhanle atthu” wira akhale paahi ni Tiithi awe a wiirimu.—Mar. 1:32-35.

10-11. Miruku xeeni Yesu aavanhe awe arummwa awe oJardim ya oXeseemani siri Matheyo 26:40, 41? Masi exeeni yaakhumelenle?

¹⁰ Ohiyu wookiserya ari awe valaponi, ohalaka vakhaani omaliha muteko awe woolaleerya, Yesu aahihaavya-tho opuro woomaaleleya wira ovekele ni wuupuwelela. Aahirowa ojardim ya oXeseemani. (Math. 26:36) Okathi ole Yesu aahaaleela awiixutti awe etthu ya efaita yuulupale enivarihana ni nivekelo.

¹¹ Nkahaya nuupuwele itthu saakhumelenle ohiyu ole. Woonasa wene okathi Yesu ni awiixutti awe yaaphiyale aya oJardim, waari ohiyu eriyari. Nuumala-vo, Yesu aahaahimeerya arummwa awe wira: “Muthipeleleke owehaweha”. Nuumala-vo aahikhuma opuro ole onarowa ovekela. (Math. 26:37-39) Masi mooriipiha murima okathi aavekela awe awiixutti awe yaamurupa. Ewoora Yesu aatthinke awe ni aaphwanya erupasaka, aahaaleela wira: “Muthipeleleke owehaweha, nvekeleke voohihiyererya”. (Mmusome Matheyo 26:40, 41.) Yesu aahisuwela wira awiixuttihi awe yaarookhulumuwa ni oxanka vanceene. Yena khaapwapwenle, maana aanisuwela wira erutthu ti “yootteettheya”. Masi nuumala-vo exeeni yaakhumelenle? Yesu aahirowa ovekela ikwaha piili, ni ewoora aahokolonwe  awe, aaphwannye arummwa erupasaka.—Math. 26:42-45.

12. Exeeni nikhanle ahu oopaka okathi ninxanka ahu ni oriipiwa murima nihinawerya ovekela?

¹² Muthanleke okathi wooreerela. Ikwaha sikina, hiyo pooti oriipiwa murima aahiiso okhulumuwa mpakha ohiwerya ovekela. Niireke eyo yootoko owiiraneelani? Akhala wira yootoko, weeso khamukhanle mekhinyu. Nto exeeni mukhanle anyu oopaka? Atthu akina yaalimalenle ovekela ahinatthi orowa orupa, ahoona wira vannireerela ovekela sihinatthi waaphwanya ikhove aahiiso okhulumuwa. Nave akina anoona wira moota anikhala aya okathi anivekela aya, pooti waakhaliherya. Masi ankhi vakhala wira yookhala etthu enooxankihani ni woriipihani murima mpakha muhinawerya ovekela? Mmuleeleke Yehova itthu munuupuwela anyu. Mukupaliki wira Tiithi ahu oophenta a wiirimu, onoowiiwani.—Esal. 139:4.

13. Xeeni selulari ahu aahiiso aparelyo eletroniko akhanle aya oonaakanyerya okathi ninkhala ahu ni Yehova?

¹³ Okathi munsoma anyu, mukhalaneke ephoole ni itthu sikhanle oowaakanyeryani. Ohiya paahi ovekela, sihaavo itthu sikina sikhanle oonikhaliherya olipiha opatthani ahu ni Yehova. Nave hiyo pooti olipiha opatthani ahu nimusomaka Biibiliya ni orowela mithukumano sa ekristau. Exeeni mukhanle anyu oopaka wira murumeele oratteene okathi muthanlale anyu wira mpake itthu? Mwiikoheke so: ‘Exeeni enimakela okaakanyerya okathi kiniweha aka mithukumano sa ekristau, aahiiso kinsoma aka?’ Etthu emosa ekhanle oomwaakanyerya mutthu, oligareliwa, waakhela mensagem muselularini aahiiso aparelyo akina eletroniko. Ekeekhai wira olelo-va aparelyo awo anninikhaliherya vanceene, nave atthu anceene aakhalana. Masi asomi akina, aahoona wira akhala wira selulari onnikhala vakhiviru vahu, pooti onaakanyerya. Prusoore mmosa onisomiha edisiplina enisoma muupuwelo wa mutthu aahiiso Psicologia, ohimmye so: ‘Okhala-wene mutthu akhalana telefoni vakhiviru, oniphavela osuwela itthu atthu akina anipaka aya aahiiso olepa. Mutthu owo onuupuwela itthu siri opuro mukina, ohiya ele enivara awe okathi ole’. Ahinatthi opacerya asembeleya aahiiso akongresu, okhala wene ninnileeliwa wira akhala wira noomuruuha selulari aahiiso etthu ekina enruma, nihaana olokiherya wira nihiwaakanyerye atthu akina. Nave okathi ninkhala ahu ni Yehova, vaamureera opaka etthu emosa-ru wira aparelyo ahu awo ehinaakanyerye.

14. Moovarihana ni aFilipi 4:6, 7, Yehova onrowa onikhaliherya sai ohimakela wuupuwela aahiiso ovara itthu sikina?

 ¹⁴ Munvekeleke Yehova wira ookhaliheryeni ohimakela wuupuwela aahiiso ovara itthu sikina. Ewoora ekina, okathi ninsoma ahu aahiiso oweha mithukumano, hiyo pooti wuupuwelaka itthu sikina. Akhala wira eyo enimwiiraneya, munvekeleke Yehova wira ookhaliheryeni. Ekeekhai wira okathi ninriipiwa ahu murima ni oxanka, vannivila wuupuwela itthu sinlipiha opatthani ahu ni Yehova, masi vannireerela opaka eyo. Tivonto nvekeleke wira nvahiwe murettele wa Muluku, yoowo onrowa osuka ohiya paahi murima anyu, masi-tho “miyuupuwelo sanyu”.—Mmusome aFilipi 4:6, 7.

15. Xeeni vanireerela aya oviriha okathi niri ene ni Yehova?

¹⁵ Akhala wira munooviriha okathi nvaanelaka ni Yehova, onwiriyana ni wuupuwela voohimya sa yena, munoophwanya mureerelo. Moota xeeni? Yoopacerya, munoopaka soothanla sooloka. Biibiliya onihimya wira “ole onetta n’asuweli onokhala musuweli”. (Mir. 13:20) Tivonto akhala wira munooviriha okathi muri ene ni Yehova yoowo ori musuweli muulupale, munookhala mutthu oosuwela. Nave munoosuwelaka moota woopaka soothanla sinrowa omusivela ni sihinrowa omunyoonyiha.

16. Xeeni oviriha okathi niri ene ni Yehova onnikhaliherya aya okhala atthu oosuwela wiixuttiha?

¹⁶ Ya nenli, munookhala mutthu oosuwela wiixuttiha. Etthu yuulupale nimphavela ahu okathi nimmusomiha ahu mutthu Biibiliya, omukhaliherya omphenta Yehova. Akhala wira ninniviriha okathi niri ene ni Tiithi ahu a wiirimu, omphenta wahu onnincerereya. Nuumala-vo, vannikhweya waakhaliherya atthu nnaasomiha ahu Biibiliya, nave omphenta Yehova. Eyo ti etthu yaamwiiranenle Yesu. Yena aanimulavula Tiithi awe moophenta, ni eyo yaahiwiiriha awiixutti awe nave ophavela omphenta Yehova.—Yohani 17:25, 26.

17. Xeeni ovekela ni yoosoma ahu ya omwaneene, enlipiha aya waamini wahu?

¹⁷ Ya neeraru, waamini wanyu onootepaka olipa. Nkahaya muupuwele etthu enikhumelela okathi nninvekela ahu Yehova wira onikhaliherye, onimaaliha, ni onivaha malakiheryo. Khula okathi onaakhula awe mavekelo ahu, waamini wahu onnitepa olipa. (1 Yohani 5:15) Etthu akina ennikhaliherya olipiha waamini wahu, yoosoma ahu ya omwaneene. Biibiliya onihimya wira “mutthu onaamini paahi nuumala wiiwa nuulumo”. (aRom. 10:17) Omusoma Biibiliya, onlikana ni onwiriyana Yehova. Masi wira waamini wahu olipe, khivaniphiyerya paahi wiixutta voohimya sa yena. Etthu xeeni-tho ekina ninreerela ahu opaka?

18. Nvahe ntakiheryo na moota Esalimo 77, enooniherya aya oreera waya wuupuwelela.

 ¹⁸ Nihaana wuupuwelela itthu nniixutta ahu. Nkahaya nuupuwele etthu yaamwiiranenle mulipa-oolepa Esalimo 77. Nasalimo ole, aahiriipiwa murima vanceene, maana uupuwela wira yena ni aisarayeli, yaahikhoottiwa ni Yehova. Mulipa-oolepa ole aahixanka mpakha ohinawerya orupa. (Iveersu 3-9) Nuumala-vo exeeni aapanke awe? Yena aalavunle so: “Kinnupuwela miteko sothene sìralyanyu: kinnitthokelela miteko sanyu sovuwa”. (Eveersu 13) Nasalimo ole aanisuwela itthu Yehova aawiirenle awe atthu awe khalai. Masi hata vari siiso, aanixanka ni onaikoha so: “Mano Muluku òliyala onimorela ikharari? Ohùmiha murim’awe mwaha w’oviruwa wawe?” (Eveersu 10) Nuumala-vo, aahitthokelela etthu Yehova aapanke awe khalai, ni moota aamorenle awe ikharari atthu a nloko nawe. (Eveersu 12) Masi nuumala-vo exeeni yaakhumelenle? Nasaalimo ole aahoona wira Yehova khaakhala-khala ahiyaka atthu awe. (Eveersu 16) Mwa enamuna emosaru, akhala wira munootthokelela itthu sootheene Yehova owiirenle awe atthu awe vamosa ni nyuwo, nave waamini wanyu onootepa olipa.

19. Etthu xeeni ekina ninrowa ahu ophwanya akhala wira nnooviriha okathi niri ene ni Yehova?

¹⁹ Ya neexexe, etthu yootepexa okhala efaita okhala wira, omphenta wanyu Yehova onimuncerereya. Nnaamwi sikhanle ene mikhalelo sikina, ophenta tonrowa wookhaliheryani ophavela omwiiwelela Yehova, oleva itthu sikina wira mmusiveliwe, ni ovilela okathi wa mixankiho. (Math. 22:37-39; 1 aKor. 13:4, 7; 1 Yoh. 5:3) Khiivo etthu erina efaita yuulupale ovikana omphenta wahu Yehova ni opatthani ahu nuuwo!—Esal. 63:2-9.

20. Exeeni mulakenle anyu opaka wira murumeeleke saana okathi muniviriha anyu muri ene ni Yehova?

²⁰ Muhiliyale wira ovekela, omusoma Biibiliya ni wuupuwelela, oniirela mpantta okokhorela wahu. Moolikanasa ni Yesu, muhaavyeke opuro woomaaleleya wira mukhale Yehova. Musyakeke itthu sikhanle oowaakanyeryani. Nave okathi munipaka anyu itthu sinilipiha opatthani anyu ni Yehova, munvekeleke Yehova wira ookhaliheryeni ohuupuwela aahiiso ohivara itthu sikina. Akhala wira olelo-va munoorumeela saana okathi anyu, Yehova onimootthuvelani ni okumi woohimala elapo esya.—Mar. 4:24.