1. Emusi aayariwe awe Yakobo yaari sai?

YAKOBO, muhima awe Yesu, aahuuwale emusi yaasiveliwa myaha sa Muluku. Apapawe ni amamawe yaawo yaitthaniwa Yosefe ni Maria, yaanimphenta vanceene Yehova, ni yaanipaka sootheene yaawerya aya wira amuhakalalihe. Yakobo aahikhalana-tho eparakha ekina, maana muulupale awe, nuumala wunnuwa aarowa okhala Mesiya. Tivonto Yakobo aahikhalana eparakha yuulupale yooyariwa emusi ele!

2. Mathowa xeeni yaakhanle oomwiiriha Yakobo otikinihiwa ni muulupale awe?

² Yakobo aahikhalana mathowa manceene yaamwiiriha otikinihiwa ni muulupale awe. (Math. 13:55) Mwa ntakiheryo, okathi Yesu aarina awe iyaakha 12, aanisuwela saana soolempwa sa Muluku. Eyo yaahiwiiriha awiixuttihi a oYerusalemu yaawo yaasuwela vanceene moolumo a Muluku otikinihiwa. (Luka 2:46, 47) Woonasa wene Yakobo aahivara hoothe ni Yesu muteko wa okalapintero. Nto vakhala wira ti siiso, aanimusuwela saana Yesu. Munna Nathan Homer Knorr, aamakela ohimya so: “Mutthu onnimusuwela saana mukhwaawe vakhala wira onivarana muteko vamosa”. * Tthiri Yakobo aaniweha wira “Yesu aaninnuwa ni ankhili awe yaanincerereya. Nave owo aanimusiveliha Muluku ni atthu”. (Luka 2:52) Mwaha wa itthu iyo sootheene, hiyo pooti wuupuwelaka wira Yakobo aari ekrupu yoopacerya ya awiixutti a Yesu. Masi eyo khahiyo ti etthu yaakhumelenle.

3. Yakobo aamoonenle sai Yesu okathi aapacenrye awe olaleerya?

³ Okathi wootheene Yesu ovirinhe awe olaleeryaka valaponi, Yakobo khaatonko okhala mwiixutti awe. (Yoh. 7:3-5) Woonasa  wene Yakobo aari hoothe ni amusi akina, yaale yuupuwela wira Yesu ‘aaroovahuwa’. (Mar. 3:21) Vanikhala wira Yakobo khaakhanle opuro ole ni Maria, maama aya, okathi Yesu aakhomeliwe awe vamwirini va nihaaxeryo.—Yoh. 19:25-27.

4. Itthu xeeni ninrowa ahu othokorerya mwaha ola?

⁴ Nuuvira okathi Yakobo aahipacerya omwaamini Yesu ni aahithanliwa okhala mutokweene. Owo aari mutokweene oottittimihiwa a mmulokoni wa ekristau. Mwaha ola nnoothokorerya itthu piili ninniixuttiha aya ntakiheryo na Yakobo: (1) Xeeni vari aya vooloka ohihiya okhala oowiiyeviha? (2) Ninrowa olokiherya sai enamuna ahu ya owiixuttiha atthu nuulumo na Muluku?

5. Exeeni Yakobo aapanke awe nuumala Yesu omukhumelela?

⁵ Yakobo aapacenrye silini okhala mwiixutti oororomeleya a Yesu? Nuumala Yesu ohihimuwa, “aahimukhumelela Yakobo, nuumala-vo, aahaakhumelela arummwa otheene”. (1 aKor. 15:7) Moottharelana, Yakobo aahikhala mwiixutti a Yesu. Yakobo aari hoothe ni arummwa okathi yaakhenle aya munepa woowaarya. (Mit. 1:13, 14) Muhoolo mwaya Yakobo aahikhalana eparakha yoowiirela mpantta ekrupu ya nikhuuru noolamulela na eseekulu yoopacerya. (Mit. 15:6, 13-22; aGal. 2:9) Nave ohinatthi ophiya mwaakha 62  Nuumala Kristu Orwa, Yakobo aahirummwa ni Muluku wira aalepele ekarta makristau oothanliwa orowa wiirimu. Olelo-va otheene ahu pooti wiixutta etthu ni ekarta eyo, hata nirina ene eparakha yookhala mahiku otheene valaponi aahiiso wiirimu. (Yak. 1:1) Moovarihana ni Josefo, mulipa-oolepa sowiiraneya sa ayuda a eseekulu yoopacerya, Yakobo aiviwe ni atthu yaarummwale ni Namukuttho Muulupale Ananiya mwaana a Hanaaxi. Yakobo khaahiyale ororomeleya mpakha omala okumi awe valaponi.

6. Yakobo aavirikanne sai ni awiixuttihi a itiini a okathi ole?

⁶ Yakobo aari mutthu oowiiyeviha. Xeeni ninhimya ahu siiso? Nrowe niwehe moota Yakobo aavirikanne awe ni awiixuttihi a itiini a okathi ole. Okathi aawenhe awe itthu sooniherya wira Yesu aari Mwaana a Muluku, aaheemererya moowiiyeviha. Masi awiixuttihi a oYerusalemu, khiyaapanke eyo. Mwa ntakiheryo, ekeekhai wira yaanikupali wira Yesu aahimuhihimuxa Laazaro. Masi ohiya okupali wira Yesu aarummwale ni Yehova, awo yaahimananiha omwiiva Yesu ni Laazaro. (Yoh. 11:53; 12:9-11) Ovinre ene okathi nuumala Yesu ohihimuxiwa, yaahimananiha ovitha mwaha ole wira ohisuweliwe ni atthu akina. (Math. 28:11-15) Wiixinnuuha wa  ahooleli ale a itiini, waahiwiiriha omukhootta Mesiya.

7. Xeeni vari aya vooloka okhootta wiixinnuuha?

⁷ Etthu nniixutta ahu: Muhiixinnuuheke, masi mweemereryeke wiixuttihiwa ni Yehova. Naahikhalane ephoole, wiixinnuuha pooti oniirihaka wuumiha murima. Nrowe niwehe etthu yaakhumelenle afarisi. Alopwana ale yaahuumiha murima aya, ni khiyeemererya wira Yesu aari Mwaana a Muluku. Wiixinnuuha etthu yoowoopiha ni pooti onivalaanya ni Yehova. (Yoh. 12:37-40) Nto mwaha waivaavo, afarisi yaahiperteri eparakha yoophwanya ekumi ehinimala. (Math. 23:13, 33) Tivonto, neemereryeke wira Biibiliya ni munepa woowaarya wa Muluku, orukunuxeke mukhalelo ahu, moota nnuupuwela ahu ni onikhaliherya opaka soothanla sa miruku! (Yak. 3:17) Wiiyeviha, waahimukhaliherya Yakobo weemya wiixuttihiwa ni Yehova. Sintoko ninrowa ahu oweha, wiiyeviha ti waamukhalihenrye okhala mutthu oosuwela wiixuttiha.

8. Exeeni enrowa onikhaliherya okhala atthu oosuwela wiixuttiha?

⁸ Yakobo khahiyo aari mutthu oosomexa. Enamuna yaamuthokorerya aya ahooleli a itiini a okathi ole, yaamulikana ni enamuna yaamuthokorerya murummwa Pedru ni Yohani, nihimye so, yaathokorerya ntoko ‘atthu yahaasomme ni atthu pure’. (Mit. 4:13) Masi hata vari siiso, Yakobo aahikhala mutthu oosuwela wiixuttiha. Ninniwerya oweha eyo okathi ninsoma ahu eliivuru ya mBiibiliyani olempe awe. Moolikanasa ni Yakobo, woonasa wene ni hiyo-tho khinaarina eparakha yoosoma vanceene. Masi nikhaliheriwaka ni munepa woowaarya wa Yehova vamosa ni mutthenkeso awe, hiyo-tho pooti okhala atthu oosuwela wiixuttiha. Vano nrowe niwehe etthu yaamukhaliherya Yakobo okhala mutthu oosuwela wiixuttiha, ni moota nikhanle ahu ootthara ntakiheryo nawe.

9. Mutthokiherye moota Yakobo aixuttiha awe.

⁹ Yakobo khaarumeela moolumo oovila ni khaatthokiherya itthu mooxankiha. Tivonto, okathi Yakobo aixuttiha awe, atthu yanwiriyana yaanisuwela etthu yaareerela aya opaka, ni moota yaakhanle aya oopaka etthu eyo. Mwa ntakiheryo: Yakobo aixuttinhe wira mukristau pooti othokoreriwaka moohixariya, masi hata vari siiso, onaimananiha ohinanariwa. Aalempe so: “Hiyo ninnaahimya atthu anivilela, okhala ootteeliwa  murima. Nyuwo muhiiwa ohimmwaka ovilela wa Yobi, nave moosuwela sooreera Yehova anvahale awe wookiseryani. Tthiri, Yehova toophenta vanceene ni toomoriwa ikharari”. (Yak. 5:11) Itthu Yakobo aixuttiha awe, saakhuma munuulumoni na Muluku. Nto aahirumeela nuulumo na Muluku wira aakhaliherye atthu woona wira Yehova okathi wootheene onnaatthuvela, ale aniroromeleya ntoko Yobi. Yakobo aarumeela moolumo ookhweya ni aatthokiherya itthu mwa enamuna yookhweya wiiwexexa. Tivonto, khaapaka itthu wira okupaliwe, masi aaninvuwiha Yehova.

10. Okathi nniixuttiha ahu, ninrowa omutakiha sai Yakobo?

¹⁰ Etthu nniixutta ahu: Mwiixuttiheke mwa enamuna yookhweya ni mmurumeeleke Biibiliya. Okathi nimmusomiha ahu Biibiliya mutthu, nihiphaveleke omooniherya wira naatthu oosuwelexa, masi niphaveleke omooniherya wira Yehova tori oosuwelexa ni onniphenta. (aRom. 11:33) Nnoowerya opaka eyo nimurumeelaka Biibiliya okathi wootheene nniixuttiha ahu. Mwa ntakiheryo, nihimuhimeeryeke naxikola ahu a Biibiliya etthu naarowa ahu opaka vaakhanle wira muxankiho omphwannye, onikhumelenle hiyo. Masi nimuleeleke matakiheryo a mBiibiliyani, wira yena iiwexexe moota Yehova onoonela awe mwaha owo. Opaka eyo enoomukhaliherya woona wira etthu yootepa otthuneya omuhakalaliha Yehova, ohiya hiyo nimmwiixuttiha.

11. Mixankiho xeeni yaarina aya makristau makina? Nave miruku xeeni Yakobo aavanhe awe? (Yakobo 5:13-15)

¹¹ Yakobo aahikhalana muupuwelo wooloka. Okathi ninsoma ahu ekarta awe, ninniweha wira Yakobo aanisuwela sootteettheya sa anna ni arokora. Tivonto aavanhe awe malakiheryo ooluluwanya yaahimya itthu yaakhanle aya oopaka. Mwa ntakiheryo makristau makina yaanipisa vakhaani weettela malakiheryo yaavahiwa aya. (Yak. 1:22) Akina yaanaattittimiha vanceene athaaciri waavikana atthu oohaawa. (Yak. 2:1-3) Nave akina khiyaawerya wiikasoopa ni itthu yaalavula aya. (Yak. 3:8-10) Iyo saari mixankiho suulupale. Masi Yakobo aanisuwela wira axinna awe yanwerya oopaka marukunuxo. Yakobo aahaavaha malakiheryo anna awo mwa enamuna yoophenta, masi aaleelaka mooluluwanya itthu yaareerela aya olokiherya. Ohiya vo, Yakobo aahaatumererya anna ale wira yaahaana waavekela nikhaliheryo axitokweene wira awerye oopaka marukunuxo awo.—Mmusome Yakobo 5:13-15.

12. Ninrowa okhalana sai moonelo wooloka okathi nnaakhaliherya ahu anaxikola ahu a Biibiliya?

¹² Etthu nniixutta ahu: Muhuupuweleke wira atthu akina khanikhala-khala apakaka marukunuxo. Nihaana okhalana moonelo wooloka ni weemya wira atthu anceene nnaasomiha ahu Biibiliya, vannaavila weettela malakiheryo a mBiibiliyani. (Yak. 4:1-4) Pooti ovira okathi wira atthu akina attharuwe soolema soohiloka yaarina aya, ni opacerya ookhalana mikhalelo sa eKristau. Moolikanasa ni Yakobo, nihaana olipiha murima wira naaleele anaxikola ahu a Biibiliya itthu anreerela aya olokiherya. Nihaana okhalana moonelo wooloka, niroromelaka wira Yehova onimwaathanla atthu oowiiyeviha ni onimwaavaha ikuru ale aniphavela opaka marukunuxo mookumini mwaya.—Yak. 4:10.

13. Ntoko onihimya awe Yakobo 3:2, etthu xeeni Yakobo eemerenrye awe?

¹³ Yakobo khaixoona okhala mutthu ootepexa okhalana efaita waavikana atthu akina. Yakobo khaixoona okhala mukristau ootepexa okhalana efaita waavikana makristau makina, mwaha wookhala muhima awe Yesu paahi, aahiiso mwaha woothanleliwa ovara miteko sinceene mmulokoni mwa ekristau. Mwa ntakiheryo, aahiwiitthana makristau makina aasuwela awe, orumeelaka moolumo oowi, “annaka oophentiwa”. (Yak. 1:16, 19; 2:5) Khaamananiha owiiriha atthu akina wuupuwela wira yena khahiyo aari mutthu oottheka. Ohiya-vo aahiihela  muhina okathi aalavunle wira: “Tthiri otheene ahu ninnittheka ikwaha sinceene”.—Mmusome Yakobo 3:2.

14. Xeeni vanrerelaya waaleela anaxikola ahu wira ikwaha sikina khivanikhweya wiiwelela malakiheryo a mBiibiliyani?

¹⁴ Etthu nniixutta ahu: Muhiliyale wira otheene ahu naatthu oottheka. Nihuupuweleke wira naatthu ootepexa oloka waavikana anaxikola ahu a Biibiliya. Mwaha wa xeeni? Vakhala wira ninniwiiriha anaxikola ahu wuupuwelaka wira okhala wene khaninttheka, awo pooti okhulumuwa maana anrowa wuupuwela wira khanirowa owerya opaka itthu Muluku onaavekela awe. Masi, mooreerela murima neemereryeke wira ikwaha sikina khivanikhweya wiiwelela malakiheryo a mBiibiliyani. Nave-tho naatthokiheryeke anaxikola ahu a Biibiliya woona moota Yehova onnikhaliherya awe ovilela mixankiho, ni waakhaliherya oweha wira naawo-tho anoowerya omurumeela Yehova.

15. Malikanyiho Yakobo aarumeela awe yaakhala sai? (Yakobo 3:2-6, 10-12)

¹⁵ Yakobo aanirumeela malikanyiho wira owiirihe atthu osiveliwa ni itthu aixuttiha awe. Moohaanyiherya Yakobo aanikhaliheriwa ni munepa woowaarya. Masi vanooneya wira itthu sikina, aixuntte ni malikanyiho a muulupale awe, Yesu. Muliivuruni mwawe, oorumeela malikanyiho ookhweya ni yaasuweliwa.—Mmusome Yakobo 3:2-6, 10-12.

16. Exeeni eniiraneya okathi ninrumeela ahu malikanyiho ooreerela?

¹⁶ Etthu nniixutta ahu: Murumeeleke malikanyiho anaasivela atthu. Orumeela malikanyiho ooreerela, pooti omukhaliherya ole munimusomiha anyu ohiya paahi wiiwa, masi-tho wuupuwelela. Owo onimwiiwexexa saana etthu mumphavela anyu omwiixuttiha ni khonrowa oliyala. Khuuvo mutthu aasuwela saana otthokiherya malikanyiho onvikana Yesu. Nave Yakobo aahitthara ntakiheryo nawe. Vano, nrowe nivarerye nlikanyiho nimosa na Yakobo ni niwehe nthowa naya naari aya nooreerela.

17. Xeeni ninhimya ahu wira nlikanyiho niri Yakobo 1:22-25 ti noovara murima?

¹⁷ Mmusome Yakobo 1:22-25. Nlikanyiho nna na exipelyu ti nooreerela mwaha wa mathowa manceene. Noopacerya, Yakobo aanisuwela saana etthu aaphavela awe wiixuttiha. Nlikanyiho nna, aaphavela wiixuttiha wira, naaphavelaka wira nuulumo na Muluku nirukunuxe murima ahu, ohiya paahi osoma nuulumo nlo, nihaana weettela itthu nniixutta ahu. Yakobo aahiromola  etthu yeeyo atthu ootheene yaasuwela aya, eyo piiyo, exipelyu. Exeeni naixuttiha aya nlikanyiho nne? Vaarowa okhala voololo mutthu wiiweha vaxipelyuni onoona etthu ehikhale saana owiitho wawe, masi onahiya siiso. Mwa enamuna emosaru, khivaarowa okhala vamiruku mutthu osoma nuulumo na Muluku, onaweha marukunuxo onreerela awe opaka mookumini mwawe, masi nuumala-vo ohinapaka etthu.

18. Itthu xeeni tthaaru ninreerela ahu wuupuwela okathi nimphavela ahu opaka malikanyiho?

¹⁸ Ninrowa omutakiha sai Yakobo nirumeelaka malikanyiho ooreerela? Hiyo pooti opaka itthu 3: (1) Muthanleke nlikanyiho ninrowa omukhaliherya naxikola anyu wiiwexexa etthu mumphavela anyu omwiixuttiha. (2) Mpakeke malikanyiho a itthu sinisuweliwa. (3) Mooniheryeke saana etthu nlikanyiho nno nimphavela aya wiixuttiha. Masi ankhi vakhala wira vannooxankihani opaka malikanyiho oovara murima? Nyuwo pooti omurumeela Índice das Publicações da Torre de Vigia. Murowe opuro onihimya so: “Ilustrações”, nuumala-vo munoophwanya malikanyiho manceene mukhanle anyu oorumeela. Masi muhiliyale wira malikanyiho anlikana ni mikrofooni. Okathi mutthu onlavula awe mmikrofoonini, nsu nawe ninniiwanyeya vanceene waavikana atthu akina. Nave malikanyiho anniiwanyeiha itthu nimphavela ahu wiixuttiha. Tivonto, nihaana okhalana ephoole wira nirumeeleke paahi malikanyiho opuro ori iponto suulupale. Veekeekhai nimphavela okhala atthu oosuwela wiixuttiha, voohiphavela ohimmwa, masi naakhaliheryaka atthu anceene wiirela mpantta emusi yoohakalala ya Yehova.

19. Ninrowa wooniherya sai wira ninnaaphenta axinnihu ni axirokorihu makristau?

¹⁹ Moovirikana ni hiyo, Yakobo annunwe ni muulupale awe yoowo ayariwe ohirina etampi. Masi hiyo nookhalana eparakha ya omurumeela Yehova, ni wiirela mpantta emusi yuulupale ya anna ni arokora makristau. Ninnooniherya wira ninnaavaha efaita axinnihu awo, okathi ninrowela ahu mithukumano sa ekristau, wiixutta nittharaka ntakiheryo naya ni olaleerya vamosa naawo. Vakhala wira nnimwiimananiha otthara saana ntakiheryo Yakobo onihiyenrye awe, nnonvuwiha Yehova. Nave nnimwaakhaliherya atthu arina murima wooloka wiixutta itthu Biibiliya oniixuttiha awe.