1-2. (a) Nihiku xeeni nintepa ahu omuupuwela mutthu namphenta ahu okhwiiye? (b) Ohiyu wookiserya ohinatthi wiiviwa, etthu xeeni Yesu aarumme awe awiixutti awe?

HATA oviraka okathi munceene, khannaaliyala atthu naaphenta ahu akhwiiye. Okhala-wene khula eyaakha vaavo nimphiya aya nihiku yaakhwiiye aya, ninniwuupuwela.

² Nave khula mwaakha ninnithukumana nihiku Yesu Kristu aakhwiiye awe wira nuupuwelele. (1 Ped. 1:8) Ninnuupuwela nlipelelo nirina ahu mwaha wa Yesu ovaha okumi awe ntoko mukuttho wira onoopole mwaha wa etampi ni okhwa niravihiwe ahu. (Math. 20:28) Nave Yesu oniphavela wira awiixutti awe yuupuweleleke okhwa wawe. Ohiyu aarowa awe wiiviwa, aahimmye so: “Muthipeleleke opaka ela mukuupuwelaka miyo”. *—Luka 22:19.

3. Exeeni ninrowa ahu othokorerya mwaha ola?

³ Nnaamwi atthu imilyau sinceene khula eyaakha erowelaka muthukumano wa Wuupuwelela, ale arina nlipelelo noorowa okhalaka wiirimu ari vakhaani. Anamunceene anlipelela okhalaka valaponi vaava. Mwaha ola, nnooweha mathowa anniiriha orowela muthukumano wa Wuupuwelela hata nirina ene yoolipelela yoorowa wiirimu aahiiso okhalaka valaponi vaava. Nave nnimoona moota muthukumano owo onniphwanyiha aya mureerelo. Masi nrowe toko niwehe nthowa naya makristau oothanliwa, anrowela aya muthukumano wa Wuupuwelela.

4. Xeeni makristau oothanliwa anikhuura aya ephaawu ni owurya eviinyu ya Yuupuwelela?

⁴ Makristau athanliwe orowa wiirimu, khula eyaakha annirowela muthukumano wa Wuupuwelela ni annikhuura ephau ni anniwurya eviinyu ya Wuupuwelela. Masi xeeni anipaka eyo? Wira niiwexexe saana mwaha ola, vannireerela osuwela etthu yaakhumelenle ohiyu wookiserya Yesu aari awe valaponi. Yesu ni awiixutti awe yaahilya efesta ya ayuda eniitthaniwa Paasikha. Nuumala-vo Yesu aahipaceriha Yoolya ya Ohiyu ya Apwiya, ele olelo-va enisuweliwa okhala nihiku na Wuupuwelela okhwa wa Kristu. Okathi ole, Yesu aahaavaha ephau ni eviinyu arummwa awe 11 oororomeleya, ni aahaaleela wira elyeeke ni ewuryeke. Moottharelana Yesu aahaahimeerya mavarihano manli: Nivarihano na niinaano, ni nivarihano na Omwene. * (Luka 22:19, 20, 28-30) Mavarihano ale aakhaliherya wira arummwa ni awiixutti akina oothanliwa, ekhalane eparakha yoorowa okhala mamwene ni anamukuttho wiirimu. (Wis. 5:10; 14:1) Paahi makristau oothanliwa nlelo ari valaponi, tanikhuura ephau ni owurya eviinyu ya Wuupuwelela, maana taniirela mpantta mavarihano awo.

5. Nlipelelo xeeni arina aya makristau oothanliwa? Nave exeeni akhanle aya oopaka wira yaakhele yoolipelela aya?

⁵ Nookhala nthowa nikina ninwiiriha makristau oothanliwa ovaha efaita niira na Wuupuwelela. Awo annirumeela okathi owo wira yuupuwelele saana yoolipelela aya. Yehova ohaavaha nlipelelo noohakalaliha na waakhela wiirimu ekumi ehinikhwa, evaraka muteko ni Yesu Kristu vamosa ni makristau makina 144.000 oothanliwa. Nave anookhalana eparakha yoomoonaka Yehova Muluku ntoko siri awe. (1 aKor. 15:51-53; 1 Yoh. 3:2) Makristau oothanliwa annisuwela saana wira aalattuliwa wira yaakhele eparakha eyo wiirimu. Masi-tho annisuwela wira yaaphavelaka waakhela yoolipelela aya eyo, ahaana okhala oororomeleya mpakha okhwa. (2 Tim. 4:7, 8) Awo annitteeliwa murima okathi anuupuwelela aya yoolipelela aya yoorowa wiirimu. (Tito 2:13) Masi mwaha wa xeeni ale a “ipwittipwitthi sikina” anirowela aya muthukumano wa Wuupuwelela? (Yoh. 10:16) Itthu xeeni sikina siniwiiriha orowela muthukumano owo?

6. Xeeni ale a ipwittipwitthi sikina anirowela aya muthukumano wa Wuupuwelela khula eyaakha?

⁶ Ale a ipwittipwitthi sikina annirowela muthukumano owo, masi khanikhuura ephau ni khaniwurya eviinyu ya Wuupuwelela. Masi hata vari siiso annihakalala mwaha woorowela muthukumano owo. Mukwaha woopacerya makristau arina nlipelelo na okhala valaponi yaalattuliwe aya orowela muthukumano owo, waari mwaakha wa 1938. A Sentinela a 1 a Março a 1938, aahimmye so: “Ti vookhalela ni ti va xariya ale a ipwittipwitthi sikina orowela muthukumano owo wira aweheke itthu siniiraneya okathi owo. . . . Owo okathi woohakalaliha ni wootthapa”. Makristau a ipwittipwitthi sikina annihakalala mwaha woorowela muthukumano wa Wuupuwelela.

7. Xeeni makristau a ipwittipwitthi sikina anivaha aya efaita mwaha onilavuliwa nihiku na Wuupuwelela?

⁷ Ale a ipwittipwitthi sikina annihakalala-tho Wuupuwelela yoolipelela aya. Awo vannaasivela owiriyana mwaha wa Wuupuwelela yoowo onittittimiherya itthu Yesu ni makristau 144.000 oothanliwa anrowa aya opaka okathi wa olamulelo wa Kristu wa iyaakha 1000 wira yaaphwanyinhe  mureerelo apinaatamu oowiiwelela. Ahooleliwaka ni Mwene Yesu Kristu, ale oothanliwa, anookhaliherya olokiherya elapo wira ekhale eparayiisu. Nave animwaakhaliherya apinaatamu oowiiwelela wira atthikele okhala oomalela aahiiso oohittheka. Para imilyau sinceene sa atthu anirowela muthukumano owo wa Wuupuwelela, ti voohakalaliha otthokelela moota okumi onrowa okhala wooreera okathi sinrowa aya wiiraneya iprofesia siri Yesaya 35:5, 6; 65:21-23; ni Wiisuupulula 21:3, 4. Wuupuwelela ekhalaka ni amusi ni apatthani elapo esya yooreera, onnilipiha yoolipelela aya ya muhoolo ni yoophavela aya ya ohihiya omurumeela Yehova.—Math. 24:13; aGal. 6:9.

8. Etthu xeeni-tho ekina eniwiiriha makristau a ipwittipwitthi sikina orowela muthukumano wa Wuupuwelela?

⁸ Nthowa nikina ninwiiriha ale a ipwittipwitthi sikina orowela muthukumano owo, ophavela waya wooniherya waaphenta waya ni waakhaliherya ale oothanliwa. Biibiliya aahihimya wira makristau oothanliwa yaarowa ovaraka hoothe ni ale arina nlipelelo nookhala valaponi. Moota xeeni? Nrowe nithokorerye iprofesia tthaaru.

9. Eprofesia eri Zakariya 8:23 enooniherya sai moota ale a ipwittipwitthi sikina anaathokorerya aya axinnaya oothanliwa?

⁹ Mmusome Zakariya 8:23. Eprofesia ele ennihimya saana moota ale a ipwittipwitthi sikina anaathokorerya aya axinnaya oothanliwa. Moolumo anihimya wira “mutthu òYuda” ni “nyuwo”, anihimmwa atthu amosaru athanliwe orowa wiirimu, masi nlelo ari valaponi. (aRom. 2:28, 29) “Amalapo muloko a maloko otheene”, anithoonyerya makristau a ipwittipwitthi sikina. Makristau awo, ‘annaavara metto’ aahiiso waatthara ale oothanliwa emurumeelaka hoothe Yehova. Tivonto annipaka sootheene aniwerya aya wira ehicompele muthukumano wa Wuupuwelela yaakhaliheryaka ni murima aya wootheene ale oothanliwa.

10. Yehova onimaleliha sai eprofesia eri Ezekiyeli 37:15-19, 24, 25?

¹⁰ Mmusome Ezekiyeli 37:15-19, 24, 25. Yehova onnimaleliha eprofesia ela iirihaka wira makristau oothanliwa vamosa naale a ipwittipwitthi sikina, evareke saana muteko hoothe ni okhala oowiiraana. Eprofesia ele enniromola mapawe manli. Ale arina nlipelelo noorowa okhalaka wiirimu anlikana ni nipawe naalempwale nloko na “Yuda” (nloko na mamwene a wIsarayeli yaathanliwa ni Yehova). Nave ale arina nlipelelo nookhala mahiku otheene valaponi, anlikana ni nipawe naalempwale “Efrayimi”. * Yehova onootakaaha igrupu iyo piili ni sinookhala “nipawe nimosa pahi”. Eyo entaphulela wira igrupu iyo soopiili sinvara muteko vamosa simwiiwelelaka Mwene Yesu Kristu. Khula eyaakha, makristau oothanliwa naale a ipwittipwitthi sikina, annirowela hoothe muthukumano wa Wuupuwelela. Ohiya sintoko ikrupu piili soovirikana, masi ntoko “nikoto nimosa”, nirina “makampusi mmosa”.—Yohani 10:16.

11. Enamuna xeeni yuulupale ale a “ipwittipwitthi” siniromoliwa Matheyo 25:31-36, 40, anaakhaliherya aya axinnawe Kristu?

¹¹ Mmusome Matheyo 25:31-36, 40. Nlikanyiho nla, tani ari “ipwittipwitthi”? Anihimmwa anaxariya anikhala mahiku ookiserya arina nlipelelo nookhala mwa mahiku otheene valaponi. Nave Yesu aahaahimya okhala ipwittipwitthi sikina. Makristau awo a ipwittipwitthi sikina annaakhaliherya ale oothanliwa ni munepa wowaarya nlelo ari valaponi. Awo annipaka eyo vanceenexa yiirelaka mpantta muteko woolaleerya ni waapaka awiixutti.—Math. 24:14; 28:19, 20.

12-13. Inamuna xeeni sikina ale a ipwittipwitthi sikina anaakhaliherya aya axinnawe Kristu?

¹² Khula mwaakha, sihalaka isumana vakhaani wira niphiye nihiku na Wuupuwelela, makristau  a ipwittipwitthi sikina, annaakhaliherya makristau oothanliwa wiirela mpantta ekampaanya yoolaleerya ya olumwenku wootheene. Yoolukama ya ekampaanya eyo, waalattula atthu aniphavela orowela muthukumano wa Wuupuwelela. (Nwehe ekaaxa enihimya so:  Niireke Munniilokiherya Wira Murowe Wuupuwelela?) Hata muloko aya ohikhanle mutthu oothanliwa, ale a ipwittipwitthi sikina annikhaliherya olokiherya muthukumano owo. Mwa moonelo aya, eparakha yuulupale waakhaliherya axinnawe Kristu mwa inamuna iyo. Mwa moonelo wa Yesu khula etthu nimpaka ahu wira naakhaliherye makristau oothanliwa, vanikhala wira nnimpakela yena.—Math. 25:37-40.

¹³ Hata nirina ene yoolipelela yookhala valaponi aahiiso wiirimu, exeeni enniiriha orowela muthukumano wa Wuupuwelela.

14. Mwa inamuna xeeni Yehova ni Yesu anoonihenrye aya wira anniniphenta?

¹⁴ Ninnixukhurela niphento onoonihenrye awe Yehova ni Yesu. Yehova ohooniherya wira onniniphenta mwa inamuna sinceene soovirikana, masi yookhala emosa ya vameekhaaya. Mwaha wooniphenta, Yehova Muluku aahimuruma mwanawe onimphentexa awe wira orwe valaponi, ohaawe ni okhwe mwaha wa itampi sahu. (Yohani 3:16) Nave ninnimuxukhurela Yesu maana khaavo aamukhanyerenrye ovaha okumi awe wira onoopole. Owo aapanke eyo mwaha wooniphenta. (Yohani 15:13) Hiyo khaninkhala-khala niweryaka omuliva aahiiso omuttikiherya Yehova ni Yesu ophenta anoonihenrye aya. Hata vari siiso mahiku otheene nnoowerya wooniherya wira ninnaaxukhurela nivaraka itthu sinaasivela. (aKol. 3:15) Ti nthowa naya ninrowela ahu muthukumano wa Wuupuwelela, nave onninikhaliherya otthokelela oratteene ophenta anoonihenrye aya ni wooniherya moota nnaaphenta ahu.

15. Xeeni makristau oothanliwa ni ale a ipwittipwitthi sikina, anivaha aya efaita yuulupale yowoopola?

¹⁵ Ninnivaha efaita yuulupale yowoopola. (Math. 20:28) Ale oothanliwa annivaha efaita yuulupale yowoopola maana enniiriha oweryaneya okhalana yoolipelela yoorowa wiirimu. Mwaha woowaamini mukuttho wa Yesu, ale oothanliwa, annikhalihiwa anaxariya ni Yehova, nave onnakuxa wira ekhale anaawe. (aRom. 5:1; 8:15-17, 23) Nave ale a ipwittipwitthi sikina annivaha efaita yuulupale yowoopola. Mwaha woowaamini mukuttho wa Yesu, makristau awo anniwerya weemela ohoolo wa Muluku ni murima wooloka. Nave anniwerya omurumeela mwa enamuna oneemererya awe, ni okhalana eparakha yowoopowa okathi wa “maxakha maalupale”. (Wiis. 7:13-15) Hata mulipelelaka okhala mwa mahiku otheene wiirimu aahiiso valaponi, munimooniherya wira munnivaha efaita yowoopola, murowelaka muthukumano owo khula mwaakha.

16. Etthu xeeni ekina enniiriha orowela muthukumano wa Wuupuwelela?

¹⁶ Nthowa nikina ninniiriha orowela muthukumano wa Wuupuwelela, mwaha woowi nimphavela omwiiwelela Yesu. Hata nilipelelaka orowa wiirimu aahiiso okhalaka valaponi vaava, otheene ahu nimphavela wiiwelela yooruma ya Yesu. Ohiyu aarowa awe wiiviwa, Yesu aahimmye so: “Muthipeleleke opaka ela mukuupuwelaka miyo”.—1 aKor. 11:23, 24.

17. Muthukumano wa Wuupuwelela onnikhaliherya sai otepa omwaattamela Yehova?

¹⁷ Ninnitepa omwaattamela Yehova. (Yak. 4:8) Sintoko niwenhe ahu, nihiku na Wuupuwelela, okathi wooreerela otthokelela yoolipelela Yehova onivanhe awe, ni ophenta onoonihenrye awe. (Yer. 29:11; 1 Yoh. 4:8-10) Okathi  nimpaka eyo, omphenta wahu Yehova onnitepa olipa, nave ninnitepa omwaattamela.—aRom. 8:38, 39.

18. Wuupuwelela ntakiheryo na Yesu onrowa oniiriha ophavela opaka exeeni?

¹⁸ Onniniiriha ophavela otthara ntakiheryo na Yesu. (1 Ped. 2:21) Nihalaka vakhaani ophiya nihiku na Wuupuwelela, wira nilokiherye murima ahu, ninnimusoma Biibiliya sowiiraneya sinttittimiherya itthu saakhumelenle mahiku ookiserya Yesu aari awe valaponi, okhwa wawe ni ohihimuwa. Nave, mwaha onilavuliwa ohiyu wa Wuupuwelela, onninikhaliherya otthokelela ophenta Yesu onoonihenrye awe. (aEef. 5:2; 1 Yoh. 3:16) Okathi ninsoma ahu ni wuupuwela itthu saamwiiranenle Yesu, ninnikhalana yoophavela yoweetta “ntoko Yesu eetta awe”.—1 Yoh. 2:6.

19. Exeeni ninreerela ahu opaka wira opatthani ahu ni Muluku otepeke olipa?

¹⁹ Ninnikhalana yoolukama ya ohihiya okhala apatthani a Yehova. (Yuda 20, 21) Opatthani ahu ni Yehova onrowa otepa okhala woolipa akhala wira nnoomwiiwelela, otteeliha nsina nawe, ni omuhakalaliha. (Mir. 27:11; Math. 6:9; 1 Yoh. 5:3) Muthukumano wa Wuupuwelela onninikhaliherya okhalana mweettelo onimusivela Yehova Muluku, nave onlikana ni ohimya so: ‘Miyo kimphavela woorumeelani mwa mahiku otheene!’

20. Mathowa xeeni maalupale anniiriha orowela muthukumano wa Wuupuwelela?

²⁰ Hata nirina ene yoolipelela ya orowa wiirimu aahiiso okhalaka valaponi vaava, otheene ahu nookhalana mathowa anniiriha orowela muthukumano wa Wuupuwelela. Nlo nihiku nnuupuwela ahu okhwa wa mutthu nnimphenta ahu vanceene, Yesu Kristu. Ohiya-vo ninnuupuwela ophenta wuulupale Yehova onoonihenrye awe okathi aamurumme awe mwanawe wira orwe okhwe ntoko yowoopola. Eyaakha ela Wuupuwelela onrowa okhala ohiyu wa Namathanu 15 a Abril, a 2022. Ninnimphenta Yehova ni Yesu, tivonto khiivo etthu erina efaita yuulupale ovikana orowela muthukumano wa Wuupuwelela.