1. Olelo-va, etthu xeeni Yehova oniphavela awe?

 OLELO-VA, Muluku oniphavela wira ihapari sooreera sa Omwene silaleiwe elapo yotheene. (Mar. 13:10; 1 Tim. 2:3, 4) Yehova onnivaha efaita yinceene muteko woolaleerya. Nto oomuthanla Mwanawe Yesu Kristu wira ohooleleke muteko woolaleya ihapari sooreera. Nikupaliki ni murima wootheene wira ohooleliwaka ni Yesu, muteko woolaleerya onoovariwa ntoko Yehova oniphavela awe ohinatthi ophiya wanikisa. — Math. 24:14.

2. Mwaha ola, ninrowa othokorerya exeeni?

² Mwaha ola, nnooweha moota Yesu onimuruma awe “murumeyi oororomeleya ni a ankhili” wira onivaheke malakiheryo anikhuma mBiibiliyani ni waatthokiha atthareli a Yesu wira avareke muteko woolaleerya onivariwa olelo-va. (Math. 24:45) Nave nnooweha itthu nikhanle oopaka wira nimukhaliherye Yesu ni murumeyi oororomeleya.

3. Okhulupale xeeni Yesu ovahiwe awe?

³ Yesu onnihoolela muteko woolaleya ihapari sooreera sa Omwene. Masi etthu xeeni ennikupaliha wira Yesu onnihoolela muteko owo? Okathi vakhaani ohinatthi orowa wiirimu, Yesu aahaakhumelela atthareli awe omwaako wa oGalileya. Yesu aalenle so: “Muluku ookivaha okhulupale wotheene, wiirimu ni vathi-va”. Vano nwehe etthu aahimmye awe moottharelana, oriki: “Tivonto, murowe mwawiixuttiheke atthu a ilapo sotheene wira akhale awiixutti aka”. (Math. 28:18, 19) Nto okhulupale Yesu aavahiwe awe waahela muhina ohoolela muteko woolaleya ihapari sooreera.

4. Etthu xeeni ennikupaliha wira Yesu onnihoolela muteko woolaleerya?

 ⁴ Yesu aahihimya wira muteko woolaleya ihapari sooreera ni waapaka awiixutti, waarowa ovariwaka “ilapo sotheene”. Nave aahaaleela awiixutti awe wira aarowa okhala naawo “mahiku otheene mpakha olumwenku ola omala”. (Math. 28:20) Moolumo ala a Yesu, annooniherya wira aarowa ohoolelaka muteko woolaleerya mpakha mahiku ahu ala.

5. Ninrowa okhaliherya sai wiiraneya eprofesia eri Esalimo 110:3?

⁵ Yesu aanisuwela wira wanikisa wa olumwenku ola, yaamukhala atthu anceene yaarowa olaleyaka ihapari sooreera sa omwene ohinatthi olumwenku omala. Eyo yaahihimmwa khalai ene Esalimo 110:3, yeeyo enihimya wira: “Nihiku ninwirelanyu ekhotto awanan’inyu, atthu annothukumanelani votthuna waya”. Yesu aanisuwela oratteene wira eprofesia ela yaamwiiraneya. Akhala wira munnilaleya ihapari sooreera sa Omwene, munnimukhaliherya Yesu ni murumeyi oororomeleya. Nave munnikhaliherya wiiraneya eprofesia ela. Masi, muteko woolaleya ihapari sooreera wookhalana mixankiho.

6. Olelo-va, okathi ninlaleerya ahu, muxankiho xeeni ninkumana ahu?

⁶ Olupatthiwa muxankiho ninkumana ahu okathi ninlaleerya ahu ihapari sooreera. Anamavaanyiha, ahooleli a itiini ni a epoliitika annilavula itthu sowoothiwa voohimya sa muteko ahu woolaleya ihapari sooreera. Pooti wira amusi ahu, atthu nnaasuwela ahu, ale ninvarana ahu muteko ni ninsomana ahu oxikola, anookupali itthu iyo sowoothiwa ni onikhanyererya ohiya omukokhorela Yehova ni ohiya olaleerya. Ilapo sikina, awanani ahu annaahasula, waaruwana, waavara ni waatthukwela mukhatteya anna ni arokora. Okathi itthu iyo siniiraneya aya, hiyo khanintikinihiwa. Mwaha wa xeeni? Mwaha woowi Yesu aahihimya wira “atthu a maloko otheene anrowa woonyokhani mwaha wa nsina naka”. (Math. 24:9) Tthiri itthu iyo sootheene sinnooniherya wira ninnikhaliheriwa ni Yehova Muluku. (Math. 5:11, 12) Satana Diabo toniwiiriha atthu awo onilupattha. Yesu ookhalana owerya wuulupale onvikana Diabo! Nikhaliheriwaka ni Yesu, ihapari sooreera sinnilaleiwa ilapo sootheene. Nrowe niwehe itthu vakhaani sinooniherya eyo.

7. Itthu xeeni sinooniherya wira eprofesia eri Wiisuupulula 14:6, 7, enniiraneya?

⁷ Muxankiho mukina ninkumana ahu okathi ninlaleya ahu ihapari sooreera, okhala wira olumwenku wootheene, annilavuliwa mattaava manceene ni oovirikana. Etthu aamulenle awe murummwa Yohani, Yesu aahooniherya wira mahiku ahu ala, ihapari sooreera saamulaleiwa hata nirina ene muxankiho owo wa mattaava. (Mmusome Wiisuupulula 14:6, 7.) Eyo eniiraneya sai olelo-va? Olelo-va, ihapari sooreera sinnilaleiwa ilapo sinceene ni mattaava oovirikana. Mwa ntakiheryo, esaiti ahu jw.org, atthu anoowerya osoma iliivuru sinimutthokiherya Biibiliya mattaava anivikana 1000! Nave eliivuru Okumi Woohimala!, yeeyo ninrumeela ahu wira niwiixuttihe atthu Biibiliya enniphwanyaneya mattaava anivikana 700! Malakiheryo a mBiibiliyani anniphwanyaneya ntoko iviidiyu sa nttaava ninlavuliwa ni matata ni iliivuru sa ebraile para atthu ahinoona. Nave atthu a mattaava ni “maloko othene” anniixutta ekeekhai ya mBiibiliyani. (Zak. 8:23; Sof. 3:9) Hiyo nookhalana eparakha yuulupale ya oweha eprofesia ntoko ela yiiraneyaka. Itthu iyo sootheene sinnipakiwa nihooleliwaka ni Yesu Kristu.

8. Itthu xeeni muteko woolaleerya onikumiherya aya?

⁸ Olelo-va, atthu anivikana imilyau 8 a ilapo 240 anniirela mpantta mutthenkeso wa Yehova. Nave khula mwaakha atthu anceene annipatisiwa. Mammeru awo, kharina efaita  yinceene, etthu erina efaita yinceene okhala wira awiixutti awo asya anniwara “omutthu wa niinaano”, niire so, awo annikhalana mikhalelo sooloka sa ekristau. (aKol. 3:8-10) Mwa ntakiheryo, atthu anceene aahiya orupihana woohiloka, otakhala murima, nthalu ni wiirela mpantta epoliitika. Eprofesia eri Yesaya 2:4, enniiraneya olelo-va, maana arumeyi a Yehova ‘khaniixutta owana ekhotto’. Okathi nniimananiha ahu owara omutthu wa niinaano, ninnaakhaliherya atthu akina okela mmutthenkesoni mwa Yehova. Nave ninnaakhaliherya woona wira nimmutthara muhooleli ahu, Kristu Yesu. (Yoh. 13:35; 1 Ped. 2:12) Itthu iyo sootheene khahiyo wira sinikhumelela mekhaya paahi. Yesu tonnikhaliherya ovariwa itthu iyo sootheene.

9. Moovarihana ni Matheyo 24:45-47, etthu xeeni Yesu aahimmye awe yaarowa wiiraneya wanikisa?

⁹ Mmusome Matheyo 24:45-47. Yesu aahimmye wira ammuthanla “murumeyi oororomeleya ni a ankhili” aarowa vaavahaka malakiheryo a mBiibiliyani arumeyi a Muluku. Nto mahiku ahu ala, murumeyi owo onnivara muteko munceene. Hiyo ninniweha eyo yiiraneyaka. Mukhulupale ahu Yesu Kristu, onnaaruma alopwana vakhaani oothanliwa wira yaavaheke “yoolya okathi wooreerela” arumeyi a Muluku ni atthu ale aniphavela ihapari sooreera. Masi alopwana awo khahiyo axineene waamini wahu. (2 aKor. 1:24) Ohiya-vo, awo annisuwela wira Yesu Kristu tori “mukhulupale” a arumeyi a Muluku. — Yes. 55:4.

10. Moovarihana ni efootu, eliivuru xeeni yookhalihenryeni wiixutta ekeekhai?

¹⁰ Okhuma mwaakha wa 1919, murumeyi oororomeleya ni ankhili onnipaka iliivuru soovirikana wira aakhaliherye atthu wiixutta ekeekhai ya Nuulumo na Muluku. Mwaakha wa 1921, yaahikumiheriwa eliivuru a A Harpa de Deus, yeeyo yaakhaliherye atthu anceene wiixutta  ekeekhai ya mBiibiliyani. Nuuvira okathi saahipakiwa iliivuru sikina. Eliivuru xeeni yookhalihenryeni wiixutta ekeekhai ni omphenta Yehova? Niireke yaari eliivuru “Seja Deus Verdadeiro”, A Verdade Que Conduz à Vida Eterna, Poderá Viver Para Sempre no Paraíso na Terra, Conhecimento Que Conduz à Vida Eterna, Biibiliya Oniixuttiha Exeeni Tthiri?, Biibiliya Onniixuttiha Exeeni? aahiiso eliivuru ahu esya Okumi Woohimala!? Iliivuru iyo sootheene saapakiwe wira sinikhaliheryeke owiixuttiha atthu ekeekhai ya mBiibiliyani. Khula eliivuru yaakumiheriwe moovarihana ni makhalelo a okathi owo.

11. Xeeni vari aya vooloka ohihiya wiixutta itthu sa mBiibiliyani?

¹¹ Khahiyo paahi atthu a niinaano aahiiso anisiveliwa ekeekhai anireerela omusuwela oratteene Yehova ni Biibiliya. Ootheene ahu nihaana omusuwela oratteene Yehova ni Biibiliya. Murummwa Paulo aalempe so: “Atthu arina waamini woolipa, tanilya yoolya yoolipa”. Nave murummwa Paulo oonikhaliherya woona wira weettela itthu nniixutta ahu sinoonikhaliherya “ovirikanyiha etthu yooloka ni yoohiloka”. (aHeeb. 5:14) Olelo-va, vannixankiha vanceene weettela malamulo a Yehova, mwaha woowi atthu anceene kharina mweettelo wooloka ni annirupihana moohiloka. Yesu onninikhapelela vanceene, maana onninivaha iliivuru sinnikhaliherya olipiha waamini wahu. Nto onnimuruma murumeyi oororomeleya ni ankhili wira onivaheke iliivuru iyo sinimutthokiherya Biibiliya.

12. Nittharaka ntakiheryo na Yesu, ninvuwiha sai nsina na Muluku?

¹² Nittharaka ntakiheryo na Yesu, ninnivuwiha nsina na Muluku. (Yoh. 17:6, 26) Mwa ntakiheryo, mwaakha wa 1931, nittharaka malakiheryo ari Yesaya 43:10-12, nsina nahu ti Anamoona a Yehova. Nto ninniitthaneliwa nsina nlo wira nivuwiheke nsina na Tiithi ahu a wiirimu. Okhuma mweeri wa Outubro a  mwaakha ole, nsina noowaarya na Muluku ninnikhumela ekaapa ya erevista Owehaweha. Nave hata itiini sikina sikumihaka nsina na Muluku aBiibiliya anaataphulela aya, Biibiliya a Elapo Esya ninniphwanyaneya nsina na Muluku mapuro ootheene naari aya Soolempwa soopacerya.

13. Etthu xeeni enookupalihani wira olelo-va Yesu onnimuruma “murumeyi oororomeleya ni a ankhili”? (Yohani 6:68)

¹³ Omurumaka “murumeyi oororomeleya ni a ankhili”, Yesu oopaka valaponi-va mutthenkeso onikumiherya okokhorela weekeekhai. Munoonela sai wiirela mpantta mutthenkeso owo? Woonasa wene, munnuupuwela moolumo a murummwa Pedru, yoowo aamulenle Yesu wira: “Pwiya, ninrowa omutthara pani? Ti nyuwo murina moolumo a okumi woohimala”. (Yoh. 6:68) Naarowa okhala sai olelo-va, waahaakhanle mutthenkeso wa Yehova? Orumeelaka mutthenkeso owo, Yesu onninivaha malakiheryo anikhuma mBiibiliyani. Nave onniniixuttiha moota woovara oratteene muteko ahu woolaleya ihapari sooreera sa Omwene. Ohiya-vo, owo onninikhaliherya ‘owara omutthu musya’ wira nimusiveliheke Yehova Muluku. — aEef. 4:24.

14. Malakiheryo nivahiwe ahu ni mutthenkeso wa Yehova okathi wa koronaviiru, anikhalihenrye sai?

¹⁴ Yesu onninivaha malakiheryo ooloka okathi wa mixankiho. Eyo yaahooneya oratteene okathi yaapacenrye aya eretta ya koronaviiru aahiiso COVID-19. Hata atthu anceene a molumwenkuni yahaasuwela etthu yoopaka, Yesu aahinivaha malakiheryo ooloka orumeelaka mutthenkeso wa Muluku. Hiyo naahitumereriwa onwara maskara mapuro oowaatta atthu ni orakamelana ni atthu akina wira noopole okumi ahu. Nave axitokweene yaahitumereriwa  omakela olavula, niire so, waalikarela anamalaleerya ootheene wira asuwele makhalelo a okumi aya ni waakhaliherya ohihiya olipiha ompatthani aya ni Yehova. (Yes. 32:1, 2) Nave irelatoorio sa Nikhuuru Noolamulela saakumiheriwa khula mweeri saahinivaha malakiheryo ooloka ni saaninlipiha vanceene.

15. Malakiheryo xeeni naavahiwe ahu okathi wa koronaviiru a moota woopaka mithukumano ni olaleerya? Itthu xeeni sooloka sikhumelenle?

¹⁵ Okathi wa koronaviiru, naahivahiwa malakiheryo a moota woohihiya opaka mithukumano sa mmulokoni ni ohihiya olaleerya. Okathi vakhaani paahi naahipacerya opaka mithukumano sahu, waapaka asembeleya ni akonkresu nirumeelaka videoconferência. Moohipisa naahipacerya olaleerya nimurumeelaka telefoni ni ikarta paahi. Nto Yehova onnireeliha vanceene wiimananiha wahu. Ifiliyaali sinceene sa olumwenku wootheene sinnihimya wuncerereya wa anamalaleerya. Anna ni arokora anceene, anoowerya ohimya itthu sooreera ni soohakalaliha okathi ola wa koronaviru. — Nwehe ekaaxa eni: “ Yehova Onnireeleiha Muteko Woolaleerya”.

16. Etthu xeeni ninreerela ahu okupali?

¹⁶ Atthu akina pooti wuupuwelaka wira mutthenkeso wa Yehova onnitepana ovaha malakiheryo okathi wa koronaviiru. Masi khula okathi, vannooneya oratteene wira mutthenkeso wa Yehova onnivaha malakiheryo a ankhili ni ootepa oloka. (Math. 11:19) Okathi nnuupuwela ahu enamuna yoophenta ni ya ankhili Yesu onaahoolelawe atthu awe, ninnikupali ni murima wootheene wira moohicikha etthu enrowa onikhumelela muhoolo, Yehova ni Yesu anrowa okhala ni hiyo. — Mmusome aHeeberi 13:5, 6.

17. Nyuwo munoonela sai ohooleliwa ni Yesu?

¹⁷ Ninnihakalala vanceene ohooleliwa ni Yesu Kristu. Hiyo nniirela mpantta mutthenkeso ohikawanyeyale mwaha wa elapo, eraasa aahiiso mattaava. Ninnivahiwa malakiheryo ooloka anikhuma Nuulumo na Muluku, Biibiliya ni ninniixuttihiwa moota woovara oratteene muteko ahu woolaleerya. Nave khula mmosa a hiyo onniixuttihiwa ni okhaliheriwa moota woowara omutthu wa niinaano ni moota woophentana mukina ni mukhwaawe. Tthiri nookhalana mathowa ooloka a ohakalala mwaha woohooleliwaka ni Yesu Kristu.