Ootheene ahu ninkhalana okathi vakhaani wiira nipake yoosoma ahu ya omwaneene. Exeeni ninreerela ahu opaka, wiira nirumeele saana okathi ahu? Yoopacerya, muhisomeke mwaakuveyasaka. Tthiri ti vooreera osoma itthu vakhaani ni ephoole, ovikana osoma itthu sinceene mwaakuveyasaka.

Muthanleke etthu munrowa anyu opacerya osoma. (aEef. 5:15, 16) Nwehe malakiheryo anittharelana:

• Mmusomeke Biibiliya khula nihiku. (Esal. 1:2) Nyuwo pooti opacerya osoma muttharaka eprograma ya omusoma Biibiliya ya mithukumano sa eriyari ya esumana.

• Mulokiheryeke yoosoma ya Owehaweha ni mithukumano sa eriyari ya esumana. Mmananiheke wiilokiherya saana, wiira mwaweryeke okomentari. — Esal. 22:23.

• Vakhala wiira munnikhalana okathi, xontte mmananiheke osoma ni oweha iliivuru ni iviidiyu sinikumiheriwa ni mutthenkeso ahu. Mwa ntakiheryo, irevista siniroiheliwa atthu ootheene, iviidiyu ni myaha sinikumiheriwa musaitini jw.org.

• Musomeke myaha sinoovarani murima. Vakhala wiira ohoophwanyani muxankiho, nyuwo pooti osoma myaha sinlavula muxankiho owo. Nave vakhala wiira yookhala eponto ya mbiibiliyani yootikininheni, nave munaphavela wiiwexexa saana, nyuwo pooti otokosa mwaha owo. Wiira musuwele itthu sikina, nwehe epantta eni “Exercícios Bíblicos” eri musaitini jw.org.