1. Mwa enamuna xeeni makristau anilikana aya ni mwiri woowaakuva oputtheya? (Nwehe efootu.)

 ATTHU akina anihimya wiira: “Mwiri woowakuva oputtheya, ovila wuntiwa ni epheyo”. Okathi mwiri owo oniputtheya awe, yavira epheyo owo onnaakuva ovenya. Moolikanasa ni mwiri owo, wiira nimurumeele Yehova moohakalala nihaana waakuvaka ovenya okathi siniphwanya aya mixankiho. Exeeni enrowa onikhaliherya opaka eyo? Nihaana ovilelaka okathi sinniphwanya aya mixankiho ni ottittimihaka miyoonelo sa atthu akina.

2. a) Mikhalelo xeeni sinrowa onikhaliherya olimalela makhalelo masya? b) Mwaha ola ninrowa othokorerya exeeni?

² Okhala wiira na arumeyi a Yehova, nihaana ohithipelelaka moonelo ahu. Nave nihaana okhala oowiiyeviha ni ooreera murima. Mwaha ola, nnooweha moota mikhalelo iyo saakhaliherya aya makristau olimalela makhalelo masya. Nave, nnooweha moota mikhalelo iyo sinrowa aya onikhaliherya. Masi wanipacerya, nrowe niwehe etthu nniixutta ahu ni Yehova vamosa ni Yesu yaawo ari matakiheryo ooloka a ohithipelela moonelo aya.

3. Ninsuwela sai wiira Yehova khonithipelela moonelo awe?

³ Yehova onniitthaniwa okhala “Mwala” okhala wiira toolipa ni khonittikinyeya. (Otum. 32:4 NWT.) Masi hata vari siiso, owo khonithipelela moonelo awe. Makhalelo a mulaponi anniturukeya moowakuveya, masi eyo khenimuxankiha Yehova, okhala wiira onoopaka itthu sootheene oleihenrye awe. Yehova ohaapattuxa apinaatamu iilikanyihaka mmansawe, nto ti nthowa naya awo anwerya aya otakiha mikhalelo sawe ntoko waakuva wiilimaleliha makhalelo masya. Mbiibiliyani ninniphwanya malakiheryo yaawo annikhaliherya opaka soothanla sooloka hata siniphwanyaka mixankiho.  Tthiri malakiheryo ootheene ari mbiibiliyani, anninikhaliherya woona wiira nnaamwi Yehova ori ene “Mwala”, owo khahiyo mutthu oothipelela.

4. Nvahe ntakiheryo nnooniherya wiira Yehova khonithipelela moonelo awe. (Onamukuttho 5:7, 11.)

⁴ Itthu sootheene Yehova onipaka awe ti sooloka ni sinnooniherya wiira onnaathokorerya saana atthu akina. Nave owo khonaakhanyererya apinaatamu opaka itthu ahiniwerya aya. Mwa ntakiheryo, nrowe niwehe moota Yehova aathokorerya awe aisarayeli. Yehova khaavekenle wiira avaheke mikuttho soolikana, maana akina yaari ohaawa nave akina yaari othaaciri. Masi Yehova aahiweemererya wiira avaheke mikuttho moovarihana ni makhalelo aya. — Mmusome Onamukuttho 5:7, 11.

5. Nvahe ntakiheryo nnooniherya moota Yehova oonihenrya awe wiiyeviha ni othunku.

⁵ Yehova khahiyo Muluku oothipelela, okhala wiira owo toowiiyeviha ni ta othunku. Mwa ntakiheryo, Yehova aahooniherya wiiyeviha okathi yoole aaphavela awe opwetexa epooma ya oSodoma. Ohinatthi opwetexa epooma ele, Yehova aahiruma malaikha awe wiira yamuhimeerye naxariya Lothi, wiira otthyawele muttetthe wa omiyaakoni. Masi okhala wiira Lothi aanoova, owo khaaphavenle otthyawela muttetthe ole. Lothi aahivekela wiira yena ni emusi awe atthyawele muttetthe mwaamukhaani wa oSowari, weiwo-tho Yehova aaphavela awe opwetexa. Niireke Yehova aahimukhanyererya Lothi wiira iiwelele malakiheryo ale avahiwa awe ni malaikha? Nnaari. Moowiiyeviha Yehova aahimweemererya otthyawela muttetthe ole wa oSowari ni khaapwetenxe. (Maph. 19:18-22) Muhoolo mwaya, Yehova aahiwooniherya othunku atthu yaakhala epooma ya oNiinive. Yehova aahimuruma profeta Yona wiira aalopole atthu ootakhala murima yaakhala epooma ele wiira yaampwetexiwa. Masi nuumala atthu ale ottharuwa itthu soohiloka yaapaka aya, Yehova aahiwoonela othunku ni khaapwetenxe. — Yona 3:1, 10; 4:10, 11.

6. Nvahe matakiheryo anooniherya wiira Yesu aanimutakiha Yehova ohikhala mutthu oothipelela.

⁶ Omutakihaka Yehova, Yesu aanaathokorerya saana atthu akina. Yesu aahirummwa orwa valaponi wiira aalaleerye ‘atthu aisarayeli paahi, yaawo yaari ntoko ipwittipwitthi saarimenle’. Okhala wiira Yesu aanaathokorerya saana atthu akina, eyo yaahimwiiriha ohiya waalaleerya atthu aarummwale awe paahi, masi aahaalaleerya ale yahaakhanle aisarayeli. Mwa ntakiheryo, ekwaha emosa muthiyana yoowo ahaakhanle mwisarayeli, aahinvekela Yesu wiira ampenuxe mwaana awe mwaamuthiyana yoowo ‘aahaawa vanceene mwaha wa nlaikha nootakhala nanvanre’. Yesu aahimoonela othunku muthiyana ole ni aahimpenuxa mwaana owo. (Math. 15:21-28) Nrowe niwehe ntakiheryo nikina. Wanipacerya wa muteko awe woolaleerya valaponi, Yesu ahimye so: “Ole onikikhootta . . . , nave-tho miyo kinoomukhootta”. (Math. 10:33) Masi Pedru aahimukhootta Yesu ikwaha tthaaru. Niireke Yesu aahimukhootta Pedru? Nnaari. Yesu anisuwela wiira Pedru aahittharuwa ni ari mutthu oororomeleya. Nuumala Yesu ohihimuxiwa, owo aahitthikela okumana ni Pedru ni aahimuleela  wiira aahimulevelela ni aanimphenta. — Luka 24:33, 34.

7. Moovarihana ni aFilipi 4:5, nimphavela wiira atthu akina anooneleke sai?

⁷ Mpakha-va, nihiixutta wiira Yehova ni Yesu khahiyo atthu oothipelela. Ankhi hiyo, niireke ninnimutakiha Yehova ni Yesu ohikhala atthu oothipelela? Tthiri Yehova oniphavela wiira nimutakiheke. (Mmusome aFilipi 4:5.) Mwiikoheke so: ‘Kiireke atthu akina annikisuwela ntoko mutthu onaathokorerya saana atthu akina, ooleva ni nkinaakhanyererya atthu akina moonelo aka? Kiireke atthu anikisuwela okhala mutthu oothipelela? Kiireke nkinaakhanyererya atthu wiira apakeke itthu mwa enamuna kinoona aka okhala yooloka? Kiireke kinniiwelela ni otthara miyoonelo sa atthu akina?’ Wiikoha makoho ala, anoonikhaliherya woona akhala wiira ninnimutakiha Yehova ni Yesu. Nrowe niwehe ipantta piili ninreerela ahu ohikhala atthu oothipelela. Yoopacerya, okathi makhalelo ahu aniturukeya aya. Ya nenli, okathi moonelo ahu ni soothanla sahu sinivirikana aya ni sa akina.

8. Itthu xeeni sinrowa onikhaliherya ohithipelela moonelo ahu hata makhalelo ahu aturukeyaka? (Nwehe enoota.)

⁸ Hata makhalelo ahu aturukeyaka, nihaana ohithipelela itthu sa khalai ni waakuva wiilimaleliha makhalelo masya. Nto oturukeya iwo wa makhalelo ahu, pooti oniphwanyihaka mixankiho nahaalipelela ahu. Mwa ntakiheryo, hiyo pooti oniphwanyaka oretta mootutuxerya, othoiwa musurukhu, aahiiso oniphwanya mixankiho sinikumiheriwa ni ahooleli a mulaponi. (Mus. 9:11; 1 aKor. 7:31) Ikwaha sikina, pooti onixankiha okathi mutthenkeso wa Yehova onnivekela awe othaamela mapuro makina aahiiso onituruka awe yoothanleliwa ahu. Moohicikha etthu eniiraneya, vanniweryaneya olimalela makhalelo masya. Masi ninrowa owerya sai opaka eyo? Nnoowerya akhala wiira nnimwiimananiha opaka itthu 4 sinittharelana: (1) Npakeke itthu moovarihana ni makhalelo anyu aniinaano, (2) muhuupuweleleke itthu siiraneyale khalai, (3) muupuweleleke itthu sooloka murina anyu aahiiso muniwerya anyu opaka, ni (4) mwaakhaliheryeke atthu akina. b Nrowe niwehe moota itthu iyo saakhalihenrya aya anna ni arokora ni mireerelo aphwannye aya.

9. Moota xeeni anamathelana ale mamisionaario yaawenrye aya ovilela mixankiho saaphwannye mootutuxerya?

⁹ Mpakeke itthu moovarihana ni makhalelo anyu aniinaano. Emanuele ni Francesca yaahivekeliwa orumeela ntoko mamisionaario elapo ekina. Nto nuumala ophiya, yaahipacerya wiixutta nttaava nsya ni waasuwela anna ni arokora, masi moohipisa oretta wa koronaviiru waahipacerya. Awo yahaana ohikhuma owaani. Nave mootutuxerya, maama awe Francesca aahikhwa. Nto Francesca aaniphavela orowa okhala ni amusi awe okathi ole wooxankiha, masi mwaha wa oretta ole wa koronaviiru khivaaweryaneya. Exeeni yaamukhalihenrye Francesca ni iyawe ovilela muxankiho ole? Etthu yoopacerya yaakhaliherye, waari onvekela Yehova miruku wiira aakhaliherye ovilela khula nihiku. Nto Yehova aahaakhula mavekelo aya aavahaka iliivuru okathi wooreerela saakhaliherya olipiha ompatthani aya ni yena. Mwa ntakiheryo, okathi yaaweha aya eviidiyu, awo yaahilipihiwa ni moolumo yaalavuliwe ni munna mmosa. Munna owo ahimmye so: “Okathi nnaakuva ahu olimalela makhalelo masya, vannikhweya hiyo otthikela ohakalala. Nave nnimwiixuttaka itthu sooloka ni makhalelo ahu awo masya”. c Ya nenli, awo  yaaniwerya olokiherya inamuna saya isya soolaleerya amurumeelaka telefoni, nave yaahiwerya opaceriha soosoma sa Biibiliya. Ya neeraru, awo yaaneemya olipihiwa ni anna ni arokora a muloko ole ni yaanixukhurela nikhaliheryo naya. Mwa ntakiheryo, murokora mmosa oreera murima aaniwinviyarela soolepa sa mbiibiliyani omurumeelaka telefoni nto aahipaka eyo eyaakha ntero. Nave akhala wiira nnimweemererya makhalelo masya ni wiilimaleliha makhalelo awo, hiyo nnoohakalalaka mwaha woopaka ele ninwerya ahu moovarihana ni makhalelo ahu.

10. Murokora Christina, aawenrye sai wiilimaleliha makhalelo masya?

¹⁰ Nwehexexeke itthu sooloka sa muhoolo. Murokora mmosa oniitthaniwa Christina a oRomênia, masi onikhala oJapão, aahiriipiwa murima vanceene okathi waahiiwale aya opakiwa mithukumano muloko wa enkelexi. Masi yena khaamakela wuupuwelela etthu ele yaakhumelenle. Ohiya-vo, owo aanirowela mithukumano muloko wa nttaava na ejaponês, nave aniimananiha vanceene olavula nttaava nlo. Nto, wiira omukhaliherye olavula saana ejaponês, owo ahinvekela muthiyana aavarana awe muteko wiira omwiixuttiheke. Muthiyana owo aaheemererya omurumeela Biibiliya ni ebroxuura Okumi Woohimala!, wiira omwiixuttiheke Christina nttava nne. Masi muhoolo mwaya, ohiya paahi murokora Christina wiixutta nttaava na ejaponês, mpatthani awe ole aahipacerya osiveliwa eekeekhai. Tthiri vaavo nnuupuwelela ahu itthu sooloka sa muhoolo, hata aniphwanyaka marukunuxo mootutuxerya, ninniphwanya mareeliho nahaalipelela ahu.

11. Munna mmosa ni mwaara awe, yaawenrye sai ovilela muxankiho wa othoiwa musurukhu?

¹¹ Mwaakhaliheryeke atthu akina. Anamathelana yaawo anikhala elapo muteko ahu onikhoottihiwa aya, yahipacerya othoiwa musurukhu okathi elapo ele yaarina aya muxankiho wa othowa musurukhu. Anamathelana ale yaawenrye sai olimalela makhalelo ale? Etthu yoopacerya yaakhalihenrye waari okhweiherya okumi aya, eyo piiyo, ovukula itthu soothuma. Etthu ya nenli, awo khiyaawehexexa muxankiho ole, masi yaaniimananiha oviriha okathi munceene alaleeryaka. (Mit. 20:35) Munna ole onihimya so: “Oluttuweliwa muteko woolaleerya, waahinikhaliherya opakaka itthu Muluku oniphavela awe, ohiya owehexexaka muxankiho ole”. Nto okathi makhalelo ahu aniturukeya aya, nihiliyale wiira etthu yooreerela opaka ori waakhaliherya atthu akina, otepexa wene naalaleeryaka.

12. Ntakiheryo na murummwa Paulo ninnikhaliherya sai olokiherya inamuna sahu soolaleerya?

¹² Nihaana okhala atthu oowiixaakuviha okathi ninlaleerya ahu. Maana okathi owo, ninnaaphwanya atthu a ilapo soovirikana, a makhalelo ovirikana ni arina soolema soovirikana. Murummwa Paulo aari mutthu owaakuva wiilimaleliha makhalelo, nto hiyo nnoowerya wiixutta etthu ni ntakiheryo nawe. Yesu ahimuthanla Paulo wiira okhale murummwa a “atthu ahikhanle ayuda”. (aRom. 11:13) Nto Paulo anaalaleerya ayuda, akereku, atthu oosoma ni ohisoma, makhulupale ni mamwene. Wiira Paulo aavare murima atthu ale, owo aahipaka ‘itthu sootheene wiira aakhaliherye atthu a maloko ootheene’. (1 aKor. 9:19-23) Nave Paulo aanisuwela mapuro yaakhuma aya ni soolema saya, nto eyo yaanimukhaliherya olokiherya inamuna sawe soolaleerya. Nave hiyo nnoowerya waavara murima ale nnaalaleerya ahu, akhala wiira nnoosuwela makhalelo aya ni wiihela nipuro naya.

13. Ephoole xeeni eri 1 aKorinto 8:9, ninreerela ahu osyaka, wiira nttittimihe moonelo wa atthu akina?

¹³ Ohikhala atthu oothipelela, onoonikhaliherya ottittimiha miyoonelo sa atthu akina. Mwa ntakiheryo, arokora akina waasivela wootta makeyaxe, masi akina nnaari. Nave anna  akina annithanla owurya eviinyu ni ephoole, masi akina khaniphavela nnakhala olawiha. Tthiri ootheene ahu ninniphavela okhalana okumi wooloka, masi khula mutthu onniphavelasa inamuna sa moota wookhapelela saana okumi awe. Nto akhala wiira nnoowehexexaka moonelo ahu ni owiiriha akina opaka itthu mwa enamuna nimphavela ahu, pooti waakwattuliha atthu awo ni wiiriha okawanyeya mmulokoni. Hiyo khanimphavela wiira eyo yiiraneye! (Mmusome 1 aKorinto 8:9; 10:23, 24.) Nrowe niwehe ipantta piili sinooniherya wiira navarihela muteko malakiheryo a mbiibiliyani, nnoowerya opakaka itthu mwa enamuna yooloka ni okumiherya murettele.

14. Exeeni ninreerela ahu wuupuwelelaka Okathi ninthanla ahu moota woowara ni wiitthokiha?

¹⁴ Ikuwo ni ikharari sahu. Yehova khonivanhe malamulo a moota woowiitthokiha, masi oonivaha malakiheryo nikhanle ahu ootthara. Nto nihaana owara mwa enamuna eninvuwiha Muluku, nihikhalaka atthu oothipelela, nave nihaana wiitthokiha vookhalela ni “voohuliha muru”. (1 Tim. 2:9, 10; 1 Ped. 3:3) Hiyo khanimphavela wiira atthu akina aniwehexexeke mwaha wa mawarelo ahu. Malakiheryo a mbiibiliyani pooti waakhaliherya axitokweene, ohivaha malamulo a moota woowara ni wiitthokiha. Nrowe nivahe ntakiheryo na axitokweene aniphavela waakhaliherya anna amiravo, yaawo ammettha ikharari saya yaatakihaka amiravo akina a mulaponi. Axitokweene awo yaarowa waakhaliherya sai anna awo voohipaka malamulo? Mutokweene a esirkwitu onnaavaha miruku iya axitokweene awo a mmulokoni: “Vakhala wiira muri opalkuni, anna ohiya ovaha ephoole ele munihimya anyu, masi anavaha ephoole moota nwanre anyu ni moota mwiitthokinhe anyu, eyo enooniherya wiira yookhala ehilonke”. Moolumo ala ookhweya aakhaliherya ophuka mwaha ola, masi voohipaka nlamulo. d

15. Malamulo xeeni ni malakiheryo ari mbiibiliyani, anrowa onikhaliherya okathi woothanla enamuna ya okhapelela okumi ahu? (aRoma 14:5.)

 ¹⁵ Okhapelela okumi. Khula mukristau ohaana othanla moota onrowa awe okhapelelaka okumi awe. (aGal. 6:5) Okathi mukristau onithanla awe moota wookhapelela okumi awe, malamulo a mbiibiliyani onireerela awe wuupuwelela paahi taale anlavula sa okhootta ephome ni onammunepani. (Mit. 15:20; aGal. 5:19, 20) Ohiya malamulo awo ari mbiibiliyani, khula mukristau pooti othanla enamuna omphavela awe wiira olooliwe. Anna akina amphavela olooliwa ospitaali paahi, masi aakhala anna akina anithanla inamuna sikina sa olooliwa. Hiyo nihaana ottittimiha khula enamuna ya olooliwa munna onithanla awe, hata neemereryaka wala niheemererya aka. Etthu enrowa onikhaliherya ori wuupuwelela iponto iya sinittharelana: (1) Omwene wa Muluku paahi tonrowa openuxa moomalela iretta sootheene. (Yes. 33:24) (2) Khula mukristau ohaana ‘wiikupaliha’ mmansawe etthu enrowa omukhaliherya. (Mmusome aRoma 14:5.) (3) Nihaaphukeleke atthu akina mwaha wa soothanla anipaka aya, nnakhala nihipake etthu enrowa ovukula waamini waya. (aRom. 14:13) (4) Makristau anniphentana, nave aasuwela wiira wiiraana wa mmulokoni teri etthu ya faita yuulupale ovikana miyuupuwelo saya. (aRom. 14:15, 19, 20) Vakhala wiira nnimuupuwelela iponto iya, nnookhalana ompatthani woolipa ni anna ni arokora, nave nnookhaliherya wiiraana mmulokoni.

16. Axitokweene anrowa wooniherya sai wiira khanithipelela muupuwelo aya okathi anikhala aya ni axitokweene akina? (Nwehe ifootu.)

¹⁶ Axitokweene, ahaana ovaha ntakiheryo na atthu aniiwa miyuupuwelo sa atthu akina. (1 Tim. 3:2, 3) Mwa ntakiheryo, mutokweene ohilipeleleke wiira khula okathi miyoonelo sawe sinimwiiweleliwaka, okhala wiira owo muulupale waavikana axitokweene akina. Osuweleke wiira munepa wa Yehova pooti omurumeela khula mutokweene, wiira ovahe moonelo onrowa okhaliherya opakiwa yoothanla yooloka. Nave vakhala wiira axitokweene anceene anniiwanana othanla opaka etthu emosa ehinihonona malakiheryo a mbiibiliyani, mutokweene ohinithipelela muupuwelo awe, onookhaliherya yoothanla eyo, nnaamwi aarina moonelo woovirikana.

17. Mireerelo xeeni mutthu oniphwanya awe mwaha woohithipelalaka moonelo awe?

¹⁷ Makristau ahinithipelela muupuwelo aya annaakhela mareeliho manceene. Mwa ntakiheryo, ninnikhalana ompatthani woolipa ni anna ni arokora, nto eyo eniiriha okhala murettele mmulokoni. Ninnihakalala mwaha wookhalana eparakha ya waasuwela atthu a makhalelo oovirikana, nave ti vooreera oweha wiira hata nivirikanne ene vanceene, ootheene ahu nimmukokhorela Yehova mowiiraana. Nave etthu yootepa okhalana efaita, ori ohakalala ninkhalana ahu mwaha woosuwela wiira ninnimutakiha Yehova, yoowo ohinithipelela etthu.